Pagdagusan iti Kannag a Pakakitaan iti Namituen a Langit

BABAEN ITI MANNURAT TI AGRIINGKAYO! IDIAY FRANCIA

ADU ti kas kaniak a kaykayatda ti maturog iti kannag iti desierto ngem iti primera klase nga otel ta kayatda ngamin a matmatan buyogen ti panagsiddaaw ti namituen a langit. Dayta ti napadasak kalpasan ti panagpasiarko iti napintas nga abagatan ti Tunisia, iti Amianan nga Africa. Tinagiragsakko sadiay dagiti kinanam-ay ti maaw-awagan a pagdagusan iti kannag a pakakitaan iti namituen a langit​—ti tolda ti agakar-akar a pastor iti desierto.

Iti intero a pakasaritaan ti tao, minilion a naggapu iti adayo a luglugar kas kadagiti nalawa a tanap ti Asia, Sahara, ken Amianan nga America ti agnanaed kadagita a pagdagusan iti kannag a pakakitaan iti namituen a langit. Nupay adun a tribu ti napilitan a mangpanaw kadagiti toldada iti napalabas a siglo, rinibu kadagiti agakar-akar a pastor ti agtultuloy nga agdakdakiwas kadagiti desierto. Pulos a diakto malipatan ti aldaw a nakikaduaak kadakuada gapu iti agdinamag a kinamanagpasangbayda.

“Balbalay a Muldot”

Tapno mapasiarmi ti kampo dagiti agakar-akar, wenno ti maawagan a douar iti Amianan nga Africa, kaduak ti giyak a nagbiahe iti desierto babaen ti daan a Land Rover. Kalpasan ti panagsaludsodmi iti direksion iti sumagmamano a pastor, nasirpatmi met laengen ti kolor kape a sumagmamano a tolda. Apagdissaagmi, talaga a nasdaawkami iti naan-anay a kinaulimek ti desierto. Sigun kadagiti Bedouin, daytoy a kinaulimek ket mangpalimbong iti panunot. Sibabara a pinasangbaynakami ti nangsangaili kadakami. Pinastreknakami iti toldana nga agarup 12 a metro ti kaatiddogna, 5 a metro ti kalawana,  ken 2 a metro ti kangatona. Simrekkami iti paset ti tolda a naireserba kadagiti lallaki ken sangaili sa nagtugawkami iti nagpipintas nga aplag. Saan unay a makita ti bangir a sikigan ti tolda ta makurtinaan no adda sangaili. Nailatang dayta para iti pamilia ken iti panagluto. Bayat a nagiinnestoriakami, indasarannakami ti asawa ti nangpasangbay iti kadawyanda a tsa a yerbabuena, bayat a naggamay iti arina ti babbalasangda nga adda iti kosina ti tolda tapno aglutoda iti tinapay. Dagitoy naimas a tinapay ti maluto iti damili a maisaang iti dalikan.

Bayat ti saritaanmi, dinamagko iti nangpasangbay kaniak no kasanot’ pannakaaramid dagiti atep ken diding ti tolda. Naragsakan unay a nangilawlawag kadakami. Kinapudnona, saan a maymaysa a tela dagiti nausar, no di ket sumagmamano a pessat nga agarup 15 a metro ti kaatiddogna ken 50 a sentimetro ti kaakabana sa napagsasaip. Addaan iti 12 wenno 13 a pessat ti dadduma a daddadakkel a tolda. Kasano a naaramid dagitoy a pessat?

Kabayatan ti nadagaang a malem, nakitak ti maysa kadagiti babbalasang ti nangpasangbay kaniak nga agtugtugaw iti kadaratan iti sango ti tolda. Addaan iti sunay ken sisisigo nga agsunsunay iti muldot ti animal tapno pagbalinenna a napuskol a sag-ut. Maabel daytoy a sag-ut a mapagbalin nga atitiddog a pessat iti paidda a pagablan. Napariir ti tolda no saan unay a nasedsed ti inabel. Ngem no agtudo, bumlad dagiti sag-ut isu a masedsed ti inabel ket saanen a maslep ti pessat. Sigurado a maitutop ti Arabe a sao para iti tolda a bait esh-shaar, a “balay a muldot” ti kaipapananna.

Panangmantener

Kasano kapaut ti maysa a tolda? Dagiti agakar-akar aywananda a naimbag ti pagtaenganda iti desierto. Imbaga ti nangpasangbay kaniak nga agabel dagiti babbai iti sangakabbalayanna iti di kumurang a sangapessat iti kada tawen. Kaaduanna, iti kada tawen, masukatan iti baro ti nadadaelen a pessat. Isu a naan-anay a mapabaro ti walo a pessat ti tolda iti uneg ti walo a tawen. Iti dadduma a lugar, masatsat dagiti pessat sada baliktaden tapno ti napimpintas a bangirna ti makita iti ruar.

Kasano a maipatakder ti tolda? Matukalan ti tengnga ti tolda iti uppat nga adigi a sambaldoke, nupay sagpaminsan a maus-usar met ti dadduma a kayo. Agarup dua ket kagudua a metro ti dua a makintengnga nga adigi. Maipalok iti daga ti maysa a murdong ti tunggal adigi, ket maisulluop ti bangir a murdong ti tunggal adigi iti naarkosan a nammek a sallabawan a maysa ket kagudua agingga iti dua a pie ti kaatiddogna. Medio kurbado ti sallabawan, isu a kasla bungkatol ti kamelio ti tuktok ti tolda. Ti sikigan ken likudan ti tolda ket matukalan iti sumagmamano a babbabassit nga adigi. Rimmuarkami tapno makitami ti pannakaigalut ti tolda. Nakitami nga adda mangtengtengngel a tali a naaramid iti muldot ti kalding a nausar a mangigawid kadagiti pessat iti daga.

Iti likudan ti tolda, adda napuskol nga alad a nagango a babassit a kayo nga agpaay a salaknibda manipud kadagiti atap nga animal. Iti asideg ti tolda, adda naibaud nga asno ti pamilia. Iti labesna, iti uneg ti nagtimbukel nga alad, adda pangen dagiti karnero ken kalding, nga ay-aywanan a naimbag ti babbalasang ti nangpasangbay kadakami.

Simple a Panagbiag

Kalpasan a sinukimatko ti pannakaipatakder ti tolda, naidasaren dagiti tinapay, ket anian a nagimas no maisawsaw iti nasam-it a lana ti olibo. Idi kinitak ti aglawlaw, talaga a nasdaawak iti kinasimple ti panagbiag dagiti agakar-akar a tattao. Ti laeng lakasada ti kakaisuna a mueblesda ken sumagmamano a naabel a bag, aplag, ken ules. Naragsakan unay dagiti babbalasang ti nangpasangbay kaniak a nangipakita iti simple nga alikamenda a pangwarwar iti nakulkol a delana ken ti pagsunayda. Ngem malaksid iti dayta, manmanon ti material a sanikuada. Daytoy ti mangipalagip kaniak iti nainsiriban a sasao ti dumadaniw ken pastor a ni David nga apagbiit a nagnaed kadagiti tolda: “Ti maysa mangigabsuon iti bambanag ket saanna nga ammo no siasinonto ti mangummong kadakuada.”​—Salmo 39:6.

Adu nga agakar-akar​—a nalabit kaay-ayoda ti aglawlawda​—ti dumadaniw, ken kaay-ayoda ti makisalip iti panagdaniw. Kaay-ayoda met dagiti estoria ken proverbio. Iti biangko, inadawko ti sumagmamano a proverbio manipud iti Nasantuan a Kasuratan a napno iti perpekto a kinasirib “Daydiay mangyun-unnat iti langlangit kas iti napino a barabad, a mangyukrad kadakuada kas iti tolda a pagnaedan.” (Isaias 40:22) Dimtengen ti aldaw a nagpakadaak kadagiti nangpasangbay kaniak. Nagyamanak unay iti panangpasangbayda ken pampanunotek no kaano ngata manen a makasubliak iti maysa kadagitoy a napintas a pagdagusan iti kannag a pakakitaan iti namituen a langit.

[Ladawan iti panid 26]

Dagiti tinapay a malutluto iti dalikan

[Picture Credit Lines iti panid 26]

Musée du Sahara à Douz, avec l’aimable autorisation de l’Agence de mise en valeur du patrimoine et de promotion culturelle de Tunisie; dagiti kamelio: ZEFA/ROBERTSTOCK.COM