Ti Bantay Gerizim, a pagaammo ita kas Jebel et Tur (Har Gerizim), agraman ti Bantay Ebal iti amianan a daya, ket adda iti tengnga ti distrito ti Samaria. Dagitoy nagbinnatog a bantay ti katatayagan iti dayta a rehion a nagsumbangiranda ti maysa a napateg a bessang a manipud iti daya nga agpalaud. Iti nagbaetan ti dua a bantay adda maysa a nadam-eg a ginget, ti Ginget ti Siquem, nga ayan ti agdama a Nablus. Ti Siquem, maysa a nabileg ken napateg a siudad ti Canaan sakbay a simrek dagiti Israelita iti Naikari a Daga, ket adda iti makindaya nga ungto ti ginget, agarup 1.5 km (1 mi) iti abagatan a daya ti Nablus. Gapu iti nagsayaat nga ayan ti Bantay Gerizim ken Bantay Ebal, nagpateg dagitoy no mainaig iti militar ken politika, ket napateg met a disso no mainaig iti relihion.​—LADAWAN, Tomo 1, p. 331.

 Ti tapaw ti Bantay Gerizim ket nasurok a 850 m (2,800 pie) ti kangatona manipud iti Baybay Mediteraneo. Nupay nababbaba iti agarup 60 m (200 pie) ngem iti Bantay Ebal, matannawagan manipud Gerizim ti teritoria iti aglikmut. Manipud iti dayta, makita iti amianan ti naabbungotan iti niebe nga alimpatok ti Bantay Hermon, makita iti daya ti nadam-eg a ginget ti Jordan, makita iti abagatan ti bambantay iti teritoria ti Efraim, ket makita iti laud ti Tanap ti Saron ken ti asul a Mediteraneo.

 Naminsan a nagpakarso ni Abram (Abraham) “iti asideg dagiti dadakkel a kayo ti More” iti nagbaetan ti Bantay Gerizim ken Ebal, ket sadiay nga inawatna ti kari ni Jehova: “Iti bin-im itdek daytoy a daga.” (Ge 12:6, 7) Nagpakarso met ni Jacob iti daytoy a disso.​—Ge 33:18.

 Maitunos kadagiti pammilin nga impaay ni Moises, naguummong dagiti tribu ti Israel idiay Bantay Gerizim ken Bantay Ebal babaen ti panangiwanwan ni Josue kalpasan unay ti panangparmekda iti Ai. Sadiay nangngeg dagiti umili ti pannakaibasa dagiti bendision nga awatenda no agtulnogda ken Jehova ken dagiti lunod nga agur-uray kadakuada no sumukirda kenkuana. Iti sango ti Bantay Gerizim ti nagtakderan dagiti tribu da Simeon, Levi, Juda, Isacar, Jose, ken Benjamin. Iti ginget ti nagyanan dagiti Levita ken ti lakasa ti tulag, ket iti sango ti Bantay Ebal ti nagtakderan ti innem pay a tribu. (De 11:29, 30; 27:11-13; Jos 8:28-35) Agparang a dagiti tribu nga adda iti sango ti Bantay Gerizim ti simmungbat kadagiti bendision a naibasa a nakasango iti ayanda, idinto ta ti dadduma met a tribu ti simmungbat kadagiti lunod a naibasa a nakasango iti Bantay Ebal. Nupay adda dagiti nangikuna a dagiti bendision ket naibasa a nakasango iti Bantay Gerizim gapu ta napimpintas ken nadamdam-eg dayta no idilig iti nabato ken aglanglangalangen a Bantay Ebal, saan a mangipaay ti Biblia iti aniaman nga impormasion maipapan itoy a banag. Ti Linteg ket naibasa iti napigsa “iti sanguanan ti intero a kongregasion ti Israel, agraman kadagiti babbai ken kadagidiay ubbing ken kadagiti ganggannaet nga agnanaed a nagna iti tengngada.” (Jos 8:35) Mangngeg daytoy nagdakkelan a bunggoy ti sasao kadagiti ayanda nga adda iti sanguanan ti aniaman kadagitoy a bantay. Nalabit maysa a makagapu ti nakasaysayaat a panagallangugan ti timek iti dayta a disso.​—Kitaenyo ti EBAL, BANTAY.

 Kadagidi kaaldawan ti Uk-ukom ti Israel, ti anak ni Gideon a ni Jotam ket nagsao kadagiti agtagtagikua iti daga iti Siquem bayat a sitatakder “iti tapaw ti Bantay Gerizim.” (Uk 9:7) Uray ita, ti maysa a patag a disso iti katengngaan ti bakrang ti bantay ket maaw-awagan iti pulpito ni Jotam, ngem ti nagan daytoy a disso ket naibatay iti nabayagen a patpatien.

 Templo Dagiti Samaritano. Nalabit idi maikapat a siglo K.K.P. naibangon iti Bantay Gerizim ti maysa a templo dagiti Samaritano a nangribal iti templo nga adda idiay Jerusalem ngem nadadael idi 128 K.K.P. Sigun iti nabayagen a patpatien, dinadael dayta ni Juan Hircanus. (Jewish Antiquities, XI, 310, 311, 324 [viii, 2, 4]; XIII, 254-256 [ix, 1]; The Jewish War, I, 63 [ii, 6]) Uray iti agdama a panawen ramrambakan pay laeng dagiti Samaritano dagiti piesta a kas iti Paskua idiay Bantay Gerizim, iti disso a patienda nga ayan ti kadaanan a templo. Nabatad a ti Bantay Gerizim ti tuktukoyen ti Samaritana a babai idi kinunana ken Jesu-Kristo: “Nagdaydayaw dagidi ammami iti daytoy a bantay; ngem kunaenyo nga idiay Jerusalem ti lugar a rebbeng a pagdaydayawan dagiti tattao.”​—Jn 4:5, 19, 20.

 Kas ipakita dagiti kadaanan a sinsilio a nasarakan idiay Nablus, ti maysa a templo ni Zeus ket adda idi iti makin-amianan a daya a paset ti Bantay Gerizim, a ti pagulian nga agturong sadiay ket napattapatta nga addaan 1,500 a tukad. Naibangon ti maysa a simbaan iti tapaw ti bantay idi maikalima a siglo K.P., ket adda sabali pay a simbaan nga imbangon ti emperador ti Byzantine a ni Justinian. Naikuna a dagiti rebba a masarakan ita sadiay ket addan idi tiempo ni Justinian.