Libro a Masapul a Basaen

“Dimo unay patpatien ta Biblia.” Kasta ti kinuna ti maysa a propesor ti unibersidad iti prangka nga agkabannuag a babai.

“Nabasayo kadin ti Biblia?” insaludsodna.

Gapu ta naklaat, inannugot ti propesor a dina pay nabasa.

“Kasanoyo nga ukomen ti maysa a libro a diyo pay pulos nabasa?”

Adda rason ti babai. Inkeddeng ti propesor a basaen ti Biblia ket kalpasanna nakabukel iti opinion maipapan iti dayta.

TI Biblia, a buklen ti 66 a sursurat, ket nadeskribir kas “mabalin a kasasaknapan ti impluensiana a koleksion dagiti libro iti historia ti tao.”¹ Kinapudnona, inimpluensiaanna ti sumagmamano kadagiti kalalatakan nga arte, literatura, ken musika ti lubong. Dakkel ti impluensiana iti linteg. Napadayawan iti nagsayaat nga estilo ti pannakaisuratna ken raraemen unay dagiti adu a de-adal a tattao. Simmamay ti naidumduma nga epektona iti biag dagiti tattao iti amin a benneg ti kagimongan. Nakaskasdaaw a kinasungdo ti pinatanorna kadagiti adu a mangbasbasa. Dadduma pay ti nangirisgo iti biagda ken patay tapno mabasada laeng dayta.

Kasta met, adda panagduadua maipapan iti Biblia. Adda tattao a di mabalusingsing ti opinionda iti dayta nupay pulos a saanda a mismo a nabasa dayta. Mabalin a bigbigenda ti nasayaat a pannakaisuratna wenno ti pategna iti historia, ngem ut-utobenda: Kasano nga agaplikar iti daytoy moderno a lubong ti libro a naisurat iti rinibu a tawenen ti napalabas? Agbibiagtayo iti “panawen ti impormasion.” Apagdarikmat a maalatay dagiti minuminuto nga impormasion kadagiti agdama a damag ken teknolohia. Madadaan a magun-odantay dagiti “nasigo” a balakad iti gistay amin a parikut ti moderno a biag. Talaga kadi a naglaon ti Biblia iti impormasion a praktikal itatta?

Ikagumaan daytoy a broshur a sungbatan ti kakasta a saludsod. Saan a nairanta a mangipilit kadakayo kadagiti narelihiosuan a panangmatmat wenno patpatien, no di ket nairanta a mangipakita a daytoy a libro, ti Biblia, a nangimpluensia iti historia, ket maikari nga amirisen. Nadlaw ti maysa a report a naipablaak idi 1994 a sipapasnek a patien ti sumagmamano nga edukador a ti Biblia ket sititibker a nairamut iti kultura ti Lumaud a “ti asinoman, manamati man wenno saan, a di makaammo kadagiti sursuro ken salaysay ti Biblia ket awan ammona iti kultura.”²

Nalabit, kalpasan a mabasayo ti naipablaak ditoy, umanamongkayto a​—relihioso man wenno saan ti maysa a tao​—ti Biblia ket, uray kaskasano, libro a masapul a basaen.

[Kahon/Ladawan iti panid 3]

“Talaga nga utangko ti pannakalawlawagko iti libro a nabasak.​—Libro? Wen, ket daanen a gagangay a libro, simple a kas iti mismo a nakaparsuaan, ken saan a napammarang . . . Ket ti nagan daytoy a libro simple laeng, ti Biblia.”​—Heinrich Heine, Aleman a mannurat idi maika-19 a siglo.³