Idi adda ni Jesus ken dagiti apostolna iti makinngato a kuarto, imbagana kadakuada: ‘Panawandakto ita a rabii.’ Kinuna ni Pedro: ‘Uray pumanawda amin, saankanto a panawan.’ Ngem imbaga ni Jesus: ‘Sakbay nga agtaraok ti kawitan, namitlonton nga imbagam a dinak am-ammo.’

Idi a ni Jesus ket impan dagiti soldado iti balay ni Caifas, naglibas ti kaaduan kadagiti apostol. Ngem dua kadakuada ti nangsurot ken Jesus ket nakikaduada kadagiti tattao. Ni Pedro ti maysa kadakuada. Napan ni Pedro iti paraangan ti balay ni Caifas ket immasideg iti apuy a paginuduan. Nakita isuna ti maysa nga adipen a babai ket imbagana: ‘Am-ammoka! Kadkaduam idi ni Jesus!’

Kinuna ni Pedro: ‘Saan! Diak ammo ti ibagbagam!’ Idi rimmuar iti ruangan, adda sabali nga adipen a babai a nakakita kenkuana ket imbaga ti adipen kadagiti tattao: ‘Kadkadua idi isuna ni Jesus!’ Imbaga ni Pedro: ‘Saanko nga am-ammo ni Jesus!’ Kinuna ti maysa a lalaki: ‘Kaduam idi ida! Madlaw iti panagsaom a sika ket taga-Galilea, kas ken Jesus.’ Ngem insapata ni Pedro: ‘Saanko nga am-ammo isuna!’

Dagus a nagtaraok ti kawitan. Nakita ni Pedro a timmaliaw ni Jesus kenkuana. Nalagipna ti imbaga ni Jesus isu a rimmuar ket napalalo ti sangitna.

Naguummong dagiti miembro ti Sanhedrin tapno denggenda ti kaso ni Jesus iti balay ni Caifas. Planodan a patayen ni Jesus, ket agbirbirokda iti ebidensia a maikontra kenkuana. Ngem awan mabirokanda. Idi kuan, insaludsod ni Caifas ken Jesus: ‘Sika kadi ti Anak ti Dios?’ Insungbat ni Jesus: ‘Wen, siak.’ Imbaga ni Caifas: ‘Saantayon a kasapulan ti kanayonan nga ebidensia. Maikontra iti Dios ti ibagbagana!’ Kinuna dagiti miembro ti korte: ‘Masapul a matay  daytoy a tao.’ Tinungtungpada ni Jesus, tinuptupraanda, inabbonganda ti matana, ken kinabkabilda, nga ibagbagada: ‘No talaga a maysaka a propeta, ibagam no asino ti nangkabil kenka!’

Idi bumigaten, impanda ni Jesus iti Sanhedrin ken insaludsodda manen: ‘Sika kadi ti Anak ti Dios?’ Insungbat ni Jesus: ‘Dakayo ti mangibagbaga iti dayta.’ Imbagada a maikontra iti Dios ti ibagbagana ket impanda iti palasio ti Romano a gobernador a ni Poncio Pilato. Ania ti simmaruno a napasamak? Kitaenta.