KASTA ti imbaga ni David idi pinadayawanna ti maysa a babai a nakasaritana. Abigail ti naganna. Apay nga imbaga ni David dayta, ken ania ti masursurotayo ken Abigail?

Naam-ammo ni David daytoy a babai idi ilemlemmenganna ni Ari Saul. Ti asawa ni Abigail ket ni Nabal—nabaknang a lalaki nga adu ti tarakenna iti kabambantayan iti makin-abagatan a paset ti Juda. Ni David ken dagiti kakaduana ti nagbalin a ‘pannakapader’ dagiti pastor ken taraken ni Nabal. Idi kuan, nangibaon ni David kadagiti mapan ken Nabal tapno dumawatda “iti aniaman” a maitedna nga abastoda. (1 Sam. 25:8, 15, 16) Saan met a nadagsen dayta a dawatda no panunotentayo ti inaramid ni David ken dagiti kakaduana para iti pagsayaatan ni Nabal.

Maibagay la unay ken Nabal ti naganna, a kaipapananna, “Nakuneng” wenno “Maag.” Makapainsulto ken nakaal-alas ti insungbatna ken David ken dina inted ti dawdawatenna. Nagsagana ngarud ni David tapno balsenna ni Nabal gapu iti makapainsulto ken nagmadi nga impakitana. Maipalak-am ken Nabal ken iti pamiliana ti resulta ti kinakunengna.—1 Sam. 25:2-13, 21, 22.

Gapu ta ammo ni Abigail a nakaro ti mabalin a pagbanagan ti plano ni David, natured a nangaramid iti pamay-an tapno malapdanna dayta. Nadayaw a nagpakaasi ken David ken imbagana a panunotenna koma ti relasionna ken Jehova. Kalpasanna, nangted iti adu a makan ken David, ti sumaruno nga agbalin nga ari, ken iti kakaduana. Nabigbig ni David nga inusar ni Jehova ni Abigail a manglapped kenkuana tapno saan a makabasol iti Dios. Kinuna ni David ken Abigail: “Mabendisionan koma ti kinasimbengmo, ken mabendisionanka koma sika a nangpawil kaniak itoy nga aldaw a sumrek iti panagbasol iti dara.”—1 Sam. 25:18, 19, 23-35.

Siempre, ditay pulos kayat a tuladen ni Nabal, a saan a nangapresiar kadagiti nasayaat a maar-aramidan ti dadduma kenkuana. Kasta met, no adda makitatayo a situasion nga agresulta iti dakes, aramidentayo ti amin a kabaelantayo a manglapped iti dayta. Wen, kayattayo a tuladen ti imbaga ti salmista iti Dios: “Isuronak iti . . . kinasimbeng ken pannakaammo.”—Sal. 119:66.

Babaen iti aramidtayo, mabalin a madlaw ti dadduma ti nasayaat a panagdesdesision, wenno kinasimbengtayo. Ibagada man dayta wenno saan, mabalin nga adda iti pusoda ti kas iti imbaga ni David: “Mabendisionan koma ti kinasimbengmo”!