Kapitulo 94

Pannakasapul ti Kararag ken Kinapakumbaba

ITI nasapsapa, idi isut’ adda idiay Judea, nangted ni Jesus ti pangngarig maipapan ti pateg ti kinapinget iti panagkararag. Itan, iti maudi a panagdaliasatna idiay Jerusalem, impaganetgetna manen ti pannakasapul a di sumuksuko iti panagkarkararag. Nalabit adda pay laeng ni Jesus idiay Samaria wenno Galilea idi salaysayenna kadagiti adalanna daytoy kanayonan a pangngarig:

“Adda idi ti maysa nga ukom iti maysa a siudad a dina kabuteng ti Dios ket dina met padayawan ti uray asino a tao. Adda met idiay a siudad ti maysa a babai a balo a masansan a napan kenkuana, nga agkunkuna, ‘Ibalesannak iti kabusorko.’ Ket isu nagmadi iti sumagmamano nga aldaw, ngem kalpasanna kinunana iti unegna, ‘Uray diak kabuteng ti Dios ket awan ti panangpadayawko iti tao, ngem gapu ta daytoy balo makaalimuteng kaniak, aramidekto ti kinalinteg kenkuana, tapno sumardeng nga um-umay kaniak.’”

Kalpasanna inyaplikar ni Jesus ti estoriana, a kunkunana: “Denggenyo ti sao ti ukom a nakillo! Ket ti Dios dinanto aya aramiden ti kinalinteg kadagiti pinilina nga umawag kenkuana iti aldaw ken rabii, ket addanto anusna kadakuada?”

Di kayat nga ipamatmat ditoy ni Jesus a ni Jehova a Dios ket kaas-asping ti nakillo nga ukom. Imbes ketdi, no urayto pay ti nakillo nga ukom agtignay iti paulit-ulit a panagpakpakaasi, awan duadua ngarud a ti Dios, nga agpadpada a nalinteg ken naimbag, sungbatannanto met ti ilina a di agsarday ti panagkarkararagna. Gapuna intuloy ni Jesus: “Kunak kadakayo nga [ti Dios] aramidennanto ti kalinteganda a dagus.”

Masansan mapagliblibakan ti kinahustisia dagiti nanumo ken napanglaw, idinto a dagiti napigsa ken nabaknang masansan mapabpaboranda. Ti Dios, nupay kasta, saannanto laeng a kitaen a madusa a sililinteg ti managdakdakes no di ket ipasiguradona met a matratonto a sililinteg dagiti adipenna babaen ti panangtednanto kadakuada ti biag nga agnanayon. Ngem mano a tattao ti mamati a siinget a ti Dios aramidennanto ti kalinteganda a dagus?

Iti panagsaona nangnangruna iti pammati a mainaig iti pannakabalin ti kararag, insaludsod ni Jesus: “Inton umay ti Anak ti tao, masarakannanto aya ti pammati ditoy daga?” Nupay di nasungbatan ti saludsod, mabalin nga ipamatmatna a ti kasta a pammati ket saanto a nasaknap inton ni Kristo umay iti pannakabalinna ti Pagarian.

Sumagmamano kadagidiay agdengdengngeg ken Jesus patienda a sigurado nga adda pammatida. Agtalekda iti bagbagida a nalintegda, ket lalaisenda dagiti sabsabali. Mabalin a sumagmamano kadagiti adalan ni Jesus ti nairaman pay iti grupo. Gapuna inturongna ti sumaganad a pangngarig kadagita:

“Dua a tao immulida iti templo a nagkararag, ti maysa Fariseo ket ti maysa, agsingsingir ti buis. Ket ti Fariseo nagtakder ket nagkararag iti pakinakemna a kastoy, ‘O Dios, agyamanak kenka ta saanak a kas kadagiti sabali a tao a mannanakawda, nakilloda, mannakikamalalada, ket saanak a kas itoy agsingsingir ti buis. Agayunarak ti mamindua iti maysa a lawas, itedko ti apagkapullo ti amin a kupkupikupak.’”

Pagaammo dagiti Fariseo iti panangiparparangda iti publiko ti kinalintegda tapno pagsiddaawen dagiti dadduma. Ti gagangay nga al-aldaw nga impaalagadda iti bagbagida a panagayunar ket kada Lunes ken Huebes, ket siinget a baybayadanda ti apagkapullo uray pay ti nagbassitan a yerba kadagiti talon. Iti sumagmamano a bulan a nasapsapa, ti pananglaisda kadagiti gagangay a tattao ket naiparangarang bayat ti Piesta ti Tabernakulo idi a kinunada: “Dagitoy adu a tao dida ammo ti Linteg [kayatna a sawen, ti panangipatarus nga ipapaay dagiti Fariseo iti dayta] mailunodda.”

Iti panangitultuloyna ti pangngarigna, sinalaysay ni Jesus ti maipapan iti kasta a tao a “nailunod”: “Ngem di agsingsingir ti buis idinto nga adda iti adayo dina maitangad man la koma dagiti matana sadi langit, no di ket dandanogenna ti barukongna, a kunkunana, ‘O Dios, mangngaasika kaniak a managbasol.’” Gapu ta ti agsingsingir ti buis sipapakumbaba a binigbigna dagiti biddutna, kuna ni Jesus: “Kunak kadakayo, Daytoy nagawid iti balayna a napakawan nga immun-una ngem daydi maysa; ta uray siasino nga agpasindayaw maipababanto, ket ti agpakumbaba maitan-okto.”

Gapuna impaganetget manen ni Jesus ti pannakasapul ti panagpakumbaba. Gapu ta dimmakkelda iti sosiedad a nakaim-impluensia dagiti Fariseo ket ti saad ken ranggo kanayon a maipagpaganetget, saan a nakaskasdaaw nga uray dagiti adalan ni Jesus ket apektadoda. Kaskasdi, anian a nagsayaat a leksion ti kinapakumbaba ti isursuro ni Jesus! Lucas 18:1-14; Juan 7:49.

▪ Apay nga impaay ti nakillo nga ukom ti dawat ti balo a babai, ket ania a leksion ti isuro ti pangngarig ni Jesus?

▪ Ania a pammati ti sapulento ni Jesus inton umay?

▪ Iti siasinot’ nangiturongan ni Jesus ti pangngarigna maipapan iti Fariseo ken ti agsingsingir ti buis?

▪ Ania a kababalin dagiti Fariseo ti rebbeng a liklikan?