KITAEM ti anghel ditoy a tengtenglenna a silulukat ti ruangan ti pagbaludan. Pinalubosanna dagiti apostoles ni Jesus. Apay kadi a naibaludda?

Maysa a malem, di nagbayag kalpasan pannakaiparukpok ti nasantuan nga espiritu iti ad-adalan ni Jesus, mapmapan da Pedro ken Juan idiay templo ti Jerusalem. Iti dumna ti ruangan adda agpalpalimos, a lugpin manipud pannakaiyanakna. Idi nakitana da Pedro ken Juan, nagpakpakaasi a mangtedda ti aniaman kenkuana. Aniat’ aramiden itan dagiti apostol?

Kuna ni Pedro: ‘Awan pirakko, ngem itdek kenka ti adda kaniak. Iti nagan ni Jesus, tumakderka ket magnaka!’ Dagdagus, naglagto ti lalaki ket mangrugin a magna. Idi nakita dagiti tattao daytoy, nagsiddaaw ken maragsakanda unay.

‘Inaramidmi daytoy babaen ti pannakabalin ti Dios, a nangbangon ken Jesus manipud ken patay,’ kuna ni Pedro. Iti dayta a kanito, immayen dagiti relihiuso a papangulo. Makaungetda ta ibagbaga da Pedro ken Juan a nagungar ni Jesus kadagiti natay. Gapuna impaibaludda ida.

Iti sumaganad nga aldaw, ni Pedro ken Juan, agraman tao a pinaimbagda, ti naiyeg iti sanguanan dagiti relihiuso a papangulo. ‘Babaen iti ania a pannakabalin nga inaramidyo daytoy a milagro?’ insaludsodda.

Imbaga ni Pedro a daytat’ babaen iti pannakabalin ti Dios, a namagungar ken Jesus kadagiti natay. Di ammo dagiti papadi no aniat’ aramidenda, ta dida mailibak a pudno a napasamak ti maysa a milagro. Gapuna imbilinda kadagiti apostoles a saandan nga agsasao maipapan ken Jesus, ket sada winayawayaan ida.

Iti panaglabas dagiti al-aldaw, intultuloy dagiti apostoles ti nangaskasaba maipapan ken Jesus ken nangag-agas kadagiti masakit. Nagsaknap ti damag, ket dagiti tattao manipud il-ili iti aglawlaw ti Jerusalem inyegda dagiti masakitda tapno agasan dagiti apostoles. Daytoy ti nagimunan dagiti relihiuso a papangulo, isu nga impaibaludda dagiti apostoles. Ngem saanda nga agbayag idiay.

Iti rabii, luktan ti anghel ti Dios ti ruangan ti pagbaludan, kas makitkitayo ditoy. Kunana: ‘Inkayo ket sawenyo kadagiti tattao idiay templo.’ Iti sumaganad a bigat, nakita dagiti relihiuso a papangulo nga awanen dagiti apostoles. Kalpasanna, makitada ida a mangisursuro idiay templo, ket inyegda ida idiay Sanhedrin.

‘Imbilinmi a siiirut kadakayo a dikayon isursuro ti maipapan ken Jesus,’ kuna dagiti relihiuso a papangulo. ‘Ngem pinunnoyo ti Jerusalem kadagiti pannursuroyo.’ Simmungbat dagiti apostoles: ‘Masapul nga agtulokkami a nangnangruna iti Dios ngem kadagiti tao.’ Gapuna intultuloyda nga insursuro ti “naimbag a damag.” Di aya nagpintas nga ulidan a surotentay dayta?