Ti panangipasubli iti salun-at iti masakit; ti panamagbalin a nasayaat, wenno napia, iti daydiay adda depektona wenno nadunor; ti panangagas iti nadumaduma a sagubanit ken pilaw; ti panangisubli iti maysa a tao iti gagangay a nakaradkad a kasasaad. Ti Hebreo a berbo a ra·phaʼʹ ken ti Griego a berbo nga i·aʹo·mai ket kangrunaan a sasao iti Biblia a mangdeskribir iti kasta a panangpaimbag agpadpada iti literal ken piguratibo a kaipapanan. Ti Griego a berbo a the·ra·peuʹo naipatarus nga ‘agasan.’ (Mt 4:23, 24) No dadduma, ti panangpaimbag ket in-inut idi; giddato dayta iti dadduma a gundaway.

 Karaman kadagiti bendision nga impaay ni Jehova iti intero a sangatauan isu ti pannakabalin dagiti pisikal nga organismoda nga agpabaro, ti pannakabael ti bagi nga umimbag a bukbukodna no masugatan wenno agsakit. Mabalin a ti maysa a mangngagas mangirekomenda kadagiti pamay-an a mangpapardas iti panagimbag, ngem iti kinapudnona, ti mangaramid iti panangpaimbag ket  dagiti inted-Dios a pannakabalin nga agpaimbag nga adda iti uneg ti bagi. Ngarud, binigbig ni salmista David a nupay isu nayanak nga imperpekto, nabaelan a saranayen ti Namarsuana bayat ti panagsakitna ket pinaimbagna kadagiti amin a sakitna. (Sal 51:5; 41:1-3; 103:2-4) Pinasubli ni Jehova ti kinasalun-at ti bagi ti naparigatan a ni Job (Job 42:10) ket ti Dios impaayanna met ti ilina nga Israel iti pisikal a pannakapaimbag.​—Ex 15:26.

 Maipapan ken Jehova, naisurat nga isu agpadpada a mangsugat ken mangpaimbag, ket literal ken piguratibo nga aramidenna daytoy. Ngarud, kenkuana adda tiempo ti panangsugat ken tiempo ti panangpaimbag. (De 32:39; idiligyo ti Ec 3:1, 3.) Kas pagarigan, ti di matalek nga ari ti Juda, ni Jehoram, ket dinusa ni Jehova iti pisikal a sakit dagiti bagis nga awanan pannakapaimbag. (2Cr 21:16, 18, 19) Nabigbig ni Moises a ni Jehova ti namagkukutel ken Miriam; gapuna, nagpakaasi iti Daydiay kakaisuna a makaagas kenkuana, a kinunana: “O Dios, pangngaasim! Paimbagem, pangngaasim!” (Nu 12:10, 13) Maipapan iti panagipasngay iti annak, ni Jehova pinaimbagna ni Ari Abimelec, ti asawana, ken ti adipenna a babbai kalpasan ti ilalabas ti nakaro a parikut mainaig ken Sara ken iti naikari a bin-i.​—Ge 20:17, 18.

 Iti Biblia, ti naespirituan imbes a ti pisikal a dunor, ken ti naespirituan a pannakapaimbag kalpasanna, ket topiko a naisangsangayan ti kinapategda. Kadagitoy a banag, naipalagip ti rebbengen ti papanguluen ti nainkasigudan nga Israel. “Manipud iti mammadto agingga a mismo iti padi, tunggal maysa agtigtignay a siuulbod” idi kaaldawan ni Jeremias, nga iti isu met laeng a gundaway aginkukunada a papaimbagenda ti dunor ti ili ti Dios, a kunkunaenda a ti amin ket nasayaat. (Jer 6:13, 14; 8:11) Umaspingda unay kadagiti manangliwliwa ni Job, “mangngagas nga awan pategna.”​—Job 13:4.

 Iti sumagmamano a gundaway, napaimbag ti awanan biag a bambanag, kayatna a sawen, nabukel manen, kas iti narba nga altar a tinarimaan ni Elias. (1Ar 18:30) Kasta met, pinaimbag ni mammadto Eliseo ti dandanum iti asideg ti Jerico, iti kasta dagitoy ket saanen a pakaigapuan dagiti pannakaalis. (2Ar 2:19-22) Nupay kasta, naan-anay a binurak ni Jeremias ti prasko ti agdamdamili, iti kasta saanen a matarimaan dayta, kayatna a sawen, saanen a mapaimbag, ket ngarud nagpaay kas nagsayaat a pangngarig. “Iti isu met laeng a wagas,” indeklara ni Jehova, “burakekto daytoy nga ili ken daytoy a siudad kas no ti maysa burakenna ti basehas ti agdamdamili iti kasta saanen a mabalin a tarimaanen [maysa a porma ti ra·phaʼʹ; iti literal, mapaimbag].”​—Jer 19:11; idiligyo ti 2Cr 36:15-17.

 Ni Jesus ken Dagiti Padana a Manangpaimbag. Binigbig ni Jesu-Kristo a ti ‘panangisuro ken panangikasaba iti naimbag a damag ti pagarian’ isu ti kapatgan iti ministeriona ket ti ‘panangagas iti tunggal kita ti sagubanit ken tunggal kita ti an-annayen kadagiti tattao’ segundario laeng. Dayta ti makagapu a simnek ti asina kadagiti bunggoy nangnangruna “agsipud ta nalalatan ken naiwarawarada a kasla karkarnero nga awanan pastor.”​—Mt 4:23; 9:35, 36; Lu 9:11.

 Daytoy Naindaklan a Mannursuro impakitana met ti panangngaasi kadagiti umariwekwek a simmurot kenkuana agsipud ta ninamnamada a paimbagenna dagiti pisikal nga an-annayenda. (Mt 12:15; 14:14; 19:2; Lu 5:15) Ti trabahona a namilagruan a panangpaimbag nagserbi kas makita a pagilasinan agpaay iti kaputotanna ken kas kanayonan a pammaneknek iti kina-Mesiasna, kas naipadto. (Mt 8:16, 17) Ti kasta a panangpaimbag ket pakpakauna met kadagiti mangpaimbag a bendision a maipagtengto iti sangatauan iti sidong ti turay ti Pagarian ti Dios. (Apo 21:3, 4) Iti literal a pamay-an, pinaimbag ken pinasubli ni Jesus ti salun-at ti adu a tattao​—ti pilay, ti pawad, ti bulsek, ti umel (Mt 15:30, 31), ti agkissiw, ti paralitiko (Mt 4:24), maysa a babai nga agsagsagaba iti panagpadara (Mr 5:25-29), maysa a nagango ti imana (Mr 3:3-5), maysa a tao nga agebbal (Lu 14:2-4), ket iti adu a gundaway, dagidiay nagunggan ti sairo naruk-atanda manipud panangadipen ken panangkayaw ni Satanas.​—Mt 12:22; 15:22-28; 17:15, 18; Mr 1:34; Lu 6:18; 8:26-36; 9:38-42; Ara 10:37, 38.

 Iti nadumaduma a gundaway, nadumaduma ti pamay-an a panangagas ni Jesus iti tattao. Iti maysa a gundaway, kinuna laeng ni Jesus, “Bumangonka, bagkatem ta langkapim ket magnaka,” ket naagasan ti masaksakit a lalaki nga adda iti asideg ti ban-aw ti Bethzatha. (Jn 5:2-9) Iti sabali pay a gundaway, insawang laeng ni Jesus ti sao ket immimbag ti masaksakit, nupay adda iti adayo. (Mt 8:5-13) Iti sabali pay a tiempo, impatayna a mismo ti imana iti masakit (Mt 8:14, 15) wenno sinagidna ti sugat ket pinaimbagna dayta. (Lu 22:50, 51) Ti sumagmamano a masakit a tattao sinagidda laeng ni Jesus wenno uray ti barayubay ti kawesna ket immimbagda. (Mt 14:36; Mr 6:56; Lu 6:19; 8:43-47) Ket awan nakaidumaanna uray no ti tattao ket adu a tawenen a naparparigatan iti sakit.​—Mt 9:20-22; Lu 13:11-13; Jn 5:5-9.

 Ti sumagmamano a tattao binusorda ni Jesus, a saanda a tinagipateg ti ar-aramidenna idi a nakaskasdaaw a trabaho a panangpaimbag. Nagunget  iti kasta unay dagiti panguluen ti relihion idi nangpaimbag ni Jesus iti tattao iti Sabbath. (Mt 12:9-14; Lu 14:1-6; Jn 5:10-16) Iti maysa kadagita a gundaway, pinagulimek ni Jesus dagiti kabusorna idi kinunana: “Managinsisingpet, saan kadi a ti tunggal maysa kadakayo iti sabbath warwaranna ti torona wenno ti asnona manipud iti kulluong ket iturongna tapno painumenna? Saan kadi a maiparbeng, ngarud, a daytoy a babai nga anak ni Abraham, ken pinarautan ni Satanas, adtoy! iti sangapulo ket walo a tawen, maluk-atan iti daytoy a pannakabalud iti aldaw ti sabbath?”​—Lu 13:10-17.

 Saan a ti pannakaipakat ti kabukbukodan a pannakabalin, pannakaammo wenno sirib ni Jesus ti nangpaimbag kadagiti masakit. Saan met a naaramat ti panangagas babaen iti hipnotismo, sikolohia, wenno aniaman nga umasping a pamay-an. Imbes ketdi, ti espiritu ken pannakabalin ni Jehova ti nangibanag iti kasta a panangpaimbag. (Lu 5:17; 9:43) Nupay kasta, saan nga amin ket nagyaman tapno ipaayda ti dayaw iti Dios gapu kadagitoy a pannakaagas. (Lu 17:12-18) Itatta, saan nga amin ket bigbigenda dagiti manayon a mangpaimbag a gunggona a magun-odan babaen iti sakripisio a subbot ni Kristo.​—1Pe 2:24.

 Daytoy a nagtaud-Dios a pannakabalin a mangpaimbag intalek met ni Jesus kadagidiay sisisinged a nakikadua kenkuana iti ministeriona. Idi naibaon dagiti 12 nga apostol, ken dagiti 70 nga adalan idi agangay, naipaayanda iti pannakabalin a mangagas kadagiti masakit. (Mt 10:5, 8; Lu 10:1, 8, 9) Kalpasan ti Pentecostes ti 33 K.P., ti sumagmamano, a pakairamanan da Pedro, Juan, Felipe, ken Pablo, ket naipaayan iti daytoy a pannakabalin manipud iti Dios, tapno maaramidda ti naan-anay a panangagas. (Ara 3:1-16; 4:14; 5:15, 16; 8:6, 7; 9:32-34; 28:8, 9) Idi natibkeren ti pannakairamut ti Kristianidad, ken naawanen dagiti apostol, naglabas metten ti kakasta a “sagsagut kadagiti panangpaimbag.”​—1Co 12:8, 9, 28, 30; 13:8, 13.

 Daydiay mangar-aramid idi iti panangagas masapul nga addaan iti naan-anay a pammati ken panagtalek ken Jehova, kasta met a bigbigenna a, kas iti inaramid ni Jesus, ti panangagas ket naibanag babaen ti pannakabalin ti Dios. (Mt 17:14-20; Jn 5:19) Ngem saan a kasapulan a dagidiay naparigatan maaddaanda iti pammati sakbay a maagasanda. (Jn 5:5-9, 13) Nupay kasta, adu ti pudno a naaddaan iti nabileg a pammati.​—Mt 8:5-13; 15:28; Mr 5:34; Lu 7:1-10; 17:19; Ara 14:8-10; kitaenyo ti PAMMATI.

 Ti namilagruan a panangpaimbag ket “pagilasinan” idi ti kaadda ti pannaranay ti Dios. (Ara 4:22, 29, 30) Dagidiay saan a nangbigbig ken nangawat iti daytoy a pagilasinan bulsek ken tulengda iti naespirituan. (Isa 6:10; Jn 12:37-41) Gapu ta dagiti panangpaimbag manipud iti Dios agpaayda idi kas pagilasinan kadagiti di manamati, kadawyanna a saan a naaramid dagitoy maipagapu kadagidiay Kristiano a nayanaken iti espiritu. Gapuna, idi nagsakit ti tian ni Timoteo, imbes a mangaramid iti namilagruan a panangagas, inrekomenda ni Pablo nga uminum iti bassit nga arak maipaay iti an-annayenna.​—1Ti 5:23.

 Naespirituan a Pannakapaimbag. Iti sabali a bangir, ti pudno a naespirituan a pannakapaimbag agtaud ken Jehova agpaay kadagidiay agbabbabawi. Kaipapananna ti pannakaisubli iti anamong ti Dios ken ti panangtagiragsak manen kadagiti bendisionna. (Isa 19:22; 57:17-19; Jer 33:6) Babaen iti kasta a pannakapaimbag, mapapigsa ti nakapuy nga im-ima ken agkalogkalog a tumtumeng, maluktan ti bulsek a matmata, maisubli ti panagdengngeg ti tuleng, mapaimbag ti pilay, ket ti umel maipaayan iti pannakabael nga agsao, iti naespirituan a pamay-an. (Isa 35:3-6) Ngem dagidiay di agbalbaliw manipud panagapostatada, saanda a pulos mapasaran ti pannakapaimbag, wenno pannakaisubli iti nasayaat a salun-at ken kinarang-ay iti naespirituan. (2Cr 36:15-17; Isa 6:10; Jer 30:12, 13; Ara 28:24-28) Umasping iti dayta, awan idi ti pannakapaimbag maipaay iti Egipto, iti Faraonna, ken maipaay iti “ari ti Asiria.”​—Jer 46:11; Eze 30:21; Na 3:18, 19.

 Ti Kasuratan isingasingna ti pangagas iti tattao a masakit iti naespirituan.​—Heb 12:12, 13; San 5:14-16; Apo 3:18.