NUPAY awan nagmamaayan ti biag ti sangatauan gapu iti iyaalsada iti nadibinuan a turay, saan a binaybay-an ti Dios dagiti tattao a maawanan iti namnama. Kuna ti Biblia: “Ti sangaparsuaan naipasakup iti kinabarengbareng, saan a babaen ti bukodna a nakem no di ket babaen kenkuana a nangipasakup iti dayta, a maibatay iti namnama a ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya dagiti annak ti Dios.” (Roma 8:20, 21) Wen, adda impanamnama ti Dios kadagiti annak ti immuna a pagassawaan. Dayta daydiay natalged a namnama a mawayawayaan ti sangatauan manipud natawid a basol ken ipapatay. Maaddaandanto manen iti nasinged a relasion ken Jehova a Dios. Kasano?

² Idi nagbasol da Adan ken Eva, inikkatda kadagiti annakda ti gundaway a mangtagiragsak iti makapnek a biag nga agnanayon ditoy daga. Kas kasukat ti wayawayada nga agaramid iti kaykayatda, inlakoda ti masanguanan a pamiliada iti pannakaadipen iti basol ken ipapatay. Gapu ta nayanakda iti kasta a pamilia, mayarig dagiti kaputotanda kadagiti tagabo nga agnanaed iti naiputputong a puro nga iturayan dagiti nauyong nga ari. Kinapudnona, kasla ari nga inturayan ni patay ti sangatauan nga adda iti sidong ti sabali pay nga ari—ti basol. (Roma 5:14, 21) Kasla awan mangisalakan kadakuada. Mismo a dagiti kapuonanda ti nangilako kadakuada iti pannakaadipen! Ngem maysa a nasingpet a tao ti nangibaon iti anakna, a nangipaay iti naan-annay a gatad a kasapulan tapno mawayawayaan ti amin manipud pannakaibalud.​—Salmo 51:5; 146:4; Roma 8:2.

³ Iti daytoy nga ilustrasion, ti tao a nangisalakan kadagiti adipen isu ni Jehova a Dios. Ti anak a nangipaay iti gatad para iti pannakawayawaya isu ni Jesu-Kristo. Nagbiag kas bugbugtong nga Anak ti Dios sakbay a nagbalin a tao. (Juan 3:16) Isu ti inauna kadagiti pinarsua ni Jehova, ket  napaadda ti amin a parsua iti uniberso babaen kenkuana. (Colosas 1:15, 16) Simimilagro nga inyakar ni Jehova ti biag daytoy nga espiritu nga Anakna iti aanakan ti maysa a birhen tapno maipasngay kas perpekto a tao, ti gatad a kalikaguman ti nadibinuan a kinahustisia.—Lucas 1:26-31, 34, 35.

⁴ Idi agtawen ni Jesus iti agarup 30, nabautisaran idiay Karayan Jordan. Bayat ti pannakabautisarna, napulotan iti nasantuan nga espiritu, wenno aktibo a puersa ti Dios. Iti kasta, nagbalin a Kristo, kayatna a sawen “Napulotan.” (Lucas 3:21, 22) Nagpaut ti ministerio ni Jesus ditoy daga iti tallo ket kagudua a tawen. Bayat dagidi a tawen, insurona kadagiti pasurotna ti maipapan “iti pagarian ti Dios,” ti nailangitan a gobierno a mangisubli  iti natalna a relasion ti sangatauan ken Jehova a Dios. (Lucas 4:43; Mateo 4:17) Ammo ni Jesus no kasano a makapagbiag a naragsak ti tattao, isu nga impaayna kadagiti pasurotna dagiti espesipiko a pagalagadan maipapan iti kinaragsak. Apay a dikay ukagen ti Bibliayo iti kapitulo 5 aginggat’ 7 ti Mateo ket basaenyo ti dadduma kadagiti insurona iti Sermon idiay Bantay?

⁵ Saan a kas ken Adan, nagtulnog ni Jesus iti Dios iti amin a gundaway. “Saan a nakaaramid iti basol.” (1 Pedro 2:22; Hebreo 7:26) Kinapudnona, mabalinna koma ti agbiag nga agnanayon ditoy daga, ngem ‘insukona ti kararuana’ tapno mabayadanna iti Dios ti napukaw ni Adan. Iti kayo a pagtutuokan, insuko ni Jesus ti biagna kas perpekto a tao. (Juan 10:17; 19:17, 18, 28-30; Roma 5:19, 21; Filipos 2:8) Idi inaramidna dayta, impaay ni Jesus ti subbot, wenno binayadanna ti gatad a kasapulan tapno masubbot ti sangatauan iti pannakaadipen iti basol ken ipapatay. (Mateo 20:28) Iladawanyo ti bagiyo a nagbalin a maysa a tagabo iti bassit ken narugit a paktoria. Dikay kadi pagyamanan iti kasta unay daydiay nangyurnos iti pannakaruk-atyo iti pannakaadipen ken iti tao a nagbulontario a mangisakripisio iti biagna para kadakayo? Babaen ti urnos ti subbot, naluktan ti dalan tapno makasublikayo iti sangalubongan a pamilia ti Dios ket matagiragsakyo ti pudpudno a makapnek a biag, a saan a naadipen iti basol ken ipapatay.—2 Corinto 5:14, 15.

⁶ No ammo ken apresiarenyo daytoy di kaikarian a kinamanangngaasi ni Jehova, dakdakkel ti panggapuanyo a mangyaplikar iti biagyo kadagiti pammagbaga a masarakan iti Biblia. Kas pagarigan, usigenyo ti maysa kadagiti karirigatan a prinsipio nga iyaplikar—ti panangpakawan kadagiti nangsair kadakayo. Malagipyo kadi dagiti sasao a masarakan iti Colosas kapitulo 3, bersikulo 12 agingga iti 14, nga inusigtayo iti Leksion 2? Dagidiay a teksto pinaregtanakayo a mangpakawan iti sabsabali uray no mabalin nga adda panggapuanyo a mangireklamo kadakuada. Ilawlawag ti konteksto no apay, idi kunana: “Kas iti sibubulos a panangpakawan ni Jehova kadakayo, kasta met ti aramidenyo.” No ipapusoyo ti inaramid ni Jehova ken ni Jesu-Kristo para iti sangatauan, matignaykayo a mangpakawan iti sabsabali aniaman ti nakabasolanda, nangnangruna no agbabawi ken agpadispensarda.