Panunotem nga aggigianta idiay Jerico. Maysa dayta a siudad ti Canaan. Dayta ti ayan dagiti tattao a saan a mamati ken Jehova. Aggigian met ditoy ni Rahab.

Idi ubing pay ni Rahab, nadamagna ti panangbisngay ni Moises iti Nalabaga a Baybay ken ti panangiruarna kadagiti Israelita idiay Egipto. Naammuanna met a tinulongan ni Jehova dagiti Israelita tapno abakenda dagiti kalabanda. Ita, ammona a nagkampo dagiti Israelita iti asideg ti Jerico!

Maysa nga aldaw, adda dua nga Israelita a nagespia iti Jerico. Napanda iti balay ni Rahab, ket pinastrekna ida. Karabiyanna, naammuan ti ari ti Jerico nga adda espia iti siudad ken napanda iti balay ni Rahab. Isu a nangibaon kadagiti lallaki a mangtiliw kadagiti espia. Ngem inlemmeng ni Rahab dagiti espia iti tuktok ti balayna, sa imbagana kadagiti imbaon ti ari: ‘Immay ditoy dagiti espia, ngem nakapanawdan. Partakanyo ta maabutanyo pay ida! Ammom kadi no apay nga inlemmeng ni Rahab dagiti espia?— Mamati ngamin ken Jehova ken ammona a maitedto kadagiti Israelita ti Canaan.

Sakbay a pimmanaw dagiti espia iti balay ni Rahab, inkarida a maisalakanto ni Rahab ken ti pamiliana inton madadael ti Jerico. Ammom kadi no ania ti imbagada nga aramiden ni Rahab?— ‘Igalutmo daytoy nalabaga a tali iti tawa tapno maisalakan amin nga adda iti balaymo.’ Inaramid ni Rahab ti imbaga dagiti espia. Ammom kadi no ania ti simmaruno a napasamak?—

Rinikus dagiti Israelita ti siudad iti innem nga aldaw. Inaramidda dayta iti maminsan iti kada aldaw. Ngem iti maikapito nga aldaw, namimpito a rinikusda ti siudad. Kalpasanna, nagpukkawda iti napigsa. Narba dagiti pader ti siudad. Pimmayso ti imbaga ni Jehova. Ngem saan a narba ti balay nga ayan ti nalabaga a tali. Makitam kadi dayta iti ladawan?— Naisalakan ni Rahab ken ti pamiliana!

 Ania ti maadalmo ken Rahab?— Namati ni Rahab kadagiti naammuanna a naimbag nga inaramid ni Jehova. Adu met ti maammuam a naimbag maipapan ken Jehova. Mamatika kadi met ken Jehova a kas ken Rahab?— Ammok a mamatika!