LEKSION 18
No Kasano a Mailasin Dagiti Pudno a Kristiano
Binilion ti mangibagbaga a Kristianoda. Ngem agduduma met ti patpatienda ken ti estandarte iti biag a sursurotenda. Isu a kasanotayo a mailasin dagiti pudno a Kristiano?
1. Ania ti kayat a sawen ti panagbalin a Kristiano?
Dagiti Kristiano ket adalan, wenno pasurot ni Jesu-Kristo. (Basaen ti Aramid 11:26.) Kasanoda nga ipakpakita nga adalan ida ni Jesus? Kinunana: “No agtalinaedkayo iti saok, pudno a dakayo dagiti adalak.” (Juan 8:31) Kayatna a sawen, masapul a suroten dagiti pudno a Kristiano dagiti pannursuro ni Jesus. Kanayon nga inusar ni Jesus ti Kasuratan a nangisuro. Kasta met dagiti pudno a Kristiano. Kanayon nga ibatbatayda dagiti patpatienda iti Biblia.—Basaen ti Lucas 24:27.
2. Kasano nga ipakpakita dagiti pudno a Kristiano ti ayat?
Kinuna ni Jesus kadagiti pasurotna: “Agiinnayatkayo kas iti panagayatko kadakayo.” (Juan 15:12) Kasano nga impakita ni Jesus nga ay-ayatenna dagiti adalanna? Nakikadua kadakuada, pinabilegna ida, ken tinulonganna ida. Intedna pay ti biagna para kadakuada. (1 Juan 3:16) Kasta met, dagiti pudno a Kristiano saanda la nga ibagbaga nga ay-ayatenda ti sabsabali. Ipakpakitada dayta iti sao ken aramid.
3. Ania ti kapatgan a trabaho dagiti pudno a Kristiano?
Inikkan ni Jesus dagiti adalanna iti trabaho. “Imbaonna ida a mangikasaba iti Pagarian ti Dios.” (Lucas 9:2) Saan la a kadagiti lugar a pagdaydayawan ti nangasabaan dagiti immuna a Kristiano. Nangasabada met kadagiti publiko a lugar ken kadagiti tattao iti balbalayda. (Basaen ti Aramid 5:42; 17:17.) Kasta met laeng dagiti pudno a Kristiano ita. Ikaskasabada ti kinapudno iti Biblia sadinoman ti pakakitaanda kadagiti tattao. Ay-ayatenda ti padada a tattao, isu a naragsakda a mangusar iti oras ken pigsada a mangibaga iti mensahe ti Biblia a mangted iti namnama ken gin-awa.—Marcos 12:31.
AMMUEM TI AD-ADU PAY
Kitaem ti nakaidumaan dagiti pudno a Kristiano kadagiti saan a mangsursurot kadagiti pannursuro ken ulidan ni Jesus.
4. Ad-adalenda ti kinapudno iti Biblia
Impateg dagiti immuna a Kristiano ti Sao ti Dios
Adu ti mangibagbaga a Kristianoda ngem saanda met a sursuroten ken ipatpateg dagiti kinapudno iti Biblia. I-play ti VIDEO, sa pagsaritaan ti sumaruno a saludsod.
-
Kasano a ti dadduma a relihion nga agkunkuna a Kristiano saanda a naisuro dagiti pannursuro ni Jesus?
Insuro ni Jesus ti kinapudno manipud iti Sao ti Dios. Basaen ti Juan 18:37, sa pagsaritaan daytoy a saludsod:
-
Sigun ken Jesus, kasanotayo a mailasin dagiti Kristiano a “mangtungtungpal iti kinapudno”?
5. Ikaskasabada ti kinapudno iti Biblia
Nangasaba dagiti immuna a Kristiano iti dadduma
Sakbay a napan ni Jesus idiay langit, inikkanna dagiti pasurotna iti trabaho nga ar-aramidenda agingga ita. Basaen ti Mateo 28:19, 20 ken Aramid 1:8, sa pagsaritaan daytoy a saludsod:
-
Agingga kaano ken kasano kaadayo ti pakaikasabaan ti naimbag a damag?
6. Ar-aramidenda ti ikaskasabada
Ania ti nakakombinsir iti maysa a lalaki nga agnagan iti Tom a nasarakannan dagiti pudno a Kristiano? I-play ti VIDEO, sa pagsaritaan dagiti sumaruno a saludsod.
-
Iti video, apay a nauma ni Tom iti relihion?
-
Ania ti nakakombinsir kenkuana a nasarakannan ti kinapudno?
Sao baybay-an, aramid pakakitaan. Basaen ti Mateo 7:21, sa pagsaritaan daytoy a saludsod:
-
Ania ti napatpateg ken Jesus—ti ibagbagatayo a patpatientayo wenno dagiti ipakpakitatayo babaen ti aramidtayo?
7. Ay-ayatenda ti maysa ken maysa
Inayat dagiti immuna a Kristiano ti maysa ken maysa
Talaga kadi a kaya dagiti Kristiano nga isakripisio ti biagda para iti padada a Kristiano? I-play ti VIDEO, sa pagsaritaan dagiti sumaruno a saludsod.
-
Iti video, apay a nakasagana ni Lloyd a matay para ken Brother Johansson?
-
Panagkunam, pudno kadi isuna a Kristiano?
Basaen ti Juan 13:34, 35, sa pagsaritaan dagitoy a saludsod:
-
Kasano ti panangtrato dagiti adalan ni Jesus (dagiti pudno a Kristiano) kadagiti saanda a kapada iti puli wenno nasionalidad?
-
Kasanoda nga ipakpakita dayta no adda gubat?
KUNA TI DADDUMA: “Agpapada lang met amin a Kristiano uray ania ti sektada.”
-
Ania a teksto ti mabalinmo nga usaren tapno maipakitam no kasanotayo a mailasin dagiti pudno a Kristiano?
SUMARIO
Sursuroten dagiti pudno a Kristiano dagiti pannursuro ti Biblia, ipakpakitada ti managsakripisio nga ayat, ken ikaskasabada ti kinapudno iti Biblia.
Rebiu
-
Nakaibatayan ti patpatien dagiti pudno a Kristiano?
-
Ania a kualidad ti pagilasinan kadagiti pudno a Kristiano?
-
Ania a trabaho ti ar-aramiden dagiti pudno a Kristiano?
AGDISKOBREKA PAY
Am-ammuem ti maysa a grupo a mangar-aramid iti amin a kabaelanda a mangsurot iti ulidan ken pannursuro ni Jesu-Kristo.
Kitaem no kasano a nasarakan ti maysa a dati a madre ti “sangalubongan a pamilia nga agdaydayaw iti Dios.”
“Inusarda ti Biblia a Mangsungbat Kadagiti Saludsodko!” (Ti Pagwanawanan, Abril 1, 2014)
Kitaem no kasano nga ipakpakita dagiti pudno a Kristiano ti ayat kadagiti kapammatianda nga agkasapulan iti tulong.
Panangtulong Kadagiti Kakabsat No Adda Didigra—Ababa a Paset (3:57)
Ammuem no kasano a sinurot dagiti immuna a Kristiano ken dagiti pudno a Kristiano ita ti imbaga ni Jesus a pakailasinan dagiti pasurotna.
“Ania ti Pakabigbigan Dagiti Pudno a Kristiano?” (Ti Pagwanawanan, Marso 1, 2012)
Baka Kayatmo Met ti
MASANSAN A MAISALSALUDSOD
Ania ti Panagadal iti Biblia nga Iyaw-awis Dagiti Saksi ni Jehova?
Iti libre a panagadal nga iyaw-awis dagiti Saksi ni Jehova, mabalinmo nga usaren ti aniaman a patarus ti Biblia. Mabalinmo nga awisen ti amin a kapamiliam wenno ti asinoman a gayyemmo.
