Paset 9

No Kasanot’ Pannakaammotayo nga Agbibiagtayo iti “Maudi nga Al-aldaw”

1, 2. Kasano a maammuantayo nga addatayon iti maudi nga al-aldaw?

KASANO a masiguradotayo nga agbibiagtayon iti tiempo a panangdadaelton ti Pagarian ti Dios itoy agdama a sistema ti turay ti tao? Kasano a maammuantayo nga asidegtay unayen iti tiempo ti panangipatingganton ti Dios iti amin a kinadakes ken panagsagaba?

² Kayat a maammuan dagiti adalan ni Jesus dagitoy a bambanag. Inimtuodda kenkuana no anianto “ti pagilasinan” ti kaaddana iti Pagarianna ken “iti panungpalan ti sistema dagiti bambanag.” (Mateo 24:3) Simmungbat ni Jesus babaen ti detaliado a panangibagana kadagiti paspasamak a manggunggon iti lubong ken dagiti agtitipon a kasasaad a mangipakita a simreken ti sangatauan “iti tiempo ti panungpalan,” “ti maudi nga al-aldaw” daytoy a sistema dagiti bambanag. (Daniel 11:40; 2 Timoteo 3:1) Nakitatayo kadin iti daytoy a siglo dayta a nagkaykaysa a pagilasinan. Wen, nakaad-adun ti nakitatayo!

Dagiti Gubat Sangalubongan

3, 4. Kasano a dagiti gubgubat iti daytoy a siglo katupagda ti padto ni Jesus?

³ Impadto ni Jesus a ‘ti nasion tumakderto a bumusor iti sabali a nasion ken ti pagarian a maibusor iti sabali a pagarian.’ (Mateo 24:7) Idi 1914 nairaman ti lubong iti maysa a gubat a nakakita ti pannakiraman dagiti nasion ken pagpagarian iti wagas a naiduma ngem ti aniaman a gubat sakbayna. Iti panangbigbig iti dayta, inawagan dagiti historiador dayta a ti Dakkel a Gubat. Awan pay ti kasta a kita ti gubat iti historia, ti umuna a gubat sangalubongan. Agarup 20,000,000 a soldado ken sibilian ti natay, ad-adu pay ngem ti aniaman a napalabas a gubat.

⁴ Ti Gubat Sangalubongan I tinandaanna ti pangrugian ti maudi nga al-aldaw. Kinuna ni Jesus a daytoy ken dagiti dadduma pay a pasamak ti  “pangrugian dagiti ladingit.” (Mateo 24:8) Pudno dayta, ta ti Gubat Sangalubongan II ad-adu pay ti pinapatayna, agarup 50,000,000 a soldado ken sibilian ti natay. Iti daytoy maika-20 a siglo, nasuroken a 100,000,000 a tattao ti napapatay kadagiti gubat, nasurok a mamimpat a daras ti kaaduna ngem iti napalabas a 400 a tawen no pagtitiponen! Anian a nagdakkelan a pangkondenaran iti turay ti tao!

Dadduma a Pammaneknek

5-7. Ania dagiti dadduma a pammaneknek nga addatayon iti maudi nga al-aldaw?

⁵ Inraman ni Jesus ti dadduma pay a pasamak a kumuyog iti maudi nga al-aldaw: “Addanto dadakkel a ginggined, ket iti nadumaduma a disso baybayangubong [epidemia ti sakit] ken kinakurang ti taraon.” (Lucas 21:11) Dayta katupag unay dagiti paspasamak nanipud 1914, ta adda dakkel a panagladingit gapu kadagita a didigra.

⁶ Dagiti dadakkel a ginggined kanayonen a mapaspasamak, a mangpukaw iti adu a biag. Ti trangkaso Español laeng pinapataynan ti agarup 20,000,000 a tattao a simmaruno iti Gubat Sangalubongan I​—dadduma a pattapatta ket 30,000,000 wenno ad-adu pay. Kinettelen ti AIDS dagiti ginasgasut a ribo a biag ket mabalin a kettelenna pay ti minilion iti asideg a masanguanan. Kada tawen minilion a tattao ti matay kadagiti sakit ti puso, kanser ken sabsabali pay a saksakit. Minilion pay ti in-inut a matay gaput’ bisin. Awan duadua a dagiti ‘nagsakay iti kabalio iti Apocalipsis’ babaen kadagiti gubatda, kinakurang ti taraon, ken nasaknap a saksakit pappapatayendan ti nakaad-adu iti natauan a pamilia nanipud idi 1914.​—Apocalipsis 6:3-8.

⁷ Impadto met ni Jesus ti iyaadu ti krimen a napadpadasan iti isuamin a dagdaga. Kinunana: “Ket agsipud ta agadunto ti kinadakes ti ayat dagiti adu lumamiisto.”​—Mateo 24:12.

8. Kasano a ti padto idiay 2 Timoteo kapitulo 3 katupagna ti tiempotayo?

⁸ Kasta met, ipadto ti Biblia ti pannakarba ti moral a nalawag a makita iti isuamin a lubong itatta: “Kadagiti maudi nga al-aldaw umaydanto dagiti aldaw a napeggad. Ta dagiti tattao agayatdanto kadagiti bagbagida, naagumda iti pirak, managpasindayaw, napalangguad, managuy-uyaw, nasukir kadagiti dadakkelda, awan panagyamanda, saanda a nasingpet, awananda iti ayat a nakayanakan, awan pannakapnekda, managpadpadakes, saanda a managparbeng, nauyongda, gumurgurada kadagiti naimbag, mangliliput, nasubeg, natangsit, managayat kadagiti ragragsak a nangnangruna ngem iti panagayatda iti Dios, nga adda langada a kinasanto ngem libakenda ti pannakabalin daytoy a kinasanto . . . Dagiti tao a dakes ken dagiti managulbod dumakesdanto la a dumakes.” (2 Timoteo 3:1-13) Amin dayta pudno a naimatangantayo.

Sabali Pay a Banag

9. Aniat’ napasamak idiay langit a maigiddan iti pangrugian iti maudi nga al-aldaw ditoy daga?

⁹ Adda pay sabali a banag a makagapu iti kasta unay nga iyaadu ti panagsagaba iti daytoy a siglo.  Maigiddato iti pangrugian iti maudi nga al-aldaw idi 1914, adda napasamak nga ad-adda pay a namagpeggad iti sangatauan. Iti dayta a tiempo, kas isalaysay ti maysa a padto iti maudi a libro ti Biblia: “Adda gubat sadi langit: Ni Miguel [ni Kristo nga addaanen ti pannakabalin idiay langit] ken dagiti anghelna nakigubatda idi dragon [ni Satanas], ket daydi dragon ken dagiti anghelna [dagiti demonio] nakibakalda ngem dida nangabak, ket di met nasarakan daydi dissoda sadi langit. Ket naigarangugong daydi dakkel a dragon, daydi uleg a kadaanan, nga isu ti managan Diablo ken Satanas, isu a mangallilaw iti isuamin a napagnaedan a daga; naitapuak ditoy daga, ket dagidi anghelna naitapuakda a naikanunong kenkuana.”​—Apocalipsis 12:7-9.

10, 11. Kasano a naapektaran ti sangatauan idi naitappuak ni Satanas ken dagiti demoniona ditoy daga?

¹⁰ Ania dagiti banagna iti natauan a pamilia? Ituloy a kunaen ti padto: “Asikayo pay daga ken baybay ta ti Diablo immulog kadakayo nga addaan dakkel a pungtot, nga ammona a bassiten ti tiempona.” Wen, ammo ni Satanas a ti sistemana asidegen ti panungpalanna, gapuna ar-aramidennan ti isuamin a kabaelanna a mangiyadayo kadagiti tao iti Dios sakbay nga isu ken ti lubongna mapukawda. (Apocalipsis 12:12; 20:1-3) Anian a kinakillo dagidiay nga espiritu a parparsua gapu ta di umiso ti panangusarda iti wayawayada nga agpili! Anian a nakalkaldaang ti kasasaad ti daga iti sidong ti impluensiada, nangnangruna nanipud 1914!

¹¹ Di ngarud pakasdaawan nga impadto ni Jesus iti tiempotayo: “Ditoy rabaw ti daga rigat dagiti nasion, nga agdanag . . . Dagiti tattao agkapuydanto gapu iti buteng ken danagda kadagiti maar-aramid nga umayto iti amin a napagnaedan a daga.”​—Lucas 21:25, 26.

Panungpalan ti Turay ti Tao ken Demonio Asidegen

12. Ania ti maysa kadagiti saan pay a natungpal a padpadto sakbay ti panungpalan daytoy a sistema?

¹² Mano a padpadto ti Biblia ti di pay natungpal sakbay a dadaelen ti Dios daytoy agdama a sistema? Sumagmamano laengen! Maysa kadagiti maudi isut’ adda idiay 1 Tesalonica 5:3, a kunaenna: “Bayat a sasawenda talna ken talged, giddato nga umay ti pannakadadaelda.” (The New English Bible) Daytoy ipakitana a ti panungpalan daytoy a sistema mangruginto “bayat nga agsasaoda.” Di ipagpagarup ti lubong, umay ti pannakadadael inton di namnamaen, inton inanamaen dagiti tao ti pagarupenda a talna ken talged.

13, 14. Ania a tiempo ti rigat ti impadto ni Jesus, ken kasano nga agpatingga dayta?

¹³ Aggibusen ti tiempo daytoy lubong iti sidong ni Satanas. Di agbayag umayton ti panungpalanna iti panawen ti rigat isu a kinuna ni Jesus: “Ta addanto dakkel a rigat a nanipud idi punganay ti lubong agingga ita, awan pay kasta a napasamak, ket awanto metten uray kaano.”​—Mateo 24:21.

¹⁴ Ti kangitingitan iti “dakkel a rigat” isunto ti gubat ti Dios nga Armagedon. Dayta ti tiempo a sinarita ni mammadto a Daniel inton “buraken [ti Dios] ken ibusennanto amin dagitoy a pagpagarian.” Daytoy kaipapanannanto ti panungpalan ti amin nga agdama a turay ti tao a naisina iti Dios. Ti turay ti Pagarianna manipud langit sublatennanto a naan-anay dagiti amin nga ar-aramid ti tao. Dinto, kas impadto ni Daniel, maited ti panangituray “iti sabali nga ili.”​—Daniel 2:44; Apocalipsis 16:14-16.

15. Anianto ti mapasamak iti impluensia ni Satanas ken dagiti demoniona?

¹⁵ Iti dayta a tiempo, agpatingganto met amin nga impluensia ni Satanas ken dagiti demonio. Dagidiay a managalsa nga espiritu a parparsua mapukawdanto tapno didan “allilawen dagiti nasion.” (Apocalipsis 12:9; 20:1-3) Nasentensiaandan a matay ket ur-urayenda ti pannakadadael. Anian a pannakabang-arto ti sangatauan a mawayawayaan iti nakillo nga impluensiada!

Asinonto ti Makalasat? Asinonto ti Di Makalasat?

16-18. Asinonto ti makalasat iti panungpalan daytoy a sistema, ken asinonto dagiti saan a makalasat?

¹⁶ Inton maibanag ti panangukom ti Dios iti daytoy a lubong, asinonto dagiti makalasat? Asinonto dagiti di makalasat? Ipakita ti Biblia a dagidiay  agtarigagay iti turay ti Dios masalaknibandanto ket makalasatdanto. Dagidiay di mangayat ti turay ti Dios didanto masalakniban no di ket madadaelda a maikanunong iti lubong ni Satanas.

¹⁷ Kunaen ti Proverbio 2:21: “Ti nalinteg [dagidiay agpaituray iti turay ti Dios] agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes [dagidiay di agpaituray iti turay ti Dios], magudasdanto ditoy daga; ket dagiti nagulib maparutdanto kenkuana.”

¹⁸ Kunaen met ti Salmo 37:10, 11: “Ta bassit pay a darikmat ket ti nadangkes maawanton . . . Ngem dagiti naemma tawidendanto ti daga, ket maay-ayatandanto iti kinaruay ti talna.” Inayon pay ti Salmo 37 bersikulo 29: “Ti sililinteg tawidennanto ti daga, ket agtaengto kenkuana nga agnanayon.”

19. Ania a balakad ti ipapusotayo?

¹⁹ Masapul nga ipapusotayo ti balakad idiay Salmo 37:34, a kunaenna: “Manginanamaka ken Jehova ket salimetmetam ti dalanna, ket itan-oknakanto nga agtawid iti daga. Intono magessat ti nadangkes, makitamto. Kunaen ti Salmo 37 bersikulo 37 ken 38: “Mingmingam ti napnuan-imbag a tao ket matmatam ti nalinteg, ta addanto nanam-ay a tungpal a maipaay iti tao ti kappia. Ngem no maipapan kadagiti managlabsing, madadaeldanto a matalipupus; ti tungpal dagiti nadangkes magessatto.”

20. Apay a maikunatayo a dagitoy ket nakaragragsak a tiempo a pagbiagantayo?

²⁰ Anian a makaliwliwa, wen, anian a makaparegta a maammuan a pudno a maseknan ti Dios ket iti mabiiten ipatinggananton dagiti amin a kinadakes ken panagsagaba! Anian a makaparagsak ti pannakabigbig a mabiiten ti kaitungpalan dagidiay a nadayag a padpadto!

[Salsaludsod]

[Ladawan iti panid 20]

Impadto ti Biblia dagiti pasamak a mangbukel “ti pagilasinan” iti maudi nga al-aldaw

[Ladawan iti panid 22]

Iti mabiiten, iti Armagedon, dagidiay a di agpaituray iti turay ti Dios magudasdanto. Dagidiay agpaituray makalasatdanto a sumrek iti nalinteg a baro a lubong