1, 2. (a) Iti napalabas a kapitulo, ania ti naammuantayo maipapan iti templo a nasirmata ni Ezekiel? (b) Ania ti dua a saludsod nga usigentayo iti daytoy a kapitulo?

 SAAN a nakita ni Ezekiel iti sirmata ti dakkel a naespirituan a templo nga inlawlawag ni apostol Pablo ginasut a tawen kalpasanna. Naammuantayo dayta iti napalabas a kapitulo. Naammuantayo met a panggep ti sirmata a maisuro iti ili ti Dios ti kinapateg dagiti pagalagadan ti Dios iti nadalus a panagdaydayaw. Maisubli laeng dagiti tattao ti relasionda ken Jehova no surotenda dagita a pagalagadan. Maawatantayo itan no apay a namindua nga impaganetget ni Jehova iti maymaysa a bersikulo daytoy a kangrunaan a punto: “Daytoy ti linteg maipapan iti templo.”​—Basaen ti Ezekiel 43:12.

² Masapul nga usigentayo ita ti dua pay a saludsod. Umuna: Iti templo a nasirmata idi tiempo ni Ezekiel, ania dagiti mabalin nga espesipiko a nasursuro dagiti Judio maipapan kadagiti pagalagadan ni Jehova iti nadalus a panagdaydayaw? Makatulong ti sungbat dayta a saludsod tapno masungbatantayo ti maikadua a saludsod: Ania ti kaipapanan ti sirmata kadatayo iti nariribuk a maudi nga al-aldaw?

3. Apay a nabainan dagiti tattao idi naammuanda ti sirmata a naisaad ti templo iti nangato a bantay?

³ Tapno masungbatan ti umuna a saludsod, kitaentayo ti dadduma a naisangsangayan a detalye daytoy a templo iti sirmata. Ti nangato a bantay. Mabalin a napanunot dagiti tattao a ti lugar iti sirmata ni Ezekiel ket ti makaparagsak a padto ni Isaias maipapan iti pannakaisubli. (Isa. 2:2) Ngem ania ti insuro kadakuada ti kaadda ti balay ni Jehova iti nangato a bantay? Insurona kadakuada a ti nadalus a panagdaydayaw ket rumbeng a maitan-ok, maipangato, ken maisaad iti kangatuan. Siempre, rumbeng laeng a natan-ok ti nadalus a panagdaydayaw ta urnos dayta Daydiay ‘natantan-ok ngem iti amin a sabali a dios.’ (Sal. 97:9) Ngem saan a kasta ti inaramid dagiti tattao. Ginasut a tawen a maulit-ulit nga impalubosda a naibabain, nabaybay-an, ken narugitan ti nadalus a panagdaydayaw. Sigurado a nabainan dagiti nalinteg a tattao ta nakitada a ti sagrado a balay ti Dios ket naitan-ok ken naipangato iti pakaikarianna a kinadayag ken kinalatak.

4, 5. Ania ti nalabit isuro dagiti nangato a ruangan ti templo kadagiti tattao a dimngeg ken Ezekiel?

⁴ Dagiti nangato a ruangan. Iti rugi ti sirmata, binuya ni Ezekiel ti nangipasiar nga anghel a mangrukrukod kadagiti ruangan. Agarup 30 a metro ti kangatoda! (Ezek. 40:14) Adda dagiti pagpuestuan ti guardia kadagita a pagserkan. Ania ngata ti isuro dagita kadagiti nangadal iti daytoy a plano? Imbaga ni Jehova ken Ezekiel: “Siputam a naimbag ti pagserkan ti templo.” Apay? Gapu ta mangiserserrek dagiti tattao kadagiti ‘dakes ti pusoda ken saan a nakugit’ iti sagrado a balay a pagdaydayawan iti Dios. Ania ti resultana? ‘Rugrugitanda ti templok,’ kinuna ni Jehova.​—Ezek. 44:5, 7.

⁵ Sinukir dagidiay ‘saan a nakugit’ ti nalawag a bilin ti Dios sipud pay idi tiempo ni Abraham. (Gen. 17:9, 10; Lev. 12:1-3) Ngem nakarkaro pay dagidiay “dakes ti pusoda.” Igaggagarada ti agrebelde ken dida ikankano ti panangisuro ken panangidalan ni Jehova. Naparitan koma a sumrek dagiti kasta a tattao iti sagrado a balay a pagdaydayawan ken Jehova! Kagura ni Jehova ti panaginsisingpet, ngem impalubos ti ilina nga umadu dagiti managinsisingpet iti balayna. Nalawag ti isuro dagiti ruangan ken dagiti pagpuestuan ti guardia iti templo a nakita iti sirmata: Hustonan dagita a panangabuso! Masapul a masurot dagiti nangato a pagalagadan iti iseserrek iti balay ti Dios tapno bendisionan ni Jehova ti panagdaydayaw dagiti tattao.

6, 7. (a) Kasano nga inusar ni Jehova ti pader iti aglawlaw ti templo a mangibaga iti mensahena iti ilina? (b) Kasano ti dati a panangtrato ti ili ni Jehova iti balayna? (Kitaen ti footnote.)

⁶ Ti pader iti aglawlaw. Maysa pay a naisangsangayan a detalye ti templo a nakita iti sirmata ket ti pader iti aglawlaw ti intero a templo. Kuna ni Ezekiel a ti kaatiddog ti tunggal sikigan ti pader ket 500 a runo, wenno 1,555 a metro, dandani 1.6 a kilometro! (Ezek. 42:15-20) Ngem dagiti pasdek ken paraangan ti templo ket  kuadrado a 500 a kasiko, wenno 259 a metro laeng iti tunggal sikigan. Isu nga adda nalawa nga espasio iti aglawlaw ti templo ken napalawlawan dayta iti pader. a Apay?

⁷ Kinuna ni Jehova: “Ita, isardengda koma ti panagdayawda iti sabali a dios ken iyadayoda kaniak ti bangkay dagiti arida, ket agtaengakto iti tengngada iti agnanayon.” (Ezek. 43:9) “Ti bangkay dagiti arida” ket mabalin a tumukoy iti idolatria. Isu nga inusar ni Jehova ti nalawa nga espasio iti templo a nasirmata ni Ezekiel tapno kasla ibagana: “Iyadayoyo amin dagiti kasta a narugit a banag. Diyo pulos iyasideg.” No ngarud pagtalinaedenda a nadalus ti panagdaydayawda, bendisionan ida ni Jehova babaen ti kaaddana kadakuada.

8, 9. Ania ti mabalin a nasursuro dagiti tattao iti nadagsen a balakad ni Jehova kadagiti lallaki nga addaan iti responsabilidad?

⁸ Nadagsen a balakad kadagiti lallaki nga addaan responsabilidad. Nangted met ni Jehova iti nadagsen ngem naayat a balakad kadagiti lallaki nga addaan iti dakkel a responsabilidad iti ilina. Napalalo ti panangkorehirna kadagiti Levita nga immadayo kenkuana idi nagdaydayaw ti ilina kadagiti didiosen, ngem inapresiarna ti annak ni Zadok a ‘nangasikaso kadagiti responsabilidadda iti santuariona idi immadayo kenkuana dagiti Israelita.’ Patas ken naasi ti panangtratona iti tunggal grupo, sigun kadagiti inaramidda. (Ezek. 44:10, 12-16) Kinorehirna met iti kasta unay dagiti panguluen iti Israel.​—Ezek. 45:9.

⁹ Nalawag ngarud nga impakaammo ni Jehova kadagiti lallaki a naikkan iti autoridad ken naisaad kas manangaywan a sungsungbatanda kenkuana ti pamay-an ti panangibaklayda kadagiti responsabilidadda. Kasapulanda latta ti balakad, panangkorehir, ken disiplina ta isuda ti mangyun-una iti panangsurot kadagiti pagalagadan ni Jehova!

10, 11. Ania ti ebidensia a mangipakita nga inyaplikar ti dadduma kadagiti nakasubli a Judio dagiti nasursuroda iti sirmata ni Ezekiel?

¹⁰ Inyaplikar kadi dagiti nakasubli a Judio ti nasursuroda iti sirmata ni Ezekiel? Siempre, ditay maibaga ti eksakto a pampanunoten dagiti matalek a lallaki ken babbai maipapan iti dayta a naisangsangayan a sirmata. Ngem adu ti ibaga kadatayo ti Sao ti Dios maipapan iti inaramid dagiti nagsubli a Judio ken iti panangmatmatda iti nadalus a panagdaydayaw ken Jehova. Inyaplikarda kadi dagiti prinsipio a masursuro iti sirmata ni Ezekiel? Uray kaskasano, inyaplikarda met, lalo no ikompara ida kadagiti rebelioso nga apongda sakbay a naipanda idiay Babilonia.

¹¹ Inkagumaan dagiti matalek a kas kada propeta Haggeo ken Zacarias, ti padi ken parakopia a ni Esdras, ken ni gobernador Nehemias nga isuro kadagiti tattao dagiti prinsipio a kas iti masursuro iti templo a nasirmata ni Ezekiel. (Esd. 5:1, 2) Insuroda kadagiti tattao a masapul a maitan-ok ti nadalus a panagdaydayaw ken mayun-una ngem kadagiti material ken personal a pagimbagan.  (Hag. 1:3, 4) Impaganetgetda a masapul a maraem dagiti pagalagadan iti pannakipaset iti nadalus a panagdaydayaw. Kas pagarigan, nadagsen ti imbalakad da Esdras ken Nehemias kadagiti tattao a papanawenda dagiti ganggannaet nga assawada a mangpakpakapuy iti espiritualidadda. (Basaen ti Esdras 10:10, 11; Neh. 13:23-27, 30) Ti ngay idolatria? Agparang a kalpasan a naadipenda, nasursuro met laeng ti Israel a guraen dayta a basol, a masansan idi a nakatnaganda. Dagiti ngay padi ken panguluen, wenno prinsipe? Kas ipakita ti sirmata ni Ezekiel, karamanda kadagiti binalakadan ken kinorehir ni Jehova. (Neh. 13:22, 28) Adu ti napakumbaba a nangipangag iti dayta a balakad.​—Esd. 10:7-9, 12-14; Neh. 9:1-3, 38.

12. Kasano a binendisionan ni Jehova dagiti nakasubli a Judio?

¹² Gapu iti dayta, binendisionan ni Jehova ti ilina. Simmingedda kenkuana, simmalun-atda, ken naaddaanda iti kinaurnos a nabayag a dida a napadasan. (Esd. 6:19-22; Neh. 8:9-12; 12:27-30, 43) Apay? Ngamin, sinurot met laengen dagiti tattao dagiti nalinteg a pagalagadan ni Jehova iti nadalus a panagdaydayaw. Adu ti nangipapuso kadagiti nasursuroda iti templo a nakita iti sirmata. Makunatayo ngarud a ti templo a nasirmata ni Ezekiel ket nakatulong kadagiti naipanaw iti dua a napateg a pamay-an. (1) Insurona kadakuada dagiti makatulong a leksion maipapan kadagiti pagalagadan iti nadalus a panagdaydayaw ken no kasano ti panangsurotda  kadagita. (2) Dayta a padto ket pammatalged. Impakaunana a maisubli ti nadalus a panagdaydayaw, ken no kasano a bendisionan ni Jehova ti ilina no agtalinaedda iti nadalus a panagdaydayaw. Ngem daytoy ti kayattayo a maammuan: Adda kadi kaitungpalanna ita dayta a sirmata?

13, 14. (a) Kasanotay nga ammo nga agaplikar ita ti nakita ni Ezekiel a sirmata maipapan iti templo? (b) Iti ania a dua a pamay-an a makatulong kadatayo ita ti sirmata ni Ezekiel? (Kitaen met ti kahon 13A, “Nagduma a Templo, Nagduma a Masursuro.”)

¹³ Masiguradotayo kadi nga agaplikar kadatayo ita ti templo a nasirmata ni Ezekiel? Wen! Lagipentayo ti nagpadaan ti nasirmata ni Ezekiel a sagrado a balay ti Dios iti “nakangatngato a bantay” ken ti padto ni Isaias a “sititibkerto a maipasdek ti bantay ti balay ni Jehova iti ngatuen dagiti bantay.” Espesipiko nga ibaga kadatayo ni Isaias a matungpal ti padtona bayat ti “maudi a paset dagiti aldaw,” wenno “kadagiti maudi nga aldaw.” (Ezek. 40:2; Isa. 2:2-4; ftn.; kitaen met ti Mikias 4:1-4.) Dagitoy a padto ket agaplikar kadagiti maudi nga aldaw manipud 1919, idi a ti nadalus a panagdaydayaw ket naipangato, naisubli, ken kasla naisaad iti nangato a bantay. b

¹⁴ Masiguradotayo ngarud a ti sirmata ni Ezekiel ket agaplikar iti nadalus a panagdaydayaw ita. No kasano a dakkel ti naitulongna idi kadagiti naipanaw a Judio, makatulong met daytoy a sirmata kadatayo ita iti dua a pamay-an. (1) Mangted kadagiti makatulong a leksion no kasanotayo a suroten dagiti pagalagadan ni Jehova iti nadalus a panagdaydayaw. (2) Mangted kadagiti padto a mangpatalged a maisubli ti nadalus a panagdaydayaw ken kadagiti bendision ni Jehova.

15. Ania ti masapul a laglagipentayo bayat nga ammuentayo dagiti leksion iti templo a nasirmata ni Ezekiel?

¹⁵ Kitaentayo ita dagiti dadduma nga espesipiko a detalye ti sirmata ni Ezekiel. Panunotenyo a kaduanatayo ni Ezekiel iti panagpasiarna iti nasirmatana a nagdakkel a templo. Laglagipenyo a saan a ti dakkel a naespirituan a templo ti kitkitaentayo; no di ket kayattayo laeng nga ammuen dagiti leksion nga agaplikar iti panagdaydayawtayo ita. Ania ti dadduma kadagita?

16. Iti sirmata ni Ezekiel, ania ti masursurotayo iti pannakarukod ti amin? (Kitaen ti ladawan iti rugi ti kapitulo.)

¹⁶ Apay nga amin ket narukod? Bayat nga agbuybuya ni Ezekiel, ti anghel a gambang ti langana detalyado a rinukodna ti templo, agraman dagiti pader, ruangan, dagiti pagpuestuan ti guardia, dagiti paraangan, ken ti altar. Mabalin a marigatan ti agbasa a mangtarus iti nagadu a detalye. (Ezek. 40:1–42:20; 43:13, 14) Ngem panunotentayo dagiti napateg a punto a masursurotayo iti kasta a detalye. Impaganetget ni Jehova ti kinapateg dagiti pagalagadanna. Isu ti mangikeddeng kadagita, saan a dagiti tattao. Nagkamali dagiti agkunkuna a saan a napateg no kasano ti agdaydayaw iti Dios. Ti detalyado a pannakarukod ti templo ket nalawag a  pammatalged ni Jehova a sigurado a maisubli ti nadalus a panagdaydayaw. Ti eksakto a pannakatungpal ti kari ti Dios ket kas iti kinasigurado dagita nga eksakto a rukod. Pinatalgedan ngarud ni Ezekiel a talaga a maisubli ti nadalus a panagdaydayaw iti maudi nga al-aldaw!

17. Ania ti mabalin nga ipalagip kadatayo ita ti pader iti aglawlaw ti templo?

¹⁷ Ti pader iti aglawlaw. Kas naadaltayon, nakakita ni Ezekiel iti pader iti aglawlaw ti templo iti sirmata. Dayta a detalye ti nabileg a palagip a masapul a saan nga ipalubos ti ili ti Dios a makastrek ti aniaman a narelihiosuan a kinarugit iti nadalus a panagdaydayaw tapno saan a pulos marugitan ti balay ti Dios. (Basaen ti Ezekiel 43:7-9.) Kasapulantayo met la ita dayta a balakad! Kalpasan a nawayawayaan ti ili ti Dios iti ginasut a tawen a naespirituan a pannakaadipen iti Babilonia a Dakkel, dinutokan ni Kristo ti matalek ken masirib nga adipenna idi 1919. Sipud idin, inkagumaan ti ili ti Dios nga ikkaten dagiti ulbod a doktrina ken ar-aramid a nalaokan iti idolatria ken tradision dagiti pagano. Masapul nga iyadayotayo ti naespirituan a kinarugit manipud iti nadalus a panagdaydayaw. Saantayo met ngarud nga agnegosio iti Kingdom Hall tapno agtalinaed a naisina dagiti kasta a gagangay a banag manipud iti panagdaydayawtayo.​—Mar. 11:15, 16.

18, 19. (a) Ania ti masursurotayo kadagiti nangato a ruangan ti templo iti sirmata? (b) Ania ti masapul a reaksiontayo kadagidiay mangibaba kadagiti nangato a pagalagadan ni Jehova? Mangted iti pagarigan.

¹⁸ Dagiti nangato a ruangan. Ania dagiti masursurotayo no panunotentayo dagiti nangato a ruangan a nakita ni Ezekiel? Dayta a detalye iti sirmata ti sigurado a nangisuro kadagiti naipanaw a Judio a nakangatngato dagiti moral a pagalagadan ni Jehova. No kasta idi, kasta met ngata ita? Agdaydayawtayo iti dakkel a naespirituan a templo ni Jehova. Saan ngata a napatpateg ita ti nalinteg nga aramid nga awan panaginsisingpetna? (Roma 12:9; 1 Ped. 1:14, 15) Iti maudi nga al-aldaw, in-inut nga indalan ni Jehova ti ilina a mangsurot a naimbag kadagiti pagalagadanna iti nasayaat nga aramid. c Kas pagarigan, dagiti di agbabbabawi a managbasol ket mailaksid iti kongregasion. (1 Cor. 5:11-13) Dagiti met pagpuestuan ti guardia kadagiti pagserkan dagiti ruangan ipalagipda kadatayo nga iti panagdaydayaw ken Jehova ita, saan a maawat ti maysa a tao no saan nga anamongan ti Dios. Kas pagarigan, mabalin a sumrek iti Kingdom Hall ti doble kara ti panagbiagna, ngem saan nga anamongan ni Jehova malaksid no aramidenna ti umiso iti imatang ti Dios. (Sant. 4:8) Nagsayaat a proteksion dayta iti nadalus a panagdaydayaw iti daytoy tiempo a nasaknap ti kinadakes ken immoralidad!

¹⁹ Impadto ti Biblia a dumakes ti lubong sakbay ti panungpalan. Mabasatayo: “Ad-addanto pay a dumakes dagiti dakes ken impostor a tattao, a mangallilawda ken maallilawda.” (2 Tim. 3:13) Umad-adu ita ti mangipagarup a dagiti nangato a pagalagadan ni  Jehova ket istrikto unay, lausen, wenno saan nga umiso. Kastaka met kadi? Kas pagarigan, no adda mangkombinsir kenka a saan a husto dagiti pagalagadan ti Dios maipapan iti homoseksualidad, patiem kadi isuna? Wenno ni Jehova a Dios ti patiem, a nalawag nga ibaga ti Saona a dagiti agar-aramid kadagita ket “ar-aramidenda ti naalas”? Pakdaarannatayo ti Dios a ditay anamongan dagiti immoral nga aramid. (Roma 1:24-27, 32) No maipasangotayo kadagita, nasayaat no panunotentayo ti templo a nasirmata ni Ezekiel nga addaan kadagiti nangato a ruangan ket laglagipentayo: Saan nga ibaba ni Jehova dagiti nalinteg a pagalagadanna, uray no ipapilit ti dakes a lubong. Umanamongtayo kadi iti nailangitan nga Amatayo ken itakderantayo ti umiso?

20. Ania dagiti palagip iti sirmata ni Ezekiel a makaparegta iti “dakkel a bunggoy”?

²⁰ Ti paraangan. Idi nakita ni Ezekiel ti nakalawlawa a makinruar a paraangan ti templo, naragsakan la ketdi a nangpanunot no kasano kaadu ti makapagtataripnong sadiay a naragsak nga agdaydayaw ken Jehova. Ita, agdaydayaw dagiti Kristiano iti adayo a mas sagrado a disso. Ti sirmata ni Ezekiel ket makaparegta a palagip kadagiti mangbukel iti “dakkel a bunggoy” nga agdaydayaw iti makinruar a paraangan ti naespirituan a templo ni Jehova. (Apoc. 7:9, 10, 14, 15) Kadagiti paraangan, nakita ni Ezekiel dagiti naintar a siled a panganan a pakipanganan dagiti agdaydayaw a nangyeg kadagiti daton a pakikappia. (Ezek. 40:17) No ar-arigen, makipanganda ken Jehova a Dios a pagilasinan ti nasayaat a panaggayyem!  Ita, saantayon nga agdatdaton a kas kadagidi Judio sigun iti Mosaiko a Linteg. Mangipapaaytayo iti “daton ti panangidaydayaw” no makipaspasettayo iti nadalus a panagdaydayaw, kas iti panagkomento wenno panangyebkas iti pammatitayo kadagiti gimong wenno iti ministeriotayo. (Heb. 13:15) Mangmangantayo met iti naespirituan a taraon nga ipapaay ni Jehova. Sigurado a mariknatayo ti narikna dagiti annak ni Kore a nangikanta ken Jehova: “Ti maysa nga aldaw kadagiti paraanganmo ket nasaysayaat ngem ti sangaribu nga aldaw iti sabali a lugar!”​—Sal. 84:10.

21. Ania ti masursuro dagiti Kristiano a nadutokan maipapan iti kinapadi iti sirmata ni Ezekiel?

²¹ Ti kinapadi. Nakita ni Ezekiel a ti makin-uneg a paraangan ket nalaka a papanan dagiti padi ken Levita. Ngamin, dagiti ruangan ket kapada dagiti ruangan iti makinruar a paraangan a pagserkan ti amin a tribu ti Israel, malaksid iti tribu ni Levi. Makatulong dayta kas palagip kadagiti lallaki iti tribu ni Levi a masapul met a surotenda dagiti pagalagadan ni Jehova iti nadalus a panagdaydayaw. Ita ngay? Kadagiti agserserbi iti Dios ita, awanen dagiti padi a nagtaud iti tribu ni Levi, ngem naibaga kadagiti Kristiano a nadutokan: “Dakayo ket ‘napili a puli, papadi nga ari.’” (1 Ped. 2:9) Naiduma a paraangan ti nagdaydayawan dagiti padi iti nagkauna nga Israel. Ita, dagiti Kristiano a nadutokan ket saan a naisina kadagiti padada nga agdaydayaw iti aniaman a pisikal a pamay-an, ngem espesial ti relasionda ken Jehova kas dagiti amponna. (Gal. 4:4-6) Iti sirmata ni Ezekiel, adda met dagiti makatulong a palagip kadagiti nadutokan. Kas pagarigan, naawatanda a kasapulan met dagiti padi ti balakad ken disiplina. Nasayaat a laglagipen ti amin a Kristiano a pasettayo ti “maymaysa nga arban” nga agserserbi babaen ti panangaywan ti “maymaysa a pastor.”​—Basaen ti Juan 10:16.

22, 23. (a) Ania ti masursuro dagiti Kristiano a panglakayen ita iti panguluen a nailadawan iti sirmata ni Ezekiel? (b) Ania ti mabalin a mapasamak iti masanguanan?

²² Ti panguluen. Iti sirmata ni Ezekiel, medio nalatak ti panguluen. Saan a nagtaud iti tribu ni Levi ket idiay templo, masapul nga agpasakup iti panangidaulo dagiti padi. Ngem nalawag nga agserserbi kas manangaywan kadagiti kailianna ken tultulonganna ida a mangidatag kadagiti daton. (Ezek. 44:2, 3; 45:16, 17; 46:2) No kasta, isu ket ulidan kadagiti Kristiano a lallaki a naikkan iti responsabilidad iti kongregasion. Ngamin, amin a Kristiano a panglakayen, agraman dagiti agdaldaliasat a manangaywan ket masapul nga agpasakup iti nadutokan a matalek nga adipen. (Heb. 13:17) Kadagiti Nakristianuan a gimong ken iti ministerio, siaanep a tultulongan dagiti panglakayen ti ili ti Dios a mangidatag kadagiti daton ti panangidaydayaw. (Efe. 4:11, 12) Panunoten met koma dagiti panglakayen ti panangbabalaw ni Jehova kadagiti panguluen ti Israel gapu iti panangabusoda iti pannakabalinda. (Ezek. 45:9) Saan nga ipapan dagiti panglakayen a dida kasapulan ti balakad ken panangkorehir. Ipategda ketdi ti aniaman a gundaway a pangpasayaat  kadakuada ni Jehova tapno agbalinda a mas epektibo kas pastor ken manangaywan.​—Basaen ti 1 Pedro 5:1-3.

²³ Itultuloy ni Jehova ti mangipaay kadagiti makabael ken naayat a manangaywan iti asidegen a Paraiso a daga. Kinapudnona, adu a panglakayen ita ti masansanayen no kasano ti agbalin a manangtulong, makabael a pastor idiay Paraiso. (Sal. 45:16) Saan kadi a makaparagsak a panunoten no kasano a dagiti kasta a lallaki ket agserbinto kas bendision idiay baro a lubong? Ti pannakaawattayo iti sirmata ni Ezekiel, kas iti dadduma pay a padto maipapan iti pannakaisubli, ket mabalin a lumawlawag iti tiempo nga inkeddeng ni Jehova. Nalabit addanto makaparagsak a kaitungpalan dagiti dadduma a detalye a ditay pay la maawatan ita. Tiempo laeng ti makaibaga.

24, 25. Kasano ti panangilawlawag ti sirmata ni Ezekiel kadagiti bendision ni Jehova iti ilina no agtalinaedda iti nadalus a panagdaydayaw?

²⁴ Kas konklusion, lagipentayo ti maysa a nadayag a pasamak iti sirmata ni Ezekiel. Simrek ni Jehova iti nasirmata a templo ken inkarina iti ilina nga agtalinaed sadiay no la ket ta simamatalek a surotenda dagiti pagalagadanna iti nadalus a panagdaydayaw. (Ezek. 43:4-9) Ania ti epekto ti kaadda ni Jehova iti ilina ken iti dagada?

²⁵ Inlawlawag ti sirmata dagiti bendision ti Dios babaen ti dua a mangipanamnama a padto a ladawan: (1) Adda karayan nga agay-ayus manipud iti santuario ti templo, a mangbiag ken mangpabunga iti daga; ken (2) mabingaybingay ti daga iti naurnos ken eksakto a pamay-an a ti templo ken dagiti paraanganna ket nalawag nga adda iti tengnga. Kasanotay a tarusan ita dagita a teksto? Ngamin, agbibiagtayon iti tiempo a simreken ni Jehova iti dakkel a naespirituan a templo, ti mas sagrado a sistema ti panagdaydayaw, a pinasudi, ken inanamonganna. (Mal. 3:1-4) Adalentayo dagita a dua a padto a ladawan iti Kapitulo 19-21 daytoy a libro.