Kapitulo 108

Napaayda a Mangtiliw ken Jesus

NI Jesus nangisursuro idiay templo ket kaibagbagana kadagiti narelihiusuan a kabkabusorna ti tallo a pangngarig a nangibutaktak ti kinadakesda, nakapungtot dagiti Fariseo ket nagnunummuanda a tiliwen babaen ti panagsaona ti banag a mabalindanto a pangtiliwan kenkuana. Nagnunummuanda ti maysa a kumplot ket imbaonda dagiti adalanda, agraman dagiti paspasurot ti partido ni Herodes, tapno isut’ allilawenda.

“Mannursuro,” kuna dagitoy a lallaki, “ammomi a sika napudnoka ken isursurom a sipupudno ti dalan ti Dios, ket dika met agamak iti uray siasino, ta dika kumitkita iti pammarang dagiti tao. Ibagam, ngarud, kadakami, Ania ti panangipagarupmo? Maipalubos aya ti agbayad ti buis ken Cesar wenno saan?”

Saan a pinaallilaw ni Jesus iti pammasablog. Nailasinna a no kunaenna, ‘Saan, di nainkalintegan wenno umiso a bayadan daytoy a buis,’ agbasolto iti panangkontra ti turay ti Roma. Kaskasdi, no kunaenna, ‘Wen, rebbengyo a bayadan daytoy a buis,’ dagiti Judio, a laisenda ti panangituray ti Roma, ti mangguranto kenkuana. Gapuna isut’ simmungbat: “Apay-apay a suotendak, managinsisingpet? Ipakitayo kaniak ti pirak ti buis.”

Idi naiyegdan kenkuana ti maysa, insaludsodna: “Asino ti akinladawan ken ti naisurat itoy?”

“Ni Cesar,” insungbatda.

“Itedyo ngarud ken Cesar ti kukua ni Cesar, ket iti Dios ti kukua ti Dios.” Idi nangngeg dagitoy a lallaki ti naglaing a sungbat ni Jesus, nagsiddaawda. Ket pimmanawda ket binaybay-anda nga agmaymaysa.

Idi makitada a napaay dagiti Fariseo a makaala ti maibusor ken Jesus, dagiti Saduceo, nga agkunkuna nga awan ti panagungar, immasidegda kenkuana ket nagsaludsodda: “Mannursuro, ni Moises kinunana, ‘No ti maysa a lalaki matay nga awan putotna, asawaento ti kabsatna ti asawa a babai daydi ket iputotanna ni kabsatna iti sunona.’ Adda ngarud kadakami idi pito nga agkakabsat a lallaki; ket ti immuna nangasawa ket natay, ket idinto nga awan ti putotna imbatina ti asawana iti kabsatna. Kasta met daydi maikadua ken daydi maikatlo, agingga iti maikapito. Ket idi nalpasda aminen natay met di babai. Inton panagungar ngarud, asinonto kadagiti pito ti akin-asawa iti babai? Ta isuda amin kinupikupanda.”

Kas sungbat kinuna ni Jesus: “Saan aya a maallilawkayo, agsipud ta dikay ammo dagiti Sursurat wenno ti pannakabalin ti Dios? Ta inton panagungar, saandanto a mangasawa wenno makiasawa, ngem kasdanto la kadagiti anghel idiay langit. Ngem no maipapan kadagiti natay, nga agungarda, dikay aya nabasa idiay libro ni Moises no kasano ti pannakisao ti Dios kenkuana iti bassit a kayo a sumsumged, a kunkunana, ‘Siak ti Dios ni Abraham ken ti Dios ni Isaac ken ti Dios ni Jacob’? Saan nga isut’ Dios dagiti natay, no di dagiti sibibiag. Maallilawkayo unay.”

Nasdaawan manen ti umariwekwek iti sungbat ni Jesus. Uray ti dadduma kadagiti eskribas bigbigendan: “Mannursuro, naimbag ti panagsaom.”

Idi nakita dagiti Fariseo a pinagulimek ni Jesus dagiti Saduceo, immayda amin kenkuana kas maysa a grupo. Tapno suotenda manen, maysa kadakuada nga eskriba ti nagimtuod: “Mannursuro, ania ti dakkel a bilin iti Linteg?”

Simmungbat ni Jesus: “Ti umuna isu daytoy, ‘Denggem, O Israel, ni Jehova a Diostayo isu ti maymaysa a Jehova, ket ayatem ni Jehova a Diosmo iti amin a pusom ken iti amin a kararuam ken iti amin a panunotmo ken kadagiti isuamin a pigsam.’ Ti maikadua isu daytoy, ‘Ayatem ti kaarrubam a kas iti bagim.’ Awan ti sabali a bilin a dakdakkel ngem dagitoy.” Kinapudnona, innayon ni Jesus: “Kadagitoy dua a bilin agpannuray ti intero a Linteg, ken dagiti Mammadto.”

“Mannursuro, naimbag ti panagsaom a maitunos iti kinapudno,” inyanamong ti eskriba. “‘Isu ti Maymaysa, ket awan ti sabali no saan nga Isu’; ket ti panagayat kenkuana iti amin a puso ken iti amin a pannakaawat ken iti amin a pigsa ken ti panagayat ti kaarruba a kas iti bagi met laeng ket napatpateg ngem dagiti amin a daton ken sagut.”

Ket idi nakitana a simmungbat a sisisirib ti eskriba, kinuna ni Jesus kenkuana: “Saanka nga adayo iti pagarian ti Dios.”

Iti uneg ti tallo nga aldaw itan​—Domingo, Lunes, ken Martes​—nangisursuro ni Jesus idiay templo. Dimngeg dagiti tattao kenkuana a siraragsak, kaskasdi isut’ kayat a papatayen dagiti relihiuso a papangulo, ngem agingga ita napaay ti tigtignayda. Mateo 22:15-40; Marcos 12:13-34; Lucas 20:20-40.

▪ Ania a panangsikap ti implano dagiti Fariseo a pangtiliw ken Jesus, ket aniat’ ibungana no isut’ mangted ti wen wenno saan a sungbat?

▪ Kasanot’ panangtungday ni Jesus kadagiti ranta dagiti Saduceo a mangtiliw kenkuana?

▪ Ania pay a tignay ti inaramid dagiti Fariseo a pangsuot ken Jesus, ket aniat’ resultana?

▪ Bayat ti maudi a ministeriona idiay Jerusalem, mano nga aldaw a nangisuro ni Jesus idiay templo, ket aniat’ epektona?