Mabalin a kayatmo a dagus a baliwan ti amin a bambanag iti biagmo. Imbagam iti bagim, ‘Ita a lawas, isardengkon ti agsigarilio, isardengkon ti agsao iti dakes, isardengkon ti agpuyat, irugikon ti ag-exercise, irugikon ti mangan iti nasustansia, ken irugikon a tawagan da lolo ken lolak.’ Ngem no pampaminsanem nga aramiden ti amin a kayatmo, sigurado nga awan kadagita ti maaramidmo!

Ti tao a napakumbaba ket realistiko. Akseptarenna nga adda limitasion ti oras, pigsa, ken sanikuana. Isu nga imbes a paggigiddanenna a baliwan ti amin a bambanag, in-inut a balbaliwanna dagita.

No adda dagiti kayatmo nga iyugali wenno balbaliwan, maysamaysaem laeng nga aramiden dagita. Mabalin a makatulong dagitoy:

1. Mangaramidka iti dua a ‘listaan.’ Maysa para kadagiti nasayaat a kayatmo nga iyugali ken maysa para kadagiti madi a nakasanayam a kayatmo nga isardeng. Isuratmo amin a mapanunotmo.

2. Pagsasarunuem dagiti ilistam depende iti kinaimportanteda kenka.

3. Mangpilika iti uray maysa wenno dua iti kada listaan. Agpokuska kadagita. Kalpasanna, isarunom manen ti maysa wenno dua iti kada listaam.

Al-alistoka a makapagbalbaliw no suktam iti nasayaat ti madi a nakasanayam. Kas pagarigan, no ti nabayag a panagbuya iti TV ket inlistam iti madi a nakasanayam ken ti pannakikinnomusta kadagiti ay-ayatem ket inlistam iti kayatmo a mayugali, makatulong no kastoy ti determinasionmo: ‘Imbes a luktak a dagus ti TV no makaawidakon, kontakek ti maysa a gayyem wenno kabagiak tapno makikinnomustaak.’