Posible kadi a mangipasdek ti tattao ti maysa a gobierno a mangipaay iti manayon a kinaragsak?

Aniat’ ipakita ti rekord ti natauan a historia?

Ecl. 8:9: “Ti tao inturayanna ti tao a maipaay iti pagdaksanna.” (Pudno daytoy nupay adda dagiti gobierno ken agtuturay a nagsayaat ti arapaapda idi mangrugida.)

“Amin a sibilisasion nga adda idi ket narpuog idi agangay. Ti historia naglaon kadagiti ganuat a napaay, wenno ar-arapaap a di naragpat. . . . Ngarud, kas maysa a historiador, agbiag ti maysa a sipapanunot a dina maliklikan ti didigra.”—Henry Kissinger, politikal a sientista ken propesor ti gobierno, kas naadaw iti The New York Times, Oktubre 13, 1974, p. 30B.

Aniat’ mangtuben iti regget ti tao no iti tay-ak ti gobierno?

Jer. 10:23: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturongna iti addangna.” (Saan nga impalugod ti Dios a ti tao ti mangimapa iti bukodna a daná nga agwaywayas manipud iti Dios.)

Gen. 8:21: “Ti pagannayasan ti puso ti tao dakes manipud iti kinaubingna.” (Saan laeng a dagiti agtuturay no di ket pati dagiti iturayan nayanakda amin iti basol, nga addaan inaagum a pagannayasan.)

2 Tim. 3:1-4: “Kadagiti maudi nga aldaw umaydanto dagiti napeggad a panawen a narigat a pakilangenan. Ta dagiti tattao agayatdanto iti bagbagida, managayatda iti pirak, . . . narigatda a katultulag, . . . natangsit.” (Dagiti problema ita ti sangatauan di marisot ti maymaysa a nasion para iti agnanayon; kasapulanda ti internasional a panagdadanggay. Ngem ti inaagum a nasional a paginteresan lapdanna ti kasta ken tubenanna a sikakaro ti aniaman a napudno a panagdadanggay dagiti nadumaduma nga organisasion nga adda iti uneg dagita a nasnasion.)

Ipalgak met ti Biblia a dagiti puersa a nabilbileg ngem tao  isudat’ mangpapaandar iti gangganuat ti tattao. “Ti isuamin a lubong adda iti babaen ti pannakabalin daydiay nadangkes.” (1 Juan 5:19) “Ti pannakidangadangtayo, saan a maibusor iti dara ken lasag, no di ket . . . kadagiti agturay iti lubong daytoy a sipnget, kadagiti puersa dagiti nadangkes nga espiritu kadagiti nailangitan a lugar.” (Efe. 6:12) “Dagiti ebkas a pinaltiingan dagiti demonio . . . isuda a mapan iti ar-ari ti intero a napagnaedan a daga, tapno urnongenda ida a maisagana iti gubat ti dakkel nga aldaw ti Dios a Mannakabalin amin.”—Apoc. 16:14.

Kasano a dagiti umili agnanayondanton a mabang-aran manipud kinakillo ken panangirurumen dagiti gobierno?

Marisut ngata ti problema babaen iti panangsukat kadagidiay sisasaad?

Saan aya a mapaspasamak, a kadagiti lugar nga adda ti siwayawaya a panagbutos, dagidiay sisasaad masansan a suktanda ida kalpasan laeng ti sumagmamano a tawen? Apay? Kaaduanna dagidiay di mapnek iti panagturay dagita.

Sal. 146:3, 4: “Dika agkammatalek kadagiti prinsipe, wenno iti anak ti tao, a kenkuana awan ti pannakaisalakan. Ti espirituna agpukaw, isu agpulang iti dagana; iti dayta met la nga aldaw ti pampanunotna mapukawda.” (No kasta, dagiti programa dagiti agtuturay a para iti paglaingan di agbayag maipasada kadagiti sabali ket masansan a baybay-andan dagita.)

Uray no asino ti agturay, kaskasdi nga isu ket paset daytoy a lubong nga adda iti sidong ti pannakabalin ni Satanas.—1 Juan 5:19.

Ti nakas-ang a rebolusion isu ngata ti mangrisut?

Uray pay marpuog dagiti nakillo nga agtuturay ken maiwaksi dagiti nakas-ang a linlinteg, dayta kabbaro a gobierno buklento met laeng dagiti imperpekto a tattao ken kaskasdi a pasetda ti napolitikaan a sistema a sibabatad a kunaen ti Biblia nga adda iti sidong ti panangtengngel ni Satanas.

Mat. 26:52: “Ipulangmo ta kampilanmo iti kalubanna, ta isuamin dagiti mangaramat iti kampilan mataydanto iti kampilan.” (Insao ni Jesus daytoy iti maysa kadagiti apostolna idi a ti turay ti gobierno ket naaramat a nangirurumen iti mismo nga Anak ti Dios. Ania pay ti mas nadaydayaw a ganuat nga ilaban ti maysa a tao, no koma ta dayta ket nainkalintegan?)

 Prov. 24:21, 22: “Anakko, agbutengka ken ni Jehova ken iti ari. Kadagidiay mayat iti panagbalbaliw, dika makibiang. Ta ti didigrada tumpuarto a pettat, ket ti pannakadadael nga agtaud kadakuada asino ti makaammo?”

Ania, ngarud, ti mangrisut iti problema maipapan iti kinakillo ken panangirurumen?

Dan. 2:44: “Ti Dios ti langit mamangonto iti maysa a pagarian [maysa a gobierno] a kaanoman dinto madadael. Ket ti pagarian a mismo dinto maited iti sabali nga ili. Burakennanto ken ibusennanto amin dagitoy a pagpagarian, ket isu a mismo agtalinaedto agingga iti panawen a di nakedngan.”

Sal. 72:12-14: “Ta [ni Jesu-Kristo, a pinulotan nga ari ni Jehova] ispalennanto ti napanglaw intono umkis nga agpatulong, kasta met ti naparigat ken siasinoman nga awan mangarayat kenkuana. Mangaasinto iti daydiay nanumo ken daydiay napanglaw, ket dagiti kararua dagiti napanglaw isalakannanto. Subbotennanto dagiti kararuada manipud panangirurumen ken iti kinaranggas, ket napategto ti darada kadagiti matana.” (Ti pannakaseknanna iti kakasta a tattao idi isu ket adda ditoy daga—ti panangagasna kadakuada, panangtaraonna kadagiti umariwekwek, nga urayna la nga indaton ti biagna para kadakuada—ipakitana nga isunto a pudno dayta agturay a naipadto.)

Kitaenyo met ti panid 293-298, iti paulo a “Pagarian.”

Apay a serioso nga amirisentay koma ti kunaen ti Biblia maipapan ti masanguanan ti gobierno?

Dagiti natauan nga agtuturay dida maipaay daydiay kasapulan unay ti sangatauan

Amirisenyo dagitoy a bambanag a kasapulan ti tattao uray adino ti yanda, a di ipapaay dagiti natauan a gobierno ngem inkari ti Dios: (1) Biag iti lubong nga awanan pamutbuteng iti gubat.—Isa. 2:4; Sal. 46:9, 10. (2) Umdas a taraon para iti isuamin.—Sal. 72:16. (3) Komportable a balay para iti isuamin.—Isa. 65:21. (4) Makapnek a pagtrabahuan para kadagiti amin a makasapul, tapno mapataudda ti kasapulanda ken kasapulan ti pamiliada.—Isa. 65:22. (5) Biag nga awanan sakit ken an-anayen.—Apoc. 21:3, 4. (6) Kinahustisia; awanan panagil-ilem no iti relihion, rasa, ekonomia, ken pakipagilian.—Isa. 9:7; 11:3-5. (7) Panangtagiragsak iti kinatalged, a di  agpeggad ti bagi ken sanikua manipud kadagiti kriminal.—Mik. 4:4; Prov. 2:22. (8) Lubong a dagiti galad a tagtagipatgen iramanna ti ayat, kinamanangaasi, pannakaseknan iti pada a tao ken ayat iti kinapudno.—Sal. 85:10, 11; Gal. 5:22, 23.

Iti unos ti rinibon a tawen, dagiti napolitikaan nga agtuturay inkarida kadagiti umili dagiti nasaysayaat a kasasaad. Aniat’ nagbanaganda? Nupay dagiti umili kadagiti adu a nasnasion ket ad-adun dagiti material a sanikuada, saan met nga imad-adda ti ragsakda, ket dagiti problema a sangsanguenda kimmaro ketdi a kimmaro.

Napaneknekan a dagiti padto ti Biblia naan-anayda a mapagtalkan

Maysa a siglo sakbayna ti Sao ti Dios impadtona ti panangsakop ti Babilonia iti intero a lubong, kasta met ti pannakarpuogto ti pannakabalinna, ken ti kinapudno, nga apaman nga aglangalang, saanton a mapagnaedan ti kabiserana. (Isa. 13:17-22) Dandani dua a siglo sakbayna, uray pay kasakbayan ti pannakayanak ni Ciro, isut’ innaganan ti Biblia ket impadtona ti papelna no kadagiti sangalubongan a ganuat. (Isa. 44:28; 45:1, 2) Sakbay a ti Medo-Persia ket nagbalin a sangalubongan a pannakabalin, naipadto ti irarang-ayna, ti doble a pannakabalinna, ken ti pannakarbana. Nasurok a dua a siglo sakbayna naipadton ti turong ti imperio ti Grecia iti sidong ti damo nga arina, agraman pannakabingbingayto ti imperio kadagiti uppat a paspaset.—Dan. 8:1-8, 20-22.

Detalyado ti panangipadto ti Biblia kadagiti kasasaad iti kaaldawantayo, ket pinakdaarannatayo iti panagngudo amin a natauan a gobierno babaen iti ima ti Dios ket ti Pagarian ti Dios kadagiti ima ti Anakna, ni Jesu-Kristo, iturayannanto ti amin a sangatauan.—Dan. 2:44; 7:13, 14.

Saan aya a kinasirib ti panangipangagtayo iti gubuayan ti impormasion a naynay a napaneknekan a mapagtalkan?

Ti gobierno ti Dios isut’ kakaisuna a pudno a solusion dagiti problema ti sangatauan

Dagiti problema a masapul a marisut kasapulanda ti pannakabalin, dagiti abilidad ken galad nga awan kadagiti tattao. Ti Dios kabaelanna a wayawayaan ti sangatauan manipud impluensia ti Diablo ken dagiti demoniona ket inkarina a kastanto ti aramidenna, ngem di kabaelan ti tao dayta. Adda probision ti Dios a mangaramid iti daydiay di kabaelan ti medikal a siensia—panangikkat ti basol, iti kasta awanton ti sakit ken ipapatay  ken pagbalinenna dagiti umili kas iti kita ti tattao a kayatda a pagbalinan. Ti Namarsua addaan kadagiti nasken a pannakaammo (maipapan iti daga ken amin a panagandar ti biag) tapno marisutna dagiti problema maipapan iti panagpataud ti taraon ken mangtuben kadagiti makaited peggad a polusion, ngem dagiti pamuspusan ti tao masansan a mamatauddat’ ad-adu a problema. Ti Sao ti Dios agbalballigin a mangbalbaliw iti kabibiag dagidiay umawat iti puersana tapno agbalinda a manangaasi, naayat a tattao a nadalus ti moralda, sosiedad ti tattao a dida kayat a papatayen dagiti padada a tao babaen kadagiti armas ken agbibiagda a buyogen ti napudno a talna ken panagkakabsat nupay naggapudat’ amin a nasnasion, rasa ken pagsasao.

Inton-ano a dalusan ti Pagarian ti Dios daytoy agdama a sangalubongan a sistema? Kitaenyo dagiti paulo a “Dagiti Petsa” ken “Dagiti Maudi nga Aldaw.”