Sumagmamano a tiempo a nagyan ni Jesus iti “ballasiw ti Jordan” a maawagan iti Perea. (Juan 10:40) Kalpasanna, nagpaabagatanen a mapan idiay Jerusalem.

Saan nga agmaymaysa ni Jesus. Kaduana dagiti adalanna, agraman ti “adu a tattao,” a pakairamanan dagiti agsingsingir iti buis ken dagiti managbasol. (Lucas 14:25; 15:1) Adda met sadiay dagiti Fariseo ken eskriba, a mangbabbabalaw iti ibagbaga ken ar-aramiden ni Jesus. Adu ti pagpanunotanda kalpasan a nangngegda dagiti imbaga ni Jesus nga ilustrasion maipapan iti napukaw a karnero, napukaw nga anak, ken ti baknang ken ni Lazaro.​—Lucas 15:2; 16:14.

Mabalin a pampanunoten ni Jesus ti panangbabalaw ken pananglalais dagiti bumusbusor kenkuana, isu a dagiti adalanna ti nangituronganna iti atensionna. Imbagana dagiti bambanag nga insurona idin idiay Galilea.

Kas pagarigan, kinuna ni Jesus: “Sigurado nga addanto dagiti tattao a mangpakapuy iti pammati ti sabsabali. Ngem kaasi pay daydiay mangaramid iti kasta! . . . Agannadkayo. No makabasol kenka ti kabsatmo, bagbagaam, ket no agbabawi, pakawanem. Uray no mamimpito iti kada aldaw a makabasol kenka, ken mamimpito nga umay kenka, a kunkunana, ‘Pakawanennak,’ masapul a pakawanem.” (Lucas 17:​1-4) Iti dayta maudi nga imbagana, mabalin a nalagip ni Pedro ti saludsod a dinamagna idin maipapan iti panangpakawan agingga iti mamimpito.​—Mateo 18:21.

Agtignayto kadi dagiti adalan maitunos iti imbaga ni Jesus? Idi imbagada ken Jesus, “Patibkerem ti pammatimi,” impanamnamana kadakuada: “No adda pammatiyo a kas kabassit ti bukel ti mustasa, kunayonto iti daytoy a kayo, ‘Maparutka koma ken maimulaka iti baybay!’ ket agtulnogto kadakayo.” (Lucas 17:​5, 6) Wen, uray ti bassit a pammati dakkel ti maaramidanna.

Intultuloy ni Jesus nga insuro ti maipapan iti kinapateg ti kinapakumbaba ken ti balanse a panangmatmat iti bagi. Kinunana kadagiti apostol: “Asino kadakayo nga addaan iti adipen nga agar-arado wenno agpaspastor ti mangibaganto kenkuana inton sumangpet manipud iti talon, ‘Darasem, umayka manganen’? Saan kadi a ti ibagayo ket, ‘Isaganam ti pangrabiik, agsukatka ket serbiannak agingga a malpasak a mangan ken uminum, kalpasanna, mabalinmonton ti mangan ken uminum’? Agyamankayto kadi iti adipenyo gapu ta inaramidna ti imbilinyo? Kasta met, no nalpasyon ti amin a naipaaramid kadakayo, kunayonto: ‘Ad-adipenkami laeng. Inaramidmi laeng ti rumbeng nga aramidenmi.’ ”​—Lucas 17:​7-10.

Masapul a maawatan ti tunggal adipen ti Dios ti kinapateg ti panangyun-una iti pagayatan ti Dios. Laglagipenna met koma ti pribilehiona nga agdayaw iti Dios kas miembro ti sangakabbalayanna.

Di nagbayag, simmangpet ti mensahero nga imbaon da Maria ken Marta, a kakabsat a babbai ni Lazaro, ken agnanaedda idiay Betania iti Judea. Imbaga ti mensahero: “Apo, masakit ti patpatgem a gayyem.”​—Juan 11:​1-3.

Nupay naammuan ni Jesus a nakaro ti sakit ti gayyemna a ni Lazaro, saan unay a nagdanag. Imbes ketdi, kinunana: “Saan nga ipapatay ti pagtungpalan daytoy a sakit no di ket pakaidaydayawan ti Dios tapno maipadayag ti Anak ti Dios.” Dua nga aldaw a nagtalinaed ni Jesus iti ayanna, sa kalpasanna imbagana kadagiti adalanna: “Mapantayo manen idiay Judea.” Kinuna dagiti adalan: “Rabbi, mapanka kadi manen? Saan kadi a nabiit pay daydi panangubor koma kenka dagiti umili ti Judea?”​—Juan 11:​4, 7, 8.

Kinuna ni Jesus: “Saan kadi nga adda 12 nga oras iti agmalem? Ti magna iti aldaw, saan a maitibkol ta makitkitana ti lawag iti daytoy a lubong.  Ngem ti magna iti rabii, maitibkol ta awan ti lawag kenkuana.” (Juan 11:​9, 10) Mabalin nga ibagbaga ni Jesus a saan pay a nalpas ti panawen nga inted ti Dios para iti ministeriona. Masapul a naan-anay nga usarenna ti ababa a tiempo a nabatbati para kenkuana.

Kinuna pay ni Jesus: “Matmaturog ni Lazaro a gayyemtayo, ngem mapanko riingen.” Mabalin a pampanunotenda nga agin-inana laeng ni Lazaro ken maimbaganto. Kinuna dagiti adalan: “Apo, no matmaturog laeng, umimbagto.” Inlawlawag ni Jesus kadakuada: “Natayen ni Lazaro . . . Mapantayo iti ayanna.”​—Juan 11:​11-15.

Gapu ta ammoda a mabalin a mapapatay ni Jesus idiay Judea, ngem kayatda a suportaran, kinuna ni Tomas kadagiti padana nga adalan: “Kumuyogtayo uray no mairamantayo a matay.”​—Juan 11:16.