DAMDAMAG ITI LUBONG
Maipapan iti Africa
Adu nga organisasion ken tattao ti agtultuloy a mangikagkagumaan a mangpasayaat iti kalidad ti biag iti Africa. Ngem nagadu latta a problema ti mangap-apektar iti dayta a rehion.
Illegal a Pananganup iti Rhino
Idi 2013, agdagup iti 1,004 a rhino iti South Africa ti illegal a napapatay idinto ta 13 laeng idi 2007. Ngem nupay nakaad-adun ti suplay a sara ti rhino, umad-adu latta ti gumatgatang iti dayta isu a nangingina payen ti kada kilo ti kasta ngem iti balitok. Mabalin nga ilako ti maysa a sara agingga iti US$500,000.
PANUNOTEM: Kabaelan kadi dagiti gobierno a pukawen ti kinadakes?—Jeremias 10:23.
Di Maipulpulong a Pasuksok
Adda iti Makindaya nga Africa dagiti pagilian nga addaan iti kangatuan a bilang dagiti kaso ti panagpasuksok iti intero a lubong, kuna ti Transparency International. Ngem agarup 90% kadagiti nabiktima ti di mangipulpulong iti dayta. Kuna ti pannakangiwat dayta nga organisasion iti sangayna iti Kenya: “Kasla awan ti talek dagiti umili nga aksionan ti gobiernoda dagiti maipulong a korapsion.”
TI KUNA TI BIBLIA: “Ti pasuksok bulsekenna dagiti nalawag-panagkitana a tattao.”—Exodo 23:8.
Dagiti Africano nga Agin-internet
Dandani 20% kadagiti Africano ti manamnama nga agusar iti Internet inton agpatingga ti 2014, sigun iti International Telecommunication Union. Doble ti iyaadu ti bilang dagiti nagsuskribir iti mobile Internet iti Africa no ikompara iti sangalubongan nga average iti intero a lubong.
