Epektibo a Panangusar iti Agriingkayo!

IDI agtawen iti 16, ni Vanessa a maysa kadagiti Saksi ni Jehova idiay Estados Unidos ket masapul nga agaramid iti maysa a report para iti eskuelaan maipapan iti suheto nga anorexia. Kinunana: “Nagsukimatak, ngem bassit laeng ti nasarakak nga impormasion. Nakisaritaak kadagiti nagannak kaniak maipapan iti dayta, ket insingasingda a sukimatek dayta a suheto kadagiti publikasiontayo.”

Babaen ti panagsukimatna kadagiti publikasion dagiti Saksi ni Jehova, nakasarak ni Vanessa iti nagadu nga impormasion para iti reportna. “Ngem saan laeng a daytoy ti aramidek idi,” kunana. “Masapul met nga ipalawagko daytoy iti sango ti maestrak ken 20 nga estudiante!” Kasano a naaramidan ni Vanessa daytoy?

Kas kadagiti Saksi ni Jehova iti amin a paset ti lubong, ni Vanessa ket masansanay nga agpalawag iti publiko iti Teokratiko nga Eskuelaan ti Panagministro, a maar-aramid iti lokal a Kingdom Hall. “Babaen iti daytoy nga eskuelaan, nagsayaat ti pannakaisaganami a mapan mangasaba ken makisao iti sabsabali,” kuna ni Vanessa. “Mabalakadankami met maipapan kadagiti masapul a parang-ayenmi tapno nalaklaka a maawatandakami dagiti tattao.” Gapu iti kinagagetna, ania ti nagbanagan ti report ni Vanessa iti eskuelaan? “Nakaawatak iti kangatuan a grado,” kinunana.

Maysa ni Vanessa kadagiti adu nga agtutubo a sieepektibo a mangus-usar kadagiti naibatay iti Biblia a publikasion ken dadduma pay a naespirituan a pannakasanay. Makomendaran dagita nga agtutubo, ta an-annurotenda ti pammagbaga iti Eclesiastes 12:1: “Lagipem, itan, ti Naindaklan a Namarsuam kadagiti aldaw ti kinaagtutubom.”