[nagtaud iti sao a kaipapananna ti “pannakabalin nga agpaadu; dinamiko nga enerhia”].

 Anak ni Juda, maikadua a putotna iti Canaanita nga anak ni Sua. (Ge 38:2-4; 1Cr 2:3) Kalpasan ti panangpapatay ni Jehova iti awanan anak ken laklakay a kabsat ni Onan a ni Er gapu iti dakes nga inaramidna, binilin ni Juda nga itungpal ni Onan ti agipag-ken-agkayong a panagasawa iti balo a ni Tamar. No addanto anakda a lalaki, saanto a dayta ti pagtaudan ti pamilia ni Onan, ket alaennanto ti tawid ti inauna kas anak a pagtawiden ni Er; ngem no saanda a makayanak iti agtawid, alaen a mismo ni Onan dayta a tawid. Idi dinennaanna ni Tamar, ‘sinayang ni Onan ti semiliana iti daga’ imbes nga ipaayna ken Tamar. Saan a masturbasion ti inaramid ni Onan, ta kunaen ti salaysay a ti panangibellengna iti semiliana ket “idi nakidenna iti asawa ti kabsatna.” Nalawag a maysa daydi a kaso ti “coitus interruptus,” nga inggagara a linapdan ni Onan ti panagparuar ti semiliana iti uneg ti mabagbagi ni Tamar. Ni Onan nga awanan met iti putot ket pinapatay ni Jehova gapu iti panagsukirna ken amana, kinaagumna, ken panangsalungasingna iti nadibinuan nga urnos ti panagasawa, saan a gapu iti masturbasion.​—Ge 38:6-10; 46:12; Nu 26:19.