Adda nangato nga opisial dagiti soldado ti Roma idiay Cesarea nga agnagan Cornelio. Uray saan a Judio, isu ket resrespetuen dagiti Judio. Naparabur ken tultulonganna dagiti marigrigat. Mamati ni Cornelio ken Jehova ken kanayon nga agkarkararag kenkuana. Maysa nga aldaw, adda anghel a nagparang ken Cornelio ket imbagana: ‘Dinengngeg ti Dios dagiti kararagmo. Mangibaonka kadagiti mapan iti siudad ti Joppe, a paggigianan ni Pedro, ket paayabam.’ Dagus a nangibaon ni Cornelio iti tallo a lallaki a mapan idiay Joppe nga agarup 50 a kilometro iti abagatan ti Cesarea.

Kabayatanna, idiay Joppe, adda nasirmata ni Pedro. Nakakita kadagiti animal a saan a mabalin a kanen dagiti Judio, ket nakangngeg iti boses a mangibagbaga kenkuana a mangan. Imbaga ni Pedro: ‘Ngem diak pay pulos nangan iti narugit nga animal.’ Imbaga ti boses: ‘Saanmo nga aw-awagan a narugit dagitoy nga animal. Pinagbalin idan ti Dios a nadalus.’ Imbaga pay ti boses: ‘Adda tallo a lallaki iti ridaw. Sumurotka kadakuada.’ Napan ni Pedro iti ridaw ket dinamagna kadagiti lallaki no ania ti kasapulanda. Insungbatda: ‘Imbaonnakami ni Cornelio a maysa a  Romano nga opisial dagiti soldado. Papaayabannaka iti balayna idiay Cesarea.’ Pinadagus ni Pedro dagiti lallaki. Kabigatanna, simmurot kadakuada a napan idiay Cesarea a kaduana ti dadduma a kakabsat idiay Joppe.

Idi nakita ni Cornelio ni Pedro, nagparintumeng. Ngem imbaga ni Pedro: ‘Tumakderka! Taoak laeng a kas kenka. Imbaga ti Dios nga umayak iti balaymo, uray no saan a mapmapan dagiti Judio iti balay dagiti Gentil. Pangngaasim, ibagam no apay a pinaayabannak.’

Imbaga ni Cornelio ken Pedro: ‘Uppat nga aldaw ti napalabasen, nagkararagak iti Dios, ket adda anghel a nangibaga kaniak a paayabanka. Pangngaasim, isurom kadakami ti sasao ni Jehova.’ Imbaga ni Pedro: ‘Naammuak a saan a mangidumduma ti Dios. Awatenna amin a mayat nga agdayaw kenkuana.’ Sinuruan ida ni Pedro iti adu a banag maipapan ken Jesus. Idi kuan, immawat ni Cornelio ken dagiti kakaduana iti nasantuan nga espiritu, ket nabautisaranda amin.