MAKITAM kadi ti napasamak? Insalakan ti ubing daytoy bassit a kordero manipud iti uso. Kanen koman ti uso ti kordero, ngem insalakan ti ubing. Ket pinatay ti ubing daydiay uso! Naminsan pay insalakanna ti karnero manipud iti leon. Saan kadi nga isut’ nagtured nga ubing? Ammom kadi no asino daytoy nga ubing?

Isu daytoy ni agtutubo a David. Isut’ aggigian idiay Betlehem. Ti apongna isu ni Obed, nga anak da Ruth ken Booz. Malagipmo kadi ida pay? Ket ti ama ni David isu ni Isai. Ni David ti agay-aywan ti karkarnero ni amana. Isut’ naiyanak 10 a tawen kalpasan panangaramid ni Jehova ken Saul kas ari.

Dimteng ti tiempo idi a kinuna ni Jehova ken Samuel: ‘Mangalaka ti espesial a lana ket inka idiay balay ni Isai sadi Betlehem. Pinilik ti maysa kadagiti annakna nga agbalin nga ari.’ Idi nakita ni Samuel ti inauna nga anak ni Isai a ni Eliab, naikunana iti bagina: ‘Siguradon nga isu daytoy ti pinili ni Jehova.’ Ngem kuna ni Jehova kenkuana: ‘Dika kitaen ti kinatayagna ken kinataerna. Saan nga isut’ pinilik nga agbalin nga ari.’

Gapuna inawagan ni Isai ti anakna nga Abinadab, ngem saan nga isut’ pinili ni Jehova. Sumaganad nga inyeg ni Isai ti anakna a ni Samma, ngem uray isu saan nga isut’ pinili ni Jehova. Inyeg ni Isai ti pito kadagiti annakna a lallaki ken Samuel, ngem awan pinili ni Jehova kadakuada.

Iti kamaudiananna inyegda ni David, nga isut’ buridek. Kuna ni Jehova: ‘Isu daytoy. Ibukbokmo ti lana kenkuana.’ Isu nga umayto ti tiempo inton agbalinen nga ari ni David iti Israel.