1. Ania a nalatak a kararag ti pagsasaritaantayo?

MINILION ti makaammo iti nalatak a kararag a maawagan iti Amami, wenno ti Kararag ti Apo. Inusar ni Jesus daytoy tapno isurona kadagiti adalanna no kasano ti agkararag. Ania ti inkararagna? Ken apay a napateg dayta kadatayo ita?

2. Ania a tallo a napapateg a banag ti insuro ni Jesus nga ikararagtayo?

² Kinuna ni Jesus: “Kastoy ngarud ti panagkararagyo: ‘Amami nga adda iti langit, masantipikar koma [wenno, matrato koma a nasantuan] ti naganmo. Umay koma ti Pagariam. Maaramid koma ti pagayatam ditoy daga, a kas sadi langit.’” (Basaen ti Mateo 6:9-13.) Apay nga insuro ni Jesus nga ikararagtayo dagita a tallo a banag?​—Kitaen ti Endnote 20.

3. Ania ti masapul a maammuantayo maipapan iti Pagarian ti Dios?

³ Naammuantayo a Jehova ti nagan ti Dios. Ken naadaltayo no ania ti pagayatan ti Dios para kadagiti tattao ken iti daga. Ngem ania ti kayat a sawen ni Jesus idi imbagana: “Umay koma ti Pagariam”? Adalentayo no ania ti Pagarian ti Dios, no ania ti aramidenna, ken no kasano a pagbalinenna a nasantuan ti nagan ti Dios.

4. Ania ti Pagarian ti Dios, ken asino ti Ari iti dayta?

⁴ Nangipasdek ni Jehova iti nailangitan a gobierno ken pinilina ni Jesus nga agbalin nga Ari iti dayta. Awagan ti Biblia dayta a gobierno kas Pagarian ti  Dios. Ni Jesus “ti Ari dagidiay agturay kas ar-ari ken Apo dagidiay agturay kas appo.” (1 Timoteo 6:15) Nasaysayaat ti maaramidan ni Jesus ngem iti asinoman a tao nga agturay, ken nabilbileg ngem iti amin nga agtuturay a tattao uray agtitiponda.

5. Sadino ti pagturturayan ti gobierno ti Dios? Ania ti iturayanna?

⁵ Nagsubli ni Jesus idiay langit 40 nga aldaw kalpasan a napagungar. Idi agangay, insaad ni Jehova ni Jesus kas Ari ti Pagarian. (Aramid 2:33) Ti gobierno ti Dios idiay langit iturayannanto ti daga. (Apocalipsis 11:15) Dayta ti gapuna nga inawagan ti Biblia ti Pagarian ti Dios kas ‘Pagarian idiay langit.’​—2 Timoteo 4:18.

6, 7. Apay a nasaysayaat nga ari ni Jesus ngem iti asinoman a tao nga agturay?

⁶ Ibagbaga ti Biblia a nangatngato ni Jesus ngem iti asinoman nga ari ta isu ti “kakaisuna nga immortal.” (1 Timoteo 6:16) Matay inton agangay ti amin nga agtuturay a tattao, ngem saan a pulos matay ni Jesus. Agpaut iti agnanayon ti amin a naimbag nga aramiden ni Jesus para kadatayo.

⁷ Kuna ti padto ti Biblia a patas ken naasinto nga Ari ni Jesus: “Agtalinaedto kenkuana ti espiritu ni Jehova, ti espiritu ti kinasirib ken pannakaawat, ti espiritu ti pammatigmaan ken pannakabalin, ti espiritu ti pannakaammo ken ti panagbuteng ken Jehova. Pagragsakannanto ti agbuteng ken Jehova. Dinanto ibatay ti panangukomna iti makitana, wenno ti panangtubngarna [wenno, panangbalakadna] iti mangngegna. Patasto ti panangukomna iti napanglaw.” (Isaias 11:2-4) Kayatmo kadi ti kasta nga ari?

8. Kasanotayo nga ammo a saan nga agmaymaysa ni Jesus nga agturay?

⁸ Nangpili ti Dios iti sumagmamano a tattao a makipagturayto  ken Jesus iti nailangitan a gobierno. Kas pagarigan, imbaga ni Pablo ken ni Timoteo: “No itultuloytayo ti agibtur, agturaytayto met a kaduana kas ari.” (2 Timoteo 2:12) Mano ti makipagturayto ken Jesus kas ari?

9. Mano ti makipagturayto ken Jesus? Kaano nga inrugi ti Dios a pilien ida?

⁹ Kas naadaltayo iti Kapitulo 7, nakaawat ni apostol Juan iti sirmata. Nakitana ni Jesus kas Ari idiay langit a kadua ti 144,000 a sabali pay nga ari. Siasino dagiti 144,000? Inlawlawag ni Juan a “nasuratan ti mugingda iti nagan [ni Jesus] ken iti nagan ni Amana.” Innayonna: “Isuda dagiti sumursurot iti Kordero [ni Jesus] iti sadinoman a papananna. Dagitoy ti nagatang iti sangatauan.” (Basaen ti Apocalipsis 14:1, 4.) Dagiti 144,000 ket matalek a Kristiano a pinili ti Dios nga ‘agturayto kas ar-ari iti daga’ a kadua ni Jesus. No matayda, mapagungarda tapno agbiagda idiay langit. (Apocalipsis 5:10) Manipud idi tiempo dagiti apostol, inrugin ni Jehova ti agpili kadagiti matalek a Kristiano nga agbalin a paset dayta a grupo dagiti 144,000 nga ari.

10. Apay a maibagatayo nga ebkas ti ayat ni Jehova ti panangpilina ken Jesus ken iti 144,000 a mangituray kadagiti tattao?

¹⁰ Ipatpategnatayo unay ni Jehova ta inyurnosna nga addanto tattao a makipagturay ken Jesus. Nasayaatto nga agturay ni Jesus ta maawatannatayo. Ammona ti rikna ti tao ken ti rikna ti agsagsagaba. Kinuna ni Pablo a makipagrikna ni Jesus kadatayo, ‘maawatanna dagiti pagkapuyantayo,’ ken “nasuboken iti amin a banag a kas kadatayo amin.” (Hebreo 4:15; 5:8) Ammo met ti 144,000 ti rikna ti tao. Ken napadasanda ti agsakit ken ti rigat ti agbalin nga imperpekto. Isu a masiguradotayo a  maawatan ni Jesus ken ti 144,000 ti marikriknatayo ken dagiti problema a pakaipaspasanguantayo.

11. Apay nga insuro ni Jesus nga ikararag dagiti adalanna a maaramid koma ti pagayatan ti Dios idiay langit?

¹¹ Insuro ni Jesus nga ikararag dagiti adalanna a maaramid koma ti pagayatan ti Dios idiay langit. Apay? Naadaltayo iti Kapitulo 3 a nagrebelde ken Jehova ni Satanas a Diablo. Kalpasan a nagrebelde ni Satanas, impalubos ni Jehova nga agtalinaed idiay langit iti sumagmamano a tiempo ni Satanas ken dagiti di matalek nga anghel, wenno demonio. Isu a saan nga amin nga adda idiay langit ket agar-aramid iti pagayatan ti Dios. Iti Kapitulo 10, ad-adu pay ti maammuantayo maipapan ken Satanas ken kadagiti demonio.

12. Ania a dua a nakapatpateg a pasamak ti mabasatayo iti Apocalipsis 12:10?

¹² Ilawlawag ti Biblia a kalpasan unay a nagbalin ni Jesus nga Ari ti Pagarian ti Dios, isu ket nakigubat ken Satanas. (Basaen ti Apocalipsis 12:7-10.) Mabasatayo iti bersikulo 10 ti dua a nakapatpateg a pasamak. Nangrugi nga agturay ti Pagarian ti Dios a ni Jesu-Kristo ti Ari. Kalpasanna, napapanaw ni Satanas idiay langit sa naitapuak ditoy daga. Kas maadaltayto, nalpasen dagitoy a pasamak.

13. Ania ti napasamak idiay langit kalpasan a napapanaw ni Satanas?

¹³ Ibaga ti Biblia a napalalo ti ragsak dagiti matalek nga anghel kalpasan a napapanaw idiay langit ni Satanas ken dagiti demoniona. Kunana: “Agragsakkayo ngarud, dakayo nga agnanaed iti langit!” (Apocalipsis 12:12) Naan-anay itan ti talna ken panagkaykaysa idiay  langit ta ar-aramidenen ti amin nga adda sadiay ti pagayatan ti Dios.

14. Ania ti napasamak iti daga gapu iti pannakapapanaw ni Satanas idiay langit?

¹⁴ Ngem naiduma unay ti biag ditoy daga. Mapaspasamak ti dakes kadagiti tattao ‘ta bimmaba ti Diablo’ ken “kasta unay ti pungtotna, ta ammona nga ababan ti tiempona.” (Apocalipsis 12:12) Kasta unay ti pungtot ni Satanas ta napapanaw idiay langit ken ammona a dandanin madadael. Ar-aramidenna ti amin tapno mangpataud iti problema, ut-ot, ken panagsagaba iti intero a daga.

15. Ania ti pagayatan ti Dios para iti daga?

¹⁵ Ngem saan a nagbalbaliw ti pagayatan ti Dios para iti daga. Kayatna latta nga agbiag nga agnanayon dagiti perpekto a tattao iti paraiso a daga. (Salmo 37:29) Kasano a pagbalinen ti Pagarian ti Dios a posible dayta?

16, 17. Ania ti ibaga kadatayo ti Daniel 2:44 maipapan iti Pagarian ti Dios?

¹⁶ Kuna ti padto iti Daniel 2:44: “Iti kaaldawan dagita nga ari, mangipasdekto ti Dios ti langit iti maysa a pagarian a saanto pulos a madadael. Daytoy a pagarian ket saanto a mayawat iti aniaman a sabali nga ili. Rumeken ken pagpatinggaennanto amin dagitoy a pagarian, ket daytanto laeng ti agtalinaed iti agnanayon.” Ania ti isuro kadatayo dayta a padto maipapan iti Pagarian ti Dios?

¹⁷ Umuna, ibaga dayta a mangrugi nga agturay ti Pagarian ti Dios “iti kaaldawan dagita nga ari.” Kayatna a sawen, agturturayto pay laeng dagiti gobierno ditoy daga inton mangrugi nga agturay ti Pagarian. Maikadua, ibaga dayta nga agpaut iti agnanayon ti Pagarian ti Dios ken saanto a pulos suktan ti sabali a gobierno. Ken maikatlo, addanto gubat iti nagbaetan ti Pagarian ti  Dios ken dagiti gobierno iti lubong. Mangabakto ti Pagarian ti Dios ken daytanto ti kakaisuna a gobierno a mangituray iti daga. Daytanto ti kasasayaatan a gobierno a pagpasakupan dagiti tattao.

18. Ania ti awag iti maudi a gubat iti nagbaetan ti Pagarian ti Dios ken dagiti gobierno ditoy lubong?

¹⁸ Ania ti mapasamakto sakbay ti maudi a gubat iti nagbaetan ti Pagarian ti Dios ken dagiti gobierno iti lubong, a maawagan iti Armagedon? Iyaw-awanto dagiti demonio dagiti “ari iti intero a daga, tapno urnongenda ida iti gubat ti naindaklan nga aldaw ti Dios a Mannakabalin-amin.” Wen, labananto dagiti gobierno ti tao ti Pagarian ti Dios.​—Apocalipsis 16:14, 16; kitaen ti Endnote 10.

19, 20. Apay a kasapulantayo ti Pagarian ti Dios a mangituray iti daga?

¹⁹ Apay a kasapulantayo ti Pagarian ti Dios? Mangdakamattayo iti tallo a rason. Umuna, managbasoltayo isu nga agsakit ken mataytayo. Ngem ibaga ti Biblia a babaen ti panangituray ti Pagarian ti Dios, agbiagtayto nga agnanayon. Kinapudnona, kuna ti Juan 3:16: “Kasta unay ti panagayat ti Dios iti lubong nga uray la intedna ti bugbugtong nga Anakna, tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.”

²⁰ Maikadua, kasapulantayo ti Pagarian ti Dios ta napalawlawantayo kadagiti dakes a tattao. Adu ti agul-ulbod, agkuskusit, ken immoral. Awan ti maaramidantayo tapno mapukawda, ngem kabaelan ti Dios a pukawen ida. Madadaelto inton Armagedon dagiti tattao nga agtultuloy nga agar-aramid iti kinadakes. (Basaen ti Salmo 37:10.) Maikatlo, kasapulantayo ti Pagarian ti Dios ta nakapuy, naulpit, ken korap dagiti gobierno ti  tao. Saanda nga interesado a mangtulong kadagiti tattao nga agtulnog iti Dios. Ibagbaga ti Biblia nga “iturturayan ti tao ti padana a tao iti pakadangranna.”​—Eclesiastes 8:9.

21. Kasanonto a siguraduen ti Pagarian a maaramid ti pagayatan ti Dios ditoy daga?

²¹ Kalpasan ti Armagedon, siguraduento ti Pagarian ti Dios a maaramid ti pagayatan ti Dios ditoy daga. Kas pagarigan, pukawennanto ni Satanas ken dagiti demoniona. (Apocalipsis 20:1-3) Inton agangay, awanton ti agsakit ken matay. Gapu iti subbot, mabalinton nga agbiag nga agnanayon dagiti tattao iti Paraiso. (Apocalipsis 22:1-3) Santipikarento ti Pagarian ti nagan ti Dios. Ania ti kayatna a sawen? Inton iturayanen ti gobierno ti Dios ti daga, idaydayawton ti amin a tao ti nagan ni Jehova.​—Kitaen ti Endnote 21.

22. Kasanotayo nga ammo a saan a nagbalin nga Ari ni Jesus idi adda ditoy daga wenno kalpasan la unay a napagungar?

²² Insuro ni Jesus nga ikararag dagiti adalanna: “Umay koma ti Pagariam.” Isu a nalawag a ti gobierno ti Dios ket umay iti masanguanan. Ipasdek pay nga umuna ni Jehova ti gobiernona ken pagbalinenna ni Jesus  nga Ari iti dayta. Nagbalin kadi nga Ari ni Jesus apaman a nagsubli idiay langit? Saan, naguray pay. Sumagmamano a tiempo kalpasan ti panagungar ni Jesus, pinagbalin da Pedro ken Pablo a nalawag dayta idi inyaplikarda ken Jesus ti padto iti Salmo 110:1. Iti dayta a padto, kuna ni Jehova: “Agtugawka iti makannawanko, agingga nga ikabilko dagiti kabusormo a pagbatayan dagiti sakam.” (Aramid 2:32-35; Hebreo 10:12, 13) Kasano kabayag a naguray ni Jesus sakbay a pinagbalin ni Jehova nga Ari?

23. (a) Kaano a nangrugi nga agturay ni Jesus kas Ari ti gobierno ti Dios? (b) Ania ti adalentayo iti sumaruno a kapitulo?

²³ Adu a tawen sakbay ti 1914, naawatan ti maysa a grupo dagiti napasnek a Kristiano a nakapatpateg dayta a tawen iti padto ti Biblia. Pinaneknekan dagiti pasamak iti lubong sipud 1914 a hustoda. Nangrugi nga agturay ni Jesus kas Ari iti dayta a tawen. (Salmo 110:2) Kalpasan unay dayta, naitapuak ni Satanas ditoy daga, ket ita, “ababan ti tiempona.” (Apocalipsis 12:12) Iti sumaruno a kapitulo, maammuantayto ti ad-adu pay nga ebidensia nga agbibiagtayon iti dayta a tiempo. Maadaltayto pay a dandanin siguraduen ti Pagarian ti Dios a maaramid ti pagayatan ti Dios ditoy daga.​—Kitaen ti Endnote 22.