Saan a libro ti medisina ti Biblia, ngem mangted iti balakad a makatulong iti maysa a tao nga addaan iti problema iti mental a salun-at. Kitaem ti dadduma a pagarigan.

“Dagiti masakit ti agkasapulan iti doktor, saan a dagiti nasalun-at.”—MATEO 9:12.

Ibagbaga ti Biblia a mabalin a kasapulantayo no dadduma ti agpadoktor. Adu a tattao ti natulongan idi naammuanda ti umiso nga impormasion maipapan iti problemada iti mental a salun-at ken idi nagpadoktorda.

“Adda maited ti panangwatwat iti bagi.”—1 TIMOTEO 4:8, Ti Baro a Naimbag a Damag Biblia.

Dakkel ti maitulongna iti mental a salun-atmo ti panangpapigsam iti pisikal a salun-atmo. Ti dadduma kadagiti mabalinmo nga aramiden ket ti regular a panag-exercise, pannangan iti nasustansia, ken umdas a pannaturog.

“Ti naragsak a puso ket nasayaat nga agas, ngem ti naladingit nga espiritu ibusenna ti pigsa.”—PROVERBIO 17:22.

Rumagsaktayo no agbasatayo kadagiti makaparegta a salaysay iti Biblia ken no mangiplanotayo kadagiti kayatayo nga aramiden. No agpokuska kadagiti  positibo a bambanag ken panunotem nga agbaliwto met laeng ti situasion, sumayaat ti emosionmo bayat a lablabanam ti problemam iti mental a salun-at.

“Ti sirib adda kadagidiay naemma.”—PROVERBIO 11:2.

Mabalin a saanmon a kaya nga aramiden a siksika dagiti kayatmo nga aramiden, isu nga awatem ti tulong ti dadduma. Baka kayatdaka a tulongan dagiti gagayyem ken kapamiliam ngem saanda nga ammo ti aramidenda. Ibagam kadakuada no ania ti talaga a makatulong kenka. Saan koma a sobra ti ekspektarem nga aramidenda para kenka, ken kanayon nga agyamanka iti tulongda.

“Madlawko a kasla adda saan a normal iti marikriknak isu a nagpadoktorak. Nadayagnosna ti kondisionko. Nakatulong dayta tapno maakseptarko ti situasionko ken naammuak dagiti pagpiliak a pamay-an ti pannakaagasko tapno sumayaat ti salun-atko.”—Nicole, a addaan iti bipolar disorder.

“Nakatulong kaniak ti regular a panagbasami ken baketko iti Biblia tapno bigbigat pay lang, positibon ken makapabileg dagiti pampanunotek. Kadagiti aldaw a marigrigatanak, kaaduanna nga adda espesipiko a teksto a mangliwliwa kaniak.”—Peter, addaan iti depresion.

“Diak maibagabaga iti sabsabali ti maipapan iti sakitko ta mababainak unay. Ngem adda nadekket a gayyemko a mannakaawat ken naanus a dumdumngeg kaniak. Talaga a tinulongannak tapno sumayaat ti riknak ken tapno saanko a marikna nga agmaymaysaak.”—Ji-yoo, addaan iti eating disorder.

“Tinulongannak ti Biblia tapno mabalansek ti panagtrabaho ken panaginana. Nakatulong dagiti mabasbasak tapno malabanak dagiti problemak iti emosion a kanayon a mangparparigat kaniak.”—Timothy, addaan iti obsessive-compulsive disorder.