Kada tawen, nasurok a 1 a milion ti matmatay ken agarup 50 a milion ti madangdangran gapu iti aksidente iti lugan. Ngem minilion nga ikan ti pinangen nga aglanglangoy a dandani dida pulos agdidinnungpar. Kasanoda a maaramidan dayta ken ania ti maisuroda kadatayo tapno malimitaran ti panagdidinnungpar dagiti lugan?

Usigem: Makabesado ti aglanglangoy a pinangen nga ikan ti aglawlawda babaen iti sentido ti panagkitada ken iti espesial a sentidoda a maaw-awagan iti lateral line. Usarenda dagita a sentido tapno madlawda ti ayan ti dadduma pay nga ikan iti aglawlawda sa agtignayda a maitunos iti sumaganad:

1. Aglangoy nga agkakaabay. Danggayanda ti kapartak ti kaabayda nga ikan ken kanayon nga adda distansiada kadakuada.
2. Umasideg. Asitganda dagiti ikan nga ad-adayo kadakuada.
3. Liklikan ti makadungpar. Baliwanda ti direksionda tapno dida masagid ti dadduma nga ikan.

Dagita a tallo nga abilidad ti aglanglangoy a pinangen nga ikan ti nangibasaran ti maysa a kompania ti lugan idiay Japan iti panangdiseniona iti sumagmamano a babassit a robot a lugan a makapagdaliasat nga inggrupo a dida agdidinnungpar. Imbes a mata, dagiti teknolohia ti komunikasion ti us-usaren dagiti robot; imbes a lateral line, agusarda iti laser a mangdetek iti distansia. Patien ti kompania a babaen iti dayta a teknolohia, makaaramiddanto kadagiti “di makadungpar” a lugan ken “makatulongda tapno maliklikan ti trapik ken saan a madadael ti aglawlaw.”

“Tinuladmi dagiti abilidad ti aglanglangoy a pinangen nga ikan babaen ti naan-anay a panangusarmi kadagiti kabaruan a teknolohia iti electronics,” kinuna ni Toshiyuki Andou, ti kangrunaan nga inheniero ti proyekto ti panagaramid iti robot a lugan. “Tangay agus-usartayo kadagiti lugan, adu ti masursurotayo kadagiti abilidad ti aglanglangoy a pinangen nga ikan.”

Ania ti makunam? Basta timmaud latta kadin ti aglanglangoy a pinangen nga ikan? Wenno nadisenio dayta?