ADDA kita ti Photuris a kulalanti a ti silawna wenno ti agsilaw a paset ti bagina ket nakalupkopan kadagiti di agbabatog ti panagririnnutapda a siksik. Dayta ti ad-adda a mamagraniag iti silaw a patauden ti insekto. *

Usigem: Naammuan dagiti managsirarak a dagiti siksik iti rabaw ti agsilaw a paset ti bagi ti dadduma a kulalanti ket kasla kadagiti saan nga agbabatog ti panagririnnutapda a tiles. Ti maysa nga ungto dagiti siksik ket nakatangad iti 3 a micrometer—naing-ingpis pay ngem iti 5% iti maysa a buok ti tao. Ngem gapu iti dayta a nagbassit a pannakaitangad dagiti siksik, ti lawag ti silaw ket agarup 50% a naranraniag ngem iti lawagna no agbabatog koma ti panagririnnutap dagiti siksik!

Mapasayaat kadi dayta a konsepto ti kinaepektibo ti light-emitting diodes (LEDs) a maus-usar kadagiti elektroniko nga alikamen? Tapno maammuan dayta dagiti sientista, kinalupkopanda dagiti LEDs kadagiti saan nga agbabatog a rutap nga umasping iti silaw ti kulalanti. Ti resultana? Naranraniag iti 55% ti lawag dagiti LEDs! Kuna ti physicist a ni Annick Bay: “Ti kapapatgan a paset daytoy a trabaho ket ti panangipakitana a nagadu ti masursurotayo iti panangadal a naimbag iti nakaparsuaan.”

Ania ti makunam? Babaen kadi iti ebolusion a timmaud ti silaw ti Photuris a kulalanti? Wenno nadisenio dayta?