No matayanka, mariknam ti kasta unay a saem ken liday. Dayta ti rason nga aw-awagan ti Biblia ti ipapatay kas kabusor. (1 Corinto 15:26) Iti Leksion 27, naadalmo nga abakento ni Jehova dayta a kabusor. Ngem anianto ti mapasamak kadagiti natayen a tattao? Iti daytoy a leksion, ad-adu pay ti maammuam maipapan iti sabali pay a nagsayaat a kari ni Jehova​—pagbiagennanto manen ti binilion a tattao ket agbiagdanto a naragsak iti agnanayon. Pagungarennanto ida! Talaga kadi a mapasamak dayta? Mapagungardanto kadi tapno agbiagda idiay langit wenno ditoy daga?

1. Ania ti kayat ni Jehova nga aramiden kadagiti natayen nga ay-ayatentayo?

Kailiw ni Jehova a pagbiagen manen dagiti natay a tattao. Kombinsido ti matalek a tao a ni Job a saanto a lipaten ti Dios inton matay. Imbagana iti Dios: “Umawagkanto, ket sungbatankanto [manipud iti Tanem].”​—Basaen ti Job 14:13-15.

2. Kasanotayo nga ammo nga agbiagto manen dagiti natay?

Idi adda ni Jesus ditoy daga, inikkan ti Dios iti pannakabalin a mangpagungar. Pinagungar ni Jesus ti 12 ti tawenna a balasitang ken ti anak ti maysa a balo. (Marcos 5:41, 42; Lucas 7:12-15) Idi kuan, natay ti gayyem ni Jesus a ni Lazaro. Uray natayen ni Lazaro ken uppat nga aldawnan iti tanem, pinagbiag manen ni Jesus. Kalpasan a nagkararag iti Dios, impukkaw ni Jesus: “Lazaro, rummuarka!” Ket “rimmuar ti tao a natayen.” Sibibiag ni Lazaro! (Juan 11:43, 44) Imadyinem no kasano karagsak dagiti kapamilia ken gagayyem ni Lazaro!

3. Ania ti namnama dagiti natayen nga ay-ayatem?

Ikarkari ti Biblia: Addanto ‘panagungar.’ (Aramid 24:15) Dagiti pinagungar idi ni Jesus ket saan a napan idiay langit. Naragsakda a nagbiag manen ditoy daga. (Juan 3:13) Kasta met, pagungarento ni Jesus ti binilion a tattao tapno agbiagda a naragsak iti agnanayon iti paraiso a daga. Imbagana nga agungarto ti “amin a natay nga adda iti pakalaglagipan a tanem”​—uray dagidiay nalipatanen dagiti tattao ngem adda iti memoria ti Dios.​—Juan 5:28, 29.

 AMMUEM TI AD-ADU PAY

4. Pinaneknekan ni Jesus a kayana a pagungaren dagiti natay

Kitaem ti dadduma pay nga inaramid ni Jesus para iti gayyemna a ni Lazaro. Basaen ti Juan 11:14, 38-44, sa pagsaritaan dagitoy a saludsod:

• Kasanotayo nga ammo a talaga a natay ni Lazaro?​—Kitaen ti bersikulo 39.

• No adda idin ni Lazaro idiay langit kalpasan a natay, panagkunam, kasapulan pay ngata a pagbiagen ni Jesus ditoy daga?

I-play ti VIDEO.

5. Adunto ti mapagungar!

Basaen ti Salmo 37:29, sa pagsaritaan daytoy a saludsod:

• Pagyananto ti binilion a mapagungar?

Nakaad-adunto ti pagungaren ni Jesus, saan laeng a dagiti agserserbi ken Jehova. Basaen ti Aramid 24:15, sa pagsaritaan daytoy a saludsod:

• Asino ti kayatmo a makita nga agbiagto manen?

• Kasano a naliwliwa ken napabileg dagiti nagannak ni Phelicity iti namnama a panagungar?

 SUMARIO

Ikarkari ti Biblia nga agbiagto manen ti binilion a natay. Kayat ni Jehova nga agbiagdanto manen, ken inikkanna ni Jesus iti pannakabalin a mangpagungar kadakuada.

Rebiu

• Ania ti rikna ni Jehova ken ni Jesus maipapan iti panangpagungar kadagiti natay?

• Sadinonto ti pagyanan ti binilion a mapagungar​—idiay langit wenno ditoy daga? Apay a kasta ti sungbatmo?

• Apay a kombinsidoka nga agbiagto manen dagiti natayen nga ay-ayatem?