Panangasaba ken Panangisuro iti Sangalubongan

AFRICA

PAGILIAN 57

POPULASION 848,582,269

AGIBUMBUNANNAG 1,122,493

PANANGYADAL ITI BIBLIA 2,202,217

Rwanda

Bayat ti panagawidna manipud eskuelaan, maysa a balasitang nga agtawen iti siam ti nakasarak iti bassit a bag a naglaon iti dakkel a kantidad. Yantangay ti pamiliana ket makipagad-adalen iti Biblia kadagiti Saksi, inkeddengda nga iyaplikar ti nasursuroda iti Biblia. Isu a binirokda ti makinkukua ket insublida ti kuarta. Ti makinkukua iti kuarta insaludsodna iti balasitang, “No ikkanka iti kuarta gapu ta mapagpiaranka, ania ti aramidem iti dayta?”

“Igatangko iti Biblia,” kinuna ti balasitang.

Gapu ta nasdaaw, kinuna ti lalaki, “Pagarupko no gumatangka iti kawes ken sapatosmo gapu ta daanen dagita kawesmo.” Ngem kinuna ti balasitang a kaykayatna latta ti Biblia. Kayat ti lalaki a maammuan no apay a dida indulin ti kuarta. Idi naammuanna a makipagad-adalda iti Biblia kadagiti Saksi ni Jehova, gimmatang ti lalaki iti dua a Biblia. Intedna iti balasitang ti maysa ket maysa met ti para iti pamiliana. Kiniddawna pay a sumarungkar kadakuada dagiti Saksi tapno mayadalanda met iti Biblia. Nagsayaat ita ti naespirituan nga irarang-ay dagitoy dua a pamilia.

Republika ti Sentral Africa

Babaen iti tulong ni Jehova, naparmek ni Theodora ti nakaro a kinamanagbabainna. Nupay napadakkel iti Kristiano a sangakabbalayan, manmano a makigimong idiay Kingdom Hall gapu iti kinamanagbabainna. Idi nangrugin a tumabuno, agtugaw nga agsolsolo, ket di pulos makisarsarita iti asinoman ken pumanaw a dagus kalpasan ti  pangserra a kanta ken kararag. Di nagbayag, kanayonen nga adda idiay Kingdom Hall ngem manmano a makipasamano kadagiti mangkablaaw kenkuana. Idi agangay, nangrugin nga agsungbat kadagiti gimong ken umasideg metten kadagiti kakabsat tapno kablaawanna ida. Dakkel a karit kenkuana ti pannakiramanna iti panangasaba ngem inkagumaanna nga inaramid dayta. Idi linalais dagiti ubbing a kaarrubana, makasarsardengen ni Theodora a mangasaba, ngem nagkararag ken Jehova ket nagkiddaw iti pammabileg. Ita, maysan a bautisado a kabsat, agserserbi kas auxiliary pioneer ken nagsayaat dagiti komentona kadagiti gimong. Adda met uppat nga iyad-adalanna iti Biblia, agraman ti maysa a kaarrubana a manglalais idi kenkuana.

Madagascar

Maysa a manangaywan iti sirkito ken ni baketna ti agbibiahe idi a mapan iti kongregasion iti away. Iti dalanda, nasabetda ti maysa a grupo dagiti agtatakaw iti baka a nagtagiarmas iti wasay ken pika. Kalpasan ti siuulimek a panagkararagna tapno maaddaan iti tured, intukon ti asawa ti manangaywan iti sirkito ti polieto a Biag iti Maysa a Natalna a Baro a Lubong. Kinunana: “Ita, agbibiagtayo a mabutbuteng. Nupay kasta, din agbayag dadaelento ti Dios dagiti nadangkes ken ipasdekna ti maysa a baro a lubong a sadiay agarinto ti talna.” Dimngeg a naimbag ti maysa kadagiti lallaki ket inawatna ti polieto.

Iti maysa nga asamblea makatawen kalpasanna, adda immasideg kenkuana a lalaki ket dinamagna no mabigbigna. Impalagip ti lalaki nga isu ti maysa kadagiti agtatakaw a nasabetda iti napitak a kalsada ken isu ti immawat iti polieto. Inlawlawagna: “Idi nasabetdakami kalkalpasmi a rimmaut. Ti imbagam ti namagpanunot kaniak. Kinunak iti bagik: ‘Saankami a mabuteng iti polis ken dagiti soldado agsipud ta malibasanmi ida. Ngem kasano a malisiak ti Dios inton dadaelenna dagiti nadangkes?’ Isu nga inkeddengko nga ammuen ti ad-adu pay. Idi nakaawidak, binisitak ti kaarrubak a makipagad-adal idi iti Biblia iti maysa nga special pioneer. Nagpayadalak  met iti Biblia kenkuana, ket ita agbautisarakon iti daytoy nga asamblea.”

Mozambique

Idi 1992, ni Madalena, nga agtawen iti nasurok la bassit a 30, naaksidente iti lugan isu a nabaldado ti kagudua ti bagina. Kalpasan ti aksidente, manmanon a rummuar iti pagtaengan. Tallo a tawen kalpasanna, adda dagiti Saksi a nakasarita ni tatangna iti ruar ti balayda. Ni tatangna ti pangulo idi ti maysa a tradisional a narelihiosuan a grupo nga agtataripnong iti likudan ti balayda. Dumdumngeg idi ni Madalena ket idi dinamag dagiti kakabsat ti kasasaadna, pinastrekna ida. Kasta unay ti pannakatignay ni Madalena iti napasnek nga interesda kenkuana! Inawatna ti panagadal iti Biblia ket interesado unay iti naammuanna. Gapu ta nakita dagiti Saksi ti panagreggetna, tinulonganda iti adu a praktikal a pamay-an agraman ti itatabunona kadagiti gimong. Gapu iti dayta, natulongan ni Madalena a mangisimbolo iti dedikasionna ken Jehova idi 2002.

Natukay unay dagiti nagannak ni Madalena iti pannakaseknan dagiti Saksi iti balasangda. Rinugian ni nanangna ti  tumabuno kadagiti gimong ket binaybay-annan ti relihion ni lakayna. Idi damo, imbaga ti tatang ni Madalena a dinanto pulos baybay-an ti relihionna, ngem idi agangay rinugianna metten ti makigimong. Pilpiliten dagiti pasurotna nga agsardeng, nangruna ta isu ti panguloda! Nupay kasta, inkeddengna a panawan ti relihionna, ket pinuoranna amin a narelihiosuan nga alikamenna. Idi 2007, nabautisaranda nga agassawa. Nagsayaat ti naespirituan a kasasaad ti intero a pamilia.

Zimbabwe

Ni Decibel, nga agtawen iti siam, kaskasabaanna dagiti kaeskuelaan ken mannursurona. Naminsan, nadlaw ni Decibel a naliday ti maestrana, isu nga inasitgan ken dinamagna no ania ti makagapu. Imbaga ti maestrana a natay ti anak ni manangna. Inkari ni Decibel nga ikkannanto ti maestra iti mangliwliwa kenkuana. Nangala ni Decibel manipud kadagiti dadakkelna iti broshur a No Adda Matay nga Ay-ayatenyo ket intugotna kabigatanna. Binasa ti maestra ti sumagmamano a parapo ti broshur ket nakasangit iti ragsakna. Kalpasanna, nagsurat kadagiti dadakkel ni Decibel nga agyamyaman kadakuada gapu iti panangsanayda iti balasangda ken iti panangliwliwa ni Decibel kenkuana iti tiempo ti panagladingitna.

Ghana

Makipagnanaed ni Abigail iti Presbiteriano a lolo ken lolana idiay makin-abagatan a Ghana, ket naisuro kenkuana nga ulbod a mammadto dagiti Saksi ni Jehova. Idi naammuanna a makipagad-adal kadagiti Saksi ni Jehova dagiti dadakkelna, nga agnanaed iti sabali a paset ti pagilian, nariribukan ket nagsurat tapno allukoyenna ida nga isardengda ti makipagadal kadagiti Saksi. Gapu ta nagtultuloy latta ti panagadal dagiti dadakkelna, nagbiahe iti 1,000 a kilometro tapno kasaritana ida. Nasdaaw ni Abigail a makaammo manipud iti mismo a Bibliana a ti impierno ket saan a maysa a lugar a pakatutuokan dagiti nadangkes. Ni Abigail ket nangrugi a nagadal iti Biblia ken tumabuno kadagiti gimong idiay Kingdom Hall a kadua dagiti dadakkelna ket idi agangay, nagbalin a di bautisado nga agibumbunannag. Nabautisaran ni Abigail iti nabiit pay nga asamblea sirkito.

 DAGITI PAGILIAN TI AMERICA

PAGILIAN 55

POPULASION 898,130,531

AGIBUMBUNANNAG 3,449,038

PANANGYADAL ITI BIBLIA 3,548,101

Dominica

Iti daytoy nga isla, adu a babbai ti aglablaba iti igid ti karayan, sada ibilag dagiti linabaanda iti rabaw dagiti dadakkel a bato. Nadlaw ti maysa a babai nga adda tumtumpaw iti ababaw a danum iti asideg ti paglablabaanna. Nailasinna a dayta ti publikasion nga us-usaren ti maysa a Saksi ni Jehova a mangyad-adal kenkuana iti linawas. Imbilagna dayta iti asideg a bato tapno mamagaan, sana intuloy ti naglaba.

Idi malemen ken inakasnan dagiti linabaanna, nalipatanna ti libro. Ngem dagiti agaw-awid a mangngalap a naggapu iti baybay nakitada ti bimmalitok ti kolorna a libro, ket maysa kadakuada ti nangpidut iti dayta. Nagustuan ti mangngalap ti paulo nga Ania a Talaga ti Isursuro ti Biblia? isu a binasana dayta. Kalpasanna, bayat ti panangasabada iti purok, dua a babbai a payunir ti immasideg kenkuana. Inlawlawagna kadakuada a 144,000 laeng ti mapan idiay langit ken naipasdeken ti Pagarian ti Dios idi 1914. Imbagana pay a ti daga ket asidegen nga agbalin a paraiso. Idi dinamag dagiti payunir kenkuana no kasano a naammuanna dagitoy a banag, dinakamatna nga adda nasarakanna a libro, ket imbagana nga inaldaw a basbasaenna dayta. Impakitana kadakuada ti libro​—namagaanen ngem pimmuskol.

Ammo ti maysa kadagiti payunir a dayta ti libro a napidut ti estudiantena iti karayan. Nairugi ti panagadal iti Biblia iti mangngalap. Kada lawas, segseggaanna ti panagadal ket nagsayaat ti panagrang-ayna.

 Bolivia

Agpadpada a makakarit ken makapnek ti panangasaba iti Amazon a rehion iti Bolivia. Maysa a grupo ti sangapulo a payunir a lallaki ken babbai​—a naglilinnetlet iti de-motor a bassit a bilog a nagkarga kadagiti tolda, paglutuan, ken adu a kinahon a Biblia ken literatura​—ti naglayag iti agarup 800 a kilometro iti Karayan Beni manipud Rurrenabaque agingga iti Riberalta. Nangasabada iti nasurok a 70 a naiputputong a komunidad ken nakaipaimada iti 800 a libro agraman dagiti broshur ken polieto. Nakaidemostrada iti agarup 700 a panangyadal iti Biblia ket 200 kadagita ti sinublianda tapno mayadalan iti Biblia. Idi pumanawen dagiti Saksi iti purok, masansan a kunaen dagiti tattao kadakuada, “Mabalin kadi nga agtalinaedkay pay biit tapno iyadalandakami?” Iti maysa a bassit nga ili, maysa a lalaki ti nangipapilit nga agtalinaedda pay ken masuron idi agawiden dagiti Saksi gapu ta kayatna ti agtultuloy a makipagadal iti Biblia kadakuada. Kinunana: “No rinugianyo ti maysa a napateg a banag, turposenyo koma dayta.”

Canada

Iti adu a tawen, nagtrabaho ni Normand iti maysa a pagrunawan iti metal a masarakan idiay Montreal. Bayat ti panaginanana iti kapeteria, kanayon a basaenna ti bokleta a Panangsukimat  Kadagiti Kasuratan iti Inaldaw. Nakita dagiti katrabahuanna a basbasaenna dayta, ket dadduma ti nangawat iti awisna a pagsasaritaanda ti inaldaw a teksto. Bayat dagitoy nga ababa a panagsasarita, inkagumaan ni Normand nga inyaplikar a nangnangruna ti teksto iti biag ti pamilia ken iti relasion iti pada a tao. Maysa a mangimatmaton ti nakiraman met iti panagsasarita ket idi agangay inayabanna ni Normand iti opisinana tapno komendaranna. Imbagana a dayta a panagsasarita ket adda naimbag nga epektona iti biag dagiti empleado ken mangpasayaat iti panaglalangenda.

Idi nasuroken a 30 ti tumabtabuno, kiniddaw dagiti mangimatmaton a mangorganisar ni Normand kadagiti babbabassit a grupo iti nagduduma a paset ti pagtrabahuan. Kinuna ni Normand: “Iti agdama, inaldaw a tallo a grupo ti idadauluak iti panagteksto, nga awagan dagiti katrabahuak iti inaldaw a palagip. Maragragsakanda kadagitoy a panagsasarita ta no awanak, maysa kadakuada ti mangidaulo. Inton agsubliak, saludsodenda kaniak ti saanda a naawatan.” Iti naglabas a lima a tawen, natulongan ni Normand dagiti katrabahuanna a mangmennamenna iti maysa a teksto iti Biblia iti inaldaw. Nagbanaganna, nasurok nga 40 kadagiti katrabahuanna ken dagiti pamiliada ti immawat iti kinapudno.

Barbados

Ni Sister Barker, nga agtawenen iti 89, kayatna ti makairugi iti panangyadal iti Biblia. Gapu iti kasasaadna, saanen a makapagbalaybalay, isu a pinadasna ti nangasaba babaen iti telepono​—ngem di nagballigi. Gapu ta naparegta iti maysa a paset ti gimong maipapan iti panagkararag, nagkiddaw iti tulong ni Jehova tapno makairugi iti panangyadal iti Biblia. Sumagmamano nga aldaw kalpasanna, innalana ti Biblia ken dagiti magasinna ket nagtakder iti sango ti balayna buyogen ti determinasion a mangasaba iti asinoman, nupay manmano laeng dagiti lumablabas. Intukonna dagiti magasin iti maysa a lalaki nga agawid a naggapu iti trabaho. Makalawas kalpasanna, bayat ti kaaddana manen iti sango ti balayna, nakitana manen ti lalaki. Gapu ta nangipakita ti lalaki iti interes kadagiti magasin a naipaima kenkuana, intukon  ni Sister Barker ti libro nga Isursuro ti Biblia ken inawisna nga agadal iti Biblia. Inawat ti lalaki ti tukon ket kasta unay ti ragsak ni Sister Barker. Nangrugi nga iyadalanna ti lalaki idi arinunos ti Marso 2008. Idi agangay, naammuanna nga asideg laeng ti pagnanaedan ti lalaki manipud iti balayna. Sumagmamano a lawas ti napalabas, nangrugin ti lalaki a tumabuno kadagiti gimong. Kinuna ni Sister Barker, “Ammok a sungbatan ni Jehova dagiti kararag, ngem diak impagarup a kasta ti kabiitna!”

Chile

Idi a maysa a kabsat a babai a payunir idiay Santiago ti dimsaag iti taksi iti ili a teritoriana, nalipatanna ti folder ti magasinna iti makinlikud a tugaw. Naglaon ti folder iti sumagmamano a magasin agraman ti kopia Ti Ministeriotayo iti Pagarian, a nakaisuratan ti nagan ti kabsat. Dua nga aldaw kalpasanna, ti drayber ti taksi natuntonna ti makinkukua iti folder babaen iti nakasurat a nagan ti kabsat ken iti tulong ti dadduma a Saksi a nakitana a mangaskasaba iti dayta a lugar. Idi insubli ti drayber ti folder iti payunir, ti laengen kopiana a Ministeriotayo iti Pagarian ti nabati. Awanen dagiti magasin. Nagpadispensar ti drayber, nga inlawlawagna a sumagmamano a pasahero ti nangukag kadagiti magasin ket kiniddawda no mabalin a dawatenda ti maysa. Isu a naiwaras amin dagiti magasin iti uneg ti maysa laeng nga aldaw uray awan ti nangipaima kadagita!

Nicaragua

Ni Ernesto, a maysa idi a kapitan ti naisangsangayan a tropa ti militar, ket agnanaed iti bassit nga ili iti asideg  ti kosta ti Caribe. Ni Jairo, maysa nga special pioneer a naggapu iti sabali a paset ti pagilian tapno mangasaba sadiay, nasarakanna ni Ernesto bayat ti panagbalaybalayna ket intukonna ken Ernesto ti panagadal iti Biblia. Nupay nagkedked daytoy dati a soldado, intultuloy ni Jairo ti simmarungkar, ket idi agangay, inawat ni Ernesto ti panagadal. Bayat ti panagtungtongda, impalgak ni Jairo a ni tatangna ti komander idi ti buyot a makilablaban kadagiti tropa ti gobierno a naipasdek babaen ti rebolusion. Natay ni tatangna bayat ti panaglalaban iti kabangibang a lugar. Intultuloy ni Ernesto ti panagadalna ket nangrugi nga umuneg ti pannakaammona, ngem kabayatan dayta, maysa a sekreto ti dina imbagbaga ken Jairo. Idi agangay, buyogen ti nakaro a ladingitna, impudno ni Ernesto nga isu idi ti komander ti armada a nangkautibo iti tatang ni Jairo, ket isu a mismo ti nangpapatay ken tatangna. Siempre, nakigtot ni Jairo, ngem ammona nga agpayso dayta agsipud ta dagiti nakaam-amak a detalye nga insalaysay ni Ernesto ket maitunos iti imbaga idi kenkuana dagiti soldado a kakadua ni tatangna. Impagarup ni Ernesto nga agpatingga idin ti panaggayyemda. Ngem imbes a kinagura ni Jairo ti estudiantena, intultuloyna nga inyadalan ni Ernesto. Rimmang-ay ni Ernesto iti naespirituan ket nagpabautisar a kadua ni baketna. Agingga ita, aggayem pay laeng da Ernesto ken Jairo.

Venezuela

Iti laud ti pagilian, dagiti kakabsat manipud iti ili ti Machiques nangasabada kadagiti katutubo iti manmano a makasabaan a teritoria iti asideg ti beddeng ti Colombia. Dimngeg ti amin nga umili! Impalubos ti pangulo iti komunidad dagiti Yukpa a maaramid ti Memorial iti damo a gundaway iti daytoy a lugar. Nagipabulod dagiti kaarruba ken ti eskuelaan sadiay kadagiti tugaw, ket nasurok a 200 ti timmabuno. Kalpasan ti Memorial, nagbitla ti pangulo maigapu iti komunidad: “Kayatmi ti agyaman kadakayo a Saksi ni Jehova. Namnamaenmi a saan a daytoy ti maudi nga iyaayyo. Kinapudno ti isursuroyo kadakami, isu a kanayon a pasangbayendakayo!” Nasurok a 50 itan ti linawas nga agpapayadal iti Biblia.

 ASIA KEN TI MAKINTENGNGA A DAYA

PAGILIAN 47

POPULASION 4,026,656,360

AGIBUMBUNANNAG 618,088

PANANGYADAL ITI BIBLIA 538,957

Taiwan

Insurat ti maysa a kabsat a babai: “Adda kabsatko iti ama a diak pay pulos nakitkita. Ngamin, agnanaedda a sangapamiliaan iti adayo unay a lugar ket kasla imposible ti mapan sadiay. Isu a maragsakanak a makakita kenkuana idi a naammuanmi nga ikagumaan ni manong ken ti pamiliana ti bumisita kadakami. Siempre, maragsakan met ni tatangko ken ti dadduma a miembro ti pamiliami. Awan ti Saksi iti lugar a pagnanaedanda, ket namnamaek nga awatenda ti naimbag a damag. Anian a ragsakko idi naginteres iti Biblia ti ipagko ken ti balasangna! Ngem kasano a matulongak ida a makaammo iti ad-adu pay maipapan kadagiti panggep ni Jehova inton agawiddan iti naiputputong a pagtaenganda? Naammuak nga adda kompiuterda a naikonektar iti Internet. Gapuna, gimmatangkami ken lakayko iti Webcam, ket idi nakaawiddan, inusarmi dayta iti kompiuter a naikonekta iti internet tapno makasarita ken makitami ida bayat nga intultuloymi ti panangyadalmi kadakuada iti Biblia. Diak ninamnama nga epektibo gayam daytoy a pamay-an ti panangyadal. Makitkitami ti reaksionda bayat a basbasaenda ti mismo a Bibliada ken ti libro nga ad-adalenmi. Iti kasta, ammok ti masinunuo nga aramidek tapno matulongak ida. Naimbag laengen ta adda kastoy a teknolohia, ket mabalin a mairanudmi ti kinapudno uray kadagiti kabagianmi a saanmi a madanon gapu iti kinaadayoda.”

 Nepal

Ni Purnamaya, nga agtawen iti 16 ket agnanaed iti bassit nga ili idiay Nepal. Kinasabaan ti ulitegna ket nairugi ti panagadal. Ita, regular a makigimgimongen maminsan iti kada lawas, nupay dua ket kagudua nga oras nga agbiahe a mapan idiay Kingdom Hall. Narigat dayta para kenkuana. Agkukutel ti tatang ken nanangna, isu a nakapangpanglawda. Parbangon pay laeng, agrumek ni Purnamaya kadagiti bato a pagbalinenna a graba tapno makatulong kadagiti gastosen ti pamiliana, malaksid kadagiti obrana iti balay a kas iti panagluto ken panaglaba. Mapan pay ageskuela. Katupag ti maysa nga aldaw a sueldo ti pletena a mapan makigimong. No dadduma, paregtaen dagiti dadakkelna a mapan laengen iti simbaan iti ilida. Ngem ammo ni Purnamaya nga idiay laeng Kingdom Hall a maammuanna ti maipapan ken Jehova, isu nga ikagkagumaanna ti makigimong. Iti nabiit pay, kasapulan nga ilakona ti relona a regalo ni lolana tapno makatabuno. Malaksid iti panagkomentona a naimbag kadagiti gimong iranudna met ti naammuanna kadagiti kailianna. Maparparegta ni Purnamaya ti amin a makaam-ammo kenkuana.

Malaysia

Idi a ti Malaysia ket kolonia pay ti Britania, rinibribu a trabahador ti naipan sadiay tapno agtrabaho kadagiti plantasion ti goma. Nagnaedda kadagiti purok a masakupan ti plantasion, ket adu kadagiti purok ti adda  pay laeng agingga ita. Adu kadagitoy a purok ti narigat a madanon ken saan a makita iti mapa. Bayat ti panangasabada iti lugar nga awan pay ti makinteritoria, maysa a kongregasion ti nakasarak iti maysa a purok iti plantasion ti goma. Dua a babbaro, a nakagun-od idin kadagiti magasin, ti naginteres unay iti panangasaba dagiti kakabsat. Inasitganda dagiti kakabsat ket intukonda nga isuroda ti dalan a mapan iti dadduma a purok. Kabesado dagitoy a babbaro ti teritoria, ngem di ammo dagiti kakabsat. Nagmotorsikloda ket inturongda dagiti lugan ti kakabsat. Limmasatda kadagiti napitak a desdes ken di sementado a kalsada, ket agingga iti 45 a minutos a nagbiaheda iti nagbabaetan dagiti purok. Inturongda dagiti kakabsat kadagiti plantasion a saan pay a nadandanon dagiti Saksi. Bayat a nangasaba dagiti kakabsat, dagiti dua a babbaro pinaregtada dagiti pumurok a mangala ken mangbasa kadagiti magasin. Tallo a naiputputong a purok ti nangituronganda kadagiti kakabsat. Gapu iti naayat a tulong dagitoy a babbaro, nakasabaan dagiti tattao a di pay pulos nakangngeg iti naimbag a damag. Iti ngudo ti lawas, nasurok a 5,000 a magasin ti naipaima dagiti 50 nga agibumbunannag ti kongregasion.

 EUROPA

PAGILIAN 47

POPULASION 733,775,190

AGIBUMBUNANNAG 1,542,507

PANANGYADAL ITI BIBLIA 789,219

Russia

Agsagsagaba ni Tatyana iti kanser ti utek. Kalpasan ti serioso nga operasion sumagmamano a tawen ti napalabasen, naikabil ni Tatyana iti maysa a kuarto nga ayan dagiti pasiente a bassit ti namnamadan a maimbagan. Bimmisita ti padi ti Orthodox iti dayta a kuarto tapno makapagkompesar dagiti pasiente kadagiti basolda sakbay a matayda. Nadlaw ni Tatyana nga inkarigatan ti maysa a babai ti nangyawat iti kuarta iti padi. Idi nakapanawen ti padi, dinamag ni Tatyana iti babai no simmayaat ti riknana. “Saan, awan a pulos ti naawatak iti imbagana,” maup-upay a kinuna ti babai. Kalpasanna, inranud ni Tatyana kenkuana ti naimbag a damag maipapan iti namnama a panagungar. Nagyaman ti babai ket kinunana, “Ita, nasaysayaaten ti riknak!” Nadamag ti manedyer iti klinika ti napasamak ket imbagana iti padi a saanen a bumisita. Ngem inkabilna ni Tatyana iti sabali a kuarto tapno makasaritana pay ti sabsabali. Dinamag met ti manedyer iti klinika no sadino ti paggimgimongan dagiti Saksi ni Jehova. Sakbay a maospital, kiniddaw ni Tatyana ken Jehova nga ikkanna koma iti bileg nga agtultuloy a mangasaba. Mamati a sinungbatan ni Jehova ti kararagna. Iti dayta a bulan, nakaireport ni Tatyana iti nasurok a 100 nga oras! Nupay kimmaron ti kasasaadna sipud idi ken saanen a makapanaw iti pagtaenganna, agtultuloy a bumisbisita kenkuana dagidiay nakasabaanna bayat ti masansan nga ipapanna iti ospital.

Georgia

Dua a babbai a temporario nga special pioneer ti natudingan nga agserbi iti lugar nga awan ti agnanaed a Saksi ni Jehova. Idi pinasiarda ti baro a teritoriada, nayaw-awanda. Bayat  a lumaslasatda iti pagattumeng a niebe a mangbirbirok iti dalanda nga agawid, nabannog ken malammindan. Kamaudiananna, nakakitada kadagiti tugot nga agturong iti maysa a balay ket nagpukkawda. Ni Khatuna, a maysa nga agtutubo a babai, nangngegna ti pukkawda ket rimmuar manipud iti nabakudan nga arubayan ti balay sa dagus nga inawisna ida a sumrek iti uneg ti naimeng a balay, isu a nagyamanda. Idi naammuanna a Saksi ni Jehova dagiti dua, inlawlawag ni Khatuna a kabayatan ti oras a pannakayaw-awan dagiti kakabsat iti kaniebian, agkarkararag met ni Khatuna ken ti pamiliana a kidkiddawenda iti Dios nga ipakitana kadakuada ti kinapudno. Sumagmamano a minuto laeng ti napalabas idi immasideg ti dua a payunir iti balayda. Imbaga ni Khatuna a talaga a dayta ti sungbat ti kararagda! Ita, uppat kadakuadan iti pamilia ti agad-adalen iti Biblia ket di bautisadon nga agibumbunannag ni Khatuna ken ti katuganganna.

Britania

Inkeddeng ni Reston a padasen ti direkta a panangitukon iti panagadal iti Biblia, a dina pay pulos idi pinadpadas. Sakbay a nagtuktok iti umuna a ruangan, nagkararag biit ken Jehova a tulonganna nga agbalin a positibo. Kalpasanna, direkta nga intukonna ti panagadal iti Biblia iti bumalay a ni Andy, a nangawat a dagus iti dayta. Determinado ni Reston a mangipan iti libro nga Ania a Talaga ti Isursuro ti Biblia? iti kamalmanna. Idi nakaluganen iti bus iti panagsublina, nadlaw ni Reston a ti drayber ket daydiay kanayon nga ik-ikkanna iti kopia ti Pagwanawanan ken Agriingkayo! Gapu ta inawat ni Andy ti panagadal iti dayta nga agsapa, inkeddengna nga itukon iti drayber ti libre a panagadal iti Biblia apaman a makadanon ti bus iti destinasionna.

Kabayatanna, maysa a baket a pasahero ti nakabigbig ken Reston kas maysa a Saksi ket kiniddawna a bisitaen ni Reston ti masakit a gayyemna tapno ikararaganna. Imbaga ni Reston a maragsakan a bumisita iti gayyem ti baket tapno makaipaay iti liwliwa manipud iti Biblia. Inusarna ti kakaisuna nga awitna a libro nga Isursuro ti Biblia tapno ipakitana iti baket a pasahero no kasano a makatulong ti panagadal iti Biblia. Imbaga met ti  baket a kayatna ti mayadalan. Maysa nga agtutubo a lalaki a nakatugaw iti batogda ti dumdumngeg iti panagsaritada. Magustuanna dagiti retrato iti libro, isu nga inted ni Reston ti libro kenkuana. Idi dimteng ti bus iti destinasionna, intukon ni Reston ti libre a panagadal iti Biblia iti drayber. Nasdaaw ni Reston idi sidadaan nga inawat ti drayber ti panagadal ket imbagana nga adu ti saludsodna maipapan iti Biblia. Dagus a napan ni Reston iti balay ti maysa a kabsat iti asideg tapno mangala iti kopia ti libro nga Isursuro ti Biblia ket rabiin idi makasangpet iti balay ni Andy. Innala a dagus ni Andy ti libro. Nairugi ti panagadal, ket di nagbayag iyap-aplikaren ni Andy ti naadalna. Makigimgimongen ni Andy ken ti drayber ti bus, ken adda itan 15 nga iyad-adalan ni Reston, a nangrugi amin iti direkta a panangitukon iti panagadal. Ita, kada mangasaba, kanayonen a siguraduen ni Reston nga adda awitna a sumagmamano a kopia ti libro nga Isursuro ti Biblia.

Da François ken Monica, agraman ti dua nga annakda, agsublida koman iti kotseda kalpasan ti panangasabada iti agsapa. Nupay kasta, ni Shaé, a dua ket kagudua ti tawenna nga  anakda a babai dina kayat ti lumugan agingga a dina maipaima ti nabatbati a polietona. Apag-isu met nga adda kotse a simmardeng iti ballasiw ti kalsada, ket rimmuar ti dua a babbai. Maysa kadakuada ti siraragsak nga inikkan ni Shaé iti polieto a Biag iti Maysa a Natalna a Baro a Lubong, ket inlawlawag ni Monica no ania ti linaon ti polieto. Imbaga ti babai nga agnagan iti Sierra a kayatna a maammuan ti ad-adu pay isu nga inawisna ni Monica a sumarungkar iti pagtaenganna tapno iyadalanna ti dua a tin-edyer a kabsatna a babbai. Iti umuna a panagadal, dinamag ni Sierra no mabalin met nga iyadalan ni Monica ti dua nga annakna a lallaki. Idi agangay, nakipagadal met ti lalaki a kaanakan ni Sierra. Nakikadua ni Sierra kadagitoy amin a panagadal ket adu ti sinaludsodna. Kamaudiananna, immanamong met ni Sierra a mayadalan iti Biblia. Kalpasanna, nagpayadal met ni lakayna. Simmaganad, nagpayadal met ti Nanang ni Sierra, sa kalpasanna, ti dadduma pay a miembro ti pamilia agraman dagiti gagayyemda. Ti determinasion ni Shaé a mangipaima iti maudi a polietona nagresulta iti 11 a panangyadal iti Biblia. Uppat kadagiti mayad-adalan ti regular itan a makigimgimong.

Italia

Naikameng ni Jennifer iti Ruso a Kongregasion idiay Milan. Namin-anon a nakasaritana iti telepono ti maysa a babai nga Ukranio nga agnagan iti Valentina, ngem dida pay pulos nagkitkita. Naminsan, nagtulagda nga agsinnarak iti estasion ti subway. Tapno adda pagilasinan ni Jennifer kenkuana, imbaga ni Valentina a nalabaga a jacket ti isuotna. Idi dimteng ni Jennifer iti estasion, nakakita iti babai a naka-jacket iti nalabaga ken madlaw  nga adda sapsapulenna. Inasitgan ni Jennifer ti babai ket insaludsodna, “Komusta, sika kadi ni Valentina?” Idi kinuna ti babai nga isu ni Valentina, intuloy ni Jennifer, “Siak ni Jennifer.” Ngem saan a naguni ti babai. Gapu ta mariro, dinamag ni Jennifer, “Saan aya a siak ti ur-urayem?”

“Saan,” insungbat ti babai. Agpayso a ti babai ket Ukranio, Valentina ti naganna, ken naka-jacket iti nalabaga; ngem adda sabali nga ur-urayenna! Nagkatawa ni Jennifer ket inlawlawagna ti kasasaad. Imbagana pay iti babai a kayatna met nga iranud kenkuana ti maysa a topiko iti Biblia, nga insaganana para iti kinatulagna a Valentina. Immannugot ti babai ken sipapasnek a nagimdeng. Kalpasanna, impakitana ken Jennifer ti papel a nangisuratanna iti Salmo 91, nga inlawlawagna a kaay-ayona ti Biblia. Rinugian ni Jennifer nga iyadal ti Biblia kenkuana. Ket ti ngay kinatulagna a Valentina? Idi agangay, nagkitada met laeng ken Jennifer, ket nangrugi met a nakipagadal iti Biblia.

Romania

Maysa a kabsat a lalaki ti simmarungkar iti am-ammona ket inranudna dagiti Nainkasuratan a bambanag kadakuada nga agassawa. Interesadoda unay a makangngeg iti isursuro ti Biblia maipapan iti relasion ti agassawa, ngem dida maiwayaan a pagsaritaan ti ibagbaga ti Biblia. Pagay-ayat ti agassawa ti nasalun-at a wagas ti biag, ket inaldaw nga ag-jogging ti lalaki iti walo a kilometro. Kalpasan ti sumagmamano a panangikagumaan a mangituloy iti panagsasarita maipapan iti Kasuratan, inkeddeng ti kabsat a damagen no kayat ti lalaki nga agkuyogda nga ag-jogging. Siraragsak nga immannugot ti lalaki. Ngem saan a nasanay ti kabsat ket di nagbayag nariknana a makabannog ti mangasaba nga agtartaray! “Naikagumaak ti mangasaba a nakasuot iti pagay-ayam ken awan ti iggemko a Biblia, nga adawek laeng dagiti bersikulo a naikabesak,” kinuna ti kabsat. Kalpasan ti sumagmamano a panag-jogging, simmayaat ti interes ti agassawa, ket nairugi ti regular a panagadal iti Biblia kadakuada. Ti lalaki ket maysa itan a di bautisado nga agibumbunannag. Naregta a mangasaba ken nagpasalistan iti Teokratiko nga Eskuelaan ti Panagministro agraman ti baro ken ti balasangna.

 OCEANIA

PAGILIAN 30

POPULASION 37,545,115

AGIBUMBUNANNAG 97,329

PANANGYADAL ITI BIBLIA 55,266

Australia

Insurat ti maysa a kabsat a lalaki a payunir: “Maysa a doktora nga agnagan iti Pam ti nagkiddaw a kanayon a mapanko ikkan iti kaudian a ruar dagiti magasin. Okupado unay ket maminsan laeng nga agkitakami iti innem a bulan, isu a kanayon nga ibatik dagiti magasin iti sirok ti ridawna ken mangibatiak iti nainggayyeman a surat. Kalpasan ti pito a bulan a pinadasko ti makipagkita kenkuana, imbatik dagiti magasin iti sirok ti ridawna agraman ti imbitasion iti asidegen a kombension distrito. Imbatik met ti numero ti teleponok ngem saan a pulos nga immawag. Idi Nobiembre, kalpasan ti kombension, simmarungkarak manen ket adda naibati a surat ni Pam iti ridaw.

“Insurat ni Pam a pagay-ayatna dagiti magasin ket ipaspasana dagita kadagiti katrabahuanna. Ipasada met dayta kadagiti pasienteda iti ospital. Kalpasanna, imbagana a nagustuanna ti ‘panaglalangen.’ Nabasana ti imbitasion iti kombension ket nagbakasion iti tallo nga aldaw tapno makatabuno. Inlawlawagna nga impa-xerox-na ti imbitasion ket nangikabil kadagiti kopia iti pagikkan ti surat dagiti katrabahona agraman ti maysa a surat a mangibagbaga nga umawagda kenkuana no interesadoda a tumabuno. Iti ngudo ti lawas, 16 a katrabahona a bin-ig a doktor ti nagbakasion met iti tallo nga aldaw tapno makatabunoda. Amin dagitoy a 17 nga interesado tinabunuanda ti tallo nga aldaw a kombension kas resulta ti maysa nga imbitasion a naibati iti sirok ti ridaw! Regular itan a mayad-adalan ni Pam iti libro nga Isursuro ti Biblia ken nangorganisar  iti grupo a panagsasarita kadagiti amin a kakaduana a timmabuno iti kombension.”

Insalaysay ti maysa pay a kabsat a lalaki: “Idi lumablabasak iti balay a sadiay adda nangibaga a dida kayat a sumarungkar kadakuada dagiti Saksi, nadlawko nga agsangsangit ken maup-upay ti agassawa iti beranda. Diak kayat a labsan latta idan ta nalawag a kasapulanda ti tulong, isu nga immasidegak ket dinamagko no adda aniaman a maitulongko. Pinastrekdak dagiti agassawa ket rinugianda nga imbaga ti problemada. Tallo a tawenen a dida nakitkita ti balasangda. Dandanin agpa-opera ti asawa a babai, ket dina ammo no makalasat iti operasion. Maladingitan ta mabalin a dinanto makitan ti balasangna. Sumagmamano nga aldaw sakbayna, nagpatulongda iti pastor ti karismatik, ngem saan a nangikankano ken saan a timmulong. Nangipaayak kadagiti Nainkasuratan a kapanunotan a ni Jehova asideg kadagiti malmaldaangan.

“Kalpasan ti agarup maysa nga oras, adda nagtuktok iti ridaw. Impagarupko a ti pastor dayta. Ngem ti nakatakder iti sango ti ridaw ket maysa a nadalimanek ti panagkawkawesna nga agtutubo a babai. Isu ti balasang ti agassawa a nabayagen a dida nakitkita! Napnuan iti emosion dayta a kanito, isu nga imbagak a nasaysayaat no pumanawakon. Ngem nasdaawak idi imbaga ti balasangda a nasaysayaat a saanak pay a pumanaw ta adda ibagana kadagiti dadakkelna. Inlawlawagna a nagbarbartek ken nagdroga ket daddadaelenna idin ti biagna, ngem ti panagadalna iti Biblia ti nangtignay kenkuana nga agawid tapno makita ken makalangenna manen dagiti dadakkelna. Itay nabiit, isu ket nabautisaran kas maysa a Saksi ni Jehova.”

Sumagmamano nga aldaw kalpasanna, simmarungkar ti pastor ket imbagada kenkuana a simmangpeten ti balasangda kas resulta ti panagbalinna a Saksi ni Jehova. Rimmuar ti pastor a di nakatagari. Sakbay a nakaadayo, pinukkawan ti asawa a lalaki ket kiniddawna a pidutenna ti surat iti lamisaan​—ti surat maipapan iti panagikkatda iti relihionda.

 Papua New Guinea

Maysa a grupo dagiti 23 a kakabsat ti napan nangasaba iti manmano a makasabaan a teritoria. Narigat ti mapan sadiay ta malaksid a magmagnada, adda dagiti bantay a sang-atenda ken dagiti karayan a ballasiwenda. Iti maysa a purok, naam-ammo ti kabsat a babai ti maysa a ministro ti Anglican a maragsakan a makangngeg iti pannakailawlawag ti Daniel 2:44. Imbagana iti kabsat a babai, “Kaslakami kadagiti napukaw a karnero ditoy.” Inawat ti ministro dagiti magasin ken broshur ken nagkiddaw met iti Biblia.

Tallo nga aldaw kalpasanna, iti sabali a purok, dua a kabsat a babbai ti nakisarita iti dua nga agtutubo a babbai a maragsakan a makangngeg iti mensahe ti Pagarian. Idi nagawid ti tatang dagiti agtutubo manipud iti talonna iti dayta a malem, imbagada kenkuana ti naammuanda manipud iti Biblia. Imbaga ti tatangda a kayatna a mangngeg a mismo daytoy nagsayaat a mensahe. Inyurnosna ti makipagkita kadagiti amin a kakabsat iti kalapaw a pagnanaedanda. Tangay isu ti pangulo iti purok, nagpaluto iti taraon ket impatulodna kadagiti kakabsat. Iti rabii, dimteng a nakaawit iti lampara ken kaduana ti dadduma a pumurok. Kinunada: “Masdaawkami a makakita kadakayo, tangay daytoy ti damo a gundaway nga iyaay dagiti Saksi ni Jehova iti purokmi.” Naipakita kadakuada ti Mateo 24:14 kas rason ti isasarungkarda. Nailawlawag met kadakuada dagiti bendision ti Pagarian, ket nakaibati dagiti kakabsat iti literatura.

Iti maikalima nga aldaw ti pannagnada, simmangpet dagiti kakabsat iti maysa a purok iti agarup ala una iti malem. Gapu ta impagarupda nga umyanda, nangrugin dagiti pumurok a nangaramid iti awan didingna a kalapaw a pagdagusan dagiti kakabsat. Nupay kasta, inlawlawag dagiti kakabsat a kayatda a kasarita ti amin ket agawidda met laeng iti dayta nga aldaw. Naipaay ti nagsayaat a pammaneknek iti amin a pumurok, agraman iti pangulo, a nangawat kadagiti literatura ket inikkanna met dagiti kakabsat iti niog, saba, ken papaya.

 Fiji

Iti away, magmagna dagiti payunir kadagiti natapuk wenno napitak a kalsada a mapan mangasaba. Ni Nagamma ken ti balasangna a ni Reshma, nga agpada a regular pioneer, inawisda ni Ushla, a maysa a bulsek a kabsat a babai, a kumuyog kadakuada nga agpayunir iti makabulan. Magmagnada iti adu a kilometro iti kada aldaw bayat nga adda ni Ushla iti nagbaetanda. Bayat ti nalulem nga aldaw, maysa a pamilia a nakatugaw iti beranda ti balayda ti nakaimatang kadagiti tallo a kakabsat a babbai a magmagna iti napitak a kalsada. Nakitada ti bulsek a kabsat a nakabaddek iti pilaw ket napitakan ti gurongna. Simmardeng dagiti kakabsat tapno punasanda ti gurongna. Gapu ta masmasdaaw ti ama iti panaglabaslabas dagiti tallo a kakabsat, inayabanna  ida. Kinunana: “Inaldaw a makitkitadakayo a tallo a magmagna. Papananyo kadi?” Inlawlawagda a mapanda mangyadal iti Biblia. Kinuna ti ama a no nakapatpateg unay ti mensaheda ta masapul a magnada iti kasta a kaadayo tapno maisuroda dayta kadagiti tattao, kayatna met ngarud a mangngegan dayta! Nairugi ti panagadal iti Biblia iti daytoy a pamilia!

Guam

Maysa nga agtutubo nga agnagan Liza manipud iti Pilipinas ti nagtrabaho a kas katulong iti isla ti Tinian. Masansan a no sumarungkar dagiti Saksi ni Jehova iti balay, agkiddaw kadagiti magasin a Pagwanawanan ken Agriingkayo! Ibagbagana a magustuanna dagiti magasin, ngem iti kinapudnona, pagarunna laeng dagita.

Idi primavera iti 2007, naikkat ni Liza iti trabahona ket naturog iti aplaya tangay awanen ti pagnaedanna. Maysa nga aldaw, limmabas iti Kingdom Hall, ket adda dua a kabsat a babbai a nakatugaw iti linong iti ruar. Inawisda ni Liza a makipangan iti mangga, ket nainggayyeman a nakisarsarita kadakuada. Iti simmaganad nga aldaw, bayat a lumablabas iti Kingdom Hall, kinasarita manen dagiti kakabsat, ket bayat ti panagsasarita kinunana, “Namnamaek nga addanto aldaw a makaumayakto met iti kapiliayo.” Nupay kasla mabain dagiti kakabsat ta saanda nga inawis, pinaregtada a tumabuno iti gimong iti dayta a rabii. Inawatna ti imbitasion, a namnamaenna a makatulong kenkuana dagiti Saksi tapno makasarak iti trabaho.

Bayat ti gimong, naallukoy ni Liza iti kinapasnek dagiti kakabsat ken iti pannakaseknanda kadagiti tattao. Nakalua ni Liza, ta nabigbigna nga agimbubukodan ti panggepna a timmabuno iti gimong. Nalagipna met ti amin a magasin a pinuoranna. Gapu iti ayat nga impakita kenkuana dagiti kakabsat, natukay ti pusona ket sipud idin, tinabunuannan ti amin a gimong ken regular metten a nakipagadal iti Biblia. Nakasarak iti trabaho, nagbalin a kualipikado nga agibumbunannag, ket nabautisaran idi Pebrero 2008.

[Ladawan iti panid 45]

Ni Madalena

[Ladawan iti panid 48]

Tagtagiragsakenda ti Panagadal iti “Pagwanawanan” iti de motor a bilog

[Ladawan iti panid 50]

Ni Sister Barker a siaanus nga agur-uray tapno mangasaba kadagiti aglabas

[Ladawan iti panid 53]

Agar-aramid ni Purnamaya iti graba tapno makatulong iti pamiliana

[Ladawan iti panid 54]

Panangasaba iti babai nga Indian iti plantasion ti goma

[Ladawan iti panid 57]

Iyad-adalan ni Reston ni Andy

[Ladawan iti panid 58]

Ni Shaé

[Ladawan iti panid 63]

Da Nagamma ken Reshma bayat a kibkibinenda ni Ushla