1. Uray no ni Jehova ti Katan-okan, ania ti inyawisna iti dadduma?

NI Jehova ti Katan-okan, ti Namarsua iti amin a bambanag, Daydiay agnanayon ti kinasirib ken pannakabalinna. Naawatan ni Job dayta. Kalpasan a pinagsaludsodan ni Jehova ni Job maipapan iti amin a pinarsuana, simmungbat ni Job: “Naammuak a kabaelam nga aramiden amin a bambanag, ket awan ti kapanunotan a saanmo a kabaelan a ragpaten.” (Job 42:2) Maaramid ni Jehova ti aniaman a kayatna nga aramiden uray maymaysana. Ngem manipud pay idi damo, inawisnan ti dadduma a makipagtrabaho kenkuana tapno matungpal ti panggepna.

2. Ania a napateg a trabaho ti inyawis ni Jehova nga aramiden ni Jesus?

² Ti kaunaan a pinarsua ti Dios ket ti bugbugtong nga Anakna. Impalubos ni Jehova a makiraman ti Anakna a mangparsua iti dadduma pay a parsua. (Juan 1:1-3, 18) Kinuna ni apostol Pablo maipapan ken Jesus: “Babaen kenkuana, amin a sabsabali pay a bambanag naparsuada iti langlangit ken iti rabaw ti daga, ti bambanag a makita ken ti bambanag a di makita, uray pay no dagita ket trono wenno kinaapo wenno gobierno wenno autoridad.  Amin a sabsabali pay a bambanag naparsuada babaen kenkuana ken maipaay kenkuana.” (Col. 1:15-17) Gapuna, pinadayawan ni Jehova ti Anakna babaen ti panangiramanna kenkuana iti panamarsua ken babaen ti panangibagana iti dadduma ti napateg nga akem ti Anakna.

3. Ania ti impaaramid ni Jehova ken Adan, ken apay?

³ Inawis met ni Jehova dagiti tattao a makipagtrabaho kenkuana. Kas pagarigan, impalubosna a panaganan ni Adan dagiti animal. (Gen. 2:19, 20) Naragsakan la ketdi ni Adan a mangpaliiw kadagitoy a parsua, mangadal kadagiti kababalinda, ken mangikeddeng iti ipanaganna iti tunggal maysa! Mabalin koma a ni Jehova ti nangpanagan kadagiti animal gapu ta isu ti nangparsua kadagita. Ngem gapu iti ayat, pinalubosanna ni Adan a mangpanagan kadagitoy. Inted met ti Dios ken Adan ti gundaway a mamagbalin iti intero a daga a paraiso. (Gen. 1:27, 28) Ngem nakalkaldaang ta idi agangay, pinili ni Adan ti saan a makipagtrabaho iti Dios, a nangyeg iti didigra kenkuana ken iti amin nga annakna.—Gen. 3:17-19, 23.

4. Kasano a nakipagtrabaho ti dadduma iti Dios tapno maitungpal ti pagayatanna?

⁴ Idi agangay, inawis met ti Dios ti dadduma a tattao a makiraman iti pannakatungpal ti panggepna. Nagaramid ni Noe iti daong tapno maispal ti biagna ken ti pamiliana iti sangalubongan a Layus. Inruar ni Moises ti nasion ti Israel manipud Egipto. Indauluan ni Josue ti nasion ti Israel a sumrek iti Naikari a Daga. Imbangon ni Solomon ti templo ti Jerusalem. Ni Maria nagbalin nga ina ni Jesus. Amin dagitoy a matalek ken adu a dadduma pay nakipagtrabahoda ken Jehova tapno maitungpal ti pagayatanna.

5. Ania a trabaho ti mabalin a pakiramanantayo, ken kasapulan kadi nga iramannatayo ni Jehova iti daytoy a trabaho? (Kitaen ti ladawan iti rugi ti artikulo.)

⁵ Ita, aw-awisennatayo ni Jehova a naan-anay a suportarantayo ti Mesianiko a Pagarian. Adu a kita ti panagserbi iti Dios ti mabalin a pakiramanantayo. Dadduma ti saan a mabalin a pakiramanan ti amin a Kristiano, ngem mabalintayo amin ti makiraman iti trabaho a panangikasaba iti naimbag a damag ti Pagarian. Siempre, mabalin koma a saannatayon nga iraman ni Jehova iti daytoy a trabaho. Mabalin a direkta koma lattan a makisao kadagiti tattao ditoy daga. Kinuna ni Jesus a mabalin nga usaren ni Jehova dagiti bato a mangipukkaw iti mensahe maipapan iti Mesianiko nga Ari. (Luc. 19:37-40) Ngem impalubos ni Jehova nga agbalintayo a ‘katrabahuanna.’ (1 Cor. 3:9) Insurat ni apostol Pablo: ‘Yantangay makipagtrabtrabahokami kenkuana, ipakaasimi met kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna.’ (2 Cor. 6:1) Ti pannakipagtrabaho iti Dios ket maysa a naisangsangayan a dayaw a mangyeg kadatayo iti ragsak. Usigentayo ti sumagmamano a makagapu.

6. Kasano nga inladawan ti inauna nga Anak ti Dios ti riknana a makipagtrabaho ken Amana?

⁶ Manipud pay idi un-unana, maragragsakan dagiti adipen ni Jehova a makipagtrabaho iti Dios. Sakbay nga immay ditoy daga, kinuna ti inauna nga Anak ti Dios: “Ni met laeng Jehova pinataudnak kas ti punganay ti dalanna . . . addaak idi iti sibayna kas nasigo a managobra, ket siak daydiay pakaay-ayatanna unay iti inaldaw, yantangay maragragsakanak iti sanguananna iti isuamin a tiempo.” (Prov. 8:22, 30) Siraragsak a nakipagtrabaho ni Jesus ken Amana, a pagragsakanna nga agpadpada ti naaramidanna ken ti pannakaammona a maay-ayatan ni Jehova kenkuana. Datayo ngay?

7. Apay a makaparagsak ti trabaho a panangasaba?

⁷ Kinuna ni Jesus nga agpadpada a naragsak ti mangted ken umawat. (Ara. 20:35)  Maragsakantayo nga immawat iti kinapudno ken maragsakantayo met a mangiranud iti kinapudno iti dadduma. No ibagatayo iti sabsabali ti kinapudno a linaon ti Biblia, makitatayo a maragsakan dagiti mabisin iti naespirituan no maawatanda ken apresiarenda ti Diostayo ken dagiti nagpateg a kinapudno a linaon ti Saona. Maayatantayo a makakita iti panagbalbaliwda, saan laeng nga iti panagpampanunotda no di ket uray iti panagbiagda. Mabigbigtayo a nagpateg nga iranudtayo ti naimbag a damag. Naluktan ti gundaway a maaddaan iti agnanayon a biag dagiti tattao a makikappia iti Dios. (2 Cor. 5:20) Awanen ti trabaho a naragragsak pay ken makapnek unay a mabalin a pakiramanantayo no di ti panangtulong kadagiti tattao a mangbalbaliw iti biagda nga agresulta iti panagbiagda nga agnanayon.

8. Ania ti kinuna ti dadduma maipapan iti ragsak ti makipagtrabaho ken Jehova?

⁸ Nupay maragsakantayo no dumngeg dagiti kasabaantayo, maragsakantayo met a makaammo a maparparagsaktayo ni Jehova ken ap-apresiarenna ti panangikagumaantayo nga agserbi kenkuana. (Basaen ti 1 Corinto 15:58.) Kinuna ni Marco a taga-Italy: “Maragragsakanak ta ammok nga ipapaayko ti amin a kabaelak nga agserbi ken Jehova, saan nga iti maysa a makalipat kadagiti naaramidak.” Kinuna met ni Franco nga agserserbi met idiay Italy: “Babaen ti Saona ken kadagiti naespirituan a probision nga ipapaayna, inaldaw nga ipalpalagip ni Jehova nga ay-ayatennatayo ken napateg kenkuana ti amin nga ar-aramidentayo, uray no mariknatayo a kasla awan serbina ti maar-aramidantayo. Ti pannakipagtrabahok iti Dios ti mangipapaay iti ragsak ken panggep iti biagko.”

9. Kasanom a deskribiren ti relasion ni Jehova ken ni Jesus, ken apay?

⁹ No makipagtrabahotayo kadagiti ipatpategtayo, sumingedtayo kadakuada ken ad-adda a maam-ammotayo ida ken dagiti kababalinda. Maammuantayo saan laeng a ti kayatda nga aramiden no di ket no kasano nga aramidenda pay dayta. Nakipagtrabaho ni Jesus ken Jehova iti nalabit binilion a tawen, isu a naaddaanda iti napalalo a panagayat ken panangipateg iti maysa ken maysa. Maipapan iti kinasingedda, kinuna ni Jesus: “Siak ken ti Ama maymaysakami.” (Juan 10:30) Tinagiragsakda ti nagsayaat a panagkaykaysa, ta kanayon nga agtunosda no agtrabahoda.

10. Apay a sumingedtayo iti Dios ken iti sabsabali no mangasabatayo?

¹⁰ Babaen ti kararag, kiniddaw ni Jesus ken Jehova nga aywananna dagiti adalanna. Apay? Inkararagna: “Tapno maymaysada koma a kas kadata.” (Juan 17:11) No annurotentayo dagiti pagalagadan ti Dios ken mangasabatayo, maammuantayo dagiti nagsasayaat a galadna. Maammuantayo no apay a nainsiriban nga agtalektayo kenkuana ken no apay a surotentayo ti panangidalanna. No umadanitayo iti Dios, umadani met kadatayo.  (Basaen ti Santiago 4:8.) Sumingedtayo met kadagiti naespirituan a kakabsattayo gapu ta agpapada dagiti pakarigatan ken pagragsakantayo ken uray dagiti kalattayo. Wen, agkakaduatayo nga agtrabaho, agragsak, ken agibtur. Kinuna ni Octavia a taga-Britain: “Ti pannakipagtrabahok ken Jehova ti nangpasinged kaniak iti sabsabali, gapu ta ti panaggagayyemmi ket saanen a gapu ta agaammokami no di ket maymaysa ti kalat ken panggepmi.” Kasta met kadi ti mariknam? Saan kadi nga ad-adda a sumingedka iti sabsabali no makitam nga ikagkagumaanda a paragsaken ni Jehova?

11. Apay nga ad-adda pay a sumingedtayo ken Jehova ken kadagiti kakabsattayo idiay baro a lubong?

¹¹ Mabalin a napalalo ti panagayattayo iti Dios ken iti padatayo a tao ita, ngem nakarkaronto pay ti panagayattayo inton baro a lubong. Panunotenyo ti trabahotayo iti masanguanan! Abrasaentayto dagiti mapagungar ken sursuruantayo ida kadagiti daldalan ni Jehova. Pagbalinentayo a paraiso ti daga. Nagdakkel a trabaho dayta, ngem nakaragragsakto ti agtitinnulong nga agtrabaho bayat nga in-inut nga agbalintayo a perpekto iti sidong ti Mesianiko a Pagarian. Nakasingsingedto ti amin a tao iti maysa ken maysa ken iti Dios, a sigurado a ‘pennekennanto ti tarigagay ti tunggal sibibiag a banag.’—Sal. 145:16.

12. Kasano nga agbalin a proteksion ti panangasaba?

¹² Masapul a salaknibantayo ti relasiontayo ken Jehova. Ngamin, agbibiagtayo iti lubong nga iturturayan ni Satanas a Diablo ken imperpektotayo, isu a nalakatayo a maimpluensiaan iti di umiso a panagpampanunot ken kababalin ti lubong. Mayarig ti espiritu ti lubong iti ayus ti karayan a mangyanud kadatayo iti ditay kayat a pagturongan. Tapno saantayo a mayanud, ikagumaantayo a subaen ti ayus. Kasta met, kasapulan ti panagregget tapno saannatayo a mayayus ti espiritu ti lubong ni Satanas. No kaskasabaantayo ti sabsabali, ipampamaysatayo dagiti napateg ken makagunggona a naespirituan a bambanag, saan a dagiti mangpakapuy iti pammatitayo. (Fil. 4:8) Tumibker ti pammatitayo no mangasabatayo, ta mapalagipantayo kadagiti kari ti Dios ken dagiti naayat a pagalagadanna. Tulongannatayo met a kanayon a mangisuot iti naespirituan a kabaltayo.—Basaen ti Efeso 6:14-17.

13. Ania ti komento ti maysa a kabsat idiay Australia maipapan iti panangasaba?

¹³ No kanayontayo a mangasaba ken makiraman iti dadduma a naespirituan nga aktibidad, saantayo unay a mapanunot dagiti problematayo, ket makatulong dayta tapno masalaknibantayo. Kinuna ni Joel a taga-Australia: “Makatulong kaniak ti panangasaba tapno sipapanunotak kadagiti mapaspasamak. Maipalagip kaniak dagiti problema a pakaipaspasanguan dagiti tattao ken dagiti pagimbagan ti panangyaplikarko kadagiti prinsipio ti Biblia. Tultulongannak ti panangasaba nga agtalinaed a napakumbaba ken mangipapaay kaniak iti gundaway nga agtalek ken Jehova ken kadagiti kakabsatko.”

14. Apay a ti panagtultuloytayo a mangasaba ket mangipakita nga agtigtignay ti espiritu ti Dios kadatayo?

¹⁴ Ti panangasaba pabilgenna met ti pammatitayo a tultulongannatayo ti espiritu ti Dios. Panunotem: Ipapanmo a naikkanka iti trabaho nga agiwaras iti nasustansia a tinapay iti lugaryo. Awan ti sueldom ken saan met a maisubli ti nagastom. Ngem naammuam nga adu ti saan a mangayat iti inwarasmo a tinapay ken kaguradaka pay ti dadduma gapu ta nagiwaraska. Kasano kabayag nga itultuloymo nga aramiden dayta a trabaho? No maupayka iti negatibo a reaksion dagiti tattao, mabalin a sumardengkan a  mangaramid iti dayta. Ngem adu kadatayo ti nagtultuloy a nangasaba iti adu a tawen iti bukodtayo a gastos ken uray lalaisen ken uy-uyawendatayo dagiti saan a managyaman a tattao. Saan kadi nga ipakita dayta nga agtigtignay ti espiritu ti Dios kadatayo?

15. Kasano a ti panangikasaba iti naimbag a damag ket mainaig iti panggep ti Dios para iti tao?

¹⁵ Kasano a ti panangikasaba iti naimbag a damag ket maitunos iti panggep ni Jehova para kadagiti tattao? Pinanggep ti Dios nga agnaed dagiti tattao ditoy daga iti agnanayon. Nupay nagbasol ni Adan, saan a binaliwan ni Jehova ti panggepna. (Isa. 55:11) Imbes ketdi, inyurnosna a maispal ti tao iti basol ken ipapatay. Maitunos iti dayta a panggep, immay ni Jesus ditoy daga ket insakripisiona ti biagna para kadagiti natulnog a tattao. Ngem tapno agbalinda a natulnog, masapul a maawatanda ti kalkalikaguman ti Dios kadakuada. Gapuna, insuro met ni Jesus kadagiti tattao dagiti kalikaguman ti Dios ken imbilinna kadagiti adalanna nga aramidenda met dayta. No tulongantayo ti sabsabali nga agbalin a gayyem ti Dios, makiramramantayo a direkta iti naayat nga urnos ti Dios a mangispal kadagiti tattao manipud iti basol ken ipapatay.

16. Kasano a mainaig ti panangasabatayo iti kadakkelan a bilin ti Dios?

¹⁶ Ti panangtulong iti dadduma a manggun-od iti biag nga agnanayon ipakitana nga ay-ayatentayo ti padatayo a tao ken ni Jehova, a “ti pagayatanna ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Tim. 2:4) Idi naisaludsod ken Jesus no ania ti kadakkelan a bilin a naited iti nasion ti Israel, kinunana: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’” (Mat. 22:37-39) No mangasabatayo, agtultulnogtayo kadagita a bilin.—Basaen ti Aramid 10:42.

17. Ania ti makunam iti pribilehio a panangikasaba iti naimbag a damag?

¹⁷ Talaga a nabendisionantayo! Inikkannatayo ni Jehova iti trabaho a mangyeg kadatayo iti ragsak, mangpasinged kadatayo kenkuana ken iti sabsabali, ken mangsalaknib iti espiritualidadtayo. Mangted met kadatayo iti gundaway a mangayat iti Dios ken iti padatayo a tao. Nagduduma ti kasasaad dagiti adipen ti Dios iti intero a daga. Ngem ubing man wenno nataengan, nabaknang wenno napanglaw, napigsa wenno nakapuy, minilion ti mangbirbirok iti pamay-an a mangiranud iti patpatienda iti sabsabali. Mabalin nga umanamongka iti imbaga ni Chantel a taga-France: “Ti kabilgan a Persona iti uniberso, ti Namarsua iti amin a banag, ti naragsak a Dios, kinunana kaniak: ‘Mapanka! Agsaoka! Agsaoka para kaniak, agsaoka a naimpusuan. Itedko kenka ti Biblia a Saok, ikkanka iti pigsak, tulong manipud langit, kakaduam ditoy daga, agtultuloy a panangsanay, ken umiso nga instruksion iti maitutop a tiempo.’ Talaga a nagdakkel a pribilehio ti panangaramid iti kidkiddawen ni Jehova kadatayo ken ti makipagtrabaho iti Diostayo!”