1, 2. Apay nga adda latta marigrigat iti daytoy a sistema ti bambanag?

NAGRIGAT ken saan a patas ti panagbiag ita. Marigatan dagiti agtutubo nga agbirok iti trabaho. Adu ti mangipuspusta iti biagda nga agabrod. Nasaknap ti kinarigat ti biag, uray kadagiti narang-ay a pagilian. Bumakbaknang dagiti nabaknang ken pumangpanglaw dagiti napanglaw. Sigun iti nabiit pay a kalkulasion, agpada ti kinabaknang ti 1 a porsiento a bilang ti kababaknangan a tattao ken ti kinabaknang ti 99 a porsiento ti populasion ti lubong. Nupay saan a masigurado dayta, saan a mailibak a binilion ti marigrigat, idinto ta ti kinabaknang ti dadduma ket umanayen a pagbiagda iti uray ginasgasut a tawen. Ammo ni Jesus daytoy napait a mapaspasamak: “Kankanayon nga adda kadakayo dagiti napanglaw.” (Mar. 14:7) Apay a kasta?

² Ammo ni Jesus nga agpatingganto laeng ti kinarigat ti biag inton umay ti Pagarian ti Dios. Karaman iti lubong ni Satanas ti sistema ti relihion ken politika, ken ti naagum a sistema ti negosio nga ireprepresentar dagiti “komersiante” iti Apocalipsis 18:3. Naan-anay a naisina dagiti adipen ti Dios iti politika ken ulbod a relihion, ngem kaaduan ti marigatan a naan-anay a sumina iti sistema ti negosio iti lubong ni Satanas.

3. Ania dagiti saludsod nga usigentayo?

 ³ Kas Kristiano, nagsayaat a sukimatentayo ti kapanunotantayo maipapan iti lubong ti negosio ita. Isaludsodtayo: ‘Kasano a mausarko dagiti sanikuak a mangipakita a matalekak iti Dios? Kasano a maksayak ti pannakiramanko iti lubong ti negosio? Ania dagiti kapadasan a mangipakita a naan-anay nga agtalek iti Dios dagiti adipenna uray narigat ti biag ita?’

4, 5. (a) Ania ti nakaipasanguan ti mayordomo iti ilustrasion ni Jesus? (b) Ania ti imbalakad ni Jesus kadagiti pasurotna?

⁴ Basaen ti Lucas 16:1-9. Mamagpanunot ti ilustrasion ni Jesus maipapan iti nakillo a mayordomo. Idi naakusaran a saysayangenna ti sanikua ti amona, nagbalin a ‘masirib’ ket ‘nakigayyem’ tapno addanto tumulong kenkuana inton maikkat a mayordomo. * Siempre, saan nga iparparegta ni Jesus nga agaramid dagiti adalanna iti di umiso tapno makapagbiagda iti daytoy a lubong. Inawaganna dayta kas ugali ti “annak daytoy a sistema ti bambanag.” Imbaga ni Jesus ti ilustrasion ta adda napateg nga isurona.

⁵ Kas iti mayordomo a naipasango iti narigat a situasion, ammo ni Jesus a kaaduan kadagiti pasurotna ti marigatan met nga agbiag iti daytoy saan a patas a lubong ti negosio. Isu nga imbalakadna kadakuada: “Makigayyemkayo babaen iti nakillo a kinabaknang, tapno iti kasta, inton maibus dagita, awatendakayto [ni Jehova ken ni Jesus] kadagiti agnanayon a pagnaedan a disso.” Ania ti masursurotayo iti dayta?

6. Ania ti mangipakita a saan a karaman ti komersialismo iti panggep ti Dios?

⁶ Saan nga inlawlawag ni Jesus no apay nga inawaganna a “nakillo” ti kinabaknang, ngem nalawag nga ipakita ti Biblia a saan a karaman ti komersialismo iti panggep ti Dios. Inted ni Jehova kada Adan ken Eva idiay Eden ti amin a kasapulanda. (Gen. 2:15, 16) Idi inawat dagiti napulotan a Kristiano ti nasantuan nga espiritu idi umuna a siglo, “awan ti uray maysa nga agkuna a kukuana ti aniaman iti bambanag nga ik-ikutanna; no di ket amin a bambanag kukuada amin.” (Ara. 4:32) Impakpakauna ni propeta Isaias ti tiempo a matagiragsakto ti amin a tao ti bunga ti daga. (Isa. 25:6-9; 65:21, 22) Ngem ita, bayat nga ar-aramiden dagiti pasurot ni Jesus ti pagayatan ti Dios, kasapulan nga agbalinda a ‘masirib’ tapno adda pagbiagda iti daytoy a lubong babaen ti panangusarda iti “nakillo a kinabaknang.”

7. Ania ti ibalakad ti Lucas 16:10-13?

⁷ Basaen ti Lucas 16:10-13. Nakigayyem ti mayordomo iti ilustrasion ni Jesus para iti pagimbaganna. Ngem imbaga ni Jesus kadagiti pasurotna a makigayyemda idiay langit saan a para laeng iti bagida. Ipakita dagiti bersikulo kalpasan ti ilustrasion nga adda koneksion ti “nakillo a kinabaknang” iti kinamatalek iti Dios. Ibagbaga ngarud ni Jesus a kabaelantayo a ‘paneknekan a matalektayo’ no iti panangusar iti kinabaknangtayo, wenno kabaelantayo nga usaren dagita iti naimbag. Kasano?

8, 9. Mangted kadagiti pagarigan a mangipakita a matalek ti dadduma iti panangusarda iti nakillo a kinabaknang.

⁸ Makita a matalektayo iti panangusartayo iti sanikuatayo babaen ti panagdonartayo iti sangalubongan a trabaho a panangasaba nga impakpakauna ni Jesus. (Mat.  24:14) Maysa a balasitang a taga-India ti adda alkansiana ket tinintinnaganna dayta iti baria, nga uray la saanen a gimmatgatang iti ay-ayamna. Idi napunnon ti alkansiana, indonarna ti naurnongna para iti trabaho a panangasaba. Adda met kabsat a lalaki idiay India nga adu ti mulana a niog. Nagdonar iti nakaad-adu a niog iti Malayalam remote translation office. Gumatgatang ngamin dagiti kakabsat iti niog isu nga ad-adda a makatulong no agdonar iti niog imbes nga itedna a kuarta. “Kinasirib” dayta. Mangmangted met dagiti kakabsat idiay Greece iti olive oil, keso, ken dadduma pay a makan para iti pamilia ti Bethel.

⁹ Adda kabsat a taga-Sri Lanka nga aggigian itan iti sabali a pagilian. Ipapausarna ti lote ken balayna para kadagiti gimong ken asamblea ken pagdagusan dagiti agserserbi iti amin-tiempo. Sakripisio dayta para iti kabsat ngem dakkel a tulong dayta kadagiti kakabsat sadiay a nanumo ti panagbiagda. Iti lugar a maiparit ti trabahotayo, ipapausar met dagiti kakabsat ti balayda kas Kingdom Hall. Makatulong dayta tapno adda libre a paggimongan ti adu a payunir ken dadduma a kakabsat nga awan unay makukuartana.

10. Ania dagiti bendision a maawattayo no naparaburtayo?

¹⁰ Ipakita dagita a pagarigan a dagiti adipen ti Dios ket “matalek iti kabassitan,” kayatna a sawen, iti panangusarda iti kinabaknangda, a nababbaba ti pategna ngem iti naespirituan a kinabaknang. (Luc. 16:10) Ania ti makuna dagitoy a gagayyem ni Jehova iti panagsakripisioda? Ammoda a ti kinaparabur ket maysa a pamay-an tapno maaddaanda iti ‘pudpudno’ a kinabaknang. (Luc. 16:11) Kinuna ti maysa a sister a kanayon nga agdondonar para iti Pagarian maipapan iti bendision a naawatna: “Nagsayaat ti agbalin a naparabur, ta adda napadasak a dakkel a panagbalbaliw iti biagko bayat ti panaglabas dagiti tawen. Nakitak a no naparparaburak iti material, nalaglag-an met ti riknak iti dadduma. Nagbalinak nga ad-adda a manangpakawan, naan-anus, ken nalaklakak nga akseptaren dagiti pakaupayan ken balakad.” Adu ti nakapaneknek nga agresulta iti naespirituan a bendision ti panagbalin a naparabur.—Sal. 112:5; Prov. 22:9.

11. (a) Apay a makuna a “kinasirib” ti kinaparabur? (b) Kasano a balanse a maus-usar ti pondo iti organisasion ti Dios? (Kitaen ti ladawan iti rugi ti artikulo.)

¹¹ Makita pay a ‘masiribtayo’ no usarentayo ti kinabaknangtayo para iti Pagarian. Mangted dayta kadatayo iti gundaway a tumulong iti dadduma. Kas pagarigan, adda dagiti kakabsat nga addaan iti kinabaknang ngem saanda a makapagserbi iti amin-tiempo wenno umakar iti sabali a pagilian. Maragsakanda ta ammoda a makatulong dagiti donasionda iti panagserbi ti dadduma. (Prov. 19:17) Makatulong dagiti donasion tapno adda mausar a literatura ken pangsuporta iti panangasaba kadagiti napanglaw a lugar nga adu ti interesado. Iti adu a tawen, masansan idi nga agpili dagiti kakabsat idiay Congo, Madagascar, ken Rwanda no mangan ti pamiliada wenno maaddaanda iti  Biblia, a no dadduma, agbalor iti makalawas wenno makabulan a sueldo. Ngem ita, babaen kadagiti donasion ti adu ken ti “panamagpapada,” wenno ti balanse a pannakausar ti donasion, pomponduan ti organisasion ni Jehova ti pannakaipatarus ken pannakaiwaras ti Biblia para iti tunggal miembro ti pamilia ken kadagiti mabisbisin iti naespirituan a mayad-adalan iti Biblia. (Basaen ti 2 Corinto 8:13-15.) Makuna ngarud a posible nga agbalin a gayyem ni Jehova dagiti mangmangted ken umaw-awat.

12. Ania ti mangipakita a nagtalek ni Abraham iti Dios?

¹² Agbalintayo pay a gayyem ni Jehova no kissayantayo ti pannakiramantayo iti lubong ti komersio ken sapulentayo ti ‘pudpudno’ a kinabaknang. Nagtulnog ni Abraham, lalaki nga addaan iti pammati idi un-unana, a pumanaw iti nabaknang a lugar ti Ur tapno agyan iti tolda ken makigayyem ken Jehova. (Heb. 11:8-10) Kanayon a nagpannuray ni Abraham iti Dios kas Pagtaudan ti pudpudno a kinabaknang, ken saanna a pulos sinapul ti material a pagimbaganna, a mangipakita nga awan panagtalekna iti Dios. (Gen. 14:22, 23) Imparegta ni Jesus ti kasta a panagtalek idi imbagana iti maysa a nabaknang a lalaki: “No kayatmo ti agbalin a naan-anay, inka ilako dagiti sanikuam ket itedmo kadagiti napanglaw ket maaddaankanto iti gameng idiay langit, ket umayka agbalinka a pasurotko.” (Mat. 19:21) Saan a kas iti pammati ni Abraham ti pammati dayta a lalaki. Ngem naan-anay a nagtalek ti dadduma iti Dios.

13. (a) Ania ti imbalakad ni Pablo ken Timoteo? (b) Kasano a mayaplikartayo ita ti balakad ni Pablo?

¹³ Nabileg met ti pammati ni Timoteo. Inawagan ni Pablo ni Timoteo kas “nasayaat a soldado ni Kristo Jesus.” Kinuna ni Pablo kenkuana: “Awan tao nga agserserbi kas maysa a soldado ti makiraman kadagiti panagkomersio iti biag, tapno magun-odanna ti anamong daydiay nangipasalista kenkuana kas maysa a soldado.” (2 Tim. 2:3, 4) Dayta a balakad ni Pablo ket ikagkagumaan a suroten dagiti pasurot ni Jesus ita, agraman ti nasurok a maysa a milion nga agserserbi iti amin-tiempo. Lablabananda ti impluensia ti lubong ken saanda nga agpaallukoy kadagiti adbertismen ta silalagipda iti daytoy a prinsipio: “Ti nakabulod adipen iti tao nga agpapautang.” (Prov. 22:7) Kayat ni Satanas nga usarentayo ti amin a panawen ken pigsatayo a maadipen iti lubong ti komersio. Adda dagiti desision a mabalin a mangilumlom kadatayo iti utang iti adu a tawen. Kas pagarigan, panagutang iti dakkel para iti balay, panageskuela, nangina a lugan, ken uray nagarbo a kasar. Masiribtayo no pasimplientayo ti biagtayo ken liklikantayo ti umutang ken kissayantayo dagiti paggastuantayo. Iti kasta, nawayatayo nga agserbi iti Dios imbes nga agpaadipentayo iti sistema ti komersio ita.—1 Tim. 6:10.

14. Ania ti kasapulan nga aramidentayo? Mangted kadagiti pagarigan.

¹⁴ Tapno agbiagtayo a simple, masapul nga adda dagiti ipangpangrunatayo. Maysa nga agassawa ti addaan iti dakkel a negosio, ngem kayatda manen ti agserbi iti amin-tiempo. Tapno maaramidda dayta, masapul nga ilakoda ti negosio, barko, ken dadduma pay a sanikuada. Kalpasanna, nagboluntarioda iti panangibangon iti sangalubongan a hedkuarter idiay Warwick, New York. Espesial dayta kadakuada ta nakaduada pay a nagserbi sadiay ti balasangda ken ti manugangda, ken iti sumagmamano a lawas, ti nagannak ti asawa a lalaki. Part-time nga agtrabtrabaho iti banko ti maysa a babai a payunir idiay Colorado, U.S.A. Magustuan  ti amona ti trabahona isu nga imbagana nga agtrabahon iti full-time ken matriple ti sueldona. Ngem gapu ta manglapped dayta iti panagserbina, saanna nga inawat ti napintas nga inyopreserda. Dadduma laeng dagita iti nakaad-adu a panagsakripisio nga ar-aramiden dagiti adipen ni Jehova. No iyun-unatayo ti Pagarian, maipakitatayo a napatpateg ti pannakigayyemtayo iti Dios ken dagiti naespirituan a kinabaknang ngem iti maipaay ti lubong ti komersio ita.

15. Ania a kinabaknang ti mangparagsak unay kadatayo?

¹⁵ Saan a ti kinabaknang ti kanayon a pakakitaan iti pamendision ti Dios. Bembendisionan ni Jehova dagidiay “nabaknang iti nasayaat nga ar-aramid.” (Basaen ti 1 Timoteo 6:17-19.) Kas pagarigan, idi naammuan ni Lucia, * a taga-Italy, a kasapulan ti ad-adu a mangasaba idiay Albania, immakar sadiay idi 1993 uray awan trabahona, ngem naan-anay a nagtalek ken Jehova. Nagsursuro iti lengguahe nga Albanian ket natulonganna nga agpabautisar ti nasurok nga 60 a tattao. Saan a kasta ti kabunga ti teritoria ti kaaduan nga adipen ti Dios, ngem amin nga aramidentayo a tumulong iti dadduma a mangammo ken agtultuloy a magna iti dalan ti biag ket banag nga agnanayon nga ipategtayo ken ipategda.—Mat. 6:20.

16. (a) Anianto ti pagbanagan ti sistema ti komersio ita? (b) Ania ti epekto dayta iti pangusarantayo iti kinabaknangtayo?

¹⁶ Kuna ni Jesus:“Inton maibus” ti nakillo a kinabaknang, saan a ‘no maibus’ dagita. (Luc. 16:9) Ti pannakalugi dagiti banko ken ti panagsuek ti ekonomia kadagitoy maudi nga al-aldaw ket awan kaimudinganna iti mapasamak iti intero a lubong iti masanguanan. Madadaelto ti intero a sistema ni Satanas—ti politika, relihion, ken negosio. Impakpakauna da propeta Ezekiel ken propeta Sofonias nga awanto ti serserbi ti balitok ken pirak, a nakapatpateg iti lubong ti komersio iti ginasut a tawen. (Eze. 7:19; Sof. 1:18) Ania ngata ti mariknatayo no iti tiempo a dandanitayon matay, maamiristayo nga insukattayo gayam ti pudpudno a kinabaknang iti adu a “nakillo a kinabaknang” iti daytoy a lubong? Kaslatayto iti tao a nangusar iti intero a biagna a nagurnong iti sangabunton a kuarta ngem naammuanna a peke gayam dagita. (Prov. 18:11) Talaga nga awanto ti serserbi dagita a kinabaknang, isu nga usarentayo itan dagita a ‘makigayyem’ iti langit. Pabaknangennatayo iti naespirituan ti aniaman nga aramidentayo para iti Pagarian ni Jehova.

17, 18. Ania ti agur-uray kadagiti gagayyem ti Dios?

¹⁷ Inton umay ti Pagarian ti Dios, awanton ti agabang ken umutang, libre ken adunton ti makan, ken saanton a problema ti pagpadoktor ken pagpaagas. Matagiragsakto ti pamilia ni Jehova ditoy lubong ti kasayaatan a maipaay ti daga. Pagarkosto laengen ti balitok, pirak, ken dagiti napateg a bato. Saanton a pagnegosio ken pagpabaknang dagita. Adunton ken libre dagiti de kalidad a kayo, bato, ken metal a pagbalay. Maragsakanto a tumulong kadatayo dagiti gagayyemtayo, saan a gapu iti kuarta. Pagririnnanudanto ti amin ti kinabaknang ti daga.

¹⁸ Dadduma laeng dagita iti kinabaknang a maawatto dagidiay makigayyem iti langit. Sigurado a maragsakanto dagiti agdaydayaw ken Jehova ditoy daga inton mangngegda ti kuna ni Jesus: “Umaykayo, dakayo a binendisionan ni Amak, tawidenyo ti pagarian a naisagana kadakayo manipud iti pannakabangon ti lubong.”—Mat. 25:34.