Diak Kayat ti Agsigarilio!

DAYTA ti naituding a topiko ti salip iti panagsurat nga inesponsoran ti Missouri State Medical Association (MSMA) idiay Estados Unidos, a nakipasetan ti ginasut nga estudiante iti intero nga estado. Agarup 675 nga estudiante manipud iti 42 nga eskuelaan ti nakisalip. Ti 12 ti tawenna a ni Breanna ti nangabak, ket naipablaak iti pagiwarnak ti MSMA a Missouri Medicine ti nangabak a daniwna. Naaddaan met ni Breanna iti gundaway a mangbasa iti daniwna kadagiti delegado a timmabuno iti tinawen a kombension ti MSMA. Sakbay a binasana dayta, kastoy ti imbaga ni Breanna iti tallaong:

“Maysaak a Saksi ni Jehova, ket naggapu iti magasin nga Agriingkayo! ti amin nga impormasion iti daniwko. Kinapudnona, naggapu iti akkub daytoy a ruar ti ideya a nailanad iti paboritok a paset ti daniw. Makitayo ditoy ti maysa a bangabanga a nakaammal iti sigarilio sa napauluan iti: ‘Mailaklako ni Patay.’ Adu a tawenen a nakaipablaak ti magasin nga Agriingkayo! iti adun nga artikulo maipapan kadagiti peggad ti panagsigarilio.”

Saan nga agsigsigarilio dagiti Saksi ni Jehova. Patienda a ti inggagara a panagusar iti aniaman a produkto a mangrugit iti bagi ket panangipakita iti di panagraem iti sagut a biag agraman iti Namarsua iti dayta. (Aramid 17:24, 25) Dayta ti gapuna a sursurotenda daytoy Nainkasuratan a pammagbaga: “Dalusantayo koma ti bagbagitayo iti tunggal pakatulawan iti lasag ken iti espiritu.”​—2 Corinto 7:1.

Kas iti dadduma nga agtutubo a Saksi, ikagkagumaan ni Breanna ti agbiag a mayannurot kadagiti prinsipio ti Biblia. Amin dagita nga agtutubo sigurado a maparparagsakda ti Namarsua kadakuada.​—Proverbio 27:11.

[Ladawan iti panid 31]

Ni Breanna (14 itan ti tawenna) a mangig-iggem iti daniwna