MAKAARAMID dagiti agkomkompiuter iti nagadu a digital data a maipempen ken mabalin a mausar manen no kasapulan. Mangnamnama dagiti sientista a mabaliwanda ti agdama a pamay-an ti panagipempen iti digital nga impormasion babaen iti panangtuladda iti DNA—ti adda iti nakaparsuaan a nasaysayaat nga amang a sistema iti panagipempen iti impormasion.

Usigem: Ti DNA nga adda kadagiti sibibiag a selula ket naglaon iti binilion a biolohikal nga impormasion. “Mabalintay a maala dayta iti tultulang dagiti burboran a dadakkel nga elepante . . . ken anagen dayta,” kinuna ni Nick Goldman iti European Bioinformatics Institute. “Nakabasbassit met dayta, nasedsed ken di agkasapulan iti bateria wenno koriente tapno makaipempen isu a nalaka nga idulin ken ibiahe.” Mabalin kadi nga ipempen iti DNA ti impormasion nga inaramid ti tao? Wen, sigun kadagiti managsirarak.

Dagiti sientista ket nagaramid iti artipisial a DNA a naglaon kadagiti text, images, ken audio files, no kasano a makaipempen iti impormasion ti digital media. Idi agangay, 100% ti kinaumiso ti naipempen nga impormasion a nairuar manen dagiti managsirarak. Babaen iti dayta a pamay-an, mamati dagiti sientista a dumtengto ti aldaw a ti 1 a gramo ti artipisial a DNA ket makaipempen iti impormasion a linaon ti agarup 3,000,000 a CD. Amin dagitoy nga impormasion ket mabalin met nga idulin iti ginasut no saan man a rinibu a tawen. Posible pay ketdi nga ipempen iti daytoy a sistema ti digital archive ti intero a lubong. Gapu iti dayta, ti DNA ti maawagan a “kasayaatan a hard drive” wenno alikamen a pagipempenan.

Ania ti makunam? Babaen kadi iti ebolusion a timmaud ti kapasidad ti DNA nga agipempen iti impormasion? Wenno nadisenio dayta?