LEKSION 59
Makapagtalinaedka a Matalek Uray Maidadaneska
Addanto nga adda tiempo a maipasango ti amin a Kristiano iti ibubusor, wenno pannakaidadanes pay ketdi. Masapul kadi a pagbutngantayo dayta?
1. Apay nga ekspektarentayo a maidadanestayo?
Nalawag ti kuna ti Biblia: “Maidadanesto met ti amin nga agtarigagay nga agbiag maitunos iti debosionda iti Dios kas adalan ni Kristo Jesus.” (2 Timoteo 3:12) Naidadanes ni Jesus gapu ta saan a paset ti lubong ni Satanas. Saantay met a paset ti lubong, isu a saantayo a masdaaw no idadanesdatayo dagiti gobierno ken narelihiosuan nga organisasion daytoy a lubong.—Juan 15:18, 19.
2. Kasanotayo a makapagsagana para iti pannakaidadanes?
Masapul nga ita pay laeng, patibkerentayon ti panagtalektayo ken Jehova. Inaldaw koma nga agkararagka ken basaem ti Saona. Regular a makigimongka. Makatulong dagitoy nga aktibidad tapno naturedka a mangsango iti aniaman a pannakaidadanes, uray pay no dagiti kapamiliam ti mangidadanes kenka. Ni apostol Pablo a masansan idi a maidadanes, insuratna: “Ni Jehova ti tumultulong kaniak; saanakto nga agbuteng.”—Hebreo 13:6.
Makatulong met ti regular a panangasaba tapno agbalintayo a naturtured. No mangaskasabatayo, masursurotayo ti agtalek ken Jehova ken malabanantayo ti aniaman a buteng iti tao. (Proverbio 29:25) No agbalinka a natured a mangasaba itan, mas nakasaganakanto nga agtultuloy a mangasaba uray no iparit ti gobierno ti trabahotayo.—1 Tesalonica 2:2.
3. Kasano a pagsayaatantayo no ibturantayo ti pannakaidadanes?
Siempre, saantayo a maragsakan no maidadanestayo. Ngem no maibturantayo ti pannakaidadanes, bumileg ti pammatitayo. Agbalintayo a nadekdekket ken Jehova no mariknatayo ti tulongna kadagiti tiempo a kasla saantayon a kaya. (Basaen ti Santiago 1:2-4.) Masaktan ni Jehova no makitana nga agrigrigattayo, ngem maragsakan no makitana nga agib-ibturtayo. Kuna ti Biblia: “No ibturanyo ti panagsagabayo gapu ta inaramidyo ti naimbag, makaay-ayo dayta iti Dios.” (1 Pedro 2:20) No agtalinaedtayo a matalek, bendisionannatayo ni Jehova iti agnanayon a biag iti baro a lubong. Makapagserbitayto ken Jehova nga awanen ti bumusor kadatayo.—Mateo 24:13.
AMMUEM TI AD-ADU PAY
Ammuem no apay a posible ti agtalinaed a matalek ken Jehova uray no maidadanestayo, ken no ania ti itedna a bendision no aramidentayo dayta.
4. Makapagibturka uray busorendaka dagiti kapamiliam
Ammo unay ni Jesus a posible nga adda dagiti kapamiliatayo a saan a maragsakan no agserbitayo ken Jehova. Basaen ti Mateo 10:34-36, sa pagsaritaan daytoy a saludsod:
-
Ania ti mabalin a mapasamak no agdesision ti maysa nga agserbi ken Jehova?
Tapno makitam ti maysa a pagarigan, i-play ti VIDEO. Kalpasanna, pagsaritaan ti sumaruno a saludsod.
-
Ania ti aramidem no pasardengennaka ti maysa a kabagiam wenno gayyemmo nga agserbi ken Jehova?
Basaen ti Salmo 27:10 ken Marcos 10:29, 30. Kalpasan a mabasa ti tunggal teksto, pagsaritaan daytoy a saludsod:
-
Kasano a makatulong kenka daytoy a kari no busorendaka dagiti kapamiliam wenno gagayyemmo?
5. Itultuloymo ti agserbi ken Jehova uray maidadaneska
Kasapulan ti tured nga agserbi ken Jehova no adda mangbusor kadatayo. I-play ti VIDEO, sa pagsaritaan ti sumaruno a saludsod.
-
Kasano a napabilegka kadagiti kapadasan iti daytoy a video?
Basaen ti Aramid 5:27-29 ken Hebreo 10:24, 25. Kalpasan a mabasa ti tunggal teksto, pagsaritaan daytoy a saludsod:
-
Apay a napateg nga itultuloytayo ti agserbi ken Jehova uray no iparit ti gobierno ti panangasaba wenno panaggigimongtayo?
6. Tulongannaka ni Jehova nga agibtur
Intultuloy dagiti Saksi ni Jehova, nataengan man wenno ubbing ken sadinoman ti ayanda, ti agserbi a simamatalek ken Jehova uray no naidadanesda. Tapno makitam no ania ti nakatulong kadakuada, i-play ti VIDEO. Kalpasanna, pagsaritaan ti sumaruno a saludsod.
-
Iti video, ania ti nakatulong kadagitoy a Saksi nga agibtur?
Basaen ti Roma 8:35, 37-39 ken Filipos 4:13. Kalpasan a mabasa ti tunggal teksto, pagsaritaan daytoy a saludsod:
-
Kasano nga ipasigurado daytoy a teksto a maibturam ti aniaman a pakasuotan?
Basaen ti Mateo 5:10-12, sa pagsaritaan daytoy a saludsod:
-
Apay a posible latta nga agbalinka a naragsak uray maidadaneska?
Minilion a Saksi ni Jehova ti nakapagibtur iti pannakaidadanes. Kayam met dayta!
KUNA TI DADDUMA: “Diak kaya ti maidadanes.”
-
Ania dagiti teksto a mabalinmo nga usaren tapno matulongam ida nga agbalin a natured?
SUMARIO
Ipatpateg ni Jehova dagiti panagreggettayo nga agserbi kenkuana uray no maidaddadanestayo. Makapagibturtayo gapu iti tulongna!
Rebiu
-
Apay nga ekspektaren dagiti Kristiano a maidadanesda?
-
Ania ti mabalinmo nga aramiden itan tapno nakasaganakanto no maidadaneska?
-
Ania ti makatulong kenka tapno sigurado a makapagserbika latta ken Jehova uray no maidadaneska?
AGDISKOBREKA PAY
Buyaem no kasano a tinulongan ni Jehova nga agibtur ti maysa nga agtutubo a kabsat idi naibalud gapu iti panagbalinna a neutral.
Kitaem no ania ti nakatulong iti agassawa nga agserbi ken Jehova a simamatalek iti adu a tawen uray no nabusbusorda.
Panagserbi ken Jehova Kadagiti Tiempo ti Panagbalbaliw (7:11)
Ammuem no kasanoka nga agbalin a natured no maidadaneska.
“Agsagana Itan Para iti Pannakaidadanes” (Ti Pagwanawanan, Hulio 2019)
Kasano koma ti panangmatmattayo iti ibubusor ti pamilia, ken kasanotayo a mapagballigian dayta?
“Ti Kinapudno Mangyeg iti Kampilan Saan a Talna” (Ti Pagwanawanan, Oktubre 2017)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
