1. Idi asidegen a matay ni apostol Pedro, ania ti impaisurat kenkuana ti Dios?

 ADU a tawen a simamatalek a nagserbi ni apostol Pedro ken Jehova. Nakikadua ken Jesus iti panangasaba, rinugianna a kinasabaan dagiti saan a Judio, ken idi agangay, nagbalin a miembro ti bagi a manarawidwid. Idi ammona nga asidegen ti ipapatayna, adda impaaramid kenkuana ti Dios. Idi agarup 62-64 C.E., insuratna ti dua a libro ti Biblia—ti 1 ken 2 Pedro. Ninamnamana a makatulong kadagiti Kristiano dagita a suratna kalpasan ti ipapatayna.—2 Ped. 1:​12-15.

2. Apay a naintiempuan unay idi dagiti surat ni Pedro?

² Idi pinutar ni Pedro dagiti impaisurat kenkuana ti Dios, dagiti kapammatianna ket ‘agsagsagaba iti nagduduma a pakasuotan.’ (1 Ped. 1:6) Padpadasen idi dagiti dakes a tattao ti mangiserrek iti kongregasion kadagiti ulbod a sursuro ken naalas a kababalin. (2 Ped. 2:​1, 2, 14) Asideg idin a mapasaran dagiti Kristiano nga agnanaed idiay Jerusalem ti “panungpalan ti amin a banag”—ti panangdadael dagiti armada ti Roma iti dayta a siudad ken kadagiti Judio a sistema ti bambanag. (1 Ped. 4:7) Sigurado a nakatulong kadagiti Kristiano dagiti insurat ni Pedro tapno maammuanda dagiti masapul nga aramidenda. Iti kasta, maibturanda dagiti agdama idi a suot ken masaganaanda dagiti dumtengto pay. b

3. Apay a masapul nga adalentayo dagiti impaisurat ti Dios ken Pedro?

³ Dagiti surat ni Pedro ket para kadagiti Kristiano idi umuna a siglo. Ngem innayon latta ni Jehova dagita iti Saona tapno pakagunggonaantayo. (Roma 15:4) Agbibiagtayo ita iti lubong a nasaknap dagiti narugit nga aramid. Mapaspasarantayo met  dagiti suot isu a saan a kaskarina ti agserbi ken Jehova. Asideg metten a mapasarantayo ti rigat a nakarkaro ngem iti rigat a namagpatingga kadagiti Judio a sistema. Adda dagiti napateg a palagip iti dua a surat ni Pedro. Dagita ti makatulong tapno itultuloytayo nga urayen ti aldaw ni Jehova, saantayo nga agbuteng iti tao, ken itultuloytayo a paunegen ti ayattayo iti maysa ken maysa. Makatulong met dagita a palagip tapno sibaballigi a maasikaso dagiti panglakayen dagiti kasapulan ti arban.

4. Kas ipakita ti 2 Pedro 3:​3, 4, ania ti mabalin a mangpakapuy iti pammatitayo?

⁴ Adu ita ti saan a mamati kadagiti padto ti Biblia. Mabalin nga uyawendatayo dagiti bumusbusor ta nabayagen nga ur-urayentayo ti panungpalan. Adda dagiti kritiko a mangibagbaga a saanto a pulos a dumteng dayta. (Basaen ti 2 Pedro 3:​3, 4.) No kasta ti mangngegtayo kadagiti kaskasabaantayo, katrabahuan, wenno kapamiliatayo, mabalin a kumapuy ti pammatitayo. Inlawlawag ni Pedro ti makatulong kadatayo.

5. Ania ti makatulong tapno siaanus nga urayentayo ti panungpalan? (2 Pedro 3:​8, 9)

⁵ Baka pampanunoten ti dadduma nga itantantan ni Jehova ti panagpatingga daytoy agdama a dakes a sistema. Makatulong dagiti imbaga ni Pedro tapno siaanus nga urayentayo ti panungpalan. Dagita ti mangipalagip kadatayo nga adayo a naiduma ti oras ni Jehova iti oras dagiti tattao. (Basaen ti 2 Pedro 3:​8, 9.) Para ken Jehova, kasla maysa la nga aldaw ti sangaribu a tawen. Naanus ni Jehova. Dina kayat nga adda asinoman a madadael. Ngem inton dumteng ti aldawna, agpatingga daytoy a sistema. Pribilehiotayo ngarud nga usaren ti nabatbati a tiempo tapno makasabaantayo dagiti tattao iti amin a nasion.

6. Kasanotayo a ‘laglagipen’ ti aldaw ni Jehova? (2 Pedro 3:​11, 12)

⁶ Iparparegta ni Pedro a ‘laglagipentayo’ ti aldaw ni Jehova. (Basaen ti 2 Pedro 3:​11, 12.) Kasano? Nasayaat no agingga a posible, inaldaw a panunotentayo ti nagragsak a biagtayo iti baro a lubong. Panunotem a talaga a nakadaldaluston nga angin ti angsem, nasustansianton dagiti kanem, sarabuemton dagiti napagungar nga ay-ayatem, ken isurom kadagiti tattao a nagbiag ginasut a tawenen ti napalabas ti maipapan iti kaitungpalan dagiti padto ti Biblia. Makatulong ti kasta a panagutob tapno itultuloymo nga urayen ti panungpalan ken sipapanunotka nga agbibiagtayon iti maudi nga al-aldaw. Gapu ta ‘nasaksakbay nga ammotayon’ ti masakbayantayo, ‘saandatayo a mayaw-awan’ dagiti ulbod a mannursuro.—2 Ped. 3:17.

7. Ania ti mabalin nga epekto kadatayo ti panagbuteng iti tao?

⁷ Bayat nga itultuloytayo a laglagipen ti aldaw ni Jehova, kayattayo nga ikasaba ti naimbag a damag. Ngem adda dagiti situasion a mabalin nga agpangaduatayo nga agsao. Apay? Ngamin, baka adda tiempo a mabutengtayo iti tao. Kasta ti napasamak ken Pedro. Iti rabii ti pannakabista ni Jesus, dina inyam-ammo ti bagina kas maysa kadagiti adalan ni Jesus. Namin-adu pay ketdi nga inlibakna nga am-ammona isuna. (Mat. 26:​69-75) Ngem idi agangay, situtured a naibaga dayta nga apostol: “Diyo pagbutngan ti pagbutbutnganda, dikay met madanagan.” (1 Ped. 3:14) Ipasigurado dagiti imbaga ni Pedro a kayatayo ti saan nga agbuteng iti tao.

8. Ania ti makatulong tapno saantayo nga agbuteng iti tao? (1 Pedro 3:15)

⁸ Ania ti makatulong tapno saantayo nga  agbuteng iti tao? Imbaga ni Pedro: “Bigbigenyo . . . iti pusoyo a ti Kristo ket nasantuan ken Apo.” (Basaen ti 1 Pedro 3:15.) Ipalagiptayo met iti bagitayo a ni Kristo Jesus ti Aritayo ken dakkel ti pannakabalinna. No agnernerbios wenno mabutbutengka iti tiempo nga adda gundawaymo a mangasaba, laglagipem ti Aritayo. Panunotem nga agturturayen idiay langit ken minilion nga anghel ti adda iti aglawlawna. Tantandaanam nga adda kenkuana ti “amin nga autoridad idiay langit ken ditoy daga” ken ‘adda kadatayo iti amin nga al-aldaw agingga iti panungpalan daytoy a sistema ti bambanag.’ (Mat. 28:​18-20) Imparegta ni Pedro a masapul a ‘kanayon a nakasaganatayo’ a mangidepensa iti pammatitayo. Kayatmo kadi ti mangasaba iti pagtrabahuan, eskuelaan, wenno iti dadduma pay a lugar? Panunotem a nasaksakbay no kaano a mabalinka a mangasaba ken isaganam dagiti ibagam. Kiddawem ken Jehova a paturedennaka ken agtalekka a tulongannaka a saan nga agbuteng iti tao.—Ara. 4:29.

9. Ania ti maysa a gundaway a saan a naipakita ni Pedro ti ayat? (Kitaen met ti ladawan.)

⁹ Nasursuro ni Pedro no kasano nga ipakita ti ayat. Nangngegna daytoy nga imbaga ni Jesus: “Mangtedak iti baro a bilin, nga ayatenyo ti maysa ken maysa; no kasano ti panangayatko kadakayo, kasta met ti panagiinnayatyo.”  (Juan 13:34) Ngem idi agangay, saanen a nakikadua iti pannangan kadagiti kakabsat a Gentil ta mabuteng kadagiti Judio a Kristiano. Imbaga ni apostol Pablo a ti inaramid ni Pedro ket ‘panagpammarang,’ wenno panaginsisingpet. (Gal. 2:​11-14) Inawat ni Pedro ti pannubngar ken nakasursuro iti dayta. Iti dua a suratna, impaganetgetna a saantay la koma a marikna ti ayat kadagiti kakabsat no di ket masapul nga ipakitatayo met dayta.

10. Ti “saan a pammarang a nainkabsatan nga ayat” ket resulta ti ania? Ilawlawag. (1 Pedro 1:22)

¹⁰ Imbaga ni Pedro a masapul nga addaantayo iti “saan a pammarang a nainkabsatan nga ayat” kadagiti kapammatiantayo. (Basaen ti 1 Pedro 1:22.) Dayta nga ayat ket resulta ti ‘panagtulnog iti kinapudno.’ Karaman iti dayta a kinapudno ti pannursuro a “saan a mangidumduma ti Dios.” (Ara. 10:​34, 35) Ditay masurot ti bilin ni Jesus maipapan iti ayat no manmano laeng a kakongregasiontayo ti ayatentayo. Kas ken Jesus, natural laeng a mabalin a mariknatayo a nasingsingedtayo iti dadduma. (Juan 13:23; 20:2) Ngem impalagip ni Pedro a masapul nga ikagumaantayo ti maaddaan iti “nainkabsatan nga ayat” iti amin a kakabsat a lallaki ken babbai—ta kapamiliatayo amin ida.—1 Ped. 2:17.

11. Ania ti ramanen ti ‘sipapasnek ken naimpusuan a panagiinnayat’?

¹¹ Imparegta ni Pedro a ‘sipapasnek ken naimpusuan nga agiinnayattayo.’ Iti dayta a konteksto, ti “sipapasnek” a panagayat ramanenna ti panangayat iti maysa uray no narigat nga aramiden dayta. Kas pagarigan, nasair wenno nasaktannatayo ti maysa a kabsat. Mabalin a ti damo a reaksiontayo ket agibales, imbes nga ipakitatayo ti ayat. Ngem nasursuro ni Pedro ken Jesus a ti panagibales ket kagura ti Dios. (Juan 18:​10, 11) Insurat ni Pedro: “Diyo subadan ti panangdangran iti panangdangran wenno insulto iti insulto. Imbes ketdi, subadanyo iti bendision.” (1 Ped. 3:9) No addaanka iti napasnek nga ayat, naimbag ken nakonsiderarka uray kadagidiay mabalin a nangsair kenka.

12. (a) Ania pay ti aramidentayo no addaantayo iti nauneg nga ayat? (b) Ania ti ikagumaam nga aramiden kas isuro ti video nga Ipategyo ti Nagsayaat a Regalo a Panagkaykaysa?

¹² Iti umuna a surat ni Pedro, inusarna ti sasao a ‘nauneg nga ayat.’ Dayta nga ayat abbonganna, saan la a ti sumagmamano a basol, no di ket ti ‘adu a basol.’ (1 Ped. 4:8) Nalagip siguro ni Pedro ti insuro kenkuana ni Jesus maipapan iti panangpakawan sumagmamano a tawenen sakbayna. Mabalin nga impagarup idi ni Pedro nga isu ket manangpakawanen ta imbagana a “mamimpito” a pakawanenna ti kabsatna. Ngem insuro ni Jesus kenkuana—ken kadatayo—a “mamim-77” a mangpakawantayo, kayatna a sawen, uray mamin-ano. (Mat. 18:​21, 22) No marigatanka a mangsurot iti dayta a balakad, dika maupay! Amin nga imperpekto nga agserserbi ken Jehova ket marigatan no dadduma a mangpakawan. Ti napateg ket aramidem itan ti amin a pamuspusan tapno mapakawanmo ti kabsatmo ken makikappiaka kenkuana. c

13. Apay a mabalin a marigatan dagiti panglakayen nga ipastoran dagiti kakabsat?

¹³ Sigurado a saan a pulos a nalipatan ni Pedro ti imbaga kenkuana ti napagungar a ni Jesus: “Ipastoram dagiti babassit a karnerok.” (Juan 21:16) No maysaka a panglakayen, ammom a masapul met nga aramidem dayta. Ngem mabalin a marigatan ti maysa a panglakayen a mangiwaya iti tiempo a mangitungpal  iti dayta a napateg nga annongen. Masapul nga iyun-una dagiti panglakayen nga ipaay ti pisikal, emosional, ken naespirituan a kasapulan ti pamiliada. Mapagwadanda met iti trabaho a panangasaba, agraman iti panangisagana ken panangiparang kadagiti pasetda kadagiti gimong, asamblea, ken kombension. Ti dadduma ket miembro met ti Hospital Liaison Committee wenno tumultulongda iti Local Design/Construction Department. Talaga a nakaad-adu ti ar-aramiden dagiti panglakayen!

14. Ania ti mabalin a mangpabileg kadagiti panglakayen tapno maipastoranda ti arban? (1 Pedro 5:​1-4)

¹⁴ “Ipastoranyo ti arban ti Dios,” imparegta ni Pedro kadagiti padana a panglakayen. (Basaen ti 1 Pedro 5:​1-4.) No panglakayenka, ammomi nga ay-ayatem dagiti kakabsat ken kayatmo nga ipastoran ida. Ngem no dadduma, mabalin a mariknam a nakaad-adu ti ar-aramidem wenno nabambannogka isu a saanmo a maitungpal dayta nga annongem. Ania ti mabalinmo nga aramiden? Ibagam ken Jehova ti amin a marikriknam. Insurat ni Pedro: “No adda asinoman nga agserbi, aramidenna koma dayta sigun iti bileg nga ipapaay ti Dios.” (1 Ped. 4:11) Mabalin nga adda dagiti problema dagiti kakabsat a saan a naan-anay a masolbar iti daytoy a sistema ti bambanag. Ngem laglagipem a mas kabaelan ida a tulongan “ti panguluen a pastor” a ni Jesu-Kristo ngem sika. Maaramidna dayta ita ken iti baro a lubong. Ti laeng kidkiddawen ti Dios nga aramiden dagiti panglakayen ket ayaten ken ipastoranda dagiti kakabsat, ken agbalinda nga “ulidan iti arban.”

15. Ania ti ar-aramiden ti maysa a panglakayen a mangipastor iti arban? (Kitaen met ti ladawan.)

¹⁵ Naawatan ti nabayagen a panglakayen a ni William ti kinapateg ti panangipastor. Idi nangrugi ti COVID-19 pandemic, isu ken dagiti padana a panglakayen inaramidda a prioridad ti linawas a panangkomusta iti tunggal kagrupoda. Inlawlawagna no apay: “Adu a kakabsattayo ti agmaymaysa iti balayda isu a nalaka laeng nga agbalin a negatibo ti panagpampanunotda.” No adda problema ti maysa a kabsat, dumngeg a naimbag ni William tapno maammuanna dagiti kasapulan ken pakaseknanna. Kalpasanna, mangbirok kadagiti publikasion wenno video iti website-tayo a makatulong iti dayta a kapammatianna. Insuratna:  “Ad-adda a napatpateg ita ti panangipastor. Ikagkagumaantayo a kasabaan dagiti tattao tapno maam-ammoda ni Jehova. Masapul a kasta met ti panangikagumaantayo a mangipastor iti arban tapno dagiti karnero ni Jehova ket matulongan nga agtalinaed iti kinapudno.”

16. Ania dagiti pamay-an a mayaplikartayo dagiti nasursurotayo kadagiti surat ni Pedro?

¹⁶ Sumagmamano laeng ti napagsasaritaantayo a masursurotayo iti dua a surat ni Pedro. Baka adda dagiti nakitam a kayatmo a parang-ayen. Kas pagarigan, kayatmo kadi nga ad-adu ti tiempom a mangpanunot kadagiti bendision iti baro a lubong? Kalatmo kadi ti mangasaba iti pagtrabahuan, eskuelaan, wenno iti dadduma pay a lugar? Adda kadi dagiti napanunotmo a pamay-an tapno ad-adda a maipakitam ti nauneg nga ayat kadagiti kakabsat? Dakayo a panglakayen, determinado, situtulok, ken magagarankayo kadi a mangipastor kadagiti karnero ni Jehova? No sipupudno a sukimatem ti bagim, baka adda dagiti makitam a masapul a parang-ayem. Ngem saanka koma a maupay. ‘Naasi ti Apo,’ ken tulongannaka a rumang-ay. (1 Ped. 2:3) Ipasigurado kadatayo ni Pedro: “Ti Dios . . . turposennanto a mismo ti panagsanayyo. Patibkerennakayto, papigsaennakayto, ikabilnakayto iti natibker a pundasion.”—1 Ped. 5:10.

17. No itultuloytayo ti agporsegi ken agpasanaytayo ken Jehova, anianto ti resultana?

¹⁷ Idi damo, narikna ni Pedro a saan a maikari a makikadua iti Anak ti Dios. (Luc. 5:8) Ngem iti naayat a tulong da Jehova ken Jesus, naitultuloy ni Pedro ti agporsegi kas pasurot ni Kristo. Napalubosan ngarud ni Pedro a “[makastrek] iti agnanayon a Pagarian ti Apo ken Manangisalakan kadatayo a ni Jesu-Kristo.” (2 Ped. 1:11) Nagsayaat a gunggona! Kas ken Pedro, no itultuloymo ti agporsegi ken agpasanay ken Jehova, maawatmonto met ti gunggona a biag nga agnanayon. ‘Maisalakanka gapu iti pammatim.’—1 Ped. 1:9.