Dandani idin agpasngay ni Elisabet. Tallo a bulanen a nakikadua ni Maria kenkuana. Dimtengen ti panawen nga agpakada ni Maria ket adayo ti daliasatenna nga agawid idiay Nazaret nga adda iti amianan. Iti agarup innem a bulan, ipasngaynanto metten ti anakna.

Idi nagawiden ni Maria, nagpasngay ni Elisabet. Nakaragragsak ta naballigi ti panagpasngayna ken nasalun-at ni Elisabet ken ti anakna! Idi impakita ni Elisabet ti anakna kadagiti kaarruba ken kabagianda, nakipagragsakda kenkuana.

Ibilin ti Linteg ti Dios iti Israel nga iti maikawalo nga aldaw kalpasan a mayanak ti anak a lalaki, masapul a makugit ken mapanaganan. (Levitico 12:2, 3) Imbaga ti dadduma a masapul a maipasurot ken Zacarias ti nagan ti ubing. Ngem imbaga ni Elisabet: “Saan! Juan ti maipanagan kenkuana.” (Lucas 1:60) Laglagipenyo nga imbaga ni anghel Gabriel a mapanaganan ti ubing iti Juan.

Nagreklamo dagiti kaarruba ken kabagianda. Kinunada: “Ngem awan met ti kabagianyo a kasta ti naganna.” (Lucas 1:61) Inseniasda ken Zacarias no ania ti kayatna a nagan ti anakna. Dimmawat iti kayo a pagsuratan ket insuratna ti sungbatna: “Juan ti naganna.”—Lucas 1:63.

Idi kuan, simimilagro a naisubli ti panagsao ni Zacarias. Malagipyo a saanen a nakapagsao ni Zacarias idi saanna a pinati ti imbaga ti anghel a maaddaanto ni Elisabet iti anak. Gapuna, idi nakapagsaon ni Zacarias, nasdaaw dagiti kaarrubada ket kinunada iti maysa ken maysa: “Anianto ngata ti pagbalinan daytoy nga ubing?” (Lucas 1:66) Nakitada ti ima, wenno pannakabalin ti Dios iti pamay-an a napanaganan ni Juan.

Kalpasanna, kinuna ni Zacarias a napno iti nasantuan nga espiritu: “Maidaydayaw koma ni Jehova a Dios ti Israel, gapu ta linagipna dagiti adipenna ken insalakanna ida. Ket nangpataud iti sara ti pannakaisalakan maipaay kadatayo a pamilia  ni David nga adipenna.” (Lucas 1:68, 69) Idi imbaga ni Zacarias ti sasao a “sara ti pannakaisalakan,” ni Apo Jesus a maipasngayto pay laeng ti tuktukoyenna. Babaen kenkuana, kuna ni Zacarias, ‘isalakannatayo ti Dios manipud kadagiti kabusortayo, awanen ti pagbutngantayo nga agdaydayaw kenkuana, tapno agmatalektayo ken maaramidtayo ti umiso iti intero a panagbiagtayo.’—Lucas 1:74, 75.

Imbaga ni Zacarias maipapan iti anakna: “No maipapan kenka, anakko, agbalinkanto a propeta ti Kangatuan, ta ibaonnakanto ni Jehova a nasaksakbay tapno isaganam ti dalanna, tapno ipakaammom iti ilina nga isalakan ida ti Dios babaen ti panangpakawanna kadagiti basolda, gapu iti ayat ken asina. Gapu iti dayta nga asi, makitatayo ti lawag manipud langit nga agsilnag a kas iti panagsingising ti init, a mangsilaw kadagiti agtugtugaw iti kasipngetan ken iti anniniwan ni patay ken mangiturong kadagiti sakatayo iti dalan ti talna.” (Lucas 1:76-79) Makaparegta unay dayta a padto!

Iti daytoy a tiempo, nalawag a nakadanonen ti balasang a ni Maria idiay Nazaret. Ania ngata ti mapasamak kenkuana inton madlawen a masikog?