Ni Mabel a taga-Argentina ket nakasarsaranta ken agtrabtrabaho idi kas physical-rehabilitation therapist. Idi 2007, nangrugin a mariknana a nalaka a mabannog ken inaldaw a nakaro ti panagsakit ti ulona. “Adun ti nagpadoktorak ken pinadaskon ti amin a klase ti agas,” kunana, “ngem awan ti nakatulong.” Kamaudiananna, nagpa-MRI scan ket naduktalan nga adda tumor iti utekna. Kinunana: “Nakigtotak! Kasla diak patien nga adda kasta a sakitko.

“Sa la naawatak ti kinagrabe ti sakitko idi naoperaakon. Idi makariingak iti ICU, diak makagaraw. Nakamulenglengak laeng iti bobida. Sakbay ti operasion, nakasarsarantaak ken diak kasapulan ti tulong. Idi kuan, bigla metten nga awan ti maaramidak. Bayat ti kaaddak iti ICU, mariribukan ken maringgoranak iti uni dagiti medikal nga aparato, pang-emerhensia nga alarma, ken asug ti dadduma a pasiente. Panagriknak, bin-ig nga ut-ot ken panagrigrigat ti adda iti aglawlawko.

“Medio nakaungarak metten. Makapagnaakon uray no awan mangasistir kaniak ken pasaray makaruarak a sisiak. Ngem agdoble pay laeng dagiti makitak ken diak latta makontrol dagiti maselko.”

Agtalinaedka a positibo. Iti Proverbio 17:22, kuna ti Biblia: “Ti puso a narag-o nasayaat a pangagas, ngem ti espiritu a nadanar magmaganna dagiti tulang.” Malagip ni Mabel: “Bayat nga agpapaungarak, napasarak dagiti napadasan dagiti mismo a pasientek idi. Nakaut-ut-ot dagiti ehersisio ket no dadduma, kasla kayatkon ti sumuko. Masapul a pilitek ti bagik a mangiwaksi iti kasta a negatibo a kapanunotan ta ammok a nasayaatto met laeng dagiti pagbanagan ti panagreggetko.”

Tapno makaibturka, kanayon a panunotem dagiti mangted kenka iti namnama. “Naammuak iti Biblia no apay a mapasamak dagiti trahedia,” kuna ni Mabel. “Ngem ammok met nga iti tunggal aldaw nga aglabas, as-asidegtayon iti tiempo inton agnanayon a mapukawen ti ut-ot.” *

Laglagipem a maseknan kenka ti Dios. (1 Pedro 5:7) Malagip ni Mabel no kasano a nakatulong kenkuana dayta: “Idi inserrekdakon iti pagoperaan, napaneknekak ti kinaagpayso ti kinuna ti Dios iti Isaias 41:10: ‘Dika agbuteng, ta addaak kenka.’ Kimmalma ti riknak ta ammok a maseknan ni Jehova a Dios iti mapaspasamak kaniak.”

Ammom kadi? Isursuro ti Biblia nga addanto tiempo a saanen a pulos nga agsakit ti amin a tattao.—Isaias 33:24; 35:5, 6.