Napalalo ti ragsak ni Freda a maysa a tuleng idi naammuanna a maitimpuyogda ken ti mangyad-adal kenkuana iti umuna a sign-language a kongregasion iti Papua New Guinea a nabuangay idi Marso 1, 2013. Nadlaw ni Freda nga ad-adda a maawatanna dagiti gimong no ipamaysana ti atensionna kadagiti senias ken visual aid iti plataporma imbes a kadagiti publikasion.  Saan metten a mabain a makiraman kadagiti gimong ken mamin-adu payen nga agkomento. Idi Abril 2013, nagbalinen a di bautisado nga agibumbunannag ken adun a tuleng ti maaw-awisna kadagiti gimong. Idi napagsaludsodan no apay a masansan nga agsangit bayat ti gimong, insungbatna, “Gapu ta maawatakon.”

Idiay Australia, agmanmaneho ni Barbara a mapan iti grupoda a mangasaba. Ngem impaigidna ti luganna ta kitaenna no naitugotna ti listaan dagiti sarungkaranna. Pagammuan ta inlukat ti maysa a babai ti ridaw ti kotse ket agluganen.

“Agurayka,” kinuna ni Barbara, “baka nagkamalika iti kotse a pagluganan.”

“Ay, sorry,” kinuna ti babai. “Kunak no sika ti mangdagas kaniak.” Idi nakitana dagiti Pagwanawanan ken Agriingkayo! a magasin ni Barbara, kinunana, “Mangal-alaak idi kadagiti kasta a magasin iti dua a babbai a mangisursuro kaniak iti Biblia.” Maragsakan ni Barbara a nangted kadagiti magasin ket inrugina a yadalan iti Biblia idi agangay.

Nakapsuten ti 82 anyos a kabsat a ni Violet a taga-Christchurch, New Zealand. Regular nga agipatulod kadagiti surat ken literatura iti Biblia kadagiti pakaay-aywanan dagiti natataengan ken dagiti nataninganen ti biagda nga adda iti lugarda. Dagiti agay-aywan a nars ti  mangyawat kadagita a surat. Kunada a magaggagaran dagiti natataengan nga agur-uray kadagiti ibilbilangda a sursurat a naggapu iti Dios. Pagsisinnublatan ti dadduma a basaen dagiti surat ken literatura wenno ibasada iti napigsa kadagidiay nakapuy ti panagkitada. Kuna pay dagiti nars a mas kalmado, positibo, ken nataltalna ti panunot dagidiay agbasbasa kadagiti surat ken literatura ngem kadagidiay saan nga agbasbasa. No maipapan iti panangikagumaan ni Violet a mangasaba, kinunana: “Mariknak nga us-usarennak pay laeng ni Jehova  a tumulong iti sabsabali. Talaga a makapabileg ti kastoy a pamay-an ti panangiranud iti kinapudno.”

Maysa nga agsapa ti Sabado iti isla ti Saipan, ipapaima ni Bernie ti kabaruan a kopia Ti Pagwanawanan. “Nabasak daytan,” kinuna ti nanglukat iti ridaw a ni Bernadette a maysa nga estudiante iti kolehio. Nasdaaw ni Bernie no kasano a nabasanan dagitoy baro a magasin. Nangiruar iti sabali a magasin iti bagna. “Nabasak pay daytan,” kinuna ni Bernadette. Dinamag ni Bernie: “Nakabasaam? Maysaka kadi a Saksi ni Jehova a nagbakasion ditoy?” Imbaga ni Bernadette a saan a Saksi ngem nabasana dagiti magasin iti Internet. Maysa nga aldaw, agbirbirok iti impormasion iti Internet maipapan kadagiti sabong. Nangi-type iti sao a “rosas” ket nasdaaw iti maysa kadagiti nagparang a resulta: “Dagiti Makaay-ayo a Rosas Manipud Africa.” Artikulo dayta iti Agriingkayo! a naitampok iti Web site dagiti Saksi ni Jehova. Imbaga ni Bernadette a nagustuanna unay ti artikulo isu a linuktanna ti dadduma pay a linaon ti Web site. Idi damo, puro mulmula ken animal ti binasbasana ngem idi agangay, natakuatanna dagiti makapainteres a banag maipapan iti Biblia. Nadlaw ni Bernie nga interesado ni Bernadette isu nga intukonna ti libre a panagadal iti Biblia. Idi nagsubli, nangitugot iti libro nga Ania a Talaga ti Isursuro ti Biblia? Iti maikatlo nga isasarungkar ni Bernie, inadaldan ti kapitulo 1 ti libro. Awan pay makatawen, nabautisaran ni Bernadette idi Nobiembre 2012. Alisto ti panagrang-ayna isu a kunkuna dagiti gagayyemna a nagbiit a nagbalin a Saksi. Talaga a ti Web site ti nangpapartak iti buelona.