Kapitulo Kuatro

Daydiay Pinatalgedan ti Amin a Mammadto

1. Ania ti ipakita dagiti impormasion maipapan iti relasion ni Jesus ken ni Jehova sakbay a nagbalin a tao?

“TI AMA addaan panagayat iti Anak ket isu ipakitana kenkuana ti amin a bambanag nga aramidenna.” (Juan 5:20) Anian a nagsinged ti relasion ti Anak iti Amana, ni Jehova! Nangrugi ti kasta a relasionda sipud iti pannakaparsuana, adu a milenio sakbay ti pannakayanakna kas tao. Isu ti bugbugtong nga Anak ti Dios, ti kakaisuna a direkta a pinarsua ni Jehova. Amin a banag sadi langit ken ditoy daga naparsuada babaen ti madungdungngo unay nga inauna nga Anak. (Colosas 1:15, 16) Nagserbi met a kas Sao wenno Pannakangiwat ti Dios, Daydiay naaramat a mangipakaammo iti pagayatan ti Dios kadagiti sabsabali. Isu ti timmao a Jesu-Kristo, ti Anak a pagay-ayat unay ti Dios.​—Proverbio 8:22-30; Juan 1:14, 18; 12:49, 50.

2. Kasano kasaknap ti pannakatukoy ni Jesus kadagiti padto ti Biblia?

² Sakbay a ti inauna nga Anak ti Dios ket simimilagro a nayanak kas tao, adu ti nairekord a naipaltiing a padto maipapan kenkuana. Kinuna ni apostol Pedro ken Cornelio: “Kenkuana dagiti amin a mammadto mangsaksida.” (Aramid 10:43) Kasta unay ti pannakaitampok ti akem ni Jesus iti Biblia nga uray la kinuna ti maysa nga anghel ken apostol Juan: “Ti panangsaksi ken Jesus isu ti mangipaltiing iti panagipadto.” (Apocalipsis 19:10) Dagidi a padto ti nalawag a nangipatuldo kenkuana kas ti Mesias. Impakitada ti nadumaduma nga akmenna bayat nga ibanagna  dagiti pagayatan ti Dios. Paginteresantayo koma amin dagitoy ita.

No Ania ti Ipalgak Dagiti Padto

3. (a) Iti padto ti Genesis 3:15, asino ti iladawan ti serpiente, “ti babai,” ken ti ‘bin-i ti serpiente’? (b) Apay a paginteresan koma dagiti adipen ni Jehova ti ‘pannakadunor ti ulo ti serpiente’?

³ Nadakamat ti umuna kadagidi a padto kalpasan ti iyaalsa idiay Eden. Kinuna ni Jehova iti serpiente: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.” (Genesis 3:15) Ni Satanas, nga inrepresentar ti serpiente, ti talaga a nakaiturongan dayta a padto. “Ti babai” isu ti nasungdo a nailangitan nga organisasion ni Jehova, a mayarig iti matalek nga asawana. Ti ‘bin-i ti serpiente’ iramanna ti amin nga anghel ken tattao a mangiparparangarang iti kababalin ni Satanas, dagidiay bumusbusor ken ni Jehova ken iti ilina. Ti ‘pannakadunor ti ulo ti serpiente’ kaipapananna ti pannakadadaelto ti rebelde a ni Satanas, a nangpardaya ken Jehova ken nangyeg iti nakaro a ladingit iti sangatauan. Ngem siasino ti kangrunaan a paset ti “bin-i” a mangibanag iti panangdunor? Iti sinigsiglo, nagtalinaed dayta a “sagrado a palimed.”​—Roma 16:20, 25, 26.

4. Kasano a nakatulong ti kapuonan ni Jesus a mangipabigbig nga isu ti naikari a Bin-i?

⁴ Kalpasan ti agarup 2,000 a tawen ti natauan a historia, nangipaay ni Jehova iti kanayonan a detalye. Impalnaadna nga agtaud ti Bin-i iti kapuonan ni Abraham. (Genesis 22:15-18) Nupay kasta, ti pagtaudan ti Bin-i ket agpannuray iti pinili ti Dios, saan nga iti nainlasagan a kapuonan. Nupay napalaus ti panagayat ni Abraham ken ni Ismael, ti anakda ken Agar, kastoy ti kinuna ni Jehova: “Ti tulagko ipasdekkonto ken Isaac, nga ipasngayto kenka ni Sara.”  (Genesis 17:18-21) Kalpasanna, napatalgedan ti tulag, saan a ken Esau nga inauna nga anak ni Isaac, no di ket ken Jacob, a nagtaudan ti 12 a tribu ti Israel. (Genesis 28:10-14) Idi agangay, naiparipirip a mayanak ti Bin-i iti tribu ni Juda, iti kapuonan ni David.​—Genesis 49:10; 1 Cronicas 17:3, 4, 11-14.

5. Idi rinugian ni Jesus ti ministeriona ditoy daga, ania ti nalawag a pammaneknek nga isu ti Mesias?

⁵ Aniada pay a pangripiripan ti naipaay no maipapan iti kinasiasino ti Bin-i? Nasurok a 700 a tawen sakbayna, tinukoy ti Biblia ti Betlehem kas ti lugar a pakaipasngayan ti naikari a Bin-i. Impalgakna met nga addan ti Bin-i “kadagiti aldaw ti tiempo a di nakedngan,” sipud pannakaparsuana idiay langit. (Mikias 5:2) Babaen ken propeta Daniel, naipakpakauna met ti eksakto a tiempo ti panagparangna ditoy daga kas Mesias. (Daniel 9:24-26) Idi napulotan ni Jesus iti nasantuan nga espiritu ket nagbalin kas Daydiay Pinulotan ni Jehova, ti mismo a timek ti Dios a naggapu sadi langit ti nalawag a nangtukoy kenkuana kas ti Anakna. (Mateo 3:16, 17) Naipalgak ti Bin-i! Iti kasta, addaan panagtalek a naikuna ni Felipe: “Nasarakanmi daydiay nga iti Linteg, ni Moises ken dagiti Mammadto insuratda, ni Jesus.”​—Juan 1:45.

6. (a) Sigun iti Lucas 24:27, ania ti nabigbig dagiti pasurot ni Jesus? (b) Asino ti kangrunaan a paset ti ‘bin-i ti babai,’ ken ania ti kayat a sawen ti panangdunorna iti ulo ti serpiente?

⁶ Kalpasanna, nabigbig dagiti pasurot ni Jesus a literal a nagadu a padto a nangtukoy kenkuana ti naibinggas iti naipaltiing a Kasuratan. (Lucas 24:27) Ad-adda pay a bimmatad a ni Jesus ti kangrunaan a paset ti ‘bin-i ti babai,’ daydiay mangdunor iti ulo ti serpiente, iti kasta, talipuposenna ni Satanas. Babaen ken Jesus, matungpalto amin nga inkari ti Dios iti sangatauan, amin a banag nga il-iliwentayo.​—2 Corinto 1:20.

7. Malaksid iti kinasiasino Daydiay natukoy kadagiti padto, ania pay ti nasayaat nga usigen?

 ⁷ Kasanonatay nga apektaran ti pannakaammotayo iti daytoy? Salaysayen kadatayo ti Biblia ti maipapan iti maysa a eunuko nga Etiope a nakabasa iti sumagmamano kadagitoy a padto maipapan iti iyaay idi ti Mannubbot ken Mesias. Gapu ta dina matarusan, inyimtuodna iti mangaskasaba a ni Felipe: “Maipapan iti siasino a kunaen daytoy ti mammadto?” Ngem saan a napnek ti eunuko idi nasungbatan ti saludsodna. Kalpasan ti napasnek a panagimdengna iti inlawlawag ni Felipe, naawatan ti lalaki a masapul ti panagtignayna kas panangapresiar iti pannakatungpal ti padto. Natarusanna a nasken ti panagpabautisarna. (Aramid 8:32-38; Isaias 53:3-9) Kasta met kadi ti aramidentayo?

8. (a) Ania ti inladawan ti gistay panangidaton ni Abraham ken Isaac? (b) Apay nga imbaga ni Jehova ken Abraham a mabendisionan ti amin a nasion babaen ti Bin-i, ket kasano nga agaplikar daytoy kadatayo ita?

⁸ Panunotenyo met ti makaabbukay a salaysay maipapan iti gistay panangidaton ni Abraham ken Isaac, ti bugbugtong nga anakna ken Sara. (Genesis 22:1-18) Inladawanna ti aramiden idi ni Jehova​—ti panangidatonna iti bugbugtong nga Anakna: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Daytoy ti mangted kadatayo iti pammatalged a ‘siaasi nga ipaay kadatayo ni Jehova ti amin a dadduma a bambanag,’ no kasano nga intedna ti bugbugtong nga Anakna tapno matungpal ti panggepna. (Roma 8:32) Ania ti makalikaguman iti biangtayo? Kas nairekord iti Genesis 22:18, imbaga ni Jehova ken Abraham a mabendisionan ti amin a nasion babaen ti Bin-i, ‘maigapu iti  kinapudno nga immimdeng ni Abraham iti timek ti Dios.’ Masapul met nga umimdengtayo ken Jehova ken iti Anakna: “Ti mangwatwat iti pammati iti Anak adda agnanayon a biagna; ti sumukir iti Anak saannanto a makita ti biag, ngem agtalinaed kenkuana ti pungtot ti Dios.”​—Juan 3:36.

9. No apresiarentayo ti namnama a biag nga agnanayon a pinagbalin a posible ti daton ni Jesus, ania ti aramidentayo?

⁹ No apresiarentayo ti namnama a biag nga agnanayon a  pinagbalin a posible ti daton ni Jesus, tarigagayantayo a tungpalen dagiti imbilin ni Jehova kadatayo baeten ken Jesus. Dagitoy a bilin ket mainaig iti panagayattayo iti Dios ken kadagiti kaarrubatayo. (Mateo 22:37-39) Impakita ni Jesus a ti ayattayo ken Jehova ti mangtignay kadatayo a mangisuro kadagiti sabsabali “a tungpalenda ti amin a bambanag nga imbilin [ni Jesus kadatayo].” (Mateo 28:19, 20) Ket kayattayo nga iranud dayta nga ayat kadagiti padatayo nga agserserbi ken Jehova babaen ti regular a ‘pannakitaripnong a sangsangkamaysa’ kadakuada. (Hebreo 10:25; Galacia 6:10) Ket bayat nga umimdengtayo iti Dios ken iti Anakna, ditay koma pampanunoten a kalikagumanda ti kinanaan-anay kadatayo. Kuna ti Hebreo 4:15 a ni Jesus, kas ti Nangato a Paditayo, mabalinna “ti makipagrikna kadagiti kinakapuytayo.” Anian a makaliwliwa dayta, nangnangruna no agkararagtayo iti Dios baeten ken Kristo tapno agpatulong a mangdaer kadagiti pagkapuyantayo!​—Mateo 6:12.

Ipakita ti Pammati ken Kristo

10. Apay nga awan ti sabali a makaisalakan malaksid ken Jesu-Kristo?

¹⁰ Kalpasan nga inlawlawagna iti nangato a korte dagiti Judio idiay Jerusalem a natungpal ken Jesus ti padto ti Biblia, impaganetget ni apostol Pedro: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Aramid 4:12) Yantangay managbasol amin nga annak ni Adan, saan a kabaelan a subboten ti biagda ti asinoman. Ngem perpekto ni Jesus, ket makasubbot ti biagna. (Salmo 49:6-9; Hebreo 2:9) Indatonna iti Dios ti maysa a subbot nga eksakto a katupag ti pateg ti perpekto a biag a napukaw ni Adan. (1 Timoteo 2:5,  6) Daytoy ti nangted kadatayo iti gundaway a gumun-od iti biag nga agnanayon iti baro a lubong ti Dios.

11. Ilawlawagyo no kasano a magunggonaantayo iti daton ni Jesus.

 ¹¹ Gapu iti dayta a daton, naaddaantayo met iti gundaway a mangtagiragsak iti dadduma a benepisio uray ita. Kas pagarigan, nupay managbasoltayo, pinagbalin ti daton ni Jesus a posible ti maaddaan iti nadalus a konsiensia gapu ta mapakawan dagiti basoltayo. Dakdakkel nga amang daytoy ngem iti naaramidan dagiti daton nga animal, a kinalikaguman ti Mosaiko a Linteg, kadagiti Israelita. (Aramid 13:38, 39; Hebreo 9:13, 14; 10:22) Kaskasdi, ti kasta a pammakawan kalikagumanna ti napudno a panangbigbigtayo a talaga a kasapulantayo ti daton ni Kristo: “No kunaentayo: ‘Awan ti basoltayo,’ iyaw-awantayo ti bagbagitayo ket ti kinapudno awan kadatayo. No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo ken tapno dalusannatayo manipud iti isuamin a kinakillo.”​—1 Juan 1:8, 9.

12. Apay a napateg ti panagpabautisar iti pananggun-od iti nadalus a konsiensia iti imatang ti Dios?

¹² Kasano a maipakita dagiti managbasol ti pammatida ken Kristo ken iti datonna? Idi nagbalin a manamati dagiti tattao idi umuna a siglo, imparangarangda dayta iti publiko. Kasano? Nagpabautisarda. Apay? Agsipud ta imbilin ni Jesus a nasken nga agpabautisar ti amin nga adalanna. (Mateo 28:19, 20; Aramid 8:12; 18:8) Saan nga agkedked ti maysa a tao no pudno a natukay ti pusona iti naayat a probision nga impaay ni Jehova baeten ken Jesus. Aramidenna ti aniaman a nasken a panagbalbaliw iti biagna, idedikarna ti biagna iti Dios babaen ti kararag, ken isimbolona ti dedikasionna babaen ti panagpabautisar. No idemostrana ti pammatina iti kastoy a wagas, ‘kidkiddawenna iti Dios ti naimbag a konsiensia.’​—1 Pedro 3:21.

13. No ammotayo a nakabasoltayo, ania koma ti aramidentayo, ken apay?

 ¹³ Siempre, uray kalpasan daytoy, rumsua latta dagiti pagkapuyan. Kasano ngaruden? Kinuna ni apostol Juan: “Isursuratko kadakayo dagitoy a banag tapno saankayo a makaaramid iti basol. Ket kaskasdi, no ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg. Ken isu ket pangikappia a sakripisio maipaay kadagiti basoltayo.” (1 Juan 2:1, 2) Kayat kadi a sawen daytoy nga aniaman ti aramidentayo, palabsen lattan ti Dios no dumawattayo kenkuana iti pammakawan? Saan met. Ti tulbek ti pammakawan isu ti pudno a panagbabawi. Nalabit kasapulan met ti panagpatulong kadagidiay natataengan, aduan iti kapadasan iti kongregasion Kristiano. Nasken a bigbigentayo ti kinadakes ti naaramid a basol ken marikna ti pudno a panagbabawi tapno pagreggetantayo a liklikan ti panangulit iti dayta. (Aramid 3:19; Santiago 5:13-16) No aramidentayo dayta, manamnamatayo ti tulong ni Jesus ken ti pannakaisublitayo iti anamong ni Jehova.

14. (a) Mangtedkayo iti napateg a pamay-an a nagunggonaantayo iti daton ni Jesus. (b) No pudno met laeng nga addaantayo iti pammati, ania ti aramidentayo?

¹⁴ Gapu iti daton ni Jesus, naluktan ti gundaway nga agbiag nga agnanayon idiay langit dagiti “bassit nga ipastoran,” ti segundario a paset ti bin-i a nadakamat iti Genesis 3:15. (Lucas 12:32; Galacia 3:26-29) Linuktanna met ti gundaway nga agbiag nga agnanayon iti maysa a paraiso a daga ti binilion a tattao. (Salmo 37:29; Apocalipsis 20:11, 12; 21:3, 4) Ti biag nga agnanayon ket “sagut nga ipaay ti Dios . . . babaen ken Kristo Jesus nga Apotayo.” (Roma 6:23; Efeso 2:8-10) No patientayo dayta a sagut ken apresiarentayo no kasano a nagbalin dayta a posible, iparangarangtayo ngarud dayta a pammati. Pagbalinentayo ti Nakristianuan  a ministerio kas maysa kadagiti kapapatgan a trabaho iti biagtayo no talaga met laeng a naawatantayo ti nakaskasdaaw a panangusar ni Jehova ken ni Jesus tapno maibanag ti pagayatanna ken no apay a napateg ti panangsurottayo a naimbag iti addang ni Jesus. Maiparangarang ti pammatitayo babaen ti kinapasnektayo a mangisarita iti sabsabali maipapan iti daytoy naindaklan a sagut ti Dios.​—Aramid 20:24.

15. Kasano a mamagkaykaysa ti panamati ken ni Jesu-Kristo?

¹⁵ Anian a makaay-ayo ken mamagkaykaysa ti epekto ti kasta a pammati! Babaen ti dayta, ad-adda a mayadanitayo ken Jehova, iti Anakna, ken kadagiti kakabsat iti kongregasion Kristiano. (1 Juan 3:23, 24) Anian a rag-otayo ta siaayat nga inted ni Jehova iti Anakna “iti nagan a nangatngato ngem iti tunggal sabali pay a nagan [malaksid iti nagan ti Dios], tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.”​—Filipos 2:9-11.

Panagrepaso

• Idi nagparang ti Mesias, apay a nalawag ti kinasiasinona kadagidiay pudno a mamati iti Sao ti Dios?

• Ania ti sumagmamano a nasken nga aramidentayo tapno maipakitatayo nga apresiarentay ti daton ni Jesus?

• Kadagiti ania a pamay-an a nagunggonaantayon iti daton ni Jesus? Kasano a tumulong daytoy no dumawattayo ti pammakawan ken Jehova babaen ti kararag?

[Salsaludsod]

[Ladawan iti panid 36]

Imbilin ni Jesus kadagiti pasurotna a rumbeng nga isuroda kadagiti sabsabali a tungpalenda dagiti bilin ti Dios