TI PANAGDANAG ket mangpadagsen iti pusotayo. (Prov. 12:25) Adda kadin nakaro a nagdandanagam iti biagmo? Nariknam kadi a saanmon a kaya nga ibturan dayta? No wen, saan la a sika ti kasta. Adu kadatayo ti nagdanag, nadepres, ken nabannog gapu iti nadumaduma a rason. Kas pagarigan, dadduma ti nangaywan iti masakit a kapamilia, natayan iti ay-ayaten, ken biktima ti natural a didigra. Ngem ania dagiti aramidentayo tapno malabanantayo ti panagdanag? a

No adalentayo ti kapadasan ni Ari David, nagadu ti masursurotayo maipapan iti pananglaban iti panagdanag. Napasaranna ti adu a rigat, ken adda dagiti tiempo a nagpeggad pay ketdi ti biagna. (1 Sam. 17:34, 35; 18:10, 11) Ania dagiti inaramid ni David tapno malabananna ti panagdanag? Kasanotayo a matulad?

Naggigiddan ti adu a problema ni David. Kas pagarigan, panunotem ti napasamak idi itartarayanna ni Ari Saul a mayat a mangpatay kenkuana. Idi nagawid ni David ken dagiti tattaona manipud iti maysa a kampania militar, nakigtotda idi nasangpetanda a tinakaw dagiti kabusor dagiti sanikuada, pinuoranda ti balbalayda, ken naipanaw dagiti kapamiliada. Ania ti reaksion ni David? “Nagsangit ni David ken dagiti tattaona iti nakapigpigsa agingga nga awanen ti nabati a pigsada nga agsangit.” Nanayonan pay ti rigat ni David idi “kayat nga uboren” isuna dagiti tattao a talkenna. (1 Sam. 30:1-6) Tallo ngaruden ti nadagsen ken aggigiddan a problema ni David: Agpegpeggad ti pamiliana, mabutbuteng ta baka patayen isuna dagiti tattaona, ken itartarayanna pay laeng ni Ari Saul. Permi la ketdi idi ti danag ni David!

Ania ti simmaruno nga inaramid ni David? Dagus a pinapigsana ti bagina iti tulong “ni Jehova a Diosna.” Kasano? Kanayon a nagkararag ni David tapno agpatulong ken Jehova ken kanayon nga inutobna dagiti napalabas a panangtultulongna kenkuana. (1 Sam. 17:37; Sal. 18:2, 6) Ammo ni David a masapul nga agpaiwanwan ken Jehova. Gapu iti dayta, dinamagna ken Jehova no ania ti rumbeng nga aramidenna. Idi naammuan ni David ti sungbat ni Jehova, dagus nga inaramidna dayta. Kas resultana, binendisionan ni Jehova ni David ken dagiti tattaona ket napasublida dagiti pamiliada ken dagiti sanikuada. (1 Sam. 30:7-9, 18, 19) Ania ti tallo nga inaramid ni David? Nagkararag ken Jehova tapno agpatulong, inutobna dagiti napalabas a panangtultulong kenkuana ni Jehova, ken nagtignay sigun iti imbaga ni Jehova. Kasanotayo a matulad ni David? Kitaentayo ti tallo a pamay-an.

1. Agkararag. Kada mangrugin nga agdanagtayo, ikararagtayo ken Jehova a tulongannatayo ken ikkannatayo iti sirib. Lumag-an ken sumayaat ti riknatayo no ibagatayo kenkuana ti amin a pagdandanagantayo. Wenno mabalin nga agkararagtayo iti naulimek ken ababa no dayta laeng ti ipalubos ti situasiontayo. Kada agpatulongtayo ken Jehova, tultuladentayo daytoy a panagtalek ni David: “Ni Jehova ti dakkel a bato a paglemmengak ken natalged a pagkamangak ken Mangispal kaniak. Ti Diosko ti dakkel a bato a pagkamangak.” (Sal. 18:2) Talaga kadi a makatulong ti kararag? Imbaga ti maysa a payunir a ni Kahlia: “Kalpasan nga agkararagak, agkalman ti riknak.  Tultulongannak ti kararag tapno maitunosko ti panagpampanunotko iti panagpampanunot ni Jehova, isu a lallalo nga agtaltalekak kenkuana.” Talaga a nabileg ti kararag nga inregalo ni Jehova kadatayo tapno malabanantayo ti panagdanag.

2. Agutob. No lagipem ti napalabas, adda kadi dagiti pannubok a naibturam laeng gapu iti tulong ni Jehova? No panunotentayo no kasano ti panangtulong ni Jehova kadatayo ken kadagiti nagkauna nga adipenna, ad-adda nga agkalma ti riknatayo ken lallalo nga agtalektayo kenkuana. (Sal. 18:17-19) “Adda listaak dagiti nasungbatanen a kararagko,” imbaga ti panglakayen a ni Joshua. “Nakatulong dayta tapno malagipko dagiti tiempo nga adda espesipiko a kiniddawko ken Jehova ket intedna ti eksakto a kasapulak.” Wen, no panunotentayo dagiti naaramidanen ni Jehova para kadatayo, bumilegtayo manen a manglaban iti panagdanag.

3. Agtignay. Sakbay nga agdesisiontayo no ania ti aramidentayo iti maysa a situasion, birokentayo iti Sao ti Dios ti mapangnamnamaan unay a panangiwanwan. (Sal. 19:7, 11) Nakita ti adu a no ag-research-da maipapan iti maysa a teksto, mas maawatanda no kasano nga agaplikar dayta iti biagda. Imbaga ti panglakayen a ni Jarrod: “Matulongannak ti panag-research tapno maawatak ti kaipapanan ti maysa a teksto ken matarusak ti ibagbaga ni Jehova kaniak. Maipapusok no kua dayta isu a makapagtignayak maitunos iti panangiwanwanna.” No ammuentayo ti panangidalan ni Jehova manipud iti Biblia ken surotentayo dayta, nalaklakatayo a labanan ti panagdanag.

Naawatan ni David a tapno malabananna ti panagdanag, kasapulanna ti tulong ni Jehova. Kasta unay ti panangapresiarna iti tulong ni Jehova isu a naibagana: “Babaen ti pannakabalin ti Dios, malagtok ti pader. Ti pudno a Dios ti mangkawes kaniak iti bileg.” (Sal. 18:29, 32) Mabalin a mariknatayo a dagiti problematayo ket kas kadagiti nakangatngato a pader. Ngem iti tulong ni Jehova, malagtotayo ti aniaman nga arig pader a problematayo! Wen, no ikararagtayo ti tulong ni Jehova, utobentayo ti amin nga inaramidnan para kadatayo, ken agtignaytayo maitunos iti panangiwanwanna, makapagtalektayo nga ikkannatayo iti bileg ken sirib a kasapulan tapno malabanantayo dagiti pagdandanagantayo!