Sakbay la unay ti Paskua ti tawen 32 C.E., nagsubli ken Jesus dagiti apostol kalpasan ti panangaskasabada. Nabambannogda isu nga inkuyog ida ni Jesus a naglugan iti bangka a napan idiay Betsaida tapno makainanada. Ngem idi makaasidegdan iti igid ti baybay, nakita ni Jesus a rinibu ti simmurot kadakuada. Uray no kayat ni Jesus ti aginana a kadua dagiti apostolna, inawatna latta dagiti tattao. Pinaimbagna dagiti masakit sa nangrugi a nangisuro maipapan iti Pagarian ti Dios. Idi mumalemen, kinuna dagiti apostolna: ‘Sigurado a mabisinen dagiti tattao. Pagawidem ida tapno makagatangda iti kanenda.’

Imbaga ni Jesus: ‘Saan a masapul a pumanawda. Pakanenyo ida.’ Insaludsod dagiti apostol: ‘Mapankami kadi gumatang iti tinapay?’ Imbaga ti apostol a ni Felipe: ‘Uray no adu ti kuartatayo, ditay makagatang iti umanay a kanen dagitoy a tattao.’

Insaludsod ni Jesus: ‘Kasano kaadu a makan ti adda kadatayo?’ Imbaga ni Andres: ‘Lima a tinapay ken dua nga ikan. Saan nga umanay dayta.’ Kinuna ni Jesus: ‘Itedyo kaniak ti tinapay ken ikan.’ Imbagana kadagiti tattao nga aggugrupoda iti saglilimapulo ken sagsasangagasut ket agtugawda iti karuotan. Innala ni Jesus ti tinapay ken ikan, timmangad idiay langit, sa nagkararag. Kalpasanna, intedna ti makan kadagiti apostol ket inwarasda kadagiti tattao. Nangan ti 5,000 a lallaki ken dagiti babbai ken ubbing  agingga a nabsogda. Kalpasanna, inurnong dagiti apostol dagiti natedda a makan tapno awan ti masayang. Napunno ti 12 a basket! Talaga a nakaskasdaaw dayta a milagro!

Nagbilib unay dagiti tattao ket kayatda a pagbalinen ni Jesus nga ari. Ngem ammo ni Jesus a saan pay a pagayatan ni Jehova nga agbalin isuna nga ari. Isu a pinagawidna dagiti tattao ket imbagana kadagiti apostolna a mapanda iti ballasiw ti Baybay ti Galilea. Naglugan dagiti apostol iti bangka, ket napan ni Jesus iti bantay nga is-isuna. Apay? Gapu ta kayatna ti agkararag ken Amana. Uray no nakaad-adu ti ar-aramiden ni Jesus, siniguradona nga adda latta tiempona nga agkararag.