Nakallalagip a Panagpasiar iti Pasdek a Nalukatan iti Publiko

BABAEN TI MANNURAT TI AGRIINGKAYO! IDIAY MEXICO

IDI Marso 15, 2003, nagtataripnong dagiti delegado manipud iti nasurok nga 40 a pagilian iti ruar laeng ti Mexico City gapu iti pannakaidedikar dagiti kaibangbangon a pasdek a makita iti baba. Dagitoy a pagtaengan ken pagimprentaan ket paset iti kabaruan a pannakapalawa ti sanga nga opisina dagiti Saksi ni Jehova ditoy Mexico.

Idi 1974, idi agarup 65,000 ti Saksi ditoy Mexico, naidedikar iti daytoy a disso ti kaunaan a pasdek ti sanga nga opisina. Bayat ti nakaskasdaaw nga iyaadu dagiti Saksi ditoy Mexico, naidedikar dagiti kanayonan a pasdek idi 1985 ken idi manen 1989. Ti kaudian a nainayon a buklen ti nasurok a sangapulo ket dua a baro a pasdek ti pakairamanan ti nagdakkel a pagimprentaan ken pagtaengan a mabalin a pagnaedan ken pagtrabahuan dagiti kameng iti sanga nga opisina a buklen ti agarup 1,300.

Dua a lawas kalpasan ti pannakaidedikar, nayurnos a maawis dagiti kaarruba nga asideg iti sanga nga opisina nga agpasiar iti pasilidad. Karaman dagiti lokal nga autoridad agraman dagiti estudiante ken mannursuro iti kabarbaro nga unibersidad iti ballasiw ti kalsada kadagiti naawis babaen iti surat. Adu iti sanga nga opisina ti nagpanunot no mano ngata dagiti umay.

Makaparagsak a Reaksion

Adda 272 nga immay, a pakairamanan dagiti estudiante ken opisial ti gobierno ken munisipio. Inapresiar dagiti sangaili ti kinapintas ken kinadalus dagiti pasilidad ken nagyamanda iti pannakapasangbayda. Iti libro a nagpirmaan dagiti sangaili, kastoy ti insurat ti maysa: “Ita pay laeng a napasiarko dagiti pasilidadyo. Nagpintas. Nabayagen a magustuan ken raraemenkayo, ngem ad-adda payen ita.”

Kinuna ti maysa pay a sangaili: “Pagarupenmi idi nga adda dakes a maar-aramid ditoy. Adda nagwaras a sayangguseng maipapan kadakayo. . . . Ngem agtalekak itan gapu kadagiti makitkitak. Maragsakanakto a mangpasangbay kadakayo iti pagtaengak agsipud ta patiek a makagunggona ti ar-aramidenyo.”

Maysa kadagiti propesor iti unibersidad a Saksi ti nanangna ti nangikuyog iti intero a dua a klasena tapno agpasiarda. Kinunana: “Kayatko a maammuan dagiti agtutubo ti ar-aramiden dagiti Saksi ni Jehova iti intero a lubong. Adda masursuroda iti panagpasiarda ditoy.” Ania ti reaksion dagiti agtutubo?

Kastoy ti insurat ti maysa: “Pagyamanan iti panangpasangbayyo. Diminto malipatan nga agkakaklase daytoy nga aldaw.” Kinuna pay ti maysa a dagiti tattao a saan a dumngeg kadagiti Saksi a sumarungkar kadakuada dida ammo ti agpayso a kinatao dagiti Saksi. “Rumbeng a ditay mangidumduma  ken agbalintayo a mannakaawat iti sabsabali,” kinunana. Imbaga ti maysa nga agtutubo a lalaki: “Sabali idi ti impresionko kadagiti Saksi, ngem ita makitak nga agtitinnulongkayo. Okupadokayo a kas kadagiti kuton.”

Uppat a polis ti karaman kadagiti sangaili. Babai ti maysa kadakuada ket kastoy ti insuratna: “Nakaskasdaaw ta awan ti maidumduma ditoy. Daydiay para dalus, hardinero, amin ket agpapada. . . . Nakaskasdaaw.”

Kinuna ti dua nga ubbing a lallaki nga agtawen iti siam ken sangapulo ken agnanaed iti asideg ti sanga nga opisina: “Nagpintas​—nakadakdakkel.” “Dagiti makina ti kangrunaan a magustuak. Nakaparpartak ti panagandarda. Kaay-ayok unay dagiti makina a mangputed iti papel.”

Maysa a doktor a mangas-asikaso kadagiti nakaro ti pannakadunorda, ni baketna, ken ti balasangda nga estudiante iti unibersidad ti karaman kadagiti sangaili. Kabayatan ti panagpasiarda, adu ti inyimtuod ti asawa ti doktor maipapan iti Biblia. Imbagana a natukay ti interesna gapu iti panangsarungkar dagiti Saksi ken ni tatangna a miembro iti ebanghelikal a relihion. Makaunget idi ni tatangna idinto ta kalmado latta dagiti Saksi. “Ita maawatakon no apay,” kinunana.

Imbaga ti doktor ken ti pamiliana a gapu iti panagpasiarda, nagbalbaliw ti panangmatmatda kadagiti Saksi. Gapu ta nadlaw ti nangipasiar kadakuada a ni José nga interesadoda, inawisna ida a tumabuno iti Memorial ti ipapatay ni Kristo ken intukonna nga iyadalanna ida iti Biblia. Immannugotda ket imbagada a kayatda ti umay iti sanga nga opisina tapno agadal.

Immayda iti simmaruno a lawas, isu a naragsakan ni José ken ni baketna a Beatriz a nangpasangbay kadakuada iti siledda. Nagadu ti saludsodda iti damo a panagadalda a nagpaut iti tallo ket kagudua nga oras! Timmabuno ti pamilia iti Memorial idi Abril 16​—agraman ti tatang ti asawa ti doktor​—wen, daydiay makaunget idi no sumarungkar dagiti Saksi!

Makaparagsak unay a maammuan a nagadu a naibasar iti Biblia a literatura ti inyawid dagiti sangaili​—500 amin, nangruna dagiti Biblia. Imbaga ti dadduma kadakuada nga idi pay laeng a naaddaanda iti Biblia.

Kastoy ti imbaga ti maysa a babai nga agnanaed iti kaparanget ken ni Armando, a mangtamtaming kadagiti maited a naibasar iti Biblia a literatura: “Manipud ita, makitimpuyogakon kadakayo a Saksi kadagiti gimongyo, ta ammok a daytoy ti kinapudno.” Sumagmamano a lawas kalpasanna, naragsakan ni Armando a nakakita iti daytoy a babai iti Kingdom Hall. Kunana: “Intugotna ti libro a nagun-odanna idi nagpasiar iti sanga nga opisina. Kinunana idi kinomustak: ‘Kas makitam, ar-aramidekon ti imbagak idi kenka nga aramidek.’”

Nagbiit a limmabas ti tallo nga aldaw a pannakailukat ti pasdek iti publiko. Ngem makaparegta unay. Ti pannakangngeg dagiti kameng ti sanga nga opisina iti nakuna dagiti damo a nagpasiar sadiay ti nakatulong kadakuada tapno ad-adda nga apresiarenda ti pribilehioda nga agserbi iti maysa kadagiti sanga nga opisina dagiti Saksi ni Jehova.

[Dagiti Ladawan iti panid 24, 25]

1. Talyer, 2. pasdek ti nadumaduma a serbisio, 3. pasdek a pagmanteneran, 4. dagiti pagtaengan, 5. pagimprentaan, 6. auditorium, 7. pasdek a pagpasangbayan kadagiti sangaili

[Dagiti Ladawan iti panid 25]

Dagiti estudiante ken polis ti karaman iti ginasut a nagpasiar iti pasdek a nalukatan iti publiko