1. Iyilustrarmo no apay a napateg ti panagbalin a nasiput iti oras ken no ania ti mapaspasamak iti aglawlawtayo. (Kitaen ti ladawan iti rugi ti artikulo.)

FIVE, four, three, two, one! No makitatayo dagita iti iskrin iti entablado, ammotayo a masapul nga agtugawtayon tapno matagiragsaktayo ti maipatokar a musika a tanda ti panangrugi ti sesion iti kombension. Panawenen tapno imdengantayo a naimbag dagiti nagpintas a musika nga insagana ti Watchtower orchestra, ken kangrunaanna, tapno maisagana ti panunot ken pusotayo a dumngeg kadagiti palawag. Ngem kasano no agpagnapagna wenno makisarsarita ti dadduma kadagiti gagayyemda a saanda a madmadlaw a mangrugin ti programa? Nalawag a saanda a nasiput iti oras ken no ania ti mapaspasamak iti aglawlawda—addan iti entablado ti tserman, maipatpatokaren ti musika, ken nakatugawen dagiti tattao. Makatulong dayta nga eksena tapno makitatayo ti kinapateg ti panagbalin a nasiput iti dakdakkel a pasamak iti asidegen a masanguanan. Ania dayta?

2. Apay nga imbaga ni Jesus kadagiti adalanna nga ‘agtultuloyda nga agbantay’?

² Idi imbaga ni Jesu-Kristo ti “panungpalan ti sistema ti bambanag,”  imparegtana kadagiti adalanna: “Agtultuloykayo a kumita, agtultuloykayo a siririing, ta saanyo nga ammo no kaano ti naituding a tiempo.” Kalpasan dayta, maulit-ulit nga imbalakad ni Jesus kadakuada: “Agtultuloykayo nga agbantay.” (Mat. 24:3; basaen ti Marcos 13:32-37.) Ipakita met ti salaysay ni Mateo a pinakdaaran ni Jesus dagiti pasurotna nga agtalinaedda nga alerto: “Agtultuloykayo nga agbantay, ngarud, agsipud ta saanyo nga ammo no ania nga aldaw nga umay ti Apoyo. . . . Paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.” Kinunana manen: “Agtultuloykayo nga agbantay, ngarud, agsipud ta saanyo nga ammo ti aldaw wenno uray ti oras.”—Mat. 24:42-44; 25:13.

3. Apay a masapul nga ipangagtayo ti pakdaar ni Jesus?

³ Kas Saksi ni Jehova, masapul nga ipapusotayo ti pakdaar ni Jesus. Ammotayo nga agbibiagtayon iti maudi a paset ti “tiempo ti panungpalan” ket dandanin mangrugi ti “dakkel a rigat”! (Dan. 12:4; Mat. 24:21) Makitkitatayo dagiti makapadanag a gubgubat, umad-adu dagiti immoral ken managdakdakes, maal-allilaw dagiti tattao gapu iti relihion, adu ti agbisin, adu ti matmatay gapu iti sakit, ken adu dagiti ginggined a mapaspasamak iti intero a lubong. Ammotayo nga itungtungpal dagiti adipen ni Jehova ti panangikasaba iti Pagarian iti sadinoman. (Mat. 24:7, 11, 12, 14; Luc. 21:11) Magagarantayo a mangur-uray iti iyaay ti Apo ken ti pannakaitungpal ti pagayatan ti Dios.—Mar. 13:26, 27.

4. (a) Apay a maikunatayo nga ammon ni Jesus no kaano a mapasamak ti Armagedon? (b) Nupay saantayo nga ammo no kaano a mangrugi ti dakkel a rigat, ania ti masiguradotayo?

⁴ Ammotayo nga adda naikeddeng nga oras iti panangrugi ti tunggal sesion ti kombension. Ngem aniaman ti aramidentayo, saantayo a masigurado ti eksakto a tawen, nangnangruna ti aldaw ken oras, a panangrugi ti dakkel a rigat. Idi adda ni Jesus ditoy daga, kinunana: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mat. 24:36) Ngem adda itan ni Kristo idiay langit ken nadutokanen a makigubat iti lubong ni Satanas. (Apoc. 19:11-16) No kasta, ammon ni Jesus no kaano a mapasamak ti Armagedon. Ngem saantayo nga ammo. Masapul ngarud nga agtultuloytayo nga agbantay agingga nga umay ti dakkel a rigat. Inkeddengen ni Jehova no kaano ti eksakto nga idadateng ti panungpalan. Dandanin ti dakkel a rigat, ket “saanto a maladaw” ti panangrugina! (Basaen ti Habakuk 2:1-3.) Kasanotayo a masigurado dayta?

5. Mangted iti pagarigan a mangipakita a kanayon a matungpal dagiti padto ni Jehova iti eksakto a tiempo.

⁵ Kanayon a matungpal dagiti padto ni Jehova iti eksakto a tiempo! Panunotem ti eksakto a tiempo a panangispalna kadagiti Israelita manipud kadagiti Egipcio. Tuktukoyen ni Moises ti Nisan 14, 1513 B.C.E. idi kinunana: “Iti ngudo ti uppat a gasut ket tallopulo a tawen, naaramid a mismo itoy met laeng nga aldaw nga amin dagiti buyot ni Jehova rimmuarda manipud daga ti Egipto.” (Ex. 12:40-42) Nangrugi ti 430 a tawen idi nangrugi ti tulag ni Jehova ken Abraham idi 1943 B.C.E. (Gal. 3:17, 18) Idi agangay, kinuna ni Jehova ken Abraham: “Maammuamto a sigurado a ti bin-im agbalinto a ganggannaet nga agnanaed iti daga a saanda a kukua, ket kasapulanto nga agserbida kadakuada, ket dagitoy sigurado a parigatendanto ida iti uppat a gasut a tawen.” (Gen. 15:13; Ara. 7:6) Nalawag a nangrugi ti 400 a tawen a pannakaparigat idi 1913 B.C.E., idi linais ni Ismael ti mapuspusot idi a ni Isaac, ket nagpatingga  dayta idi pimmanaw dagiti Israelita iti Egipto idi 1513 B.C.E. (Gen. 21:8-10; Gal. 4:22-29) Wen, uppat a gasut a tawen sakbayna, inkeddeng ni Jehova ti tiempo nga isalakanna dagiti adipenna!

6. Apay a masiguradotayo nga isalakan ni Jehova dagiti adipenna?

⁶ Ni Josue ti maysa kadagiti naispal manipud Egipto. Impalagipna iti Israel: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo. Awan uray maysa a sao kadakuada ti napaay.” (Jos. 23:2, 14) Masiguradotayo a tungpalen met ni Jehova ti karina nga isalakannatayo inton dakkel a rigat. Nupay kasta, no kayattayo ti saan a mairaman iti pannakadadael daytoy a sistema, masapul nga agtultuloytayo nga agbantay.

7, 8. (a) Ania ti akem dagiti parabantay idi un-unana, ket ania ti masursurotayo iti dayta? (b) Mangted iti pagarigan iti mabalin a mapasamak no nakaturog dagiti parabantay bayat ti panawen ti panagbantayda.

⁷ Adda masursurotayo manipud iti nagkauna a tiempo maipapan iti kinapateg ti panagbalin a managbantay. Napalawlawan idi kadagiti nangato a pader dagiti dadakkel a siudad, kas iti Jerusalem. Dagiti pader ti mangsalaknib iti siudad manipud kadagiti manangraut. Adda met dagiti nangato a torrena a pagsiputan wenno pagpaliiwan iti aglawlaw. Aldaw ken rabii nga agpuesto dagiti parabantay kadagiti pader ken ruangan. Pakdaaranda dagiti agnanaed iti siudad iti aniaman a peggad. (Isa. 62:6) Biag ti nakataya, isu a masapul nga agtalinaed a siririing ken alerto dagiti parabantay.—Ezeq. 33:6.

⁸ Kinuna ti Judio a historiador a ni Josephus nga idi 70 C.E., nastrek dagiti soldado a Romano ti Torre ti Antonia, maysa a paset ti pader ti Jerusalem, gapu ta nakaturog dagiti parabantay kadagiti ruangan! Sinerrek dayta dagiti Romano ket napanda pinuoran ti templo. Dayta ti pagpatinggaan ti kakaruan a rigat a napasaran ti Jerusalem ken ti nasion dagiti Judio.

9. Ania ti saan nga ammo ti kaaduan a tattao ita?

⁹ Addaan iti “parabantay” ti kaaduan a nasion ita. Adda dagiti soldado nga agbambantay kadagiti beddeng ti pagilian ken agus-usar met ti dadduma kadagiti haytek a surveillance system. Bambantayanda ti asinoman a sumrek iti teritoriada ken dagiti kabusor a mamagpeggad iti pagilianda. Nupay kasta, dagiti laeng peggad manipud kadagiti gobierno nga inaramid ti tao wenno tattao ti masiputan dagitoy a “parabantay.” Saanda nga ammo ti kaadda ti nailangitan a Pagarian ti Dios ken ti ar-aramidenna babaen ken Kristo ken ti aramidento dayta iti dandanin pannakaukom ti amin a nasion. (Isa. 9:6, 7; 56:10; Dan. 2:44) Ngem no agbalintayo nga alerto ken managbantay iti naespirituan, nakasaganatayto inton dumteng dayta nga aldaw ti panangukom.—Sal. 130:6.

10, 11. (a) Ania ti masapul a pagannadantayo, ken apay? (b) Apay a patiem nga im-impluensiaan ti Diablo dagiti tattao tapno saanda nga ikankano dagiti padto iti Biblia?

¹⁰ Panunotem ti parabantay nga agpatnag a siririing. Nabannog ken makaturturogen no dandanin malpas ti panagbantayna. Kasta met, bayat nga umas-asidegtayo iti panungpalan daytoy a sistema ti bambanag, ad-adda a narigat para kadatayo ti agtalinaed a siririing. Makapaladingit no saantayo a makapagtultuloy nga agbantay! Usigentayo ita ti tallo a banag a no saantayo a naannad, posible a mamagbalin kadatayo a saan nga alerto ken nasiput.

 ¹¹ Pukpukawen ti Diablo ti interes dagiti tattao iti naespirituan. Sakbay unay ti ipapatay ni Jesus, namitlo a pinakdaaranna dagiti adalanna maipapan iti “agturay iti daytoy a lubong.” (Juan 12:31; 14:30; 16:11) Ammo ni Jesus nga agtultuloy a kullaapan ti Diablo ti panunot dagiti tattao tapno saanda a marikna ti kinaganat ti tiempo nga ipakpakita dagiti padto ti Dios maipapan iti masanguanan. (Sof. 1:14) Us-usaren ni Satanas ti sangalubongan nga imperio ti palso a relihion a mangbulsek iti pampanunot dagiti tattao. Ania ti madmadlawmo no makisaritaka iti dadduma? Saan kadi a ti Diablo “binulsekna ti pampanunot dagiti di manamati” maipapan iti um-umayen a panungpalan daytoy a sistema ti bambanag ken ti kinapudno nga agturturayen ni Kristo iti Pagarian ti Dios? (2 Cor. 4:3-6) Kasano kasansan a mangngegmo a kuna dagiti tattao, “Saanak nga interesado”? Adu ti saan nga interesado no ibagatayo ti pagtungpalan daytoy a lubong.

12. Apay a saantayo koma nga ipalubos a maallilawnatayo ti Diablo?

¹² Agtultuloyka koma nga agbantay uray saan nga interesado dagiti tattao. Ammom no anianto ti mapasamak. Insurat ni Pablo kadagiti padana a Kristiano: ‘Ammoyo nga umay ti aldaw ni Jehova,’ ken innayonna, “kas iti mannanakaw iti rabii.” (Basaen ti 1 Tesalonica 5:1-6.) Impakdaar ni Jesus: “Agtalinaedkayo a nakasagana, agsipud ta iti oras a saanyo nga ipagpagarup umay ti Anak ti tao.” (Luc. 12:39, 40) Dandanin allilawen ni Satanas dagiti tattao a patienda nga adda “talna ken talged.” Impluensiaanna ida a panunotenda a nasayaat ti mapaspasamak iti lubong. Datayo ngay? No ‘agtalinaedtayo a siririing ken sipupuot,’ saantayto a pakakigtotan ti aldaw ti panangukom a kas iti iyaay ti “mannanakaw.” Gapuna, masapul nga inaldaw a basaentayo ti naisurat a Sao ti Dios ken utobentayo ti ibagbaga ni Jehova kadatayo.

13. Kasano nga ap-apektaran ti espiritu ti lubong dagiti tattao, ket kasanotayo a maliklikan dayta a makadangran nga impluensia?

¹³ Mangpaturog iti naespirituan ti espiritu ti lubong. Adu a tattao ti makumikom kadagiti inaldaw nga aktibidadda isu a saanda a “sipapanunot iti naespirituan a kasapulanda.” (Mat. 5:3) Kanayon a pampanunotenda dagiti material a bambanag a mangpennek iti “derrep ti lasag ken ti derrep dagiti mata.”  (1 Juan 2:16) Kasta met, gapu iti industria ti paglinglingayan, pagay-ayat dagiti tattao ti ‘panagragragsak,’ ket kumarkaro dayta iti tinawen. (2 Tim. 3:4) Gapuna, imbaga ni Pablo kadagiti Kristiano a masapul a saanda koma nga agplano a “nasakbay maipaay kadagiti derrep ti lasag,” a dayta ti mangpaturog iti naespirituan.—Roma 13:11-14.

14. Ania a pakdaar ti masarakantayo iti Lucas 21:34, 35?

¹⁴ Imbes nga agpaimpluensiatayo iti espiritu ti lubong, ti koma espiritu ti Dios ti mangimpluensia iti biagtayo. Babaen iti dayta, nalawag nga imbaga ni Jehova dagiti bambanag a mapasamak iti masanguanan. ^[1] (1 Cor. 2:12) Ngem ammotayo a mabalin a dagiti gagangay a bambanag ti mamagbalin iti maysa a saan a siririing iti naespirituan, ket mabalin a masinga dagiti naespirituan nga aktibidadtayo. (Basaen ti Lucas 21:34, 35.) Mabalin nga uyawendatayo ti dadduma gapu ta agtultuloytayo nga agbantay, ngem saantayo koma a liplipatan ti kinaganat ti panawen. (2 Ped. 3:3-7) Imbes ketdi, masapul a kanayon a makigimongtayo a kadua dagiti kapammatiantayo, ta sadiay nga adda ti espiritu ti Dios.

15. Ania ti napasamak kada Pedro, Santiago, ken Juan, ket kasano a mabalin a mapasamak met dayta kadatayo?

¹⁵ Ti kinaimperpektotayo mabalin a pakapuyennatayo nga agtalinaed nga alerto. Ammo ni Jesus a ti imperpekto a tao nalaka laeng a tumulok kadagiti pagkapuyanna. Usigentayo ti napasamak iti rabii sakbay a mapapatay ni Jesus. Tapno mataginayonna ti kinatarnawna, kiniddawna nga isu ket patibkeren ti nailangitan nga Amana. Imbaga ni Jesus kada Pedro, Santiago, ken Juan nga ‘agtultuloyda nga agbantay’ bayat ti panagkararagna. Ngem saanda a nakita ti kinaserioso dayta. Imbes nga agbantayda para iti Apoda, timmulokda iti tarigagay ti lasagda ket nakaturogda. Nabannog met idi ni Jesus, ngem nagtalinaed a siririing ken nagkarkararag iti Amana. Kasta met koma ti inaramid dagiti kakaduana.—Mar. 14:32-41.

16. Sigun iti Lucas 21:36, kasanotayo nga ‘agtalinaed a siririing’ kas imbilin ni Jesus?

¹⁶ Saan laeng a basta panagtarigagay a mangaramid iti umiso ti kasapulan tapno ‘agtalinaedtayo a siririing’ iti naespirituan. Sumagmamano nga aldaw sakbay ti napasamak iti hardin ti Getsemani, imbaga ni Jesus kadagiti isu met laeng nga adalan nga agkararagda ken Jehova. (Basaen ti Lucas 21:36.) Gapuna, tapno makapagtultuloytayo nga agbantay iti naespirituan, masapul met a kanayon nga alertotayo iti panagkararag.—1 Ped. 4:7.

17. Kasanotayo a masigurado a nakasaganatayo iti dandanin mapasamak iti masanguanan?

¹⁷ Gapu ta imbaga ni Jesus a ti panungpalan ket umay ‘iti oras a saantayo nga ipagarup nga isu dayta,’ saan ngarud nga ita ti panawen tapno maturogtayo iti naespirituan; saan a panawen tapno gun-odentayo dagiti tartarigagayan ti lasagtayo nga ilusion ken arapaap nga ituktukon ni Satanas ken ti lubongna. (Mat. 24:44) Babaen iti Biblia, ibaga kadatayo ti Dios ken ni Kristo ti isagsaganada para kadatayo iti masanguanan ken no kasano a makapagtultuloytayo nga agbantay. Masapul koma a sipapanunottayo iti espiritualidadtayo, iti relasiontayo ken Jehova, ken iti panangipangpangrunatayo iti Pagarian. Masapul koma a nasiputtayo iti tiempo ken paspasamak tapno makapagsaganatayo iti aniaman a mapasamak. (Apoc. 22:20) Biagtayo ti nakataya!