Imbilin ti agturay iti Imperio ti Roma a ni Cesar Augusto nga agparehistro ti amin a Judio iti lugar a nakayanakanda. Isu a napan da Jose ken Maria idiay Betlehem, a naggapuan ti pamilia ni Jose. Dandani idin aganak ni Maria.

Idi nakadanondan idiay Betlehem, awan ti nabirokanda a pagdagusan isu a nagyanda lattan iti pagyaponan iti animal. Sadiay nga inyanak ni Maria ni Jesus. Binungonna iti nalamuyot a lupot sa nainayad nga impaiddana iti kulluong, wenno pagpakanan iti animal.

Iti asideg ti Betlehem, adda dagiti pastor iti away nga agbambantay kadagiti karnero iti rabii. Idi kuan, adda anghel a nagparang kadakuada ket napalawlawan dagiti pastor iti lawag ti dayag ni Jehova. Nagbutengda, ngem imbaga ti anghel: ‘Dikay  agbuteng. Adda makaparagsak a damag nga ibagak. Nayanak ita ti Mesias idiay Betlehem.’ Dagus a nagparang ti adu nga anghel iti langit ket imbagada: ‘Maidaydayaw koma ti Dios idiay langit, ken maadda koma ti talna iti daga.’ Idi kuan, nagpukaw dagiti anghel. Ania ti inaramid dagiti pastor?

Imbaga dagiti pastor iti maysa ken maysa: ‘Intayon idiay Betlehem.’ Nagdardarasda a napan ket nakitada da Jose ken Maria ken ti kayyanak nga ubing iti pagyaponan iti animal.

Nasdaaw ti amin a nakangngeg iti imbaga ti anghel kadagiti pastor. Pinampanunot a naimbag ni Maria ken tinantandaananna ti imbaga ti anghel. Nagsubli dagiti pastor kadagiti karnero ket nagyamyamanda ken Jehova kadagiti nakita ken nangngegda.