1, 2. Ania nga okasion ti kangrunaan a mamagkaykaysa iti 2018, ken apay? (Kitaen ti ladawan iti rugi ti artikulo.)

INTON Marso 31, 2018, bayat a lumlumnek ti init, agtataripnongto dagiti adipen ti Dios ken ti adu nga interesado para iti tinawen a panangselebrar iti Pangrabii ti Apo. Minilionto ti agtataripnong tapno rambakanda ti Pananglaglagip iti ipapatay ni Kristo. Iti kada tawen, daytoy nga okasion ti kangrunaan a mamagkaykaysa kadagiti tattao iti intero a daga!

² Maragsakan la ketdi ni Jehova ken ni Jesus a makakita iti minilion a tattao iti kada oras iti nagduduma a paset ti daga nga umatender iti daytoy espesial nga okasion agingga nga agleppas dayta nga aldaw. Impakpakauna ti Biblia a ‘maysa a dakkel a bunggoy, nga awan ti tao a makabilang, manipud iti amin a nasion, tribu, ili, ken pagsasao’ ti mangipukkaw: “Ti pannakaisalakan utangmi iti Diostayo, a situtugaw iti trono, ken iti Kordero.” (Apoc. 7:9, 10) Nagsayaat ta maidaydayaw ni Jehova ken ni Jesus babaen ti tinawen a pannakaselebrar ti Memorial!

3. Ania dagiti saludsod a masungbatan iti daytoy nga artikulo?

 ³ Masungbatan iti daytoy nga artikulo dagitoy a saludsod: (1) Kas indibidual, kasanotayo nga agsagana para iti Memorial ken magunggonaan iti iyaatendertayo iti dayta? (2) Kasano a makatulong ti Memorial iti panagkaykaysa ti ili ti Dios? (3) Kasano a personal a makatulongtayo iti dayta a panagkaykaysa? (4) Addanto kadi maudi a Memorial? No adda, kaano?

4. Apay a napateg nga umatendertayo iti Memorial agingga a posible?

⁴ Utobem ti pagsayaatan ti iyaatender iti Memorial. Laglagipem a paset ti panagdaydayawtayo ti panagtataripnong iti kongregasion. Sigurado a makita ni Jehova ken ni Jesus dagidiay mangikagumaan nga umatender iti daytoy kapatgan a taripnong ti tawen. Siempre, kayattayo a makitada nga umatendertayo iti Memorial, malaksid laeng no imposible dayta gapu iti salun-attayo wenno iti kasasaadtayo. No ipakitatayo iti tignaytayo a napateg dagiti taripnong para iti panagdaydayaw, naynayonantayo ti rason a pagtalinaeden ni Jehova ti nagantayo iti ‘libro a pakalaglagipanna’—ti “libro ti biag”—a nakaisuratan ti nagan dagidiay addaan iti namnama nga agbiag nga agnanayon.—Mal. 3:16; Apoc. 20:15.

5. Kadagiti aldaw sakbay ti Memorial, kasano a ‘masuboktayo no addatayo iti pammati’?

⁵ Kadagiti aldaw sakbay ti Memorial, mabalin a mangiwayatayo iti panawen a mangsukimat a naimbag buyogen iti kararag ti relasiontayo ken Jehova. (Basaen ti 2 Corinto 13:5.) Kasano? Babaen ti ‘panangsuboktayo no addatayo iti pammati.’ Tapno maaramidtayo dayta, nasayaat no isaludsodtayo iti bagitayo: ‘Talaga kadi a patiek a pasetnak ti kakaisuna nga organisasion nga us-usaren ni Jehova a mangitungpal iti pagayatanna? Ar-aramidek kadi ti amin a mangikasaba ken mangisuro iti naimbag a damag ti Pagarian? Makita kadi iti tigtignayko a talaga a patiek nga agbibiagtayon iti maudi nga al-aldaw ken asidegen nga agpatingga ti panagturay ni Satanas? Nataginayonko kadi ti panagtalekko ken Jehova ken ni Jesus a kas idi indedikarko ti biagko ken Jehova a Dios?’ (Mat. 24:14; 2 Tim. 3:1; Heb. 3:14) Makatulong ti panangutob iti sungbat kadagita a saludsod tapno masukimattayo ti bagitayo.

6. (a) Ania ti kakaisuna a dalan nga agturong iti biag? (b) Kasano nga agsagsagana ti maysa a panglakayen para iti Memorial iti kada tawen, ken kasano a matuladmo dayta?

⁶ Agbasa ken agutobka kadagiti naibatay-Biblia a material a mangilawlawag iti kinapateg ti Memorial. (Basaen ti Juan 3:16; 17:3.) Ti kakaisuna a dalan nga agturong iti biag nga agnanayon ramanenna ti ‘panangam-ammo’ ken Jehova ken ‘panangwatwat iti pammati’ ken Jesus, ti bugbugtong nga Anakna. Kas panagsagana para iti Memorial, padasem ti maaddaan iti proyekto para iti panagadal a mangpasinged kenka ken Jehova ken ni Jesus. Kitaentayo ti ar-aramiden ti maysa a nabayagen a panglakayen. Iti adun a tawen, nagkolekta kadagiti artikulo iti Pagwanawanan maipapan iti Memorial ken iti ayat nga impakita ni Jehova ken ni Jesus kadatayo. Kadagiti lawas sakbay ti Memorial, basaenna dagita nga artikulo ken utobenna ti kinapateg dayta nga okasion. Pasaray nayonanna iti maysa wenno dua nga artikulo ti koleksionna. Nadlawna nga iti kada tawen, adda latta baro a masursurona tunggal basaenna dagitoy nga artikulo ken no basaen ken utobenna ti nakaeskediul a mabasa a paset ti Biblia iti lawas ti Memorial. Kapatgan iti amin, mariknana nga ad-adda nga umuneg ti panagayatna ken Jehova ken ni Jesus iti tunggal tawen. Makatulong ti kasta a proyekto para iti panagadal tapno ad-adda nga umuneg ti panagayat ken apresasionmo ken Jehova ken ni Jesus ket mabalin a makatulong dayta tapno ad-adda a magunggonaanka iti Memorial.

7. (a) Ania ti inkararag ni Jesus iti umuna a Pangrabii ti Apo? (b) Ania ti mangipakita a sinungbatan ni Jehova ti kararag ni Jesus?

⁷ Bayat ti umuna a Pangrabii ti Apo, inkararag ni Jesus nga agkaykaysa koma dagiti pasurotna ken matagiragsakda ti kas iti panagkaykaysada ken Amana. (Basaen ti Juan 17:20, 21.) Sinungbatan ni Jehova dayta a kararag ti ipatpategna nga Anak, ket ita, minilion ti mamati nga imbaon ni Jehova ti Anakna. Saan a kas iti dadduma a panagtataripnong ti ili ti Dios, ti Memorial ket naisangsangayan a pammaneknek iti panagkaykaysa dagiti Saksi ni Jehova. Iti intero a lubong, agtataripnong dagiti tattao a nagduduma ti pagilian ken pulida. Iti dadduma a lugar, karkarna wenno mauyaw ti narelihiosuan a panagtataripnong dagiti tattao a nagduduma ti pulida. Ngem makaay-ayo ken Jehova ken ni Jesus ti kasta a panagkaykaysa!

8. Ania a mensahe maipapan iti panagkaykaysa ti inted ni Jehova ken Ezequiel?

⁸ Kas ili ti Dios, ditay masdaaw iti panagkaykaysatayo. Kinapudnona, impakpakauna dayta ni Jehova. Usigentayo ti mensahena ken propeta Ezequiel maipapan iti panagtipon ti dua a baston, ti baston a “maipaay ken Juda” ken baston a “maipaay ken Jose.” (Basaen ti Ezequiel 37:15-17.) Inlawlawag ti “Salsaludsod Dagiti Agbasbasa” a naipablaak iti Hulio 2016 a Ti Pagwanawanan: “Nangted ni Jehova iti mensahe ken Ezequiel maipapan iti inkarina a panagkaykaysa ti nasion ti Israel idi nagsublida iti Naikari a Daga. Dayta a mensahe ipakpakaunana met ti panagkaykaysa ti ili ti Dios a nangrugi a mapasamak bayat ti maudi nga al-aldaw.”

9. Ania ti pammaneknek a kada tawen a matungtungpal iti Memorial ti padto ni Ezequiel?

⁹ Manipud idi 1919 agingga ita, in-inut nga inorganisar ken pinagkaykaysa manen ni Jehova dagiti napulotan, nga isimbolo ti baston a “maipaay ken Juda.” Kalpasanna, bayat a ti umad-adu a bilang dagidiay addaan iti naindagaan a namnama—dagidiay isimbolo ti baston a “maipaay ken Jose”—nakitiponda kadagiti napulotan, nagbalin daytoy dua a grupo a “maymaysa nga arban.” (Juan 10:16; Zac. 8:23) Inkari ni Jehova nga agtipon dagitoy dua a baston ket agbalindanto a maymaysa iti imana. (Ezeq. 37:19) Ita, agkaykaysa nga agserserbida iti sidong ti maymaysa nga Ari—ti naipadayag a ni Jesu-Kristo, ti naipadto a ‘David nga adipen’ ti Dios. (Ezeq. 37:24, 25) Dayta a napateg a panagkaykaysa a nadakamat iti Ezequiel ket nalawag a makita iti kada tawen no agtitipon dagiti napulotan a natda ken ti “sabsabali a karnero” iti Pananglaglagip iti ipapatay ni Kristo! Ngem kas indibidual, ania ti maaramidtayo tapno mapagtalinaed ken makatulongtayo iti dayta a panagkaykaysa?

10. Kasano a makatulongtayo iti panagkaykaysa ti ili ti Dios?

¹⁰ Ti maysa a pamay-an a makatulongtayo iti panagkaykaysa ti ili ti Dios ket ti panangpatanortayo iti kinapakumbaba. Idi adda ni Jesus ditoy daga, pinaregtana dagiti adalanna nga agbalinda a napakumbaba. (Mat. 23:12) No napakumbaba ti pusotayo, ditay itan-ok ti bagitayo a kas iti ar-aramiden ti lubong. Imbes ketdi, makatulong ti kinapakumbaba tapno agbalintayo a managpasakup kadagiti mangidadaulo. Napateg dayta iti panagkaykaysa ti kongregasion. Kangrunaanna, maragsakan ti Dios no napakumbabatayo, ta “busorenna dagiti natangsit, ngem mangted iti di kaikarian a kinamanangngaasi kadagiti napakumbaba.”—1 Ped. 5:5.

11. Kasano a makatulong kadatayo a mangyun-una iti panagkaykaysa ti panangutob iti kaipapanan dagiti emblema ti Memorial?

¹¹ Ti maikadua a pamay-an a makatulongtayo iti panagkaykaysatayo ket ti panangutob  iti kaipapanan dagiti emblema ti Memorial. Sakbay dayta nga espesial a rabii—ken nangruna iti dayta a rabii—panunotem a naimbag ti pateg ti di nalebaduraan a tinapay ken ti nalabaga nga arak. (1 Cor. 11:23-25) Ti tinapay irepresentarna ti awanan basol a bagi ni Jesus a naidaton, ket ti arak iladawanna ti naiparukpok a darana. Ngem saan la a dayta ti masapul a matarusantayo. Laglagipentayo a ti daton a subbot ni Kristo ramanenna ti dua a kadakkelan nga ebkas ti ayat—ti ayat nga impakita ni Jehova babaen ti panangipaayna iti Anakna para kadatayo, ken ti ayat nga impakita ni Jesus babaen ti situtulok a panangisakripisiona iti biagna para kadatayo. Matignaytayo a mangayat kadakuada no utobentayo ti ayatda. Ken ti ayat ti tunggal maysa kadatayo nga agkakapammatian para ken Jehova ket kas iti tali a mangreppet kadatayo ken mangpalagda iti panagkaykaysatayo.

12. Iti ilustrasion maipapan iti ari a nangpakawan iti utang, kasano nga inlawlawag ni Jesus a namnamaen ni Jehova a mangpakawantayo?

¹² Ti maikatlo a pamay-an a makatulongtayo iti panagkaykaysatayo ket ti sibubulos a panangpakawan iti sabsabali. No pakawanentayo dagiti nakasair kadatayo, ipakpakitatayo nga ap-apresiarentayo ti pannakapakawan dagiti basoltayo kas indibidual gapu iti daton a subbot ni Kristo. Usigem ti ilustrasion ni Jesus iti Mateo 18:23-34. Isaludsodmo iti bagim: ‘Matignayak kadi a mangyaplikar iti insuro ni Jesus? An-anusak kadi ken tartarusak dagiti kapammatiak? Nakasaganaak kadi a mangpakawan kadagiti nakabasol kaniak?’ Agpayso a saan nga agpapada ti kadagsen dagiti basol, ket dadduma kadagita ti narigat a mapakawan dagiti imperpekto a tattao. Ngem isuro ti ilustrasion no ania ti namnamaen ni Jehova kadatayo. (Basaen ti Mateo 18:35.) Inlawlawag ni Jesus a saannatayo a pakawanen ni Jehova no ditay pakawanen dagiti kakabsattayo no adda nainkalintegan a rason a pakawanentayo ida. Talaga a mamagpanunot dayta! Masalakniban ken mapagtalinaedtayo ti napateg a panagkaykaysatayo no pakawanentayo ti sabsabali kas iti insuro ni Jesus nga aramidentayo.

13. Kasano a makatulong iti panagkaykaysatayo no mannakikappiatayo?

¹³ No pakawanentayo ti sabsabali, pampaneknekantayo a mannakikappiatayo.  Laglagipentayo ti balakad ni apostol Pablo a masapul koma a ‘sipapasnek nga ikagumaantayo a salimetmetan ti panagmaymaysa ti espiritu a mamagkaykaysa a singgalut ti talna.’ (Efe. 4:3) Iti panawen ti Memorial ken nangnangruna iti rabii ti Memorial, panunotem a naimbag ti panangtratom iti sabsabali. Isaludsodmo iti bagim: ‘Nalawag kadi nga ipakpakitak a diak agimulmula iti sakit ti nakem? Pagaammodak kadi a mannakikappia ken mangyun-una iti panagkaykaysa?’ Nagpateg a sukimaten dagita bayat daytoy a tiempo ti tawen.

14. Kasano a maipakitatayo nga ‘agiinnanustayo iti ayat’?

¹⁴ Ti maikapat a pamay-an a makatulongtayo iti panagkaykaysatayo ket ti panangipakita iti ayat kas panangtulad ken Jehova, ti Dios ti ayat. (1 Juan 4:8) Ditay pulos kayat nga ibaga, “Mabalin nga anusak dagiti kakabsat, ngem dina kayat a sawen a kayatko ida”! Maikontra dayta iti balakad ni Pablo a masapul nga ‘agiinnanustayo iti ayat.’ (Efe. 4:2) Paliiwentayo ta saan a basta kinuna ni Pablo nga ‘agiinnanustayo.’ Innayonna nga aramidentayo dayta buyogen “iti ayat.” Adda nagdumaan dagita. Kadagiti kongregasiontayo, masarakantayo ti amin a kita ti tattao nga inyasideg ni Jehova kenkuana. (Juan 6:44) Gapu ta inyasideg ida ni Jehova kenkuana, sigurado a makaay-ayoda kenkuana. Adda kadi ngarud karbengantayo a mangibilang a saan a maikari iti ayattayo ti maysa a kapammatian? Rumbeng a ditay ipaidam ti ayat nga imbilin ni Jehova nga ipakitatayo!—1 Juan 4:20, 21.

15. Kasano nga ammotayo nga adda maudi a Memorial?

¹⁵ Addanto tiempo a maselebraran ti Memorial iti maudi a gundaway. Kasano nga ammotayo? Iti umuna a surat ni Pablo kadagiti taga-Corinto, insuratna kadagiti napulotan a Kristiano a babaen ti tinawen a pananglaglagip iti ipapatay ni Jesus, agtultuloy nga ‘iwarwaragawagda ti ipapatay ti Apo, agingga iti idadatengna.’ (1 Cor. 11:26) Ti sao nga ‘idadateng’ iti daytoy a teksto ket tumukoy iti isu met laeng a pasamak kas iti ‘iyaay’ a dinakamat ni Jesus iti padtona maipapan iti panungpalan. Kinunana maipapan iti umas-asidegen a dakkel a rigat: “Ti pagilasinan ti Anak ti tao agparangto iti langit, ket kalpasanna dagiti amin a tribu ti daga saplitendanto ti bagbagida iti panagun-unnoy, ket makitadanto ti Anak ti tao nga um-umay kadagiti ulep ti langit nga addaan pannakabalin ken dakkel a dayag. Ket [ni Jesus] ibaonnanto dagiti anghelna a buyogen ti dakkel nga uni ti trumpeta, ket urnongendanto a sangsangkamaysa dagiti pinilina manipud iti uppat nga angin, manipud iti maysa nga ungto ti langlangit agingga iti sabali nga ungtoda.” (Mat. 24:29-31) Daytoy a ‘pannakaurnong dagiti napili’ ket tumukoy iti tiempo inton ti amin a napulotan a Kristiano nga adda pay laeng ditoy daga awatendan ti nailangitan a gunggonada. Mapasamakto dayta kalpasan ti umuna a paset ti dakkel a rigat ngem sakbay ti gubat ti Armagedon. Kalpasanna, makikaduanto ken Jesus ti amin a 144,000 a mangparmek kadagiti ar-ari ti daga. (Apoc. 17:12-14) Ti maudi a Memorial ket ti Memorial a maselebraran sakbay ti ‘iyaay’ ni Jesus a mangurnong kadagiti napulotan a mapan idiay langit.

16. Apay a determinadoka nga umatender iti Memorial iti daytoy a tawen?

¹⁶ Determinadotayo koma a magunggonaan babaen ti itatabunotayo iti Memorial inton Marso 31, 2018. Kiddawentayo met ken Jehova nga agtultuloy a makatulongtayo iti panagkaykaysa ti ilina! (Basaen ti Salmo 133:1.) Laglagipentayo nga addanto tiempo a selebrarantayo ti Memorial iti maudi a gundaway. Kabayatanna, aramidentayo ti amin a kabaelantayo nga umatender, ken ipategtayo ti makaay-ayo a panagkaykaysa a tagtagiragsakentayo bayat ti Memorial.