Idi kinuna ni apostol Pablo a dagiti Kristiano ‘maitayabdanto’ a makikadua iti Apo, ania a tema ti salsalaysayenna idi?

1 Tes. 4:13-18, RS: “Ngem dikami kayat nga awan ti ammoyo, kakabsat, maipapan kadagiti maturog [“kadagidiay maturog ken patay,” NE; “kadagidiay natay,” TEV, JB], tapno dikayo agladingit a kas kadagiti dadduma nga awan inanamada. Ta no patientayo a ni Jesus natay ket nagungar, kasta met, ti Dios iyegnanto dagiti maturog ken Jesus nga ikuyog kenkuana. Ta daytoy ti ibagami kadakayo babaen ti sao ti Apo, a datayo a sibibiag, datayo nga agbati agingga iti iyaay ti Apo, saantayonto nga unaan dagiti naturogen. Ta ti Apo met laeng aggapunto sadi langit a buyogen ti ariwawa, ti timek ti arkanghel, ken ti uni ti trompeta ti Dios. Ket dagiti natay ken Kristo bumangondanto nga umuna; kalpasanna datayo a sibibiag, datayo a nabati, maitayabtayo a maikuyog kadakuada iti ul-ulep a sumabat iti Apo iti tangatang; ket iti kasta kankanayon nga addatayto iti Apo. Ngarud pangliwliwayo iti maysa ken maysa dagitoy a sasao.” (Nabatad a dadduma a kameng ti Nakristianuan a kongregasion idiay Tesalonica ket nataydan. Pinaregta ni Pablo ida nga aglilinniwanliwada babaen ti namnama ti panagungar. Impalagipna kadakuada a ni Jesus ket nagungar kalpasan ti ipapatayna; ngarud, met, inton umay ti Apo, dagidiay matalek a Kristiano a natay kadakuada mapagungardanto a makikadua ken Kristo.)

 Siasinoda dagidiay ‘maitayabto a maikuyog iti ul-ulep,’ sigun iti 1 Tesalonica 4:17 ?

Ilawlawag ti bersikulo 15 nga isuda dagidiay matalek “nga agbati agingga iti iyaay ti Apo,” kayatna a sawen, sibibiagdanto pay laeng inton umay ni Kristo. Masapul kadi a matayda? Sigun iti Roma 6:3-5 ken 1 Corinto 15:35, 36, 44 (a nailanad idiay  panid 368, 369), masapul a matayda sakbay a magun-odanda ti nailangitan a biag. Ngem saan a masapul nga agtalinaedda iti natay a kasasaad nga ur-urayenda ti isusubli ni Kristo. Iti apagdarikmat ‘maitayabdanto,’ “apagkirem ti mata,” a makikadua iti Apo.—1 Cor. 15:51, 52, RS; kasta met ti Apocalipsis 14:13.

Agparangto kadi ni Kristo idiay ulep a sibabagi sananto ipalangit dagiti matalek a Kristiano bayat a kumitkita ti sangalubongan?

Imbaga kadi ni Jesus nga isu ket makitanto manen ti lubong babaen kadagiti pisikal a matada?

Juan 14:19, RS: “Adda pay apagbassit, ket ti lubong dinakto makitan, ngem dakayo [a matalek nga adalanna] makitadakto; gapu ta agbiagak, agbiagkayto met.” (Italics added.) (Idiligyo ti 1 Timoteo 6:16.)

Aniat’ kaipapananna no ti Apo “aggapunto sadi langit”?

Mabalin kadi a ti Apo “aggapunto sadi langit,” kas kunaen ti 1 Tesalonica 4:16, a di makita dagiti pisikal a mata? Idi panawen ti kadaanan a Sodoma ken Gomorra, kinuna ni Jehova nga isu ‘umulogto’ tapno kitaenna ti mapaspasamak. (Gen. 18:21, RS) Ngem idi immay nagsukimat ni Jehova, awan tao a nakakita kenkuana, nupay no nakitada dagiti imbaonna a pannakabagina nga anghel. (Juan 1:18) Kasta met, nga uray saan nga agsubli a silalasag, ni Jesus mabalinna nga iturong ti atensionna kadagiti matalek a pasurotna ditoy daga tapno gunggonaanna ida.

Iti ania a sentido, ngarud, a dagiti tattao “makitadanto” ti Apo nga “umayto iti maysa nga ulep”?

Impadto ni Jesus: “Iti dayta makitadanto ti Anak ti tao [a ni Jesu-Kristo] nga umayto iti maysa nga ulep agraman ti pannakabalin ken dakkel a dayagna.” (Luc. 21:27, RS) Daytoy wenno dagiti umarngi a sasao kadagiti sabali a texto dida pulos kontraen  ti insao ni Jesus a nairekord iti Juan 14:19. Amirisenyo: Idiay Bantay Sinai, aniat’ napasamak idi a ti Dios ‘immay kadagiti umili iti napuskol nga ulep,’ kas naisao iti Exodo 19:9? (RS) Ti Dios presente idi nupay dida makita; dagiti umili ti Israel nakitada dagiti ebidensia ti kaaddana, ngem awan asinoman kadakuada nga aktual a nakakita iti Dios kadagiti matada. Kasta met, ngarud, idi kinuna ni Jesus nga “umayto iti maysa nga ulep,” kayatna idi nga ibaga nga isu dinto makita dagiti mata ti tattao ngem sipupuotto ti tattao iti kaaddana. Isut’ “makitadanto” babaen iti matmata ti isipda, a mailasinda nga isu ket addan. (Para kadagiti kanayonan a komento, kitaenyo ti paulo nga “Isusubli ni Kristo.”)

Posible kadi nga agpalangit dagiti Kristiano a sibabagida iti pisikal?

1 Cor. 15:50, RS: “Kunak ngarud daytoy, kakabsat: a ti lasag ken dara saanda a mabalin a tawiden ti pagarian ti Dios, ket ti panagrupsa dina tawiden ti saan nga agrupsa.”

Ti napasaran idi ni mammadto nga Elias kontraenna aya daytoy? Pulos a saan. Masapul nga itunostay dayta iti nabatad a sinao ni Jesus adu a siglo kalpasanna: “Awan ti immuli sadi langit no di ti bimmaba nanipud langit, ti Anak ti tao.” (Juan 3:13, RS) Nupay adda nakakita ken Elias idi “immuli sadi langit iti maysa nga alawig,” dina kaipapanan daytoy nga isu ket napan idiay lugar a naespirituan. Apay a saan? Yantangay isu ket naipadamag kalpasanna a kas nangipatulod iti surat a mangtubngar iti ari ti Juda. (2 Ar. 2:11, RS; 2 Cron. 21:1, 11-15) Sakbay a naimbento ti tao dagiti eroplano, inusar ni Jehova ti bukodna a namuspusan (lugan nga apuy ken alawig) a nangipatayab ken Elias manipud daga a nagpalangit nga isut’ pagtaytayaban dagiti billit ket nagbiahe a napan iti sabali a lugar.—Idiligyo ti Genesis 1:6-8, 20.

Dagiti matalek a Kristiano sililimeddanto met ngata nga agpalangit, a basta agpukawdan ditoy daga a didan matmatay?

 Roma 6:3-5, RS: “Dikay ammo aya a datayo amin a nabautisaran ken Kristo Jesus nabautisarantayo iti ipapatayna? . . . Ta no naikanunongtayo kenkuana iti kaasping ti ipapatayna, mairanudtayto met kenkuana iti kaasping ti panagungarna.” (Ti napasamak ken Jesus isut’ nagbalin a padron. Ammo dagidi adalanna ken dagiti sabsabali nga isu ket natay. Isu saan a  napan iti nailangitan a biag agingga a kalpasan ti ipapatay ken panagungarna.)

1 Cor. 15:35, 36, 44 RS: “Addanto agkuna, ‘Kasano ti panagungar dagiti natay? Anianto a kita ti bagida?’ Nanengneng! Ti imulam saan nga agbiag no di umuna a matay. Maimula a bagi a linalasag, mapagungarto a bagi a naespirituan.” (No kasta umuna pay ti ipapatay sakbay a magun-odan ti maysa ti naespirituan a bagi, saan kadi?)

Dagiti amin a matalek a Kristiano simimilagro kadi nga alaen ti Apo ida manipud ditoy daga sakbay ti dakkel a rigat?

Mat. 24:21, 22: “Ta addanto dakkel a rigat a nanipud idi punganay ti lubong agingga ita, awan pay kasta a napasamak, ket awanto metten iti uray kaano. Kinapudnona, no dagita nga aldaw saanda koma a napaababa, awan ti lasag a maisalakan; ngem gapu kadagiti napili dagita nga aldaw mapaababadanto.” (Dina kaipapanan daytoy a “dagiti napili” ket maipalangitda amin sakbay ti dakkel a rigat, saan kadi? Imbes ketdi, itdenna ti namnama kadakuada, agraman dagiti kakaduada nga adda a silalasag, a manglasat iti dayta dakkel a rigat ditoy daga.)

Apoc. 7:9, 10, 14, RS: “Kalpasan dagitoy kimmitaak, ket adtoy, ti dakkel nga umariwekwek nga awan tao a nakabalin a bumilang, a naggapuda iti isuamin a nasion, iti isuamin a tribo ken il-ili ken dildila, nga agtaktakderda iti sanguanan di trono ken iti sanguanan daydi Kordero, a nagkawesda kadagiti pagan-anay a puraw, ket adda palpalma iti im-imada, ket agpukpukkawda iti dakkel a timek, ‘Ti pannakaisalakan nagtaud iti Diostayo nga agtugtugaw iti trono, ken iti Kordero!’ . . . ‘Dagitoy isuda dagiti naggapu iti dakkel a rigat.’” (No ti maysa ket “naggapu” iti maysa a banag masapul nga isu ket limmasat wenno simrek iti dayta. No kasta daytoy a dakkel nga umariwekwek masapul a tattaoda nga aktual a nakapasar iti dakkel a rigat ket naggapuda dita a kas dagidiay limmasat.) (No maipapan iti kaaddada ditoy daga, kitaenyo ti panid 254.)

Anianto a pannalaknib ti magun-odan dagiti pudno a Kristiano bayat ti dakkel a rigat?

Roma 10:13, RS: “Siasinoman nga umawagto iti nagan ti Apo [“ni Jehova,” NW] maisalakanto.”

Sof. 2:3, RS: “Birukenyo ti APO [“ni Jehova,” NW, AS, Yg, By], dakayo amin a napakumbaba iti daga, a nagtungpal iti bilbilinna; birukenyo ti kinalinteg, birukenyo ti kinapakumbaba;  nalabit maitalimengkayto iti aldaw ti pungtot ti APO.” (Kasta met ti Isaias 26:20)

Amin ngata a pudno a Kristiano maipalangitdanto kalpasan ti dakkel a rigat?

Mat. 5:5, RS: “Nagasat dagiti naemma, ta tawidendanto ti daga.”

Sal. 37:29, RS: “Ti nalinteg tawidennanto ti daga [“daga,” Ro, NW], ket agtaengto kenkuana nga agnanayon.” (Kasta met dagiti bersikulo 10, 11, 34)

1 Cor. 15:50, RS: “Ti lasag ken dara saanda a mabalin a tawiden ti pagarian ti Dios.”

Kitaenyo met ti paulo a “Langit.”

Apay nga addada Kristiano a mapan langit a makikadua ken Kristo?

Apoc. 20:6, RS: “Isudanto ti papadi ti Dios ken ni Kristo, ket makipagaridanto kenkuana bayat ti sangaribo a tawen.” (Yantangay makipagarida ken Kristo, masapul nga addada tattao nga iturayanda. Siasinoda ngay dagitoy? Kitaenyo ti Mateo 5:5 ken Salmo 37:29.)

Kitaenyo ti paulo a “Mayanak a Mabalbaliwan.”

Dagidiay mapan langit agsublidanto met laeng kadi kalpasanna ditoy daga tapno agbiagda nga agnanayon iti Paraiso ditoy?

Prov. 2:21, RS: “Ti nalinteg agtalinaedto ditoy daga [“agtaengto ditoy daga,” NE], ket dagiti natarnaw a tattao agtaengdanto kenkuana.” (Paliiwenyo ta ti kasuratan dina kunaen a dagiti nalinteg agsublidanto ditoy daga no di ket agtalinaeddanto ditoy.)

1 Tes. 4:17, RS: “Ket iti kasta [dagiti Kristiano a maitayab idiay langit] kankanayon nga addatayo iti Apo.”

‘Patienyo kadi ti rapture?’

Kunaenyo: ‘Maawatak a saan nga amin a tattao ket agpapada ti panangtarusda iti rapture. Ilawlawagyo man ti kapanunotanyo maipapan iti dayta? . . . Ta iti uray ania a banag,  naim-imbag no idiligtayo iti Biblia ti kapanunotantayo. (Usarenyo dagiti paset ditoy ngato a maikanatad.)’

Wenno: ‘Inlawlawagda kaniak a ti rapture ket kasla tangkulong para kadagiti Kristiano. Adut’ mamati a daytoytot’ pangliklikanda iti dayta umay a dakkel a rigat. Kasta met kadi ti makunayo?’ Sayonto inayon: (1) ‘Sigurado a kayattayonto ti pannalaknib ti Dios inton dumteng dayta a tiempo, ket makaparegta dagiti sumagmamano a texto a mangipakita no kasanotay a makalasat. (Sof. 2:3)’ (2) ‘Makaparagsak, ta ipakita ti Biblia a salaknibanto ti Dios dagidiay matalek ditoy daga a mismo. (Prov. 2:21, 22) Maitunos dayta iti panggep ti Dios idi pinarsuana nga immuna ni Adan sana insaad iti Paraiso, di ngamin?’

Wenno: ‘No rapture kayatyo a sawen a dagiti Kristiano nga agbibiag iti panungpalan ti sistema ti bambanag ket maipalangitdanto, di ngamin? . . . Inamirisyo kadin no anianto ti aramidenda idiay langit? . . . Paliiwenyo ti kunaen ti Apocalipsis 20:6 (ken 5:9, 10). . . . Ngem siasinodantot’ iturayanda? (Sal. 37:10, 11, 29)’