Panangandur iti Rigat

Kas naipadto iti Biblia, agbibiagtayon kadagiti “napeggad a tiempo a narigat a pakilangenan.” (2 Timoteo 3:1) Dagiti rigat iti pinansial, pamilia, ken sakit, ti sumagmamano laeng kadagiti parikut a mabalin a mangparparigat kenka. No dadduma, mabalin a mariknam a saanmon a maibturan. Ngem uray no adda rigat, maanduram dayta. Usigem ti sumaganad nga ilustrasion.

Agbibiag ti sabong a Teide violet iti kangato a dandani 3,700 a metro iti isla ti Tenerife iti taaw ti Makin-amianan nga Africa. Nalawag a makita iti subtropikal nga isla ti alimpatok ti bulkan ti Tenerife, a nakaipasurotan ti nagan daytoy a sabong. Kasla awan a pulos ti mulmula kadagiti makinngato a bakrasna. Ngem no primavera, ti marunrunaw a niebe ket makaipaay iti umdas a pagsibug, tapno agbiag manen dagitoy naandur a sabong ken mapapintasda ti makinngato a paset ti bulkan a kas iti lila a naikuentas. Kasla nalami ken nalaka a madadael daytoy a sabong, ngem agbiag ken umadu pay ketdi iti daytoy natikag ken narigat nga aglawlaw.

Kas iti Teide violet, kabaelam met nga anduran dagiti narigat a kasasaad. Nakatulongen ti Biblia iti adu a Saksi ni Jehova nga agandur uray kadagiti karirigatan a tiempo. Kas pagarigan, dagiti naibalud kadagiti kampo konsentrasion dagiti Nazi naanduranda ti kasasaadda. “Dakdakes ti pannakatratoda ngem iti sabali pay a grupo,” kinuna ti taga Sweden a periodista a ni Björn Hallström, “ngem gapu iti panamatida iti Dios, nasaysayaat ti panangdaerda ngem iti sabsabali.”

Iti aniaman a kasasaadmo, ti Biblia ket makatulong kenka a mangandur iti rigat. Makiumanka kadagiti Saksi ni Jehova iti lugaryo, wenno agsuratka iti adres iti panid 5 daytoy a magasin agpaay iti libre a panagadal iti Biblia.