Kas nailanad iti 1 Corinto 6:1-8, sinalaysay ni apostol Pablo ti panagdidinnarum dagiti agkakapammatian. Naldaangan agsipud ta dagiti dadduma a Kristiano idiay Corinto ‘maituredda ti mapan iti pangukoman iti saklang dagiti nakillo a tattao.’ (Bersikulo 1) Nangted ni Pablo iti natibker a rason no apay a dagiti Kristiano masapul a saanda nga idarum ti maysa ken maysa kadagiti pangukoman no di ket risutenda dagiti di pagkikinnaawatan iti uneg ti kongregasion. Usigentayo ti dadduma kadagiti rason no apay a naipaay daytoy a balakad ken kitaentayo ti sumagmamano a situasion a saan a saklawen daytoy a balakad.

No adda ditay pagkinnaawatan iti kapammatiantayo maigapu iti negosio, nasken a tamingentayo dayta sigun iti wagas ni Jehova, saan nga iti kabukbukodantayo. (Proverbio 14:12) Kas impakita ni Jesus, nasaysayaat a risuten a dagus ti di pagkikinnaawatan sakbay a dumakkel dayta. (Mateo 5:23-26) Nupay kasta, nakalkaldaang ta nagbalin a mannakisusik unay ti sumagmamano a Kristiano, nga inyulida pay ketdi kadagiti korte dagiti dida pagkikinnaawatan. Kinuna ni Pablo: “Kaipapananna ti naan-anay a pannakaabakyo ta agdidinnarumkayo iti maysa ken maysa.” Apay? Ti kangrunaan a rason ket ti kasta a wagas ti panangrisut iti parikut dadaelenna ti nasayaat a pakasarsaritaan ti kongregasion ken ti nagan ti Dios a daydayawentayo. Nasken ngarud nga ipapusotayo daytoy a saludsod ni Pablo: “Apay a dikay koma lattan baybay-an a masaurkayo?”—Bersikulo 7.

Imbaga pay ni Pablo a ti Dios inikkanna ti kongregasion iti nagsayaat nga urnos iti panangrisut kadagiti adu a di pagkikinnaawatan. Dagiti panglakayen ket Kristiano a lallaki a nagbalin a masirib gapu iti pannakaammoda kadagiti Nainkasuratan a kinapudno, ken kuna ni Pablo a ‘kabaelanda ti mangukom iti nagbabaetan ti kakabsatda’ no maipapan iti “bambanag iti daytoy a biag.” (Bersikulo 3-5) Impakita ni Jesus a dagiti di pagkikinnaawatan mainaig iti nadagsen a basol, kas iti panangpardaya ken panagkusit, ket rumbeng a marisut babaen ti tallo nga addang: umuna, dagiti nairaman iti dayta ikagumaanda a risuten dagiti bambanag nga is-isuda; maikadua, no saan nga agballigi ti umuna nga addang, mangikuyogda iti maysa wenno dua a saksi; ken maikatlo, no saan nga agballigi ti maikadua  nga addang, ipan dayta iti kongregasion nga ireprepresentar dagiti panglakayen.—Mateo 18:15-17.

Siempre, saan a nasken nga abogado wenno negosiante dagiti Kristiano a panglakayen, ken saan met a nasken nga agakemda a kasta. Saanda a mangipasdek kadagiti pagannurotan iti panangrisut kadagiti di pagkikinnaawatan dagiti kakabsat mainaig iti negosio. Imbes ketdi, ikagumaanda a tulongan ti agsumbangir a dasig a mangyaplikar iti Kasuratan ken mangrisut iti parikutda iti nainkappiaan a wagas. No narikut unay dagiti parikut, mabalin nga iyumanda dayta iti manangaywan iti sirkito wenno iti sanga nga opisina dagiti Saksi ni Jehova. Nupay kasta, adda dagiti situasion a saan nga agaplikar ti balakad ni apostol Pablo. Ania ti dadduma kadagita?

Iti dadduma a kasasaad, ti panagidarum ket mabalin a maysa laeng a pormalidad wenno legal a pamay-an tapno masurot ti di managimbubukodan ken natalna a pannakarisut dagiti parikut. Kas pagarigan, nalabit a ti panagidarum ti kakaisuna a pamay-an tapno makaala iti kasuratan ti panagdiborsio, maammuan no siasino ti mangaywan iti anak, maikeddeng no mano ti regular a sustento a maited iti asawa a lalaki wenno babai kalpasan ti diborsio, maala ti benepisio ti insurance, mapaneknekan a ti maysa ket karaman kadagidiay maiparbeng a pakaibunongan ti nabati a kuarta ken sanikua ti nabangkarote a kompania, ken mapatalgedan ti maysa a testamento. Adda met gundaway a mapilitan ti maysa a kabsat a mangyuli iti kontra demanda tapno maalangon ti naganna iti pannakaidarumna. *

No ti panggep ti panangaramid kadagiti kasta a darum ket tapno marisut ti di pagkikinnaawatan, saan a maisalungasing dayta iti naipaltiing a balakad ni Pablo. * Nupay kasta, ti kangrunaan koma a panunoten ti maysa a Kristiano ket ti pannakasantipikar ti nagan ni Jehova ken ti pannakataginayon ti talna ken panagkaykaysa ti kongregasion. Ayat ti kangrunaan a pakailasinan dagiti pasurot ni Kristo, ket “ti ayat . . . saanna a sapulen dagiti bukodna a pagimbagan.”—1 Corinto 13:4, 5; Juan 13:34, 35.