1. Ania ti mabalin nga epekto ti agimbubukodan a kababalin ti lubong iti kinapakumbabatayo?

APAY a posible a narigat nga iyaplikar ti maad-adaltayo iti Sao ti Dios? Ti maysa a rason ket kasapulantayo ti kinapakumbaba tapno maaramidtayo ti umiso, ken nakarigrigat ita ti agtalinaed a napakumbaba. Kadagitoy ‘maudi nga al-aldaw,’ napalikmutantayo kadagiti ‘managayat iti bagbagida, managayat iti kuarta, napalangguad, natangsit’ ken ‘awan panagteppelda.’ (2 Tim. 3:1-3) No adda naipadamag a panagimbubukodan ken maipadpadayaw pay ketdi dayta, mabalin a kagura ti maysa nga adipen ti Dios dayta a kababalin ngem apalanna ti resulta dayta. (Sal. 37:1; 73:3) Mabalin a panunoten pay ketdi ti maysa: ‘Adda kadi pagsayaatanna no iyun-unak ti pagimbagan ti dadduma imbes a ti pagimbagak? No ipakitak a “nanumnumoak,” saan ngata a mapukaw ti respeto dagiti tattao kaniak?’ (Luc. 9:48) No agpaimpluensiatayo iti agimbubukodan a kababalin ti lubong, mabalin a madadael ti nagsayaat a relasiontayo kadagiti kakabsat ken ti pakabigbigantayo kas Kristiano. Ngem magunggonaantayo no adalen ken tuladentayo dagiti nagsasayaat nga ulidan iti Biblia.

2. Ania ti mabalin nga epekto kadatayo ti ulidan dagiti matalek nga adipen ti Dios?

 ² No kayattayo a tuladen dagiti matalek nga adipen ti Dios, adalentayo dagiti inaramidda a nasayaat ti resultana. Kasano a nagbalinda a gayyem ti Dios, nagun-odda ti paborna, ken nabaelanda nga aramiden ti pagayatanna? Daytoy a panagadal ket nagpateg a paset ti pannangantayo iti naespirituan a taraon.

3, 4. (a) Kasano a makaaw-awattayo iti naespirituan nga instruksion? (b) Apay a maibagatayo a saan laeng a basta pananggun-od iti pannakaammo ti ramanen ti pannangan iti naespirituan a taraon?

³ Adu ti maaw-awattayo a nagsasayaat a balakad ken instruksion babaen ti Biblia, Nakristianuan a publikasiontayo, website-tayo, JW Broadcasting, ken dagiti gimong ken asambleatayo. Ngem sigun iti imbaga ni Jesus iti Juan 4:34, saan laeng a basta pananggun-od iti pannakaammo ti ramanen ti pannangantayo iti naespirituan a taraon. Ania pay? Kinuna ni Jesus: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.”

⁴ Para ken Jesus, karaman iti naespirituan a taraon ti panangsurot iti instruksion ti Dios. Kasano a mayarig daytoy iti taraon? Mapnek ken mataraonan ti bagitayo no mangantayo iti nasustansia a taraon. Kasta met, tumibker ti determinasion ken pammatitayo iti agnanayon a biag no aramidentayo ti pagayatan ti Dios. Napadasam kadin ti napan iti taripnong sakbay ti panangasaba nga aglaladutka ngem nagin-awaan ken gimmanaygayka kalpasan ti panangasabam iti dayta nga aldaw?

5. Ania ti gunggona iti panangipakita iti sirib?

⁵ Ti kaipapanan ti sirib ket panangyaplikar iti instruksion ti Dios. (Sal. 107:43) Adu ti gunggona iti panangipakita iti sirib. “Amin a sabsabali pay a pakaragsakam saan a maipada iti dayta. . . . Maysa dayta a kayo ti biag kadagidiay mangpetpetpet iti dayta, ket dagidiay agtultuloy a mangsalimetmet a siiirut iti dayta maawaganda iti naragsak.” (Prov. 3:13-18) Kinuna ni Jesus: “No ammoyo dagitoy a banag, naragsakkayo no aramidenyo ida.” (Juan 13:17) Agnanayon ti ragsak dagiti adalan no itultuloyda nga aramiden ti imbilin ni Jesus. Saan laeng nga iti daydiay a gundaway nga inakseptarda ti pannursurona ken tinuladda ti ulidanna. Kasta ti inaramidda iti intero a panagbiagda.

6. Apay a masapul nga itultuloytayo nga iyaplikar ti maad-adaltayo?

⁶ Nagpateg ita ti agtultuloy a panangyaplikar iti ammotayo a pudno. Kas panangyilustrar, mabalin nga adu ti remienta, materiales, ken ammo ti maysa a mekaniko. Ngem saan a magunggonaan no dina usaren dagita. No addan dagiti naaramidanna kas mekaniko ken in-inut a nakasursuro, masapul nga itultuloyna nga iyaplikar ti naadalna tapno agtalinaed a nalaing ken adu ti magapuananna. Kasta met, mabalin a naballigitayo gapu ta iyap-aplikartayo ti mabasbasatayo iti Biblia. Nupay kasta, manayon ti ragsaktayo no itultuloytayo a sipapakumbaba a suroten ti instruksion ni Jehova iti inaldaw.

7. Tapno maaddaantayo iti sirib, ania koma ti panunotentayo maipapan kadagiti nasayaat nga ulidan iti Biblia?

⁷ Usigentayo ti sumagmamano a situasion a mabalin a masubok ti kinapakumbabatayo ket kitaentayo no kasano a napagballigian dagiti matalek a tattao idi un-unana dagiti umasping a situasion. Tapno bumileg ti espiritualidadtayo, saantay la a pagsasaritaan dagita. Masapul a panunotentayo  no kasano a mayaplikartayo dagitoy a punto, sa agtignaytayo a dagus.

8, 9. Ania ti ipakita ti salaysay iti Aramid 14:8-15 maipapan iti kinapakumbaba ni apostol Pablo? (Kitaen ti ladawan iti rugi ti artikulo.)

⁸ Pagayatan ti Dios nga ‘amin a kita ti tattao ket dumteng iti umiso a pannakaammo iti kinapudno.’ (1 Tim. 2:4) Ania ti panangmatmatmo iti adu a kita ti tattao a saan pay a nakasursuro iti kinapudno? Binirok ni apostol Pablo dagidiay addan ammoda iti Dios kadagiti sinagoga, ngem saan laeng a dagiti Judio ti kinasaritana. Nasubok ti kinapakumbabana gapu iti reaksion dagidiay agdaydayaw iti didiosen.

⁹ Kas pagarigan, iti umuna a panagmisionero ni Pablo, impagarup dagiti taga-Licaonia a da Pablo ken Bernabe ket superhero​—dagiti naglasag nga ulbod a diosda a da Zeus ken Hermes. Nagustuan ngata da Pablo ken Bernabe dayta a panangidaydayaw? Ibilangda kadi dayta a gin-awa iti amin a pannakaidadanesda iti naudi a dua a siudad a binisitada? Pinanunotda kadi a makatulong dayta a pannakaidaydayawda iti pannakaisaknap ti naimbag a damag? Saan! Dagus a nagkedkedda ket pinisangda dagiti badoda sa nagdardarasda a napan kadagiti tattao, ket impukkawda: “Apay nga ar-aramidenyo dagitoy a banag? Tattaokami met nga addaan kadagiti isu met laeng a pagkapuyan a kas kadakayo.”​—Ara. 14:8-15.

10. Ania ti kayat a sawen da Pablo ken Bernabe idi imbagada a kapadada dagiti taga-Licaonia?

¹⁰ Idi inamin da Pablo ken Bernabe nga imperpektoda, dida ibagbaga a ti panagdaydayawda ket kapada ti panagdaydayaw dagidiay a pagano. Saan kadi nga imbaon ida ti Dios kas misionero? (Ara. 13:2) Saan kadi a napulotanda iti nasantuan nga espiritu ken addaanda iti nadayag a namnama? Wen, ngem ammo da Pablo ken Bernabe nga awaten met dagiti taga-Licaonia ti banag a tagtagiragsakenda no ipangagda ti naimbag a damag.

11. Kasano a matuladtayo ti mapagulidanan a kinapakumbaba ni Pablo iti panangasabatayo?

¹¹ Kasano a matuladtayo ti mapagulidanan a kinapakumbaba ni Pablo? Umuna, saantayo a mangnamnama wenno umawat iti pammadayaw iti banag a naaramidantayo gapu iti tulong ni Jehova. Isaludsodtayo iti bagitayo: ‘Ania ti panangmatmatko kadagiti tattao a kaskasabaak? Diak kadi mapupuotan a tultuladek ti panangidumduma a gagangay iti lugarmi maipapan iti espesipiko a grupo dagiti tattao?’ Makomendaran dagiti Saksi ni Jehova iti intero a lubong ta ikabkabilanganda dagiti tattao iti teritoriada tapno maammuanda no adu pay ti mangipangag iti naimbag a damag. No dadduma, kasapulan a sursuruenda ti lengguahe ken kostumbre dagiti ibilbilang ti kaaduan kas nababa a tattao. Dagiti Saksi a mapan tumulong kadagitoy a tattao saanda koma nga ibilang ti bagida kas nangatngato. Imbes ketdi, ikagumaanda a tarusan ti tunggal indibidual tapno maidanonda iti pusona ti mensahe ti Pagarian.

12. Kasano nga impakita ni Epafras ti di agimbubukodan a pannakaseknanna iti dadduma?

¹² Ti maysa pay a pamay-an a maipakitatayo a sipapakumbaba a sursurotentayo ti instruksion ti Dios ket ti panangikararag kadagidiay “nakagun-od iti pammati, a naibilang [kadatayo] iti maipada a pribilehio.” (2 Ped. 1:1) Kasta ti inaramid ni Epafras. Namitlo laeng a nadakamat ni Epafras iti Biblia​—iti laeng sursurat ni Pablo. Bayat a nakabalud ni Pablo iti maysa a balay, insuratna kadagiti Kristiano idiay Colosas a “kankanayon nga umag-agawa [ni Epafras] iti karkararagna maigapu  [kadakuada].” (Col. 4:12) Am-ammo unay ni Epafras dagiti kakabsat ket interesado iti pagimbaganda. Uray ‘kapadana ni Pablo a kautibo,’ impakitana latta a sipapanunot iti naespirituan a kasapulan ti dadduma. (Flm. 23) Ket adda inaramidna. Saan kadi a pammaneknek dayta iti di agimbubukodan a pannakaseknan? Adda bileg ti kararagtayo para kadagiti padatayo nga adipen ni Jehova, nangruna no inaganantayo ti tunggal indibidual.​—2 Cor. 1:11; Sant. 5:16.

13. Kasano a matuladmo ti ulidan ni Epafras iti panagkararagmo?

¹³ Panunotem dagidiay mabalinmo nga inaganan iti kararagmo. Kas ken Epafras, adu a kakabsattayo ti mangikarkararag kadagiti kakongregasionda ken kadagiti pamilia a nadagsen ti responsabilidadda wenno maipaspasango iti serioso a panagdesision wenno sulisog. Adu ti mangikarkararag kadagidiay nailista ti naganda iti artikulo a “Dagiti Saksi ni Jehova a Nakabalud Gapu iti Pammatida” iti jw.org. (Kitaen ti NEWSROOM > DAGITI KASO ITI KORTE.) Kasta met, nasayaat a laglagipentayo dagiti natayan iti ipatpateg, dagiti nakalasat iti nabiit pay a kalamidad ken gubat, ken dagiti agib-ibtur iti narigat nga ekonomia. Nalawag nga adu a kakabsattayo ti agkasapulan iti kararagtayo ken magunggonaan iti dayta. No ikararagantayo ida, ipakpakitatayo a saan laeng a ti bukodtayo a pagimbagan ti kitkitaentayo no di ket uray pay ti dadduma. (Fil. 2:4) Denggen ni Jehova dagita a kararag.

14. Kasano nga impakita ni Jehova ti kasayaatan nga ulidan iti panagdengngeg?

¹⁴ Ti sabali pay a pamay-an a maipakitatayo ti kinapakumbaba ket ti siaanus a panangdengngegtayo iti sabsabali. Kuna ti Santiago 1:19 a masapul a ‘nasiglattayo no iti panagdengngeg.’ Impakita ni Jehova ti kasayaatan nga ulidan iti daytoy a banag. (Gen. 18:32; Jos. 10:14) Kitaentayo ti masursurotayo iti pannakisaritana ken Moises a nairekord iti Exodo 32:11-14. (Basaen.) Uray no saanna a kasapulan ti opinion ni Moises, inikkanna ni Moises iti gundaway a mangibaga iti rikriknana. Adda ngata tao a siaanus a dumngeg iti opinion ti maysa a kamali ti kapanunotanna sa aramidenna ti ibaga dayta a tao? Ngem siaanus a dumngeg ni Jehova kadagiti tattao nga umaw-awag kenkuana nga addaan iti pammati.

15. Kasano a matuladtayo ni Jehova iti panangpadayaw iti sabsabali?

¹⁵ Isaludsodtayo iti bagitayo: ‘No sipapakumbaba ni Jehova a dumngeg kadagiti tattao kas iti inaramidna kada Abraham, Raquel, Moises, Josue, Manoa, Elias, ken Ezekias, saan kadi nga ad-adda pay a padayawak ti amin a kakabsat, respetuek ida, dumngegak iti opinionda, ken aramidek pay ketdi ti nasayaat nga opinionda? Adda kadi kakongregasionko wenno kapamiliak nga agkasapulan ita iti atensionko? Ania ti masapul nga aramidek iti dayta?’​—Gen. 30:6; Uk. 13:9; 1 Ar. 17:22; 2 Cron. 30:20.

16. Ania ti reaksion ni Ari David iti makapapungtot nga inaramid ni Simei?

¹⁶ Matulongannatayo met ti kinapakumbaba nga agteppel no adda mamagpungtot kadatayo. (Efe. 4:2) Ti nagsayaat a pagarigan iti daytoy ket masarakan iti 2 Samuel 16:5-13. (Basaen.) Inibturan ni David ken dagiti adipenna ti panangumsi ken pisikal a panangdangran ni Simei, a kabagian ni Ari Saul. Inaramid dayta ni David uray no kabaelanna koma a pagpatinggaen. Kasano a nakapagteppel ni David? Maammuantayo babaen ti panangadaltayo iti maikatlo a Salmo.

17. Ania ti nakatulong ken David nga agteppel, ken kasano a matuladtayo?

 ¹⁷ Ipakita ti superskripsion ti Salmo 3 a pinutar dayta ni David idi “agtaltalaw maigapu ken Absalom nga anakna.” Ti bersikulo 1 ken 2 ket kapada dagiti pasamak a nailadawan iti 2 Samuel kapitulo 16. Sa dakamaten ti Salmo 3:4 ti panagtalek ni David: “Babaen iti timekko umawagakto ken Jehova a mismo, ket sungbatannakto manipud nasantuan a bantayna.” Mabalintayo met ti agkararag no atakarendatayo. Ipaayannatayo ni Jehova iti nasantuan nga espirituna tapno makapagibturtayo. Adda kadi mapanunotmo a situasion a kasapulam ti agteppel wenno sibubulos a mangpakawan iti di nainkalintegan a pananggurada kenka? Agtalekka kadi a makitkita ni Jehova ti pakarigatam ken bendisionannaka?

18. Kasano a magunggonaantayo no itultuloytayo nga iyaplikar ti bilin ti Dios?

¹⁸ Adu a bendision ti resulta ti panangaramid iti ammotayo nga umiso. Di pakasdaawan a kuna ti Proverbio 4:7 a “ti sirib isu ti kangrunaan a banag”! Nupay ti sirib ket naibatay iti pannakaammo, saanna laeng a ramanen dagiti impormasion a matarusantayo no di ket nangnangruna dagiti desisiontayo. Addaan iti sirib uray dagiti kuton. Makita ti nainkasigudan a siribda iti panangisaganada iti kanenda iti kalgaw. (Prov. 30:24, 25) Ni Kristo, “ti sirib ti Dios,” kanayon nga aramidenna ti bambanag a makaay-ayo ken Amana. (1 Cor. 1:24; Juan 8:29) Ammo ti Dios ti nagdumaan ti panagpili iti umiso ken ti panangaramid iti umiso. Gunggonaanna dagidiay napakumbaba nga agib-ibtur ken dagidiay mangar-aramid iti ammoda nga umiso. (Basaen ti Mateo 7:21-23.) Gapuna, ikagumaantayo a pagtalinaeden ti naespirituan a kasasaad ti kongregasion a pakakitaan iti pudpudno a kinapakumbaba. Saan a nalaka nga iyaplikar ti ammotayo nga umiso ken agkasapulan dayta iti anus, ngem dayta ti pakailasinan ti kinapakumbaba nga agresulta iti kinaragsak ita ken iti agnanayon.