Nasayaat nga Ulidan​—Ni Ezekias

Adda nagpateg a panagbalbaliw iti biag ni Ezekias. Idi agtawen laeng iti 25, isun ti ari iti Juda. Ania a kita ti ari ti pagbalinanna? Agpaimpluensia ngata iti dakes nga ehemplo ni Ari Acaz nga amana? Ni Acaz ket maysa nga apostata a di pulos nagbabawi agingga iti ipapatayna. Intandudona ti pinapagano a panagdayaw ken pinuoranna pay ti maysa kadagiti kakabsat a lallaki ni Ezekias iti pagano nga altar. (2 Cronicas 28:1-4) Nupay kasta, iti baet ti kinamanaginsisingpet ni tatangna, saan a nagmawmaw ti regtana a nagdaydayaw ken Jehova kasta met a dina inulit dagiti basol ni tatangna. Imbes ketdi, intultuloy ni Ezekias ti “kimpet ken Jehova.”​—2 Ar-ari 18:6.

Ti kadi maysa kadagiti dadakkelmo um-umsienna ti panagdayaw ken Jehova? Naranggas ken naigamer kadi iti makadangran nga aramid? No kasta, dimo tultuladen ti biddut ti nagannak kenka! Saan nga impalubos ni Ezekias a ti nasaem a kasasaad ti nagtaudanna a pamilia ti mangdadael iti biagna. Kinapudnona, nagbalin ni Ezekias a nagsayaat nga ari “ket kalpasan kenkuana awan idin ti kas kenkuana iti amin nga ar-ari ti Juda.” (2 Ar-ari 18:5) Kas ken Ezekias, makapagballigika uray no narigat dagiti kasasaad iti pamiliayo. Kasano? Babaen ti ‘ikakapet ken Jehova.’