Agkedked ngata a pabautisaran dagidiay talaga a mamati iti Sao ti Dios?

Mat. 28:19, 20: “Inkayo ngarud ket pagbalinenyo nga ad-adalan dagiti umili iti amin a nasnasion, a bautisaranyo ida iti nagan ti Ama ken ti Anak ken ti nasantuan nga espiritu, nga isursuroyo kadakuada nga aywananda dagiti isuamin a banag nga imbilinko kadakayo.”

Ara. 2:41: “Dagidi ngarud immawat iti saona ket naimpusuanda a nabautisaran.”

Ara. 8:12: “Idi namatida ken Felipe, a mangikaskasaba idi ti naimbag a damag ti pagarian ti Dios ken ti nagan ni Jesu-Kristo, nabautisaranda, agpadpada a lallaki ken babbai.”

Ara. 8:36-38: “Ket idi magmagnada iti dalan, dimtengda iti maysa a danum, ket kinuna ti [Etiope a] eunuko: ‘Kitaem! Adda ti danum; ania ti makapawil kaniak a mabautisaran?’ Ket imbilinna a pasardengenda ti karwahe, ket binautisaran [ni Felipe].”

Nakristianuan a bautismo iti danum—pannakawarsi wenno naan-anay a pannakaitaneb?

Mar. 1:9, 10: “Ni Jesus . . . binautisaran [“intaneb,” ED, Ro] ni Juan iti [Karayan] Jordan. Ket apaman nga idi sumangsang-at manipud iti danum nakitana a naglukat ti langlangit.”

Ara. 8:38: “Immulogda a dua idi danum, da Felipe ken ti eunuko; ket binautisaranna [“intanebna,” ED, Ro].”

Inalagad ngata dagiti Kristiano idi immuna a siglo ti pannakabautisar dagiti maladaga?

Mat. 28:19: “Inkayo ngarud ket pagbalinenyo nga ad-adalan . . . bautisaranyo ida.”

Ara. 8:12: “Idi namatida ken Felipe . . . nabautisaranda, agpadpada a lallaki ken babbai.”

Nupay kasta, idi agbayag, insurat ni Origen (185-254 K.P.): “Ugali ti iglesia a mabautisaran dagiti maladaga.” (Selections From the Commentaries and Homilies of Origen, Madras, India; 1929, p. 211) Daytoy nga ugali ket pinasingkedan ti Konsilio ti Cartago (c.252 K.P.).

Insurat ni Augustus Neander a historiador ti relihion: “Ti pammati ken bautismo dati a nagsinninggalutda; gapuna a  nakapapati unay . . . a ti ugali a pannakabautisar dagiti maladaga ket dida nga am-ammo idi [immuna a siglo]. . . . a ti damo a pannakabigbigna kas apostoliko a tradision isu idi maikatlo a siglo, ket paneknekanna daytoy a maikontra ketdi imbes nga umabuloy a naggapu kadagiti apostol.”—History of the Planting and Training of the Christian Church by the Apostles (Nueva York, 1864), p. 162.

Ti Nakristianuan a bautismo iti danum mamakawan kadi iti basbasol?

1 Juan 1:7: “No magnatayo iti lawag a kas isu adda iti lawag, . . . ti dara ni Jesus nga Anakna ugasannatayo iti amin a basol.” (Gapuna, saan a bautismo iti danum no di ti dara ni Jesus ti mangugas kadatayo manipud basol.)

Mat. 3:11: “Siak [ni Juan a Bautista] . . . bautisarankayo iti danum gapu iti panagbabawiyo; ngem dayta umay sumaruno kaniak [ni Jesu-Kristo] nabilbileg ngem siak, dagiti sandalias daytoy saanak a maikari a manguksot.” (Dagiti bersikulo 5, 6, kasta met ti Aramid 13:24, ipakitada a ti inaramid ni Juan ket agpaay kadagiti Judio. Apay? Gapu iti panagbasolda iti Linteg a tulag ket isaganana ida ken Kristo.)

Ara. 2:38: “Agbabawikayo, ken mabautisaran ti tunggal maysa kadakayo iti nagan ni Jesu-Kristo a maipaay iti pannakapakawan ti basbasolyo.” (Mismo ngata a ti bautismoda ti nangpakawan kadakuada? Usigenyo: Naisawang daytoy kadagidiay Judio a nairamraman iti basol a pammapatay ken Kristo. [Kitaenyo dagiti bersikulo 22, 23.] Ti bautismoda paneknekanna ti maysa a banag. Ania dayta? Nga itan mamatidan kenkuana a kas Mesias, ti Kristo. Santo la mapakawan ti basbasolda no aramidenda ti kastoy. [Aramid 4:12; 5:30, 31])

Ara. 22:16: “Tumakderka, ket pabautisaranka ket ugasam ti basbasolmo babaen ti yaawagmo iti naganna.” (Kasta met ti Aramid 10:43)

Asino ti mabautisaran iti nasantuan nga espiritu?

1 Cor. 1:2; 12:13, 27: “Kadakayo a napagsanto a nainaig ken Kristo Jesus, naayaban kas dagidiay nasantuan . . . Ta gapu iti maymaysa nga espiritu datay amin nabautisarantayo iti maymaysa a bagi, uray Judio wenno Griego, uray paad-adipen wenno agwayawaya, ket datay amin napainumtayo iti maymaysa nga espiritu. Dakayo ngarud ti bagi ni Kristo.”  (Kas ipakita ti Daniel 7:13, 14, 27, ti kakasta a “nasantuan” makipagtawidda iti Pagarian ti Anak ti tao, ni Jesu-Kristo.)

Juan 3:5: “No ti maysa saan a mayanak iti danum ken iti espiritu [iti tiempo a pannakabautisarna iti dayta nga espiritu], saanna a mabalin ti sumrek iti pagarian ti Dios.” (Ti Lucas 12:32 ipakitana a “bassit nga ipastoran” laeng ti addaan iti kasta a pribilehio. Kitaenyo met ti Apocalipsis 14:1-3.)

Amin kadi a mabautisaran iti nasantuan nga espiritu ket agsaoda iti dildila wenno addaanda iti sagut ti panangagas?

1 Cor. 12:13, 29, 30: “Ta gapu iti maymaysa nga espiritu datay amin nabautisarantayo iti maymaysa a bagi . . . Saanda nga apostol amin, saan kadi? . . . Saanda nga agaramid amin iti mannakabalin nga aramid, saan kadi? Saanda nga addaan amin iti sagsagut ti panangagas, saan kadi? Saanda nga agsao amin iti nadumaduma a pagsasao, saan kadi?”

Kitaenyo met ti “Panangagas” ken “Dildila, Panagsao iti.”

‘Bautismo a maipaay kadagiti natay’—aniat’ kaipapananna?

1 Cor. 15:29, KJ: “No saan anianto ti aramiden dagidiay nabautisaran a maipaay kadagiti natay, no dagiti natay saandanto a pulos nga agungar? apay ngarud nga agbautisarda a maipaay kadagiti natay?”

Ti Griego a preposition nga hy·perʹ, a naipatarus ditoy kas “maipaay,” “sandi,” “iti biang ti,” “imbes nga,” “tapno,” kdp. (A Greek-English Lexicon, by Liddell and Scott) Aniat’ kayuloganna iti daytoy a texto? Isingsingasing kadi ni Pablo ti pannakabautisar dagiti sibibiag a mangsandi iti biang dagidiay natay a di nabautisaran?

Dagiti laeng sabali a kasuratan a diretso a nangdakamat iti ipapatay kas nainaig iti bautismo dakamatenda ti bautismo a lasaten a mismo dayta a tao, saan ketdi a bautismo a mangsandi iti sabali a tao, tao a natayen

Roma 6:3: “Dikay ammo aya a datayo amin a nabautisaran ken Jesu-Kristo ket nabautisarantayo iti ipapatayna?” (Kasta met ti Marcos 10:38, 39)

Col. 2:12: “Ta [dagiti sibibiag a kameng ti kongregasion sadi Colosas] naitabonkayo a naikuyog kenkuana iti pannakabautisarna,  ket babaen iti pannakainaigyo kenkuana napagungarkayo met a naikuyog kenkuana gapu iti pammatiyo iti panagtignay ti Dios, a namagungar kenkuana kadagiti natay.”

Ti patarus ti “New World Translation” ket maitutop no iti gramatika ket maitunos kadagitoy a dadduma pay a texto ti Biblia

1 Cor. 15:29: “Ta no saan, ania ti aramidento dagiti mabautisaran tapno maibilangda a kas natay? No dagiti natay saandanto a pulos a mapagungar, apay pay laeng a mabautisaranda tapno maibilangda a kasta?” (No kasta mabautisaranda wenno maitanebda a maipaay iti panagbiag nga agturong ken patay a buyogen ti kinatarnaw a kas napasamak ken Kristo sadanto mapagungar iti naespirituan a panagbiag a kas ken Kristo.)

Aniat’ pagbanagan ti pannakabautisar iti apuy?

Luc. 3:16, 17: “Isu [ni Jesu-Kristo] bautisarannakayto iti . . . apuy. Ti paidna adda iti imana tapno sapridanna a naan-anay ti pagbayuan . . . Puorannanto ti taep iti apuy a di maiddep.” (Agnanayonto ti pannakaduprakna.)

Mat. 13:49, 50: “Kastanto inton panagngudo ti sistema ti bambanag: rummuarto dagiti anghel ket ilasindanto dagiti dakes kadagiti nalinteg ket ipuruakdanto ida iti urno ti apuy.”

Luc. 17:29, 30: “Idi aldaw nga iruruar ni Lot idiay Sodoma nagtudo manipud langit iti apuy ken asupre ket pinukawna amin ida. Kastanto met iti aldaw a pannakaiparangarang ti Anak ti tao.”

Saan a kapareho daytoy ti bautismo iti nasantuan nga espiritu, a nagpaay kadagiti adalan

Ara. 1:5: “Ni Juan, pudno, nangbautisar iti danum, ngem dakayo [dagiti matalek nga apostol ni Jesus] mabautisarankayto iti nasantuan nga espiritu iti saan nga adu nga aldaw manipud ita.”

Ara. 2:2-4: “Iti apagdarikmat immay manipud langit ti maysa a daranudor a kasla panagpuyupoy ti napigsa unay nga angin, ket pinunnona ti amin a balay nga ayanda nga agtutugaw. Ket nagparang kadakuada dagiti kasla dildila nga apuy a naibunong, ket nagdisso [ngem dina inalikubkob wenno intaneb ida] iti tunggal maysa kadakuada, ket napnoda amin iti nasantuan nga espiritu ket rinugianda ti nagsao iti sabsabali a pagsasao, kas inted ti espiritu kadakuada a pagsasao.”